تقرير عن أداء السيارة بعد تظبيط العفشة

[lidosasa]

السلام عليكم
سبق وكتبت تقرير عن شوية حاجات وتظبيطات عملتها فى العفشة وختمتها بظبط زوايا وترصيص ودا الموضوع كامل وبالصور للى ما تابعش الموضوع من البداية

http://www.nilemotors.net/Nile/379137-a.html

وبناء على طلب من العضو الفاضل mesaharaty لعمل ملحق للتقرير لتحديد إنطباعى النهائى عن العربية وكمان لآنى فعلاً حسيت إن العربية فرقت معايا فقلت لازم أشارك الأعضاء بإنطباعاتى عشان اللى عنده حاجة فى العربية عايزة تتعمل ما يطنش ويعملها لآن العربية حتفرق معاه جامد
قبل التعديل
العربية كانت بترقص من الخلف على أى مطب وفى كل الإتجاهات مش حركة أفقية وبس يعنى المساعدين كانوا فى الضياع والسوست هى اللى مستفردة بالعربية وبتعمل معاها السليمة
بعد التعديل
طبعاً ثبات أكتر نعومة فى المطبات والمساعدين الجداد حكموا الإهتزازت دى وسيطروا على السوست
قبل التعديل
أى حد بيقعد على الكنبة اللى ورا بحس إن العربية ريحت خالص من ورا وكأنى شايل جبل
بعد التعديل
العربية عليت ومش بتنزل جامد لو حد ركب ورا
قبل التعديل
صوت طقطقة من ناحية الكبالن فى الدورانات وفى أخر يومين صوت الطقطقة بقى فى الطوالى كمان بس على المطالع بس مش طول ما أنا ماشى بالعربية
بعد التعديل
سكماً بكماً على رأى اللمبى
قبل التعديل
العربية بتعتل فى الطلعة والسحب تعبان وإستهلاك البنزين عالى وخلانى أغير البوجيهات وفلتر البنزين وأنضف الكربراتير طبعاً الإستهلاك قل لكن مش بالشكل المرضى والعربية كانت بتسخن بسرعة والموتور بيجعر بدرى على الغيار قبل ما الغيار يشبع
بعد التعديل
السحب ممتاز إستهلاك البنزين مثالى العربية مش بتسخن والغيار بياخد حقه والعربية بقت بيتهجم . وكأنى قبل التعديل كنت جايب حصان رجله مكسورة وبضربه عشان أخليه يجرى غصب عنه
نصيحة أخيرة أوعى تكسل تصين أى حاجة فى العربية مهما كانت صغيرة . والله أعلى وأعلم

[dr.hazem]

ربنا يباركلك وتسلم ايديك عالتقرير وربنا يجعلها اخر الاحزان....
تحياتي

Sent from my Xperia Arc S using Forum Runner

[S O P H O S]

كلامك مشجع علي الصيانة بصراحة

[Amr Axel]

تسلم ايديك ع التقرير الرائع ده يا باشا
و في انتظار تقاريرك المميزة :)

[mesaharaty]

ألف مبروك الصيانة يا صديقى وألف شكر على التقرير الجميل وعلى تعاونك وإستجابتك لطلبى .
ربنا يوفق ويبارك

[SunSet]

أنا شاكة إن عندي مشاكل عفشة بس مش عارفة أتأكد إزاي؟
وهل كفاية أروح بنزينة يضبطةلي العفشة وخخلاص! ؟

[SunSet]

رنا

[lidosasa]

أنا شاكة إن عندي مشاكل عفشة بس مش عارفة أتأكد إزاي؟
وهل كفاية أروح بنزينة يضبطةلي العفشة وخخلاص! ؟

البنزينة ملهاش دعوة بالعفشة خالص إنتى روحى لعفشجى قولى ليه يربط ليكى العفشة وهو بيربط يبص على المساعدين والكبالن وإديله 10 أو 15 جنيه ولو قالك إن العفشة محتاجة شغل كذا وكذا قولى ليه أنا بسأل بس عشان ممكن تكون العفشة سليمة وهو يكون عايز يفتح لنفسه شغل ويعد فلوس وتبقى عرفتى هى محتاجة أيه وتعمليه فى وقت تانى على مهلك