المفتاح المربع بتاع طبة زيت الفتيس منين

[eltorbeny]

سلام عليكم

عاوز اجيب المفتاح المربع بتاع طبة زيت الفتيس للماروتي ودايخ عليه

ممكن حد يقولي بيتباع عند مين

[MohammedAladel]

طيب هو زيت الفتيس بيتغير أزاى يعنى بيتكب من فوق عادى ليه مكان معين ولا بمكنة مخصصة

وأزاى بيتفضى الكلام دا لاغلب العربيات يعنى ؟؟ الطبة بتاعة التفريغ بتبقى من تحت جمب بتاع الزيت ولا فين بالظبط

[dr.hazem]

حضرتك هو هو مفتاح طبة زيت البيجو وهتلاقيه في شارع الازهر اذا انا فاكر صح

نقلا عن بشمهندس سبعاوي....

تحياتي

[dr.hazem]

ده اقتباس من مشاركة الزعيم سبعاوي حفظه الله ورعاه...

أؤيد كل كلام حازم واضيف عليه الآتى من واقع التجربة الشخصية:

1- الزيت -بالنسبة للماروتى-درجة لزوجة 90 ، بس انا حصلت على نتيجة افضل لما حطيت زيت 90 وحطيت عليه 100 مللى اضافة زيت شمبر ، بتحسن جدا صوت الفتيس

2- الفتيس بياخد 2 كيلو زيت، يعنى الجركن ال4 لتر يكفى مرتين

3- اقترح تغيير الزيت كل 20-25 ألف كيلومتر

4- تغيير الزيت ممكن يتم تحت البيت بشرط توافر مفتاح مربع مقاس 10 مم (بيسموه فى السوق مفتاح بيجو 10) لفك طبة الزيت -الطبة فيها تجويف مربع 10 مم يحتاج المفتاح ده، ما من أعلى فيتم اضافة زيت الفتيس من مكان مقاس الزيت وده بيتفك ويترك باليد ويضاف الزيت باستخدام قمع عادى، فى حالة عدم توافر المفتاح المربع 10 يمكن تغيير الزيت فى البنزينة

5- تشحيم كورة عصاية الفتيس بيتم من جوة السيارة وبيحتاج فك الكونصول البلاستيك اللى حوالين العصاية(6 مسامير بورمة 2 تحت فرامل اليد و اتنين فى جانبى الكونصول و 2 تحت طفاية السجاير) ثم فك المسامير الأربعة التى تمسك كاوتشة عصاية الفتيس -مع ملاحظة الامساك بالعصاية علشان متقعش بعد فك آخر مسمار-ورفع الكاوتشة قليلا لتظهر الكورة-يمكن ربط واحد من المسماير الأربعة بعد رفع الكاوتشة علشان العصاية متقعشة اثناء التشحيم، ثم فكه بعد التشحيم واعادة الكاوتشة ثم ربط المسامير واعادة الكونصول

6- ربط وصلة عصاية الفتيس اسفل السيارة لا يحتاج سوى النزول الى اسفل السيارة، العصاية والوصلة باينين جدا، لمعرفتها خلى حد يحرك العصاية اثناء وجودك تحت السيارة هتلاقى الوصلة بتتحرك، فيها مسمار 12 تحت العصاية مبشارة بيتربط ، ووصلة صليبة بمسمارين 10 فى نصها بيتربطو

[dr.hazem]

ولازلت انقل من كلام الكبير بشمهندس سبعاوي وهو جاب المفتاح من شارع الجمهورية مش من شارع الازهر وانا افتكرت غلط...

أمبارح غيرت زيت الفتيس للماروتى لأنى لاحظت انه ابتدا يسود، ودى ظاهرة غريبة جدا معناها إما ان الزيت أتأكسد او اتحرق بسبب حرارة التشغيل، لأن المفروض ان زيت الفتيس لونه ميتغيرش

الأدوات اللى احتجتها كانت 3 جاحات:
أول حاجة هى جركن زيت جيربوكس يدوى معامل لزوجة 90 ، جبته من مصر للبترول ب 44 جنيه (4 كيلو، لكن العربية بتاخد 2 كيلو بس، عموما هو صلاحيته 5 سنوات، يعنى ممكن ينفع غيارين)
تانى حاجة هى قمع بلاستيك علشان صب الزيت
أما تالت حاجة وهى اللى كانت اصعبهم فهى مفتاح الطبة، ودى كانت شغلانة، لأن الطبة مجوفة زى تجويف الألانكيه لكن التجويف مربع، وعلشان ادور على مفتاح يدخل فى التجويف ده كان قدامى حلين، إما انى اخد العربية لحد بتاع العدد وأقلبهاله جوة المحل علشان اوريه مكان الطبة ، ودى مسألة كانت صعبة شوية، او انى ادور على وسيلة اخد بيها طبعة للطبة، وده اللى انا عملته، جبت اللحام المادتين اللى على شكل صباع( مش اللى فى انبوبتين لأنه سايب ومكانش هينفع) وعجنت حتة منه ورحت حاشرها فى الطبة خدت شكلها وبعدين شلتها وسبتها تنشف، ورجت واخدها ونازل شارع الجمهورية عند بتوع العدد، وريتها لواحد فى محل قاللى دى طبة زيت بيجو؟ قلت له لأ هى طبة زيت بس يابانى، المهم نادى على الولد جوه قال له هات لى مفتاح بيجو 8-10 ، الخلاصة ان المفتاح طلع معروف فىالسوق باسم مفتاح بيجو او مفتاح طبة زيت بيجو، والراس المربعة مقاس 10 مم ، اشتريت المفتاح ورجعت البيت
فكيت الطبة ونزلت الزيت، لما عبيت الزيت اللى نازل فى قزازة بيبسى 2 لتر علشان ارميه بشكل آمن لا يلوث الصرف كان منظره جوة القزارة متفرقوش عن لون البيبسى بالظبط،
بعد كدة قفلت الطبة ، وحطيت القمع مكان مقاس الزيت ابو غطا بلاستيك ومليت الفتيس، نزل منى شوية زيادة لأنى لما قست لقيت الزيت على جداَ فى المقاس، فلقيت فيه طبة تانية فى جانب الفتيس بتتفك بمفتاح 14(العربية دى كلها ممكن تفكها وتركبها تانى بمفتاح 14-تقريبا اللى صممها كان مواليد 14-14-سنة 1914) ، بس الطبة دى تصلح لانقاص المستوى شوية فقط وليس لتفريغ الزيت لأنها فتحتها ضيقة جدا ومستواها اعلى من مستوى قاع الفتيس والطبة نفسها عبارة عن مسمار طوييييييييييل، اطول من الليلة السودا، قعدت ييجى 5 دقائق الف فيه بايدى علشان افكه وزيهم علشان اربطه، المهم فكيتها ونزلت منها شوية لحد ما المستوى اتظبط وربطتها تانى، وبعد ما قست مستوى الزيت واطمنت انه مظبوط قفلت كل حاجة وجربت العربية، فرق أوى فى نعومة الغيارات وصوت الجير
بس بصراحة بعد ما شفت حالة الزيت لما نزل انا مش هقعد الزيت فيها كدة تانى، هنزله من 15-20 ألف ، خاصة انه رخيص

تحياتي

[eltorbeny]

متشكر جدا ياستاذ حازم
هو فين شارع الجمهورية ده اروح رمسيس واسال؟؟؟
السؤال هنا بقي ارمي فين الزيت بطريقة امنة على البيئة

[eltorbeny]

هو على فكرة انا قريت في كتاب الصيانة بس مش متاكد ان لازم تفك الطبتين عشان هو تقريبا زي حوضين متوصلين ببعض من فوق ومنفصلين عن بعض من تحت
يعني اقصد ان لو مفكتش الطبه التانية هيتبقي شوية زيت وده الى ممكن يكون خل المهندس سبعاوي لقي نفسه حاطط زيت زيادة

[dr.hazem]

هو على فكرة انا قريت في كتاب الصيانة بس مش متاكد ان لازم تفك الطبتين عشان هو تقريبا زي حوضين متوصلين ببعض من فوق ومنفصلين عن بعض من تحت
يعني اقصد ان لو مفكتش الطبه التانية هيتبقي شوية زيت وده الى ممكن يكون خل المهندس سبعاوي لقي نفسه حاطط زيت زيادة

لا هو حط زيادة فعلا والفتيس بياخد 1.9لتر مش 2 وده اللي عمل الزياده
وكمان بالذات زيت الفتيس المانوال لو زاد مش مشكلة لان في خرطوم قايض وهيدلق عالشارع...

[dr.hazem]

عن نفسي باخدها المحطه وبغيره وبدفع 5 جنيه...

[eiad_naser]

انا عندي مفتاح العجل بتاع العربيه الاصلي فيه من اليد الفتحه المربعه الل يتفك بيها طبة زيت الفتيس وهيا اللي بفك بيها طبة زيت الماتور

[eltorbeny]

انا عندي مفتاح العجل بتاع العربيه الاصلي فيه من اليد الفتحه المربعه الل يتفك بيها طبة زيت الفتيس وهيا اللي بفك بيها طبة زيت الماتور

مخدتش بالى ان المفتاح ده ممكن يفتح طبة زيت الفتيس اما اروح ابص عليه واشوف

[eiad_naser]

الاخ eltorbeny
مردتش علينا بقالك يومين لعل المانع خير

[eltorbeny]

الاخ eltorbeny
مردتش علينا بقالك يومين لعل المانع خير

انا اسف كنت مشغول اليومين الى فاتو
انا شوفت مفتاح العجل الى هو موفتاح 17 ده بيفك العجل وبيفك طبة الزيت
بس مفيهوش اي حته مربعة عشان تفك طبة زيت الفتيس
وروحت شارع الجمهورية كله قالي معندهوش