أنت تسأل وإسـتـشـارى منتدى متسوبيشى يجيب

[مصراوي جدا]

معقول يابشمهندس طارق شركة كبيرة زى ميتسوبيشى عندهم عيب فى تصميم فتحات التكييف وممكن العيب دة يتحل امتى وازاى؟؟؟

دكتور محمد.. الموضوع مجرد شكوى من بعض العملاء ولم يرقى لكونه عيب تصميم علشان ميتسوبيشي تغيره لأن العربية لها سبع سنوات في الأسواق ولو كان عيب تصميم ووصل لها شكاوي من عدة بلدان من الموضوع ده كان تم تغيير بالتأكيد على مدار السبع سنوات عمر الموديل ده

فأرجو عدم اعطاء الأمور أكبر من حجمها

[moh_alaa]

سؤال للمهندس طارق و للأعضاء المحترمين انا عندى لانسر2007 (1600) عاملة 20000 لما ذهبت للصيانة (مركز خدمة الشيراتون ) بمصر الجديدة قالوا ان تيل الفرامل محتاج تغير وسعرة 475 وانا لم اشعر باى شىء اثناء القيادة و هل معقول ان التيل محتاج تغير بعد 20000 كم انا كان عندى لانوس وغيرت التيل بعد 40000 كم وهل السعر سليم
وشكراً على الجهود الرائع

[Islam Amer]

لا تنسي ذكر الله

انا ان شاء الله ناوي اشتري بومه 2009 اتوماتيك بس حابب اعرف بعض الاشياء: بعد اذن سيادتيكم
1: انا عرفت من كلام حضرتك ان البومه 2009 لا يوجد بها كاسيت ولكن يوجد بها تجهيزات الكاسيت - اما اليومه 2009 الهاف سبورت يوجد بها راديو كاسيت
السؤال1: هو في حاله شراء اي من السيارتين هل ممكن اركب كاسيت الخاص بي في اي مكان ولا لازم يكون مكان محدد عالشان لا يتلغي الضمان السياره

السؤال2: لو حبيت اشتري البومه 2009 واستفيد من الضمان في اي مكان اشتري السياره لاني كنت عايش بره ولسه جي من فتره قريبه ومش عارف اي حاجه عن التوكيلات هنا في مصر (انا عايز اشتريها خليجي ان شاء الله)

السؤال3: هل في البومه لا يوجد بها جهاز انذار وفي حاله لا يوجد بها كيف اركب جهاز انزار بدون لا يسقط الضمان

السؤال 4: وهل يوجد مراكز معتمده يتم تركيب فيها الكاسيت الخاص بي وجهاز الانذار بدون لا يسقط الضمان

السؤال5: ماهي ايموبيليزر

وشكرا جداااا
وانا اسف جدا علي الازعاج وكثره الاسئله يا استاذ طارق

وجزاك الله خيرا

[مصراوي جدا]

اهلا بيك معانا في المنتدى
الأول نقول الفرق بين العربية مصري و الخليجي ، لأن كل اسئلة حضرتك على المصري وفي نفس الوقت بتقول عايز اشتري خليجي.

اللانسر المصري يعني عربية صناعة يابانية 100% انما مستوردة عن طريق الوكيل (شركة مصرية) وعليها ضمان 3 سنوات او 100 ألف كيلو ، وللمحافظة على الضمان لابد من عمل الصيانات الدورية بانتظام في مراكز الخدمة التابعة للوكيل او المعتمدة منه (اول 1000 كيلو ثم كل 10 آلاف كيلو)

اللانسر الخليجي يعني عربية صناعة يابانية 100 % برضه انما مستوردة عن طريق الوكيل في الخليج الى الدولة الخليجية ومعاد تصديرها الى مصر لحساب احد التجار او المعارض المصرية حيث سمح القانون بذلك منذ عدة سنوات لمحاربة الاحتكار.

بخصوص ضمان الخليجي فالعربية الخليجي خمس انواع :
1- عربية عليها ضمان 3 سنوات زي ضمان الرواس ودي اماراتي ، وللمحافظة على الضمان لازم تعمل الصيانات الدورية في مركز من مراكز الرواس الأربعة التابعة له.
2- عربية عليها ضمان سنة واحدة او سنتين زي هاي تريد والصيانات تتم في مركز صيانتهم. وفيه بعض المستوردين مثل هاي تريد تقدم سنة او 2 ضمان.
3- مجموعة معارض بتستورد العربية وتتفق مع مركز خدمة مثل مركز صبحي سند في مدينة نصر على ان الضمان سنة والصيانة تبعه في مركزه ، واعتقد كمان مركز أمير وجوزيف.
4- عربية ملهاش ضمان والمعرض صادق وبيقول لك العربية ملهاش ضمان. وفي الحالة دي ممكن تعمل الصيانة في الوكيل او في اي مكان انما بدون ضمان
5- عربية ملهاش ضمان والمعرض كاذب وبيقول لك دي ضمان الوكيل او ضمان الرواس وهي دفتر الضمان بها لا مختوم من ده ولا ده وليس لها ضمان

بالنسبة للبيانات والأسعار اللي انا بانزلها بتكون كلها على العربية المصري (من الوكيل شركة مصرية حيث أنني اعمل بالشركة) انما الخليجي نظرا لتنوعه الشديد واختلاف كمالياته واسعاره ومستورديه فمعلوماتي عنه بسيطة

بخصوص تركيب جهاز كاسيت او انذار في عربية مصري وهل يمكن التركيب في الوكيل ولو بره هل ده يخرج من الضمان ؟

مراكز خدمة الوكيل لا يتم تركيب اجهزة كاسيت او انذار بها
انما دائما ننصح بتركيب اجهزة الكاسيت او الانذار في مراكز متخصصة وليس عند كهربائي عادي لأن المراكز المتخصصة يتعاملوا مع العربية بشكل احترافي (واشتغلوا في مئات العربيات اللانسر قبل كده) وهم على علم بأن بها وحدة كمبيوتر وان حدوث اي قفلة ممكن تتلفه اما الكهربائي فممكن يعمل القفلة او يجرب اي تجارب تؤدي لتلف وحدة الكمبيوتر

لو حضرتك عاوز تشتري البومة 2009 مصري من الوكيل ممكن تتصل بتليفون 19830 والأسعار مذكورة في المواضيع اللي في توقيعي وكذلك فيه خصم 750 جنيه لأعضاء نايل موتورز على البومة من الوكيل.

بخصوص الايموبيليزر فهو وحدة خاصة بقراءة مفتاح السيارة المشفر بحيث ان المفتاح الأصلي يكون له كود او شفرة معينة يتم قراءتها من تلك الوحدة ولو الكود صحيح يتم ارسال اشارة للمحرك للدوران ولو المفتاح نسخة غير صحيحة فسوف يفتح الابواب فقط لكن لن يحتوي على الكود او الشفرة وبالتالي العربية لن تدور

[Islam Amer]

لا تنسي ذكر الله

جزاك الله خيرا

[مصراوي جدا]

سؤال للمهندس طارق و للأعضاء المحترمين انا عندى لانسر2007 (1600) عاملة 20000 لما ذهبت للصيانة (مركز خدمة الشيراتون ) بمصر الجديدة قالوا ان تيل الفرامل محتاج تغير وسعرة 475 وانا لم اشعر باى شىء اثناء القيادة و هل معقول ان التيل محتاج تغير بعد 20000 كم انا كان عندى لانوس وغيرت التيل بعد 40000 كم وهل السعر سليم
وشكراً على الجهود الرائع

اولا بخصوص سعر تيل الفرامل فهو 385 جنيه شامل ضريبة المبيعات وسعر التركيب 45 جنيه (مش عارف هو زود ليه 45 جنيه ربما فيه حاجه تانية ولو تم اصدار فاتورة بهذه القيمة او المحاسبة بهذا الشكل ارجو ابلاغي لبحث الأمر)


بخصوص موعد التغيير فان تيل الفرامل من المستهلكات بالعربية واللي بتعتمد على طبيعة استخدام قائد السيارة وكذلك على ان العربية مانوال ولا اوتوماتيك حيث ان الاوتوماتيك تستهلك التيل اسرع

من المؤشرات المهمة لانتهاء التيل

(1) انخفاض مستوى زيت الفرامل

(2)سماع صوت صفارة من الفرامل كلما تم الضغط عليها

وفي مراكز الخدمة المعتمدة لا يتم تغيير التيل بها حتى يصل لأدنى مستوى له (حديد على حديد) ولكن على اساس ان العميل منتظم في الصيانة الدورية كل 10 آلاف كيلو يتم تغيير التيل اذا ما كان المتبقي منه لن يصمد لموعد الصيانة القادمة حتى لا يؤثر على الطنابير ، وكذلك فيتم دائما اعلام العميل واخذ موافقته قبل التغيير مع تسليمه التيل القديم

[emadosman63]

أستاذ طارق بعد التحية هل ميتسوبيشى ايفو هى الشارك

[NAGUIB]

م.طارق ارجو المساعده

انا عايز اغير سير الكاتينه لعربيتي لانسر مو2000 بس مش عارف هو لازم اغير الطقم بتاع الكاتينه كله و لالأ تقريبا الطقم بيبقي سير و بليه و شداد و لو غلطان يا ريت تصلحلي و توكيل بقه و لا دمشق و التوفيقيه و الكلام ده...؟؟؟
و يا ريت اعرف هو الكلام ده بيحصل كل كام كيلو....؟

[مصراوي جدا]

اهلا يا استاذ نجيب

تغيير سير الكاتينة في اللانسر بيكون كل 80 ألف كيلو متر ولازم يتغير الطقم كله سير وبلية شداد

صيانة التمانين بشكل عام بيتم فيها تغيير باقي السيور والبوجيهات والفلاتر والزيوت (هي الصيانة التقيلة الثانية بعد صيانة الاربعين) وعلشان كده بتتكلف من 1500 الى 2000 جنيه حسب فيه زيت فتيس اوتوماتيك لو العربية اوتوماتيك وتيل فرامل ولا لأ.

عموما نصيحتي اشتري سير كاتينة وبلية شداد اصلي واعملها مكان ما تحب في التوكيل او بره لأن العربية زي الجنيه الدهب لما تحافظ عليها هتعيش معاك بحالتها باذن الله

[مصراوي جدا]

أستاذ طارق بعد التحية هل ميتسوبيشى ايفو هى الشارك

اهلايا استاذ عماد

هو دايما اللانسر ايفوليوشن بيكون شكلها شبيه للانسر العادية مع تعديلات وحاليا الايفوليوشن X موديل 2008 هي نسخة معدلة من الشارك

الايفو بمحرك 2000 سي سي 291 حصان (الباجيرو 3800 سي سي 275حصان)

من موقع ميتسوبيشي أمريكا :

دي الشارك

محرك 1500سي سي مايفك 109 حصان (دي اللي بتنزل مصر)
ومحرك 2000 سي سي مايفك 152 حصان
أمريكا كمان عندهم 2400 سي سي 168 حصان


http://www.mitsubishicars.com/MMNA/jsp/lancer/09/i ndex.do?loc=en-us


ودي الايفو (عشرة) محرك 2000 سي سي تيربو تشارجر 291 حصان






http://www.mitsubishicars.com/MMNA/jsp/evo/08/inde x.do?loc=en-us

تاريخ الايفو كله (العشر موديلات) هنا

http://www.mitsubishicars.com/MMNA/j...sider/index.do

[HeMa_LanCeR]

ياسلام عليك يا أستاذ طارق
طول عمرك فنان فعلا انا كنت هموت واعرف العربيات الأيفو
شكرا يا أستاذ طارق علي المجهود الرائع
ومعلش كان عندي سؤال هو تغيير الزجاج الأمامي للكريستاله سعره كام في التوكيل علشان انا غيرته من بره من فتره واتشرخ مكان المرايا ودي مش اول مره اشوف فيها كريستاله الزجاج مكسور مكان المرايا مش عارف ليه هتجنن من الموضوع ده وهو عندي اتشرخ والشرخ كل يوم بيكبر فا كنت عايز اعرف سعره علشان لو كده اغيره في التوكيل متهيألي هيكون احسن ولا ايه ؟
وشكرا جدا لحضرتك

[NAGUIB]

الف الف شكر

اولا الف شكر ليك يا بشمهندس طارق علي تعبك و متابعتك لمواضيع و مشاكل الاعضاء
ثانيا انا كنت عايز اعرف هو الموضوع ده هيتكلف كام لو هاجيب السير و البليه من بره بكام و لو في التوكيل بكام طقم الكاتينه بس كسعر قطع غيار بس و التركيب بكام
و شاكر ليك جدااااا.....:k10:

[Mohammad]

الى الاستاذ / طارق

الاستاذ طارق
السلام عليكم و رحمة الله وبركاتة
انا عندى عربية لانسر 2006
كنت شاريها من الجيش
وعملت صيانة الالف فقط فى التوكيل و بعدين العربية وصلت 40 الف و عايز اعمل الصيانة فى التوكيل
والسؤال هو هل تفرق لو عملت الصيانة فى جسر السويس على اساس انها اقرب بالنسبة لى ولا اروح قليوب احسن
ثانيا التكاليف حاتكون فى حدود كام
ثالثا فية حاجات كتيرة صغيرة باظت فى العربية بطريقة مريبة مثلا الشنطة مش بتفتح بالمفتاح لازم تفتح باليد اللى داخل العربية
وعوامة البنزين بايظة يعنى ابقى مفول وبعد 100 كم اللمبة تنور افول تانى تاخد 10 لتر التكييف بقى ضعيف جدا
الساعة بتركن وامح من المفاتيح الاصلية اتكسر من الريموت
فهل تصليح هذة الاشياء مكلف فى التوكيل ولا احاول اشوف سكة برة ولو كدة هل تنصح بمكان معين علما بانى ساكن فى مدينة نصر
وبالمناسبة اعتقد انى محتاج تيل فرامل كمان العربية اوتوماتيك و انا غيرت التيل مرة و احدة برة التوكيل
انا المفروض اعمل الصيانة الاسبوع الجاى علشان انا حاكون اجازة
و اخيرا جزاك الله كل خير
م/ محمد على

[مصراوي جدا]

ياسلام عليك يا أستاذ طارق
طول عمرك فنان فعلا انا كنت هموت واعرف العربيات الأيفو
شكرا يا أستاذ طارق علي المجهود الرائع
ومعلش كان عندي سؤال هو تغيير الزجاج الأمامي للكريستاله سعره كام في التوكيل علشان انا غيرته من بره من فتره واتشرخ مكان المرايا ودي مش اول مره اشوف فيها كريستاله الزجاج مكسور مكان المرايا مش عارف ليه هتجنن من الموضوع ده وهو عندي اتشرخ والشرخ كل يوم بيكبر فا كنت عايز اعرف سعره علشان لو كده اغيره في التوكيل متهيألي هيكون احسن ولا ايه ؟
وشكرا جدا لحضرتك

شكرا لذوقك
سعر الزجاج الأمامي كريستالة في التوكيل كالتالي
الزجاج 980 جنيه
التركيب 150 جنيه
باكتة 65 جنيه
سيليكون 50 جنيه
اجمالي 1245 جنيه + 10% ض.م = 1370 جنيه

[مصراوي جدا]

اولا الف شكر ليك يا بشمهندس طارق علي تعبك و متابعتك لمواضيع و مشاكل الاعضاء
ثانيا انا كنت عايز اعرف هو الموضوع ده هيتكلف كام لو هاجيب السير و البليه من بره بكام و لو في التوكيل بكام طقم الكاتينه بس كسعر قطع غيار بس و التركيب بكام
و شاكر ليك جدااااا.....:k10:

سعر سير الكاتينة وبلية الشداد و 2 أويل سيل وسير دينامو وسير باور اجمالي حوالي 800 جنيه + 10 % (دي مجموعة بتتغير مع بعض)

وتركيبهم 175 ج + 10%