سؤال عن الماروتى

[dooody_2007]

اللى بتنزل مصر فيها عداد رحله اللى بيتصفر( واحد بس )انالوج وصندوق التروس 4 نقلات بس ممكن تقفل بيها امبير على كده اللى هو 150 يعنى

[dooody_2007]

بخصوص الكبالن فالكبالن بتاعتها جامده بسبب وزن العربيه الخفيف وبالتالى قصورها الذاتى قليل على المنحنيات واليوتيرنات يعنى لو جبتيها زيروا واحترمتها ممكن تقعد 15 سنه على حالتها ومتقولش اه يا عين
فكرتوونى بالذى مضى

[botros]

شكرا على الرد يا باشا

بس ما قلتليش ؟ عداد الكيلو 5 ارقام و الا سته ؟ يعنى بيقلب صفر بعد 99999 ؟ و الا بيبان بعد ال 100000و يكمل ؟

بالنسبه للنقلات ؟ 4 و واحد مارشدير ؟ ؟؟ و الا 4 شامله المارشدير ؟

[H.ibrahim]

انا بس هلخص الكلام اللى قاله الأصدقاء هنا حتى تتضح الصورة

1- السؤال (هل السيارة على كبالن ام على شاسيه؟) سؤال لا اجابه له، لأن الشاسيه له وظيفة والكبالن لها وظيفة اخرى

2- الشاسيه هو الهيكل العظمى للسيارة ، يوجد منه نوعين مشهورين، شاسيه منفصل عن الجسم الخارجى للسيارة ، وهو الأكثر تحملا ولكنه بالطبع اثقا وزنا واكثر تكلفة ، ومن الآخر لا يوجد حاليا سوى فى سيارات النقل ونصف النقل وبعض سيارات الجر الرباعى ، ام النوع الآخر وهو المسمى (شاسيه علب) وهو عبارة عن ان هيكل السيارة الأساسى هو جسم السيارة نفسها بدون الأبواب والرفارف وغطاء الشنطة والكابوت، وهو الموجود فى 99.9% من سيارات الركوب اليوم

3- السؤال( هل السيارة على سوست ام على كبالن) هو ايضا سؤال لا اجابة له، حيث ان السوست هى جزء من نظام تعليق السيارة فى حين ان الكبالن هى جزء من نظام الجر ، والسوست -مع المساعدين - مسئولة عن امتصاص المطبات ، ولا توجد سيارة بدون سوست ، والسوست لها ثلاثة انواع، حلزونيةspiral ، او ورق صلبleaf spring ، او قضيب التواء torsion bar، وكل سيارة تحمل نوع واحد او اثنين من هذة الأنواع على العجلات الأمامية والخلفية، مثلا السيارة شاهين تحمل اربعة سوست حلزونية واحدة لكل عجلة، فى حين تحمل السيارة ريجاتا سوستتين حلزونيتين فى الأمام واحدة لكل عجلة وسوستة واحدة ورق صلب بين العجلتين الخلفيتيم بالعرض ، والسيارة فولكس فاجن بيتلز 1300 موديل 1970 تحمل 4 سوستة من نوع قضيب الألتواء ، واحد لكل عجلة، اما السيارة فولكس بيتلز 1302 موديل 1972 فتحمل سوستتين قضيب التواء فى الخلف وسوستتين حلزونى فى الأمام

4- اما السؤال (هلى هذة السيارة على كورونا ام على كبالن ) فهو ايضا سؤال لا اجابة له، حيث انه لا توجد سيارة بلا كورونا، والكورونا differential gear هى جزء من نظام الجر يكون موجودا بشكل منفصل فى سيارات الدفع الخلفى ومدمجا مع صندوق التروس فى سيارات الجر الأمامى ووظيفته معقده قليلا لكن يمكن تلخيصها فى تعويض فرق عدد دورات العجلات فى الملفات حيث انه فى اى ملف تدور عجلات السيارة الموجودة فى ناحية الإلتفاف دورات اقل من العجلات البعيدة ولا بد من منظومة ضمن آلات الجر لتعويض ذلك، وبالتالى فإنه لا توجد سيارة بيلا كورونا

اما الكبالن (جمع كوبلن)ويسمى C.V.joint اختصارا ل constant velocity joint فهو وصلة تستخدم فى جميع سيارات الجر الأمامى ، ويكون هناك كوبلن واحد لكل عجلة من عجلات الجر الامامى بمجموع 2 كوبلن للسيارة ، ووظيفته نقل الحركة من عمود المحرك المثبت فى مكانه الى العجلة التى لها القدرة ان تلتف يمينا ويسارا لتوجيه السيارة ، ولذلك يكون الكوبلن سمة مميزة لسيارات الجر الامامى، لكن ذلك لا يمنع وجود سيارات دفع خلفى بنظام الكبالن مثل بعض موديلات البيجو 504 ، وكل موديلات البيجو 505 وكل موديلات المرسيدس ما بعد عام 1978، ولذلك سنجد ان سيارة مثل المرسيدس موديل 1980 هى سياره على شاسيه وعلى كورونا وعلى سوست وعلى كبالن فى نفس الوقت، مما ينفى صلاحية اسئلة من نوعية(هى العربية الفلانية على سوست وللا على كبالن؟)

5-يبقى لدينا ان السؤال الصحيح هو (هل السيارة الفلانية دفع خلفى ام جر امامى) فى الماضى كانت سيارات الفيات 127 وال128 هى سيارات الجر الامامى الوحيدة فى عالم من سيارات الدفع الخلفى مثل ال131 والبيجو 504 والمرسيدس وكل السيارات التى كان اباؤنا يستعملونها وبالتالى كان هناك مجال لانتقادها، اما اليوم فكل ما هو موجود فى السوق باستثاناءات بسيطة جدا هو جر امامى وشاسيه علب
يعنى تصميم الماروتى اللى هو جر امامى بنظام الكبالن وعلى علب هو نفسة تصميم التويوتا كورولا والأوبل فيكترا والسكودا اوكتافيا والفولكس فاجن جولف وكل السيارات الحديثة التى تملأ الشارع ،
الاسثناءات قليلة جدا وتنحصر فى تصميمات قديمة مثل الشاهين واللادا ، وتصميمات فاخرة جدا مثل المرسيدس والبى إم دبليو، وسيارات ال 4*4 وسيارات النقل

وبالتالى لا داعى نهائيا لأن نشغل بالنا بكون السيارة جر امامى حيث ان هذا السؤال سؤال يعتبر سؤال منقرض، لا يشغل بال احد سؤى سائقى التاكسى

كده المهندس سبعاوى خلص كل الكلام فى الموضوع ده علشان كده الواحد بيحب يتعرف على الموسوعات البشرية اللى زى اخونا الكبير سبعاوى ( الكبير كبير ياباشا ):embarrassed2::embarrassed2:

[shankosi]

الإخوة والأخوات الأفاضل،،،،
تحية كبيرة جداً لكم جميعا وأهنئكم على المعلومات والمشاورات التي تتبادلوها في هذا المنتدى الجميل،، وعلى فكرة دي أول مشارة ليا معكم وأرجوا ألا أكون ضيف ثقيل.

أنا أن شاء الله ناوي أجيب ماروتي 800 ومقتنع بيها جداً وشايف إنه حيكون للعربية دي مستقبل جيد جداً في مصر وخاصة في الفترة القادمة، وده أعتقد راجع للأسباب التالية:
1- ما كانش حد منتبه أوي لها في السنين اللي فاتت عشان كان في لها بدائل زي 128 واللادا.
2- عشان بقى في شباب كتير عايزين يركبوا عربيات وعايزين حاجة شكلها ظريف شوية ومش مكرر من سنة 1969.
3- سعرها مناسب لشريحة كبيرة من الناس زي الموظفين وربات المنازل والشباب اللي بيفكر في أول عربية يمتلكها بنفسه.
4- مناسبة لأسرة صغيرة من 4 أفراد أو أقل.
5- موفرة جداً في استهلاك الوقود وسمعت إن ناس بتعمل بيها 22كم/لتر.
6- غير معقدة ومافيهاش كلكعة يعني وكل أنظمة التشغيل الداخلية بها بسيطة وذلك يستتبع بالضرورة تكلفة تشغيل اقتصادية وقطع غيار أقل.
وده رسم للمتور بتاع الماروتي 800:


7- قطع غيارها متوفرة وسعرها معقول.
8- ممكن الواحد يسافر بيها بدون مشاكل، وده سمعته من كذا شخص اشتروها السنة دي واالسنة السابقة 2007.
9-السيارة دي مجربة في أماكن كتيرة من العالم ولها معجبين كتير وبتنتج في الهند والصين وباكستان بس بأسماء تجارية مختلفة، مثلا دي صورة للإنتاج الهندي اللي بينزل عندنا:



وكمان صورة للإنتاج الصيني، بس تصدقوا انها عندهم إسمها (ألتو):



أما التالي فهو الإنتاج الباكستاني:



وعرفت كمان إنها موجودة في أوروبا بس بموتور متطور شوية عن اللي بينزل عندنا وده طبعاً لأن أي عربية مستوردة عندهم لازم تنطبق عليه معايير أعلى من عندنا

أما عن عيوب السياردة دي، فهي في رأينا - العبد الفقي الى الله - فهي:
1) تفتقر لمعايير السلامة والأمن الحديثة، فليس بها Air Bags ولا فرامل مانعة للانغلاق ABS.
2) هيكهلها به ضعف وليس حمل خبطات جامدة.
3) العربية بعد سرعة 90 كم/س بتبتدي تعوم (يعني غير مستقرة على الطريق).
4) يقال - والله أعلم - إن فعالية الفرامل بعد سرعة 90 كم/س تقل وتصبح أصعب في إيقاف السيارة.
5) كرتير الزيت (تانك زيت الموتور) منخفض في مقدمة السيارة ولو نزلت في أي مطب بسرعة (يعني بلاعة جميلة كدة يكونوا ولاد الحلال سارقين غطاها) ممكن يتخبط ويتلف وتجيب زيت.
7) صوت المارش بتاعها عالي وصعب قليلاً.
8) عصاية الفتيس أحياناً بتعصلج وتصبح ثقيلة.
9) دواسات البنزين والفرامل والدبرياج صغيرة وقريبة من بعضها، يعني أصحاب الأرجل الكبيرة حتتعبهم.
10) حيز التخزين الخلفي بها صغير جداً ولكن يمكن فتح الكنبة الخلفية للحصول على مساحة أكبر بس ده معناه إنك متركبش حد في الخلف وانت محمل أغراض كتير.
11) ليس بها قضبان حماية بالأبواب.
12) غير معالجة ضد الصدأ.
13) النور الأمامي بها ضعيف وليس مناسب تماماً للقيادة الليلية.
14) السقف بها منخفض نوعاً ما - لا تصلح لطوال القامة.
15) تأتي بدون كاسيت ولا سماعات ولا نوافذ كهربائية ولا سنتر ولا تكييف.


يعني باختصار هي عربية بها مميزات وبها عيوب شاكلة كل السيارات ولكنها مناسبة على قد إمكانياتها وسعرها، بس ربنا يقدرنا ونشتريها.....

ها إيه رأيكم في التحليل بتاعي ...

أخوكم شنقوصي... ومتسألوش يعني إيه شنقوصي لو سمحتم...

[SEATLOVER]

الإخوة والأخوات الأفاضل،،،،
...

اية يا شنقوصي... الحلاوة و الجمال دة
اية ياعم القوة اللى انت داخل بيها دى
لا بجد ..الله ينور
بس ماعملتوش موضوع لية .. دة كان هايبقى مفيد جداً
ياريت تجمع كل المعلومات اللى عندك و تتأكد منها الاول كويس و تنظمها كدة ذى ما انت عامل
وتعمل بيها موضوع فى القسم هنا
ولو احتجت اى حاجة قولى
الماروتى من افضل الحلول الموجودة الان و الاكثر عملية

اة نسيتنى اقولك ...اهلاً و سهلاً بيك معانا
وعلى فكرة اسمك ذى العسل يا شنقوصي... باشا

[botros]

انا معاك فى كل اللى قلته طبعا بس نقطه واحده متهيالى محتاجين نسال فيها تانى .

موضوع العربيه مش معالجه ضد الصدا ؟ متهيالى متعالجه . مفيش عربيه الصاج بتاعها مش معالج ضد الصدا ؟

وبعدين او مش معالج ضد الصدا . يبقى ال 128 بتنزل مصديه اصلا ؟؟؟ لان تقفيل الهندى افضل بكتير من المصرى بتاع شركه النصر .

[shankosi]

SEATLOVER شكراً كتير يا هندسة على الترحيب الحلو ده وناوي أقدم مواضيع في القريب إن شاء الله.

أ/ botros يا عزيزي العربية الـ 128 أحسن بكتير من الماروتي ولازم نفرق بين الصاج المجلفن وده هو اللي بيستخدم في صناعة بودي العربيات كلها ولكن بعض الماركات المحترمة بتضيف زيادة معالجة كهروكيميائية لبدن السيارة قبل رش الدوكو وده بيكون بتغطيس هيكل السيارة كله في حوض معالجة وبذلك يكتسب بدن السيارة مقاومة عالية ضد الصدأ وأنا كنت من القلائل المحظوظين وشفت العملية دي بتتعمل في مصنع مرسيدس في 6 أكتوبر.

ودي ميزة لازم تذكر في إي دعالية خاصة بالعربية وبتخلي كمان المصنع يدي ضمان ضد الصدأ بقلب جامد.

بالطبع الماروتي ما بيتعملش فيها كده قبل رش الدوكو ويتم الرش على الصاج المجلفن مباشرة .

[botros]

طبعا يا باشا انا معاك . مش ممكن يكون صاج الماروتى زى المرسيدس و البى ام . فى المعالجات ضد الصدأ .


انا بس كنت بقارنه بصاج العربيات التجميع المصرى الفئه الصغيره المتداوله زى 128 و الشاهين و او منتجات شركه النصر بالاخص . و العربيات اللى سعرها قريب ن الماروتى .