Tweet
استغاثه بوحوش الماروتي
السلام عليكم ورحمة الله وبركاته
انا من اكتر المتابعين للمنتدي الرائع بس للأسف كنت ناسي الباسوورد بتاع الاكونت بتاعي بقالي 4 سنين
بس الحمد لله بعد طول كفاح افتكرته وجيت جري استغيث بيكم...
معايا عربيه ماروتي موديل 2009 وكنت دايماً بسميها العربيه الدكر نظرا لأنها فيها جدعنه الدنيا العربيه بإختصار عربية الوالده وهي يادوب بتروح بيها الشغل وترجع 5 كيلو رايح 5 كيلو جاي والعربيه بسم الله ما شاء الله مبتونش لغاية ما الشيطان وزني عليها وبقيت انا كمان احيانا بروح بيها شغلي اللي هو 55 كيلو رايح 55 كيلو جاي وبرضه العربيه كانت اسد اصحي من النوم متأخر وبرضه أوصل الشغل في معادي لغاية لما العربيه كانت عامله حوالي 17 او 18 الف كيلو (من حوالي سنه كده) و ابتدت الماروتي تبان عليها اعراض الإعياء
اللي فات حماده و اللي جاي حماده تاني خالص
كنت بلاحظ لما اكون راجع من الشغل و أجي انزل اشتري حاجه في السكه بعد ما أبطل العربيه العربيه بتتنفض ولما أجي ادورها تاني بتدور ولكن في 3 أو اربع اضعاف تدويرتها العاديه....
روحت لأول ميكانيكي الله يسامحه قالي الأبلاتين لادع راح مصنفره و قالي هاتبقي فل (بالمناسبه ده كان أول صنايعي يمد ايده فيها) المهم لا بقت فل ولا حصلت حاجه رحتله تاني راح قالي هات ابلاتين و كوندينسر وروحت جبت الابلاتين و الكوندنسر اللي في العلبه الكارتون الابيض في ازرق راح الراجل الأول غير الابلاتين و قالي كده مظبوطه ورجعتله بعد يومين راح مغيرلي كمان الكوندنسر وقعد يلعب في الاسبراتير لغايت ماتحسنت ( وبيني وبينكم لا اتحسنت ولا حصل حاجه بس انا قررت اني انفض كان في صوت جديد ظهر كأن الشكمان بيطرد حاجه سداه لما ازود بنزين وهي واقفه) ....
المهم العربيه مشيت بعد كده سنه بحالها ملعبتش تاني غير اني غيرت بطاريتها من سايله ل جافه ومش فاكر حتي غيرتها ليه...
المهم العربيه فضلت ماشيه زي العفريته كمان سنه وكانت بتستهلك بنزين حوالي 20 كيلو لكل لتر(طرق مفتوحه و مع اتجاه الريح عشان محدش يستغرب)
لغاية من شهر مره كنت راجع من الشغل راحت العربيه نتشت نتشه واحده ومشيت بعد كده عادي لغاية ما روحت طبعا مخدتش في بالي و تاني بوم كنت خارج بتفسح راحت العربيه فجأه قعدت تنتش وتتنطط زي المجنونه وبرضه فجأه مشيت كويس قلقت حبتين وبرضه رحت مكبر مخي المهم في نفس الليله جات العربيه فجأه نتشت نتشتين وراحت فاصله وهي ماشيه صراحه كنت في حته مقلقه حدفتلها علي التاني دارت وكملت بيها وبعدها بساعتين كررتها تاني وهنا قررت الذهاب للميكانيكي.....
وفعلا روحت قولتله اللي حصل و قولتله اني مغيرتش حاجه في العربيه من ساعة ما اشتريتها راح مغيرلي البوجيهات ( ان جي كيه نفس المقاسات بس صراحه مالقيتش نفس الكود) وجربناها اشتغلت ذي الفل وروحت وقلت الحمد لله
سبحان الله تاني يوم كانت الحاجه رايحه الشغل الصبح و المفروض العربيه فل الفل... المهم تليفون ظريف من ست الحبايب العربيه كانت ماشيه بتتنطط بعد كده فصلت وحالفه ماتدور روحت حاولت ادور العربيه مرضيتش بتاتاً صوت مارش بس الماتور مابيلقطش المهم جبت تاكسي قطرني لغاية الميكانيكي الراجل قالي دور جيت أدور لقيت العربيه قاطعه كهربه خالص كأن مفيش بطاريه دورنا العربيه من بطاريه تانيه دارت بعد كده قالي ده سير الدينامو راخي وشده و كمان صنفرلي الابلاتين جربتها لقيتها شغاله وزي الفل المهم وصلت مشوار رجعت تنتش تاني رجعتله راح ظبطلي الاسبراتير تاني قاللي كان عايز ظبطه بسيطه.. المهم اشتغلت كويس لمدة اسبوع وجات في يوم (برضه مع ست الحبايب) وراحت منتشه حاولت تسايسها مشيت 20 متر وفصلت حاولت تدورها تاني مدارتش راحت قافلاها وضربالي التليفون المتين الحمد لله كنت اجازه اليوم ده روحت نازل وكلمت واحد معرفه وصفلي ميكانيكي تاني لأني كنت متعكنن أوي من الأولاني المهم حاولت ادور العربيه دارت بس متبرجله خالص حاسس كأن الماتور هاينط من الكبود و العربيه عماله تتنطط في مكانها المهم قعد مسايسها حوالي 5 كيلو ماشي علي الأول و العربيه عماله تتنطط و السرعه مش بتوصل 10كم/الساعه حتي المهم وصلت للميكانيكي قالي روح هاتلي الابلاتين أبو سلكه سودا اللي بيتباع في ورقه وليه غطا بلاستيك شفاف ناس كتير كانت بتشكر فيه هنا و كمان قالي اجيبله كوندنسر بيجو مكنتش مرتاح لكلامه ب أمرنا لله جبته وركبهولي وقالي تعالي بكره بدري و اركنلي العربيه تبرد عشان اظبطلك التاكيهات المهم نفذنا وفعلا عمل التاكيهات وقالي جرب العربيه كانت حلوه بس كان صوت التاكيهات باين و العربيه فيها رعشه علي السلانسيه رجعت قلتله قالي يا باشا اسبوع زمن تطبع و هاتدعيلي (وبسذاجتي صدقته) صبرت عليها اسبوع و هي كل يوم حالها بيسوء لدرجة اني بقيت اسمع اصوات شخلله في العربيه علي السلانسيه أو بمجرد مارفع رجلي عن دواسة البنزين والعربيه بتترعش وسحبها بيسوء كل يوم......
رحت راجع للميكانيكي الأولاني قالي بمجرد ماسمع صوت العربيه التاكيهات مخرفه خالص .. طب ايه الحل يا عم الحج قالي سيبهالي اظبطهالك وتعالي علي المغرب استلمها... لما جيت استلمها دورتها لقيتها دارت بسهوله وصوتها ظبط وسحبها كويس بس كنت ملاحظ انها لسه بترعش علي السلانسيه و لما ارفع رجلي من علي دواسة البنزبن وانا ماشي انما الرعشه بقت اقل من الأول و أهدي وعلي كلامه الجو برد حبتين لما تسخن هاتروح الرعشه( فعلا كان الجو برد يومها) المهم بسبب المشغوليات ماركبتش العربيه فتره لغاية امبارح روحت بيها الشغل ف كنت حاسس و انا ماشي بشخلله في الموتور كأن في حاجه مش ثابته..... والنهارده بعد مارجعت من الشغل حسيت الجو حر فقولت اغير الميه الخضرا (نظراً لأأنها في العربيه من ساعة ما اشتريتها يا دوب كنت بزودها كل ماتنقص) وكمان بالمره اغسل الراديتير استعدادا للصيف الراجل بعد ماغسل الراديتير وحط الميه الخضرا الجديده (موبيل كولانت) لقي الراديتير الميه فيه بتعلي وبتكبكب والغطا مفتوح طبعاً وكمان لاحظ أن الميه ريمت ف الولا الصنايعي قالي هي العربيه دي جايبه جوان وش سلندر( بيني وبينكم أول مره اسمع ان وش السلندر طلعله جوان جهل بقي نعمل ايه) فكان المعلم بتاع الورشه جنبه جه حط مفك ف رقبة الراديتير وطلع شويه ريم بعد كده بص علي مقاس الذيت وقالي مافهاش حاجه وقفل الكبود كأنه بيخبي علي عمله وبيني وبينكم
مفكرتش افتح الكبود من ساعة ما روحت وراكن العربيه وحاسس اني خلاص قضيت علي الماروتي العزيزه
عارف ان القصه طويله ودراميه حبتين بس فعلا العربيه دي غاليه قوي عليا مع ان معانا غيرها بس مفيش عربيه بتفهمني زي الماروتي
افتوني ماذا افعل.... عايز ارجعها لأيام المجد مع العلم اني من سوهاج ومفيش حد بيبيع قطع غيار ماروتي ولا حد بيفهملها نظراً انهم 5 عربيات ماروتي فقط لاغير في سوهاج كلها وبضطر اجيب قطع غياري بالتليفون عن طريق واحد قريبي غلبان عايش في مصر الجديده وبيتسحل كل ما أعوز حاجه للعربيه....
شكراً لحسن استماعكم واسف علي الاطاله و في انتظار ردودكم و نصائحكم...
العربيه حاليا عامله 26 الف كيلو بالمناسبه
ممنوع استخدام اللون الأحمر في الكتابة حيث أنه مخصص فقط للمداخلات الإدارية، تم تغيير لون الكتابة.
يرجى مراجعة قواعد المنتدي
مشرف 10 ب
Comment