الى مالكى المازدا3 ...قولنا انطباعك عنها؟

[محمد عز]

بقالى كتير جدا معملتش مواضيع فى قسم المازدا

فحبيت اعمل موضوع....

لكل ملاك المازدا 3 ، ايه انطباعك عنها بعد امتلاكها فتره من الزمان؟

الانطباعات الايجابيه ....ايه اللى عاجبك وبتحبه فيها

وانطباعاتك السلبيه .... ايه اللى مش عاجبك

انا تقريبا المازدا 3 داخله على سنتين معايا ، فى شهر 4 الجاى هيبقوا سنتين

بس مش هقول انطباعاتى عنها الا بعد ما اشوف باقى المشاركات من الاعضاء

اكتر نقطه حابب اعرفها منكم ، ايه اخبارها مع الحفر والطرق المكسره

لانى للاسف مسقتهاش على طرق مكسره وعمرى ما نزلت بيها فى حفره

فياريت تركزوا على النقطه ده

علشان فى الاخر نجمع الايجابيات والسلبيات

وتبقى مرجع لكل اللى عاوز يعرف اكتر عن المازدا 3

شكرا

[makavelimorsy]

الحمد لله عربية زي الفل ...ثبات ممتاز... تصميم رائع و تابلوه اروع مايكون...
العيوب:
وطيا..... في بلدنا يعتبر عيب للاسف
بحس ساعات ان صاجها ضعيف
و الحفر فهي خشنه جداااااااااااااا...... بس بدل ليها ثبات رائع كده يبقى تولع النعومة
و لو رجع بيا الوقت 10000000000000000 مرة برده هاجيبها بس التوب لاينaero
عشان انا base line

[makavelimorsy]

و على فكره يا أستاد محمد مع اني بحب الزووووم من زمان اوي.... بس تقريرك كان السبب في اقتناعي بيها 100% و من ثم الحمدلله شرائي ليها

[janjon1978]

بعد 16 الف كليو فى سنة و نصف
اية اللى عجبنى ؟؟؟
نبتدئ نعد مع بعض
1- الشكل الخارجى ... جامد موت مع انه من سنة 2003 الا انه مازال احلى من كل السيارات فى فئتها (نديلة 9\10 )
خصوصا مع الالوان الجامدة .. معايا لون ازرق زهرى .. لون جميل جدا و بينطق على العربية و الجنوط كمان دهنتها دهبى 100%


2- الشكل الداخلى ... برستيج جدا .. انا كنت راكب قبلها ماتركس و طبعا اللى ركب الماتركس عارف ان التابلوه بتعها فقير جدا و لونة رمادى و حاجة كدة تكسف .. المازدا اللى معايا التابلوة بيج و اسود و بصراحة يفرق كتير جدا عن الرمادى و اسود اللى موجود فى الموديل الاساسى (9\10)

3- ال Handling يا جماعة موش طبيعى .. اول مشوار بيها و انا بستلمها فاكر جدا اللى انا كنت عمال اقوله .. العربية موش بتميل مع الملفات و ثبات عالى جدا .. كائنى فعلا راكب bmw مش مازدا .. الhandling الحاجة الوحيدة اللى بتنفرد بيه المازدا 3 عن كل اخواتها اليابنيين و الكوريين (10\10) و الحقيقة دة بفضل العفشة المشتركة بتعة الفورد اساسا واللى برده موجوده فى الفوكاس و الفولفو 40s
العفشة يقولوا عليها firm يعنى هى طرية شويتين و ناشفه حاجة بسيطة ..يعنى وسط
انا ركبت السيراتوا الجديدة .. اقولت انا فى نعمة بجد .. كمان العفشة اطرى بكتير من الاوكتافيا 5 و البورا والصنى و طبعا الماتركس .. ده اللى بركبه
بالنسبة اللطرق المكسرة لازم نضبط الهواء على 30 مش 32 .. ها يفرق جامد .. مفيش ترزيع ولا هبط ... فقط يسمع حاجة بسيطة مش جامدة
فعلا اللى قاعد وراء لازم بينام فى السفر و نوم عمبق كمان على عكس العربيان اللى فى فئتها
4- عاجبنى جدا انهم مش مسترخصين اى حاجة ... الانوار الخارجية هالوجين على الاقل فى الموديل الاساسى و زينون فى اللى اعلى .. العواكس فى كل حتة عددهم 8 .. علامة المازدا بالنيكل فى كل حتة على الموتور الجنط الدركسيون و الخ .. بمعنى اخر العربية موش محتاجه اى تضبيط


الحاجات العادية فيها زى كل العربيات اللى فى فئتها هى :
الموتور : معقول .. موش ضعيف زى الA5 و لا سوبرزى ال TSI و التربو
الوسع : معقول .. موش وحش زى الA4 , و موش بحر زى التيدا
عزل الصوت : معقول زى اخواتها لكن لا يرقى الى المرسيدس .. انا ركبي BMW 525 الجديدة والعزل ماكنش فارق قوى
عزل الحرارة : ممتاز زى معظم اخوانها .. مش حاجة جديدة يعنى
البنزين : معقول .. موش وحش زى الانسر و الصنى و موش خارفى مش عارف زى ايه؟
الشنطة: معقول
الصاج : معقول يعنى مش طرى زى الكورى (حكتين فى مكان الباب الخلفى مع ميكروبسات تويوتا و النتيجة حاجات طفيفة !!! و موش خارفى زى البيجو و الفيات القديم

اللى موش عاجبنى :
1- مطبات بلدنا
2- التوكيل فى بلدنا
3- الحاجة الوحيدة اللى زعلتنى ان الاكصدام الفيبرالامامى من على الاجناب ضعيف و بتيخلع بسرعة مع اى حد يريح عليك من عند الاجناب (بردة عيب السواقة فى بلدنا )
4- قطع الغيار اغلى من اخواتها الكوريين و دة جوة مصر و برده بره مصر

[adel1414]

موضوع رااااااائع جدا

[Eng.Sameh]

تسلم ايدك يا باشمهندس على المواضيع الجامدة دي ...

بالنسبالي .. فأنا بصراحة بحب العربية بشكل رهيب لدرجة اني بخاف وشايف انها أحسن عربية على الاطلاق في فئتها واللي أعلى شوية ..

أنا معايا مازدا3 ايرو لؤلؤي 2009 ، عامل لحد دلوقتي 13000 وشوية في حوالي 7 شهور
الأنطباعات الايجابية ..

1- الشكل : من كتر ما شكلها عاجبني بخاف عليها احسن احسدها ، بالذات اللون اللؤلؤي مع انتريور اسود بالكامل والزجاج الملون وطبعا الفوانيس الكربون والزينون وفتحة السقف عاملين شكل عام مبهر ، وبصراحة أنا شايف ان ده اجمل لون عليها ومديها جمال فوق جمالها ،

2- الخامات والتصميم الداخلي والأضائة يحسسوك أنك في عالم تاني من الأناقة والهدوء

3- صاجها أنا شايف انه افضل الياباني وافضل من كل الكوري ، خاصة اني كان معايا اوبترا ( لو ريحت بايديك على القايم تلاقي الصاج دخل لجوه ) ، لكن بصراحة المازدا صاجها محترم

4- نظام البصمة عاجبني جدا

5- الثبات والهاندلينج .. أفضل مما كنت أتوقع وفعلا المازدا3 متعة في القيادة ، وفعلا تلاقي فيها الثبات الحقيقي ، اللي هو لما تتفجئ بحاجة وتاخد غرزة على سرعة عالية تلاقي العربية في منتهى الهدوء وماسكة نفسها وبتتناغم بشكل رهيب مع تلك المواقف ( ما شاء الله ) ، مكدبش اللي شبها بالبي ام في هذه النقطة

6 - العفشة مش ناشفة في المطبات ومش ناعمة قوي ، هي فعلا وسط وأقرب للنعومة ( انا حاطط نيتروجين وظابط على 30 )

7- نظام الصوت فيها ممتاز ، وعاجبني انه CD mp3 وكمان كاسيت مع وجود 8 سماعات وصوت تحفة

8- سحب العربية بردو من الحجات اللي عجباني وبالذات في الطلعات ، وبردو على السرعات و لما تعمل كيك دون محدش بيشوفك

اللي مش عاجبني ...

مفيش حاجة مزعلاني منها خالص بصراحة ، وحتة انها واطية فهي مش للدرجة ، بس لما اكون معايا عدد كامل في العربية لازم اخد المطبات المتخلفة بزاوية وبتعدي تمام ، لكن وانا لوحدي بتكون عادي جدا.

بالنسبة للتوكيل ، انا بتعامل مع سمارت كار وهما محترمين جدا واسعارهم معقولة ، وفاهمين كويس في العربية.

البنزين .. وسط ، لا هو اقتصادي ولا هو سفاح ، واتحسن عندي كتير بعد ما عديت ال 10000

وأخيرا .. أنا بحمد ربنا جدا على اختياري وفعلا سعيد جدا بالعربية ولله الحمد.

[محمد عز]

شكرا ياسامح ، janjon ،makavelimorsy

على مشاركاتكم الفعاله جدا وتقييكم الاكثر من رائع

وفعلا التقييم الصادر من المالك بيبقى ليه طعم تانى وتحسه مهتم بتفاصيل تخفى عن اى حد تانى

انا متفق معاكم فعلا فى ال Handling او سواقه مازدا 3

فعلا سواقتها ممتعه جدا لاقصى حد ، ثبات فى المناورات ورشيقه جدا

والموتور بيستجيب بسرعه لكن بعد ما يكون الار بى ام معدى ال 3

العفشة فعلا متوسطه مش ناشفه ولا ناعمة

العزل كويس ، بس فيه عربيات احسن

استهلاك البنزين متوسط زى ما قال سامح

.
.
.
.

مجملا عربيه شيك بكماليات رائعه واداء مبهر واعتماديه عاليه

السؤال هنا؟؟؟؟؟

بعد ما سمعنا ان غبور اخد توكيل مازدا وعمل اعلانات انه هيهتم بالمازدا

وهيفتح مراكز بيع وصيانه بما فيهم العربيات الخليجى

تفتكروا ده هيحسن وضع مازدا فى مصر

ولا غبور هيقضى على المازدا عموما باللعابيه!!!!!!!!

مستنى ارائكم ياشباب

[محمد عز]

و على فكره يا أستاد محمد مع اني بحب الزووووم من زمان اوي.... بس تقريرك كان السبب في اقتناعي بيها 100% و من ثم الحمدلله شرائي ليها

ربنا يعزك ويحفظك من كل سوء

[Eng.Sameh]

السؤال هنا؟؟؟؟؟

بعد ما سمعنا ان غبور اخد توكيل مازدا وعمل اعلانات انه هيهتم بالمازدا

وهيفتح مراكز بيع وصيانه بما فيهم العربيات الخليجى

تفتكروا ده هيحسن وضع مازدا فى مصر

ولا غبور هيقضى على المازدا عموما باللعابيه!!!!!!!!

مستنى ارائكم ياشباب

أعتقد أن ده هيحسن وضع المازدا كتير .. ليه ؟
لأن معظم الناس معجبة جداً بالعربية ونفسهم يشتروها بس بيقلقوا فقط عشان التوكيل ، ورغم ذلك فالمازدا3 منتشر بشكل كبير ، وبالتالي وجود توكيل هيلغي النقطة اللي مقلقة الناس ، وكمان هيعلي سعر اعادة البيع لأن الأقبال هيزيد ، وكمان معتقدش ان غبور هيجيب نفس الكماليات وبالتالي اللي معاه خليجي ايرو يبقى عدى ويقدر يمسك في سعرها في المستعمل ( ده لو قلبه طاوعه يبيعها )

بالأضافة ان هيبقى فيه تنافس بين التوكيل والخليجي وده هيأدي لمصلحة العميل في الآخر ..

دي وجهة نظري ومستنيين رأي باقي الملاك والمهتمين.

[kholio]

اعتقد لو غبور اهتم بالمازدا هتنتشر الانتشار اللي كان المفروض تنتشره في مصر من زمان ومبيعاتها هترتفع جدا لانها فعلا كعربية محترمة جدا ومن احسن العربيات في فئتها السعرية دي

[محمد عز]

هل العربيه المازدا فى يوم عطلت منك او عملت موقف بايخ؟؟؟؟؟

انا عن نفسي لا

وانتم ياشباب ايه الاخبار؟؟؟؟

[محمد عز]

أعتقد أن ده هيحسن وضع المازدا كتير .. ليه ؟
لأن معظم الناس معجبة جداً بالعربية ونفسهم يشتروها بس بيقلقوا فقط عشان التوكيل ، ورغم ذلك فالمازدا3 منتشر بشكل كبير ، وبالتالي وجود توكيل هيلغي النقطة اللي مقلقة الناس ، وكمان هيعلي سعر اعادة البيع لأن الأقبال هيزيد ، وكمان معتقدش ان غبور هيجيب نفس الكماليات وبالتالي اللي معاه خليجي ايرو يبقى عدى ويقدر يمسك في سعرها في المستعمل ( ده لو قلبه طاوعه يبيعها )

بالأضافة ان هيبقى فيه تنافس بين التوكيل والخليجي وده هيأدي لمصلحة العميل في الآخر ..

دي وجهة نظري ومستنيين رأي باقي الملاك والمهتمين.

انا متفق معاك يا سامح فى وجهة النظر ده

وغير ان مافيش اى تعارض بين موديلات مازدا وهيوانداى اللى بتتجمع فى مصر

وهوا اكيد هيفكر بعقليه التاجر

يعنى i30 بيجبها مستورده ومش عليها اقبال

لكن المازدا هيجيبها مستورده وهيبقى عليها اقبال

يبقى هوا فى الاخر الكسبان

لكن ياشباب هل فعلا مش هيبقى فيه تعارض ما بين مبيعات الi30 والمازدا 3؟؟؟؟؟؟؟؟؟؟

[Eng.Sameh]

لكن ياشباب هل فعلا مش هيبقى فيه تعارض ما بين مبيعات الi30 والمازدا 3؟؟؟؟؟؟؟؟؟؟

ايش جاب لجاب يا كبير :) ، فيه فرق سعر مش قليل وهو بردو اكيد يا أما هيرخص ال i30 شوية يا أما هيغلي المازدا3 شوية ، المهم ان لو الفرق بين المازدا3 واي عربية هيونداي مش كبير يبقى انسى هيونداي ، وطبعا هو مش هيسيب الأمور لحد كده ، ده عيش يا عم الحج ورب ميرضاش بقطع الأرزاق

[Eng.Sameh]

هل العربيه المازدا فى يوم عطلت منك او عملت موقف بايخ؟؟؟؟؟

انا عن نفسي لا

وانتم ياشباب ايه الاخبار؟؟؟؟

الشر بره وبعيد ... .. مش هتلاقي عندنا الكلام ده يا حج محمد .. ممكن تسأل في قسم تاني

[محمد عز]

ايش جاب لجاب يا كبير :) ، فيه فرق سعر مش قليل وهو بردو اكيد يا أما هيرخص ال i30 شوية يا أما هيغلي المازدا3 شوية ، المهم ان لو الفرق بين المازدا3 واي عربية هيونداي مش كبير يبقى انسى هيونداي ، وطبعا هو مش هيسيب الأمور لحد كده ، ده عيش يا عم الحج ورب ميرضاش بقطع الأرزاق

انا كان قصدى اقل فئة فى المازدا بتبقى فول اتوماتيك وتبقى مشابهة او قريبه للفئات العاليه من الهيواندى I30 فالاختلاف هيبقى هنا

يعنى اجيب مازدا 3 فول اتوماتيك ولا هيوانداى i 30 فول اوبشن

لكن ال i30 بتبدا باسعار منافسه جدا

وفيها فتيش عادى وبالتالى هيبقى ليه زبون معتمد على فئتها السعريه اللى بتبدا من 100 الف واللى هوا بعيد جدا عن مازدا 3