حياتي مرت امام عينية .....انا حزين حتي الموت!!!!!!!!!!!!

[johnyweb]

انا حزين حتي الموت

الحمدلله علي كل شيء كنت ماشي في كورنيش المعادي وكان الطريق شبه فاضي من الامام ولكن زحمة من الخلف اذا بعربية هيونداي فيرنا سودا فيها شباب كانو يبتسرعو مع عربيه تانية انا مشوفتهاش والعربية الفيرنا قربت مني بسرعة مجنونة من الجنب اليمين حولت علي قد ماقدر اروح علي الشمال لكن خبطني في جنب العربية اليمين بالتحديد فوق الرفرف دربت فرامل العربية عومت مني الحمدلله محصلش حاجة وركنتها علي جنب وخت نفسي في 5 دقايق وشفت العربية الي لسة معملت بيها 200 كيلو

لحمدلله الفانوس سليم لكن ملاحظ الكابوت رجع لورا شويه والاكصدام اتعوج شويه
البوية سليمة الي حد ما في خدوش بس


هل التوكيل ممكن يخرج العربية من الضمان علشان الخبطة ديه ولا ايه رأيكو
انا بجد قلقان جدا
لو صيانة جوة التوكيل السمكرة تعمل كام

صورة للخبطة في المرفقات

[theking2690]

لأ طبعا ايه الى هيخرج العربيه من الضمان كده هو انت لعبت فى حاجه فيها ديه حادثه و ده شىء عادى وممكن يحصل لأى حد فينا لا قدر الله و حمدالله على سلامتك اهم حاجه و انا دايما والدى بيقولى من ساعة ما بدأت اسوق ان اللى يجى فى الحديد ممكن يتصلح انما اللى يجى فى البنى ادم ما بيتصلحش

[fahd_628]

متقلقش يا باشا اهم حاجة سلامتك و متخافش العربية مخرجتش من الضمان ولا حاجة دية حاجة عادية و واردة فى اى عربية

[شاهين - بنز]

ياعم متزعلش ولاحاجة الحمد لله إنها مجتش في الفانوس إللي تقريبا سعره فوق ألف جنيه
إن شاء الله تترد على البارد وترجع زي من الأول
وأهم حاجة نتخيل -لا قدر الله- لو حصل الأسوء ونحمد ربنا على الوضع الحالي

[hazem_khidr]

الف حمد لله علي سلامتك
الحمد لله انها جات علي قد كده.
بس اشك ان كليبسات الفانوس اتكسرت
اي حد بتاع لحام بلاستيك نضيف ممكن يضبطها لو اتكسرت فعلا.
و بعدين سيب الخبطه شويه تاخد العين
معاك انها حاجه تحزن بس قضي اخف من قضا

[مصراوي جدا]

أهم حاجه حمد لله على سلامتك واللي ييجي في الحديد يتصلح

هو يا ريت حضرتك تكون لحقت تأمن عليها ، ودي النصيحة اللي باقولها لكل واحد يشتري عربية جديدة نظرا لكثرة الحوادث اليومين دول

لو العربية متأمن عليها حضرتك ممكن تجيبها التوكيل يتعمل لها مقايسة (يعني تحديد اللي العربية محتاجاه قطع غيار واصلاح ) وبعدين مهندس التأمين ييجي يعاين ويوافق وبعدين يبدأ الاصلاح

لو مش متأمن عليها وتحب حضرتك برضه نعملها في التوكيل مع محاولة ضغط المصاريف برضه حضرتك شرفنا (بدون أي التزامات او مصاريف للمعاينة) وهخلي المهندس يعاينها ويقول ممكن نعمل فيها ايه وحضرتك تختار تعملها عندنا أو بره

بخصوص الضمان فمفيش حادثة تخرج من الضمان الا لو كان حصل ضرر لحاجة زي الردياتير مثلا وبيسرب نتيجة الحادثة فطبعا مينفعش نقول نغيره في الضمان (يعني ده كلام منطقي عادي)

احنا شغالين من 8 : 4 كل يوم ما عدا الجمعة - مركز خدمة قليوب الكيلو 16

[Karim_Monir]

الف سلامة عليك وكويس انك بخير
الواحد بيزعل على الحديد طالما هو بخير
لو لا قدر الله حصلك خدش هاتهون عليك اي حاجة الا صحتك
ربنا يديمها عليك نعمة
-----------
باشمهندس طارق
انا هانزل ابيع عربيتي واشتري لانسر عشان الدلع اللي انت مدلعة لاعضاء المنتدي ده
ربنا يديم المعروف

[مصراوي جدا]

باشمهندس طارق
انا هانزل ابيع عربيتي واشتري لانسر عشان الدلع اللي انت مدلعة لاعضاء المنتدي ده
ربنا يديم المعروف

ربنا يبارك لك في عربيتك ويزيدك وتبقى التانية لانسر برضه علشان نشوفك كتير عندنا

[islamnabil]

قدر الله ما شاء فعل
الحمد لله انها جت على قد كده
ربنا يعوضك

[johnyweb]

شكرا لرضوضكم ومواستكم
انا رحت النهارده التوكيل فرع جسر السويس كان اقرب حاجة للمعادي
انا بجد اسف علي الكلام الي هاقوله ده وطبعا عمري ماهشك في ذوق المشمهندس طارق وياريتني كنت فعلان روحت القليوبية لكن المعاملة سيئة للغاية في جسر السويس
وصلت الساعة 10:15 تقريبا وبعد صباح الخير دخلت علي الاستقبال واذا موظف الاستقبال بحكيلوا عندي خبطة في العربية وعايز اردها قالي في ضغط وممكن تحجز ميعاد قولتلو ديه حاجة مش هاتاخد وقت قالي ممكن تنتظر ساعة لغاية ما المشرف ينزل ويعاين العربية ويقولك ممكن تتعمل النهاردة ولا نحجز ميعاد قولتلوا يعني استني ساعة علشان اعرف هاتتعمل النهاردة ولا لا علما انا متصل بالتليفون الصبح وقالولي اروح بالعربية عادي طالما حاجة مش هاتاخد وقت المهم فين وفين نزل مشرف الصنايعية وبص علي العربية وقالي ممكن تتعمل لكن مش هاترجع زي الاول يعني بنسبة 70% كداوهتتعمل علي البارد وهاتاخد بتاع ساعتين او 3 ساعات
قولتله التكلفة ممكن تكون كام قالي 300 جنية فين وفين نزلي 50 جنيه مع انها رد بس ويستعدل الاكصدام
انا امبارح مفتحتش الكبوت بعد الخبطة
لكن النهارده المظف فاتحها
التلفيات كانت :
- ودان الفانوس اتكسرت اوحي ليا انو مش هاينفع وهايحاول يعمل حاجة فيها.
- الباقي كان خدوش في الرفرف اليمين والخبطة في الاكصدام والرفرف
طلعت فوق في الاستقبال وكنت بتفرج علي الشغل الي بيحصل للعربيات من الشباك الزجاج
وطبعا السمكرة كانت في دور تاني ومشفتش حاجة المهم بعد ساعتين الا شويه نادوا عليا
واشوف العربية
لموها شويه لكن الشغل معجبنيش انا حاسس اني في ورشة في الشارع مش في التوكيل المشرف الصنايعي يقولي كدا احسن حاجاة معقولة مفيش معدات او اجهزة تخليها قريبة من الطبيعي .
وافاجيء وانا ماشي بعد مادفعت الفاتورة وماشي بجرب العربية لقيت سلك مددل من الكاسحات من قدام شكيت في الانوار شغلتها وافاجء لا شبورة ولا اشارة لمين مطرح الشغل شغالة بجد مش عارف اقول ايه بس تجربتي وتقيمي للشغل سيء للغاية وشكلي مش هاروح هناك تاني لو لينا عمر هابقي اعمل صيانة 1000 في القليوبية.
شكرا ليك يابشمهندس طارق ويريت لوتوصل تقيمي السيء للفرع هناك.

[aif]

يا باشا فداك 1000 عربية الحمد لله انك سليم والناس اللي كانو حوليك بخير
والله العربيات كلها ما تسولش ضفر بني آدم
الحمد لله علي سلامتك قدر الله وما شاء فعل
نصيحة عمومية ... المكان اللي لك فيه معرفة ح يكون احسن كتيييير من غيره علي الاقل ح يكون الشغل بضمير ومن غير لكلكه ..

[johnyweb]

الحمدلله علي كل شيء

[Nile_Storm]

المهم سلامتك

[limo]

الف حمد لله على السلامه وكويس اوى اوى انها جت على اد كده
انت بقول انك لما دوست فرامل العربيه عومت منك طب ازاى ده واضخ ان عربيتك سبورت وفيها abs ؟؟؟؟؟

[bassam nagy]

قدر الله وماشاء فعل