للخبراء

[MR-Saleem]

معايا فيتارا 97 عليها المكنة ال 6 سلندر 2000 سيسي ~ فتيس اوتوماتيك ~

جرببت ف مره اعمل حركه اني اخلي العجيل يلف ف حالة وقوف العربيه ~ دوست فرامل وبنزين وخليت الفتيس ع ال D المكنةة بتنحر بس والعجل مبيلفش :V بس العربيه عايزه تتحرك من مكانها بس الفرامل مكلبشاها ع الارض
معرفش ليه
بس لما شغلت الدفع الرباعي كانت بتاكل ف الاسفلت ~

ياتري لو جبتها مثلا ع ال 2 او ال l هتفرك من غير الدفع الرباعي !

وعندي سؤال تاني معلش برخم في زرار كدا ف الفتيس جمب العصايه مكتوب عليه باور لما بدوس عليه ف لمبه ف التابلوةة بتنور مكتوب عليها باور بردو ده غير الزرار اللي ف العصايه نفسها ياريت اعرف ايه لزمتهمم ~

[م/أحمد عبد الفتاح]

حاجاوبك على زرار الباور ده بيخلى الار بى ام بتاع الموتور اعلى شوية فى كل نقله وده بيديلك زيادة شوية فى الباور بتاع الموتور مثلا لو طالع مطلع جامد ومحمل حمولة تقيلة او بتقطر حاجه تانية وراك بتستخدمه لكن لو استخدمته على طول بيخلى استهلاك البنزين يزيد جدا .

[MR-Saleem]

مشكور جدا يا استاذ احمد

[borio1704]

أنا هجاوبك على سؤالك الأولاني

حضرتك بتقول إنك جبت الفتيس على D.. يعني العربية أوتوماتيك...

حضرتك عارف الفتيس الأوتوماتك بياخد الحركة ازاي من الموتور؟؟؟

فيه حاجة في النص اسمها "محول العزم" أو torque converter... محول العزم ده هو بديل اسطوانة الدبرياج بتاعت الفتيس اليدوي..

فكرته ببساطة هي زي لما يكون عندك في البيت مروحتين قصاد بعض.. واحدة متوصلة بالكهربا وبتلف... والتانية مفصولة من الكهربا..

وما دام الاتنين قصاد بعض.. فالهوا اللي طالع من المروحة الأولانية هيخبط في المروحة التانية ويخليها تلف هي كمان...



بس انت ممكن توقف المروحة التانية دي بصباعك.. مش كده؟؟؟ علشان الهوا مش بينقل كل الطاقة اللي خارجة من الموتور بتاع المروحة اللي في الكهرباء..


المهم..

في العربية.. محول العزم ده عبارة بردو عن مروحتين.. بس عايمين في الزيت..



وبكده نقدر ننقل طاقة أكبر كتير من اللي بيشيلها الهوا...

بس بردو.. لو كان عندك مقاومة كبيرة قوي.. المروحة التانية هتقف...


ده بالضبط اللي حضرتك عملته... دست بنزين ومنعت الطاقة إنها تتنقل.

عموما.. رجاء ما تعملش الحركة دي تاني ﻹنها بتدمر محول العزم.. ومحول العزم جزء أساسي جدا في أي عربية أوتوماتيك.. من غيره العربية هتقف خالص..

ادخل على الموضوع ده لو عايز معلومات زيادة..

http://www.nilemotors.net/Nile/448512-n-d.html

...