الى مالكى المازدا3 ...قولنا انطباعك عنها؟

[محمد عز]

الشر بره وبعيد ... .. مش هتلاقي عندنا الكلام ده يا حج محمد .. ممكن تسأل في قسم تاني

كده هتعملنا مشاكل مع الاقسام التانيه....... :)

[mamido83]

السلام عيلكم رجالة المازدا، يا رب تكونوا بونو بونو كلكم

انا معايا مازدا3 2007 ايرو، شاريها مستعملة عاملة 50,000كيلو
العربية الحمد لله شاريها فابريكة بره و جوه ، و كشفت عليها فى سمارت كار.

.................................................. .................................................. .................................................. .................................................. ....
تقيمى للعربية من حيث استخدامى ليها لمدة 4 شهور جوه القاهرة بس و عملت فى الفترة دى 2,500 كيلو:
.................................................. .................................................. .................................................. .................................................. ....

1_ الشكل بسم الله ما شاء الله تحفة من بره و من جوه وعلامة المازدا عجابنى اوى. 10/9

2_ العدادات بالليل و شكل التابلوه جامد جدا لدرجة انى بهدى الاضاءه ساعات عشان بخاف من الحسد 10/9

3_ اماكن التخزين كتيره و درج التابلوه واسع، بس الشنطة مش واسعة و المفروض كان يبقى فى مكان لل sunglasses. 10/7

4_ العربية مريحة و واسعة من جوه بس مش عارف الى بيقعد ورا ايه ظروفه. 10/8

5_ التقفيل بتاع العربية ممتاز فى كل حاجة بس مش عجبنى خالص فى داير الابواب. 10/8

6_ العزل بتاع العربية من صوت و حرارة جيد جدا، بس عزل الصوت ... مش عارف بس ساعات بحس ان صوت الموتور و الفتيس و العربية واقفة عالى شوية. 10/8

7_ التكييف ممتاز بس كان نفسى يبقى فى وحده توزيع ورا و التكييف محسيتش انه مقصر على سحب العربية خالص. 10/8

8_ الكاسيت صوته ممتاز و السجنال بتاعت الراديو ممتازة من غير ما اركب الاريال. 10/9

9_ استهلاك البنزين مش عجبنى خالص، العربية بتعمل 165 كيلو فى ال 20 لتر من غير تكييف و سواقة معتدله كتيييييييير على حبت قرص شوية. 10/6

10_ سحب و صوت الموتور جيد جدا بالذات ال kick-down. 10/8.5

11_ الثبات فى الملفات ممتاز. 10/8

12_ الفرامل لحد دلوقتى الحمد لله جيده جدا و بتمسك كويس ب،س لسه مجربتش لو فيه مايه على الارض، و كمان مجربتش افرمل على سرعة كبيرة عشان اشوف العربية هتفرمل فى مكانها و لا عتحدف. 10/8

13_ العغشة معقوله، لا هى مريحة قوى و لا هى ناشفة. 10/7.5

14_ جسم العربية ضعيف شوية . 10/7.5

.................................................. .................................................. .................................................. .................................................. ....
ايه الى كنت اتمنى الاقيه فى الاوبشنز:
.................................................. .................................................. .................................................. .................................................. ....

1_ كان المفروض يبقى فيها ESP لتعزيز الثبات.

2_ فتحة السقف كانت تبقى one touch فى القفل كمان زى الفتح.

3_ الأزاز يبقى كلو اوتو فى الاربعة، مش بتاع الى بيسوق بس.

4_ المريات كانت تبقى ضم.

5_ سنسور امامى.

6_ اوتو لوك للابواب بعد ما العربية تمشى.

7_ المفروض يبان انهى باب الى مفتوح بالظبط عشان مش الاربع بيبان يتفتحو و يتقفلو تانى.

.................................................. .................................................. .................................................. .................................................. ....
ايه الى مش عجبنى خالص:
.................................................. .................................................. .................................................. .................................................. ....

1_ قطع الغيار غالية قوى زى حال كل الجديد بس مبالغ فيها شوية كتير.
2_ توكيل مش حاسين بيه، و اتمنى ان غبور يظبط الحته دى.
3_ سعر اعاده البيع مش كويس خالص للى جايبها زيرو.

.................................................. .................................................. .................................................. .................................................. ....
مشاكل حصلت قبل كده:
.................................................. .................................................. .................................................. .................................................. ....

1_ مرة نور العدادات بعد ما قفلت العربية قعد ((يرعش)) و حاولت انى افتح نور التابلوه و اقفلو تانى بس برده مكنش فيه فايدة، و الحكاية دى متحليتش غير لما دورت العربية و مشيت بيها و قفاتها تانى.

.................................................. .................................................. .................................................. .................................................. ....


....* العربية بجد مش ندمان خالص انى اشتريتها و بجد تحفة فى سواقتها و عمرى ما زهقت حتى لو الطريق زحمة زى المحور الى قعدت فيه قبل كده ساعتين و نص ;) ، بجد و الواحد و هو سايقها حاسيس انى من الاخر كده مبسوط و شكلها prestigious قوى و شكلها ملفت جدا.
انا جربت السيراتو الجديدة و هى عربية حلوة جدا و زى الفل بس بجد و الله و انا راكب فيها و سايقها محسيتش زى المازدا، بجد المازدا الله اكبر عليها.



انا اسف على العربى بتاعى، اخر مرة كتبت عربى من لما كنت فى الكلية من 4 سنين كده هههههههههههههه ، بس يا رب اكون عرفت اقيم العربية صح
اخوكم محمد

[janjon1978]

هل العربيه المازدا فى يوم عطلت منك او عملت موقف بايخ؟؟؟؟؟

انا عن نفسي لا

وانتم ياشباب ايه الاخبار؟؟؟؟

الحمد لله .. ما عملتهاش .. و يارب ميحصلش ابدا

[himaz]

بعد 16 الف كليو فى سنة و نصف
اية اللى عجبنى ؟؟؟
نبتدئ نعد مع بعض
1- الشكل الخارجى ... جامد موت مع انه من سنة 2003 الا انه مازال احلى من كل السيارات فى فئتها (نديلة 9\10 )
خصوصا مع الالوان الجامدة .. معايا لون ازرق زهرى .. لون جميل جدا و بينطق على العربية و الجنوط كمان دهنتها دهبى 100%

ربنا يباركلك فيها بسم الله ما شاء الله , فعلا اللون الازرق عليها حكاية و كان نفسى اجيبها بس لم اجد اللون ده (نصيب بقى )

[himaz]

اولا احب اشكر ربنا على كل نعمة فى حياتنا و الستر و الصحة ,
الحـمـد للـه علـى كـل مـا رزقـنـيـه من غيـر حـول منـي و لا قـوة.اللـهم بـارك لـي فـيما رزقـتني و ارزقنـي خـيرا منـه


و اشكر جدا كل المازدااوية الجامدييين اوى و شكر خاص ل محمد عز و سامح

كمان عندى اقتراح بمناسبة التجميعة دى عايزيين نعمل مقابلة و تعارف لكل المتزداوية فى مكان و زمان معين نتفق عليه

قبل بداية التقييم احب اوضح نقطة مهمة جدا هى ان التقييم ده بالمقارنة بفئة العربية و سعرها طبعا


1-التصميم والشكل
-------------
ما شاء الله الشكل رائع وممتاز ومن الاشكال المميزة اوى من بعيد بتبان بصمة العربية فى الشارع
وكمان مش بيقدم مع الزمن (فكرتونى بالسيفيك 93 احد الاشكال اللى علمت فى العربيات لحد دلوقتى ) والتابلوه ممتاز فعلا فخم و شيك جدا و الوان متناسقة

العلامة عاجبانى جدا وطبعا واضح من الامضاء بتاعى

التقييم 9\10


2-التقفيل و الخامات
------------
التقفيل ممتاز والخامات نضيفة جدا ودائما تحس انك فلوسك اتدفعت فى مكان صح

التقييم 9\10


3-الراحة و العزل
----------
العزل عالى جدا سواق فى صوت الموتور او الحرارة الخارجية

فعلا لو مش متاخد بالك من عداد ال "ار بى ام" ممكن تقرص على الموتور لانك مش سامعه


جميل اوى السمارت كى اولا بيسهل جدا فتح وتشغيل العربة بدون استخدام مفتاح وبيحافظ على الكوالين بالكامل و اللى بيمنع او بيقلل كتير سرقة العربية
وحتى فى حالة عطل السمارت كى او فراغ اليطارية تشتغل عادى جدا مانوتا فى فتح الابواب و ايضا تشغيل المحرك


التقييم 9.5\10


4- التكييف
--------
قوى و سريع


التقييم 9\10



5- ال سى دى و الصوت
---------------
اكثر من رائع و مش بحتاج انى اوصل لاعلى من درجة صوت 25


6- استهلاك البنزين
----------
هو ممكن مايكونشى احسن اتهلاك فى الفئة دى بس انا شايف انو تمام اوى خصوصا العربية 1600 سى سى وكمان سحبها الرياضى الرائع

بس نقدر نقول انو متوسط

التقييم 8.5\10



و كمان الاستهلاك ده هى بتعتمد على حاجات كتير اوى اوى زى :

1) سعة الموتور و قوته

2)تقل دوسة البنزين و التدريج فى زيادة السرعة

3)التدريج فى الفرامل او بمعنى اصح الفرملة على مسافات اطول

4)الزحمة فى الطرق

5)المطبات

6)السرعات القصوى و الصغرى والثبات عليها

7)الوقوف لفترات طويلة اثناء تشغيل المحرك او فى اشارات لزمن كبير زى عندنا فى مصر الحمد لله

8)الحفاظ على الموتور و عمل جميع الصيانات الدورية اللازمة و تصليح اى عطل مهما كان تاثيره يبان انو ضعيف
(حالة الموتور يعنى)

9)ظبط ضغط الهواء او النيتروجين فى جميع الاطارات الاربعة

10)كفاءة و نضافة البنزين المستخدم فى الموتور

11)كفاءة و نضافة الزيت المستخدم فى الموتور

12)وزن الحمل فى العربية من افراد او امتعة فى الشنطة

13)استخدام التكييف و درجة الحرارة الخارجية فى الوقت ده

14) استخدام ال كروز كنترول ان وجد

15) عدد الناس المختلفين اللى بيسوقو العربية و طريقتهم فى السواقة

16) طريقة السواقة عموما هادية و لا , انا بسميها السواقة الشيك للبرينسيسة


7- جسم العربية
---------
هو يبان ان الصاج الخارجى ضعييف شوية بس الحقيقة انو مرن من بره عشان من اى ترييحة صغيرة تدخل جوة كتيير و تسمكر بقى و الخنقة دى و انا شايف ان ده ميزة انو يعمل الصاج مرن شوية مع وجود طبعا الدعامات من الداخل للحفاظ على اللى جوه فى حالة الحوادث ربنا يحفظنا جميعا

العيب الواضح فعلا فى الاكصدام لان مع اى ترييحة مش لذيذة هوه مش حيقع بس حيفرق ويتاثر من الجانبين بالزات و دى حاجة فعلا تضاية

نصيحتى اختلر الاماكن اللى بتركن فيها تكون واسعة مش عشان انت مش عارف تركنها بس عشان تقلل ان اللى بيركنوا حواليك يريحوا عليها

لان للاسف اغلب الترييحات دى بتبقى و هى راكنة تنزل تجيلك الصدمة ليه عشان فى ناس ظراف بيرجعوا بالعربية للخلف لغاية ما تخبط فى العربية اللى وراه كده هوه وصل و هكذا


التقييم 9\10

8- العغشة
------

كويسة حتى مع وجود الجنط ال 16 بتاعها


التقييم 9\10


9- المشاكل
--------
الحمد لله مفيش مشاكل حتى الان


التقييم 10\10


10- اللى كنت بتمنى وجوده
----------------

وحدات رفع كاملة ال 4 زجاج + فتحة السقف ان وجدت
ضم المرايات بزرار من الدااخل
الأزاز يبقى كلو اوتو بانوار فى الاربعة، مش بتاع الى بيسوق بس
وجود سى دى تشانجر 6 اسطوانات بدل الكاسيت اللى مالوش لازمة
وجود وصلة ال aux .. اللى اصلا موجودة فى السى دى
كروز كنترول


11- التوكيل
---------

صراحة هو ده العيب الاساسى ان لحد دلوقتى مش شايف حد استاذ فى المازدا
سمارت كويسسسن بس مش الوهم عادى ,

بالنسبة اغبور اتمنى فعلا انو يهتم بيها زى مسمعنا و فى الاخر دى مصلحته قبل اى شىء
العربية فعلا ليها عشاق كتير بس اللى بيجيبوها مع الانتشار الملحوظ اعتقد لا يتعدى 40% من الناس دى


انا متفق جدا معال يا سامح فى النقطة دى

أعتقد أن ده هيحسن وضع المازدا كتير .. ليه ؟
لأن معظم الناس معجبة جداً بالعربية ونفسهم يشتروها بس بيقلقوا فقط عشان التوكيل ، ورغم ذلك فالمازدا3 منتشر بشكل كبير ، وبالتالي وجود توكيل هيلغي النقطة اللي مقلقة الناس ، وكمان هيعلي سعر اعادة البيع لأن الأقبال هيزيد ، وكمان معتقدش ان غبور هيجيب نفس الكماليات وبالتالي اللي معاه خليجي ايرو يبقى عدى ويقدر يمسك في سعرها في المستعمل ( ده لو قلبه طاوعه يبيعها )

بالأضافة ان هيبقى فيه تنافس بين التوكيل والخليجي وده هيأدي لمصلحة العميل في الآخر ..

دي وجهة نظري ومستنيين رأي باقي الملاك والمهتمين.

الحـمـد للـه علـى كـل مـا رزقـنـيـه من غيـر حـول منـي و لا قـوة.اللـهم بـارك لـي فـيما رزقـتني و ارزقنـي خـيرا منـه

[Eng.Sameh]

تسلم ايديك يا Himaz ، وواضح ان كل اللي بيمتلك العربية دي بيبقى بينه وبينها عشق غريب ( يعني مش أنا لوحدي ) .. ربنا يحفظنا جميعاً

[محمد عز]

شكرا ياحازم على ردك الوافى لكل الاسئله

ربنا يبارك فيك

[mamido83]

يا ريت يا م/محمد عز تقولنا على تقييمك انت للعربية
انت قولت

"انا تقريبا المازدا 3 داخله على سنتين معايا ، فى شهر 4 الجاى هيبقوا سنتين

بس مش هقول انطباعاتى عنها الا بعد ما اشوف باقى المشاركات من الاعضاء"

م/ محمد أحمد

[himaz]

شكرا ياحازم على ردك الوافى لكل الاسئله

ربنا يبارك فيك

العفو يا باشا

انا على فكرة اسمى ابراهيم Himaz هو اسم الشهرة

[محمد عز]

يا ريت يا م/محمد عز تقولنا على تقييمك انت للعربية
انت قولت

"انا تقريبا المازدا 3 داخله على سنتين معايا ، فى شهر 4 الجاى هيبقوا سنتين

بس مش هقول انطباعاتى عنها الا بعد ما اشوف باقى المشاركات من الاعضاء"

م/ محمد أحمد

عزيزى محمد

بعد العشره مع المازدا اقدر اقول

اللى عاجبنى فيها

الشكل الخارجى رائع ومميز
التصميم الداخلى مميز وشيك
المرونه فى المناورات وسرعه الاستجابه
الثبات على السرعات العاليه
قلة الاعطال والاعتماديه العاليه
تكييفها قوى



ايه اللى مش عاجبنى

الدريسكيون تقيل نوعا ما لان الباور استرينج هيدروليك وافضل لو كان كهربا
ازاز السواق هوا بس الاتو ، كنت افضل انه يكون الاربعا
مافيش كومبيوتر لحساب استهلاك البنزين
العزل كويس بس ممكن يبقى احسن من كده (اصلى مش بحب اسمع اى صوت نهائى)
مافيش فتحات تكييف خلفيه
درج التابلوه مش مكيف علشان السفر لو تستعمله زى التلاجه
استهلاكها للبنزين ممكن كان يكون احسن من كده

[mamido83]

الف شكر على التقيم الرائع لكل المازداوية و م/ محمد عز ،و انا حساس ان كل التقيمات بتاعتنا كانت متقاربه لحد كبير، و دى بجد اول مرة احس بمعنى المنتدى لما كلنا بننقل تجربتنا مع بعض

[janjon1978]

[quote=himaz;3872371832
10- اللى كنت بتمنى وجوده
----------------

وحدات رفع كاملة ال 4 زجاج + فتحة السقف ان وجدت
ضم المرايات بزرار من الدااخل
الأزاز يبقى كلو اوتو بانوار فى الاربعة، مش بتاع الى بيسوق بس
وجود سى دى تشانجر 6 اسطوانات بدل الكاسيت اللى مالوش لازمة
وجود وصلة ال aux .. اللى اصلا موجودة فى السى دى
كروز كنترول

[/quote]

تصدق ان هم حسيين بينا علشان كدة كل دة اتحط فى الموديل الجديد اللى نزل مصر بس السعر نار
الحقيقة كمان ان الحاجات دى موجودة اصلا فى الموديل القديم المواصفات الاوروبية و للسوق الامريكى

[janjon1978]

الدريسكيون تقيل نوعا ما لان الباور استرينج هيدروليك وافضل لو كان كهربا

بصراحة يا محمد الباور بتعها ممتاز .. الماتركس اللى كانت معايا قبل كدة --> الباور كان اتقل بمراحل
وعموما الموديل الجديد اللى فى مصر منزلينو ب باور electrohydrolic يعنى كهرباء و هيدروليك مع بعض

[himaz]

تصدق ان هم حسيين بينا علشان كدة كل دة اتحط فى الموديل الجديد اللى نزل مصر بس السعر نار
الحقيقة كمان ان الحاجات دى موجودة اصلا فى الموديل القديم المواصفات الاوروبية و للسوق الامريكى

فعلا لان الكلام ده موجود فى المانوال اللى جاى مع العربية

انا اعتقد ممكن تركيب المرايات دى لو الفيش بتاعتها ستاندارد موجودة فى كل العربيات , بس انا مش متاكد

[himaz]

بصراحة يا محمد الباور بتعها ممتاز .. الماتركس اللى كانت معايا قبل كدة --> الباور كان اتقل بمراحل
وعموما الموديل الجديد اللى فى مصر منزلينو ب باور electrohydrolic يعنى كهرباء و هيدروليك مع بعض

انا شايف الباور حلو واعتقد الباور الكهرباء فعلا اخف من العادى بس ليه عيوبه