أنت تسأل وإسـتـشـارى منتدى متسوبيشى يجيب

[مصراوي جدا]

الاستاذ طارق
السلام عليكم و رحمة الله وبركاتة
انا عندى عربية لانسر 2006
كنت شاريها من الجيش
وعملت صيانة الالف فقط فى التوكيل و بعدين العربية وصلت 40 الف و عايز اعمل الصيانة فى التوكيل
والسؤال هو هل تفرق لو عملت الصيانة فى جسر السويس على اساس انها اقرب بالنسبة لى ولا اروح قليوب احسن
ثانيا التكاليف حاتكون فى حدود كام
ثالثا فية حاجات كتيرة صغيرة باظت فى العربية بطريقة مريبة مثلا الشنطة مش بتفتح بالمفتاح لازم تفتح باليد اللى داخل العربية
وعوامة البنزين بايظة يعنى ابقى مفول وبعد 100 كم اللمبة تنور افول تانى تاخد 10 لتر التكييف بقى ضعيف جدا
الساعة بتركن وامح من المفاتيح الاصلية اتكسر من الريموت
فهل تصليح هذة الاشياء مكلف فى التوكيل ولا احاول اشوف سكة برة ولو كدة هل تنصح بمكان معين علما بانى ساكن فى مدينة نصر
وبالمناسبة اعتقد انى محتاج تيل فرامل كمان العربية اوتوماتيك و انا غيرت التيل مرة و احدة برة التوكيل
انا المفروض اعمل الصيانة الاسبوع الجاى علشان انا حاكون اجازة
و اخيرا جزاك الله كل خير
م/ محمد على

اهلا يا باشمهندس محمد

عربيات الجيش ضمانها تبع الوكيل مصرية (3 سنوات او 60 ألف كيلو ايهما أقرب) واكيد حضرتك عارف المعلومة دي طالما عملت صيانة الألف في التوكيل وكان الأفضل ليك تحافظ على الضمان بعمل صيانة العشرة والعشرين والتلاتين لأن عوامة البنزين والساعة لو فيهم مشاكل المفروض يتغيروا في الضمان


عموما حضرتك ممكن تروح جسر السويس تعمل صيانة الأربعين وهي تتكلف حوالي 1500 جنيه لو فيه تغيير تيل فرامل وزيت اوتوماتيك (لو العربية اوتوماتيك) واقل لو العربية مانوال

وعموما لما حضرتك تروح هتقول لهم على المشاكل اللي فيها وهما هيقولوا تتكلف كام وبالتالي تحكم تعملها ولا لأ

ارجو الاتصال بهم لحجز موعد للصيانة تليفون 26981976 - 26982975

[fekriano]

ليه الياباني كله لا يهتم بأمان السائق يعني أعلى حاجه في الإير باج كان 2 في الياباني ؟؟؟؟؟ بينما الأوروبي كله على الأقل 4 إيرباج
ثانيا ليه بتخففوا وزن السياره بينما stability بتقل مع تخفيف الوزن مع السرعات العاليه و هل ده معناه ان الياباني مش بتاع سرعات عاليه بعيدا عن الهوندااا ؟؟؟
أنا معايا ثمن الميتسوبيشي الجديده لكن بصراحه متردد أشتريها ياريت تطمنني بالرد على الإستفسارات ديه ؟؟؟؟؟؟

[fekriano]

أنا والله مش بقلل من ميتسوبيشي بس بصراحه العربيه حاجه تحفه بس حوار الإير باج ده قالقني و يارب تنزلوا عربيه حلوه يكون فيها اير باج

[مصراوي جدا]

ليه الياباني كله لا يهتم بأمان السائق يعني أعلى حاجه في الإير باج كان 2 في الياباني ؟؟؟؟؟ بينما الأوروبي كله على الأقل 4 إيرباج
ثانيا ليه بتخففوا وزن السياره بينما stability بتقل مع تخفيف الوزن مع السرعات العاليه و هل ده معناه ان الياباني مش بتاع سرعات عاليه بعيدا عن الهوندااا ؟؟؟
أنا معايا ثمن الميتسوبيشي الجديده لكن بصراحه متردد أشتريها ياريت تطمنني بالرد على الإستفسارات ديه ؟؟؟؟؟؟

اهلا يا استاذ فكري .. مين قال ان ميتسوبيشي لا تهتم بأمان السائق.. تعال حضرتك التوكيل شوف عربيات الحوادث هتلاقي الجزء الوحيد اللي سليم في العربية مهما كانت الحادثة جامدة هو كابينة الركاب والتابلوه مهما كانت قوة الحادثة لا يتحرك سنتيمتر واحد في اتجاه الركاب بخلاف عربيات تانية بتلاقي التابلوه راجع على الركاب

العربيات الميتسوبيشي مصممة تبعا لنظام RISE العالمي Reinforced Impact Safety Evolution (RISE)
ممكن حضرتك تقرا عنه هنا في الويكيبيديا
http://en.wikipedia.org/wiki/Mitsubishi_RISE

ده بيحط سلامة الركاب نمرة واحد
اما بخصوص الايرباج فشركة ميتسوبيشي عاملة 7 ايرباج في اللانسر الشارك (2 أمامي و2 في جنب الكراسي الأمامية و2 ستارة جانبية و 1 لركبة السائق كمان) وبالطبع دي كماليات بترفع من سعر العربية وبالتالي اللي بينزل مصر الاتنين ايرباج فقط

عموما شوف حضرتك عوامل الأمان في صفحة 22 من كتالوج العربية له لنك في الصفحة دي وكذلك موقع العربية له لنك برضه في نفس الصفحة

http://www.mitsubishi-motors.com.eg/products/lancer/Lancer%20EX/overview.html

أما بخصوص الاتزان فحضرتك لو قريت في المنتدى هنا هتلاقي ان من اكبر مميزات اللانسر هو الاتزان

[mgk_tex]

السلام عليكم
يا ريت يا بشمهندس تقولى الفتحه دى اللى بجوار الدركسيون فى الصوره بتاعت ايه
وشكرا

[Mohammad]

بسم الله الرحمن الرحيم
اولا نتشكر على الرد السريع يا استاذ طارق
انا كلمت التوكيل فرع جسر السويس قالى ان اول ميعاد 25 نوفمبر
فهل دة طبيعى انى استنى شهر وهل دة نفس الحال فى فرع قليوب علشان انا عايز اعمل الصيانة الاسبوع القادم
وجزاك الة كل خير
م / محمد على

[مصراوي جدا]

هو الحقيقي فرع جسر السويس الضغط عليه عالي علشان داخل القاهرة اكتر من قليوب واقرب لسكان مصر الجديدة ومدينة نصر والمعادي

انا اجازة النهارده انما بكره باذن الله اشوف الحجز عندنا في قليوب واحجز لحضرتك الاسبوع القادم لأن الحجز في قليوب اقرب كتير من جسر السويس

وفرصة نتشرف بمعرفتك

[nobody]

السلام عليكم
يا ريت يا بشمهندس تقولى الفتحه دى اللى بجوار الدركسيون فى الصوره بتاعت ايه
وشكرا

الفتحة دي بتاع صوت طن طن طن أول ما تحط المفتاح في الكوناكت

[Islam Amer]

لا تنسي ذكر الله

السلام عليكم : انا ليه سؤال فني بسيط وهو
لو حبيت اغير طقم البوجيهات القديم بجديد عند ميكانيكي وانا في فتره الضمان الوكيل (هل يسقط الضمان)

[مصراوي جدا]

هي المحافظة على الضمان معناها المداومة على عمل الصيانات الدورية في التوكيل وهي صيانة الألف ثم صيانة العشرة ثم العشرين ثم التلاتين وهكذا كل عشرة آلاف كيلو فيه صيانة.

وفي كل صيانة بيتم المراجعة على الزيوت والفلاتر والسيور والبوجيهات للتأكد من سلامتها حتى قبل ان يحين موعد تغييرها الطبيعي ، وبالتالي فحضرتك لو مداوم على الصيانة الدورية مش هتحتاج تغير اي شيء خارج مواعيد الصيانة الطبيعية وحتى كمان الزيت بننصح بموبيل 1 (او ما يماثله) اللي بيقعد 10 آلاف كيلو علشان العميل لا يحتاج يعمل اي حاجه في العربية في غير مواعيد الصيانة الدورية اكتر من البنزين

انما بشكل عام سقوط الضمان معناه عمل شغل خارج التوكيل ادى الى تلف جزء معين او قطعة غيار في العربية فدي لا يتم تغييرها في الضمان

مثال ذلك : تغيير الجنوط بجنوط عريضة كبيرة تتلف العفشة والمساعدين

[مصراوي جدا]

بسم الله الرحمن الرحيم
اولا نتشكر على الرد السريع يا استاذ طارق
انا كلمت التوكيل فرع جسر السويس قالى ان اول ميعاد 25 نوفمبر
فهل دة طبيعى انى استنى شهر وهل دة نفس الحال فى فرع قليوب علشان انا عايز اعمل الصيانة الاسبوع القادم
وجزاك الة كل خير
م / محمد على

باشمهندس محمد
تم الحجز لحضرتك في مركز خدمة قليوب يوم الاثنين 3-11
لو اليوم مش مناسب ممكن تعديله لأحد الأيام التاليه له وارجو ابلاغي به
ارجو الحضور مبكرا الساعة 8 صباحا
مع الشكر

[Islam Amer]

لا تنسي ذكر الله

جزاك الله خيراااا

[wakod]

طبعا جزاك الله كل خير عن مجهودك معانا فعلا انت انسان رائع وكل الناس بتحبك فى المنتدى وزميلاك فى قليوب كمان انا كنت هناك يوم الاحد(26\10) وسألت على حضرتك وعرفت أد اية انك انسان محترم (طبعا ماكنش أصدى حاجة من السؤال غير انى كان نفسى اسلم عليك فقط وبجد مهتموش غير لما ٍسألت عليك وحسوا انى اعرفك طبعا ليا عظيم الشرف انى اعرف شخص زىحضرتك واسف ازا كنت ضيقتك بحاجة زى كدة) .انا زى ماقلت لحضرتك انى كنت هناك يوم الاحد وكان معايا عربيتي عملة حادثة وقالولى الخبطة جامدة لانها واصلة للفتيس والايرباج طبعا فتح وقالو حنعمل مقايسة واسبوع وحنكلمك وكان ليا رجاء عند حضرتك لو يستعجلوا المقايسة عن كدة شوية علشان انا اخطرت شركة التأمين وقالولى خلال يومين حينزل حد من التأمين يعاين وياريت لو ينفع اعرف ازا كانت حاتتكهن ولا لا (يارب تتكهن علشان انا سمعت عندكم اسعار خيالية) العربية ملاكى الشرقية 61953 رقم الشاسية73779 باسم مصطفى محمود يوسف واكد
ولسيادتكم جزيل الشكر

[مصراوي جدا]

اهلا بيك يا استاذ مصطفى وشكرا على ذوقك وكلامك الجميل .. انا للأسف كنت اجازة الأحد امبارح وما اسعدنيش الحظ اشوف حضرتك ، وعموما الناس في الاستقبال في قليوب عارفين نايل موتورز ولما حد يقول لهم طرف المهندس طارق او نايل موتورز بيكون له معاملة خاصة

باذن الله بكره الصبح اشوف موقف العربية وامكانية عمل المقايسة سريعا وابلغ حضرتك

[Mohammad]

الاستاذ طارق
السلام عليكم ورحمة الله وبركاتة
اولا جزاك الله كل خير و متشكر جدا على الاهتمام وان شاء الله اكون موجود يوم الاثنين 8 صباحا بس اطمع فى العنوان و الوصفة من حضرتك
ثانيا اتمنى انى اقابل حضرتك فى قليوب علشان اشكرك
ثالثا هل مطلوب تأكيد الحجز ولا هوا كدة ماشى خلاص
و السلام عليكم ورحمة الله وبركاتة
م / محمد على