عملت حدثة

[e_amrawad]

أكتر حاجة اققدر أطمنك بيها:

تأكد تماماً إن أنك لو عملت العربية في التوكيل (إي فرع هتفرق في الوقت فقط) العربية هترجع زي الأول بالظبط عشان التوكيل بيغير مش بيصلح في معظم الاحوال وحضرتك مش هتتكلف أكتر من 1500 جنية (10% من أسعار قطع الغيار بالاضافة لبعض الاستهلاكات بالضافة لتكلفة الونش).

وأكتر حاجة تاخد بالك منها انك لازم تتابع يوم بيوم سواء التأمين أو التوكيل.

حاجة تانية أحب اوضحهالك طالما انك بتقسط الشيك هيطلع بإسم البنك اللي حضرتك بتقسط علية.

ولازم تعمل حسابك ان الفلوس اللي هتدفعها في التوكيل مش هتستلمها قبل شهر علي افضل تقدير من التأمين.

[MOK3336]

- فانوس أمامي + كليبسات

كلام صح

- اكصدام أمامي + النيكل عشان بيبيعوه لوحده + كليبسات

بس النيكل موجود في الإكصدام القديم زى ما هو ؟؟؟؟؟

- رفرف امامي

متهيقلي ممكن يتعملة سمكرة ...؟ ولا إية

- كبوت ( غالبا التوكيل حيغيره لأن بخلاف العوجة اللي في بدايته الكبوت كله معووج لفوق )
- ربنا يستر متكنش الخبطة وصلت صدر العربية الأمامي

الكبوت شكله عادي جداً مش مرفوع ولا حاجة مفيهوش غير الخبطة ايلي عند الفانوس دي و خلاص ؟

- كارتيرة رفرف داخلية

صح

- قربة مياه

صح

- قربة مساحات

صح

- احتمال علبة الفيوزات

إحتمال بس متهيقلي أنها سليمة بس القربة مريحة عليها

- بخلاف الأهم أعمال السمكرة و الدوكو دي في التوكيل ممكن تخشلها مستريح في حولي 3000 جنيه مصنعيات أو اكتر لأنه لاقدر الله و دخلت في شاسيه حتخش في فك و تركيب موتور كمان

أنا مش بضايقك و الله لكن بحب تكون علي أرض الواقع

انا مش مدايق ولا حاجة و الله عادي هعمل إية
بس يعني علي أسوء الظروف ايلي حضرتك قولتها دي هتتكلف كام ؟؟؟

ولو علي الظروف ايلي قولتهالك هتتكلف كام ؟؟

وهل فعلا باخد الفلوس تاني من شركة التأمين بعد خصم 10% ؟؟ ولا إية

وأنتم شايفين أن التوكيل أفضل عشان أنا عندي سمكري ملوش حل ممكن يلخصلي الموضوع بس مش عايز عشان التأمين
يكون جهه بتتعامل مع جهه مش صنايعي
( ولا أنا كلامي مش صح غير اللف و تضييع الوقت )

اول حاجة اعمل محضر بغض النظر عن متطلبات شركة التأمين و حتي لو قالتلك الشركة متعملش و قيده ضد مجهول انك نزلت من بيتك الصبح لقيتها كدة و محدش شاف حاجة و زود في المحضر ( بعد ما تراضي اللي بيكتبه ) و اي تلفيات تظهر بمعرفة فحص الفني المختص

ده إيلي أنا عملت أخويا عمل محضر و أمين الشرطة قالوه أنا هكتبلك أنك نزلت لقتيها كده و كتب الحجات ايلي باظت ايلي هو شايفها

خد العربية علي ونش ( تسأل عليه في البنزينات ممكن يدلوك عليه و ممكن يكون عندهم ) و بتتكلم في حدود 150 ل 200 جنيه تقريبا ( حتي لو 500 ) و وديها التوكيل

بس العربية بتمشي عادي ؟؟ بس الواحد يا جماعة و الله ما ناقص يصرف حتي 10 جنيه زيادة

حتخلي المهندس المسئول عن الأصلاحات سمكرة و خلافه يعملك مقايسة مبدأية لشركة التأمين اللي انت تبعها و حيستلم منك العربية و حيقولك مبدأيا تاخد كام يوم شغل ( وده لازم تاخد رقم موبيله لأن كل حاجة معاه مباشرة )

طيب أسيبلهم رخصة العربية ؟؟
و المفاتيح ؟؟
الكاسيت ؟؟
الحجات ايلي في الشنطة ؟؟
ولا إية بالظبط ؟
وهل هاخد منهم إيصال إستلام ؟؟؟

مع ملاحظة ان التوكيل مش حيمد ايده فيها لحد ما مهندس التأمين يحضر يعاينها و يصورها عشان يعتمد المقايسة ( الأسعار حيفاصل فيها و احيانا المهندس بيكتب اقطع غيار احتياطي زيادة عشان لما مهندس التأمين يفاصله )

طيب ولا قدر الله ممكن شركة التأمين تقولي لأ دى تكاليف يامه
و حاجة تانية ؟؟
لو وديتها التوكيل و المهندس عاين و لقيت الموضوع هيتكلف ياما أخليه برضة ( بحيث فيه تأمين ) ولا أخدها و أوديها تتعمل برة التوكيل ؟؟

حضرتك شوف وسيلة ابلاغ شركة التأمين بالحادث ازاي هل بالتليفون و لا ايه و غالبا لازم حضرتك تروح الشركة تعمل بلاغ حادث علي نموزج عندهم ترفق به محضر الشرطة و المقايسة المبدأية للسيارة و حيقولولك المهندس اللي حايعاين حيروح التوكيل في خلال كذا يوم

أنا فعلاً كلمت مندوب التأمين و قالي شوف هتدويها تتصلح فين و قولي عشان تيجي تعمل المحضر و أبلغ الإدارة و يروح المهندس يعاين
هل كده تمام ولا إية

التوكيل مش حيبتدي يشتغل في العربية غير لما التأمين يعاين و يعتمد المقايسة فحضرتك حتابع بالموبايل مع مهندس التوكيل لحد ما يؤكدلك أن التأمين عاين العربية و بعدها التوكيل حيشتغل فيها

يعني مش معني أن مهندس شركة التأمين راح عاين أنه كده يعني أعتمد ؟؟؟
أنا مش فاهم يعني ممكن يروح يعاين و بعدها يعتمد ولا إية ؟؟
و الإنتقالات علي مين ؟؟؟ وهل لازم أكون مع المهندس وهو في التوكيل بيعاين ولا إية ؟؟

لما التوكيل يخلص العربية غالبا حضرتك اللي حتسدد الفاتورة للتوكيل و تستلم عربيتك ( متدفعش الفاتورة غير لما تعاينها كويس جدا جدا جدا و تخلي المهندس يوريك ايه اللي عملوه بالضبط في العربية و أيه اللي أتغير ده حقك بفلوسك ) و لو حاجة مش عاجباك متستلمش العربية و متدفعش الفاتورة غير لما تكون راضي تماما تماما عن العربية

ممكن أخد سمكري معايا ؟؟ ولا أنا أعاين بنفسي
وهل معني الكلام ان ممكن التوكيل يعمل الحاجة أى كلام ... ؟ ( بدون إتقان يعني )

لما تدفع الفلوس و تاخد فاتورة مختومة بختم التوكيل بقيمة الأصلاحات حضرتك حتروح بعربيتك لفرع التأمين الخاص بحوادث السيارات عشان يعاينو الأصلاحات اللي تمت و يصوروها و حيستلمو منك أصل الفاتورة ( خلي صورة منها معاك و حاول تسلمهم الفاتورة عليها أو برقم عندهم )

مش فاهم يعني إية وحاول تسلمهم الفاتورة عليها أو برقم عندهم ؟؟

حضرتك بأذن الله حتسترد حوالي 80 إلي 90 % من قيمة الفاتورة خلال فترة اسبوعين إلي شهرين حسب درجة أحترام شركة التأمين مع اصرار و متابعة منك

المتابعة ماشي بس يعني إية إصرار منك يعني ممكن يقولوا لأ ..؟ ولا إية
و نسبة التحمل دي بتتحدد علي أساس إية
مندوب التأمين قالي أنت هتتحمل في حدود 10% من القيمة ؟؟؟

ياريت حضرتك تشوف مع السادة الأعضاء أفضل فرع للتوكيل فيما يخص الأصلاح و الحوادث و كذلك حضرتك مأمن في شركة أيه بالضبط يمكن حد يكون عنده معلومة تختصر عليك الطريق بالنسبة لهذه الشركة

مصر للتأمين

مع ملاحظة غاية في الأهمية أنك حتي لو مش مأمن كنت حقولك روح التوكيل عشان تشتري عربيتك

يعني حضرتك شايف أن التوكيل هيرجعها زي ما كانت الأول ؟؟ ولا ماشي حالك

وهل لو بعتها بعد كده هتتعرف أن الحجات دي كانت معمولة ولا هترجع زى الأول؟؟
معلش عشان أنا زهقان و نفسيتي زي الزفت

[MOK3336]

أكتر حاجة اققدر أطمنك بيها:

تأكد تماماً إن أنك لو عملت العربية في التوكيل (إي فرع هتفرق في الوقت فقط) العربية هترجع زي الأول بالظبط عشان التوكيل بيغير مش بيصلح في معظم الاحوال وحضرتك مش هتتكلف أكتر من 1500 جنية (10% من أسعار قطع الغيار بالاضافة لبعض الاستهلاكات بالضافة لتكلفة الونش).

وأكتر حاجة تاخد بالك منها انك لازم تتابع يوم بيوم سواء التأمين أو التوكيل.

حاجة تانية أحب اوضحهالك طالما انك بتقسط الشيك هيطلع بإسم البنك اللي حضرتك بتقسط علية.

ولازم تعمل حسابك ان الفلوس اللي هتدفعها في التوكيل مش هتستلمها قبل شهر علي افضل تقدير من التأمين.

يعني التوكيل هيرجعها زي ما كانت أفضل من السمكري ؟؟؟؟

ليه هي ممكن التكلفه توصل لـ 15000 جنيه ؟؟؟؟؟؟؟؟؟؟؟؟؟؟؟ يا خراب بيتي

طيب في الحالة أنا مقسط تبع كونتاكت أو بنك هاخد الفلوس أزاى بدال شيك التعويض هيطلع بإسم الشركة أو البنك ؟؟؟؟؟؟؟؟؟

و هستلم الفلوس يبعد طلوع روح ولا إية ؟؟؟
ده أنا فرحي في شهر 2 /2011 شكلي كده هأجل الفرح ولا إيه ؟؟؟

[MOK3336]

واحد صحبي يا جماعة قالي انت ممكن تصلحها في توكيل هينداى ( علي أساس أن قريب من بيتى ) بدال ما تسافر بيها و هيبقي أرخص ( من حيث السمكرة مش التغيير )
و قطع الغيار كده كده هتبقي أصلي ؟؟
انتم ايه رأيكم
معلش انا بقيت ممل بس انا مخي واقف عن التفكير

[e_amrawad]

يعني التوكيل هيرجعها زي ما كانت أفضل من السمكري ؟؟؟؟

أكيد افضل بكتير من السمكري

ليه هي ممكن التكلفه توصل لـ 15000 جنيه ؟؟؟؟؟؟؟؟؟؟؟؟؟؟؟ يا خراب بيتي

لأ مش قوي كدة أعتقد هتبقي في حدود 7000 جنية بس انا بقولك في اقصي تقدير عشان تبقي عامل حسابك وانا مدخل تكلفة الونش.

طيب في الحالة أنا مقسط تبع كونتاكت أو بنك هاخد الفلوس أزاى بدال شيك التعويض هيطلع بإسم الشركة أو البنك ؟؟؟؟؟؟؟؟؟

هتروح تستلمة من الينك عادي جداً (هما بيطلعوة باسم البنك عشان لو عليك اقساط متأخرة يخصموها من الشيك)


و هستلم الفلوس يبعد طلوع روح ولا إية ؟؟؟
ده أنا فرحي في شهر 2 /2011 شكلي كده هأجل الفرح ولا إيه ؟؟؟

ألف مبروك مبدئياً
أحنا ممكن نحسبها مع بعض
لو العربية راحت النوكيل انهاردة
التأمين ممكن يعاين بعد 3 أيام (ومتخافش من موضوع المعاينة دة هو تقريباً بيوافق علي كل حاجة التوكيل كاتبها ومش شرط تكون موجود ف المعاينة).
قول التصليح ياخد 21 يوم
وبعد كدة تعاين ف التأمين فول بعد يومين مثلاً
وتستلم الفلوس بعديها بشهر.

يعني تستلم العربية إن شاء الله بعد شهر من دلوقتي مثلاً (دة أقصي تقدير) يعني نص يناير
والفلوس بعد شهر من المعاينة (دة أقصي تقدير لو انت متابع معاهم) يعني نص فبراير


علي فكرة انت قلقان زيادة عن اللزوم والموضوع اسهل من كدة هما من الأخر 3 مشاوير

مشوار تسلم العربية التوقيل وتعمل مقايسة الاصلاح وتسلمها ف التأمين.

مشوار تستلم العربية وتتطلع ع التأمين يعاينوا الاصلاح

مشوار تستلم الشيك

ومتقلقش نفسك أكتر من كدة وابدأ ف الاجراءات عشان تلحق تتجوز علي خير.

[hanyaly]

معلش فداك العربيه
بس انا رأيى انك تروح تعمل مقايسه فى التوكيل لانه هيعرف هى محتاجه ايه بالظبط

[ash257]

ماتزعلش نفسك وماتخليش حاجة تنكد عليك الحمد لله انك خرجت سليم
ربنا يعوضك خير وفداك كل العربيات

[MOK3336]

شكرا يا جماعة 1000 شكر علي المشاركة الوجدانية دي
وربنا ما يكتبها علي حد
أنا إن شاء الله هروح التوكيل و فيه كمان مركز معتمد للسمكرة و كده هروح أسئل في الأثنين و هشوف
عشان مسئول التأمين قالي أن لو حاجة عايزة تتسمكر و التوكيل قال لأ تتغير يبقي أنت ايلي هاتشيل فرق الجديد من السمكرة
فاهشوف لو التوكيل قال هيسمكر يبقي خير و بركة لو قال هيغير يبقي هاخليني مع مركز الصيانه ده و خلاص و أشتري الحجات من التوكيل
سلام و هقولكم بكرة ايه حصل بإذن الله

[MOK3336]

ياااه الحادثة دي زي بتاعتي بالظبط : (غيرت اكصدام + فانوس+مكنة مياة مساحات+ رفرف+مقص يمين)

ده إيلي أتقال لي بالظبط بالإضافة إلي قربة مياه ريدياتير

[amir]

شكرا يا جماعة 1000 شكر علي المشاركة الوجدانية دي
وربنا ما يكتبها علي حد
أنا إن شاء الله هروح التوكيل و فيه كمان مركز معتمد للسمكرة و كده هروح أسئل في الأثنين و هشوف
عشان مسئول التأمين قالي أن لو حاجة عايزة تتسمكر و التوكيل قال لأ تتغير يبقي أنت ايلي هاتشيل فرق الجديد من السمكرة
فاهشوف لو التوكيل قال هيسمكر يبقي خير و بركة لو قال هيغير يبقي هاخليني مع مركز الصيانه ده و خلاص و أشتري الحجات من التوكيل
سلام و هقولكم بكرة ايه حصل بإذن الله

نعممممممممممممم

لا مؤاخذه باللي في رجلك و اديله علي دماغه

هما هيحاولو بكل السبل انك تصلح في مركز الصيانه اياك

انا غلطت الغلطه دي قبلك و طلع شغل زفت و طبعا الفاس كانت وقعت في الراس

صور جنايه لو قالك ده تاني قولو انا مأمن ليه ان شاء الله بقي؟؟؟؟؟؟؟؟؟؟؟؟؟؟؟

لولا الايقاف كنت قلتلك تقوله حاجه تانيه

فاهمني؟!!

[MOK3336]

السلام عليكم
أنا رحت مركز الصيانه أمبارح و هو مركز خدمة لهيونداى ( شبه توكيل ) بس شغال صيانه للعربيات الأخري
و كانت الخسائر زى ما انا توقعت بالظبط و لكن بالإضافة إلي مقص يمين ( مرحل من الخبطة 5 سم )
فالمهندس قالي كالأتي
فانوس
قربة مياه مساحات
قربة مياه ردياتير
كارتيرة
رفرف ( إن امكن )
إكصدام
مقص ( عشان مش هينفع يستعدل ولو حاولنا برضة مش هيجي صح و خسارة العربية لسة 2010 )

المصنعيات بقي ( بخلاف أسعار قطع الغيار - عشان هو معندوش غير قطع غيار هيونداى بس )
950 سمكرة
750 دوكو - شامل تلميع العربية
150 فك و تركيب

فأنتم شايفين إية أنا هروح التوكيل أنهرده كده كده أنا هشتري قطع الغيار من التوكيل يعني مش هتفرق معايا غير في المصنعيات و وقت التسليم أنتم إية رأيكم بقي في الورطة دي

لو الفرق كبير في المصنعيات أعملها في المركز و خلاص ( أنا أقصى حاجة 500 جنيه فرق مش أكتر )
بس أنا حاسس حاجة أن المركز هيشتغل فيها برواقة يعني مش عليه ضغط شغل و حاسس العكس هيطلع بالنسبة للتوكيل ؟؟ فانا مش عارف ؟؟؟
و الضمان مش هيتكلم في حاجة زي كده ؟؟؟

[AHMADKAMAL1]

توكيل نيسان أفضل

[.]الزميل العزيز بواقع خبرتى وتجربتى أخر حادثة انا كنت عاملهامن 10 أيام بس كانت من الخلف وغيرت شنطة واكصدام وفانوس خلفى احسن مكان لعمل الدهانات والسمكرة هو مودرن موتورز ابو رواش امكانيات المركز رهيبة والدهان بمكن المانى وهمة جنب مصنع نيسان وبصراحة العربية رجعت ا حسن من الأول كأنها زيرو واخدت اسبوع فى الشغل واقبل ما استلم العربية دخلت قسم الجودة وقعدت حوالى ساعتين للمراجعة على كل التصليحات والدهان والكهربة وكل دة حصل قدام عينى وكنت بخش جوة القسم السمكرة والدهان وبشوف الشغل بصراحة شغل محترفين وخبرة فى نيسان طويلة. انا خلال سنتين تعرضت لأربع حوادث المركز الأفضل على الأطلاق مودرن موتورز ابو رواش فقط و ماترحش اى مركز تانى لمودرن لأنى سالت المهندس بتاع المركز لية الفرق فى الأمكانيات عن الملراكز الأخرى قالى لأن المركز دة فية الأدارة وتانى حاجة همة جنب المصنع مباشرة واى دعم فنى بيحتاجوة او قطع غيار بيخدوها من المصنع واى استفسار انا تحت امرك موبيل 0105348033 بس التكلفة كانت عالية بس العربية رجعت زيرو]

[Hossam_Zaky]

زميلي العزيز

نصيحة لله و نصيحة عن ( تجارب )

روح التوكيل اياك تعملها برة

اولا مصر للتأمين شركة محترمة في حادثتي الأولي العربية اتكلفت حوالي 19000 جنيه اخدت من التأمين حوالي 17000 و بعد 3 اسابيع فقط من تقديمي لفاتورة السداد عندهم بدون وسيط ولا معارف و كمان الشيك طلع بأسمي مباشرة
و هما لما ياخدو منك اصل الفاتورة حيدوك رقم ( زي رقم وارد ) يثبت استلام الفاتورة الأصلية ( بعد ما المهندس بتاعهم يعاين العربية المتصلحة و يأشر علي الفاتورة بالمطابقة )

انما مع شركة المهندس للتأمين ( حادثتي التالتة ) عند تسليم الفاتورة اخدوها مني ودي بدون اي توقيعات ( مضطر ) و طلع الشيك بأسم البنك بعد شهر و نص مع متابعة مني اسبوعية و معاملة زي الزفت كأني بشحت منهم و اضطريت اعمله ايداع في البنك عشان يتحول بعد كده علي حسابي ( بتاع قرض السيارة ) و سحبت الفلوس بعدها بأسبوع ( فهمت بعد كده انه كان ممكن يطلع بأسمي بس كان التأمين حيخاطب البنك الأول و هو كسل )

و هنا اقولك اطلب من مندوب التأمين ان الشيك يطلع بأسمك و في الحالة دي احتمال تجيبله خطاب عدم ممانعة من البنك بكدة مادام انت منتظم في سداد الأقساط

نرجع لحكايتك برة التوكيل ولا جوة التوكيل

من الأخر لو انت العربية لسة حتعيش معاك روح التوكيل

الأسباب

اول ملاحظة من كلامك علي مركز هيونداي اللي انت رايح تصلح فيه نيسان !

لو انت الحادثة بتاعتك زي ما كنت وصفت يعني ماشي و خبطت في عربية تانية اي كان الوضع ( يعني مطلعتش علي رصيف ولا خبطت بلاعة ولا وقعت في حفرة ) يبقي ايه اللي دخلك في مقص !!

لما توصل لمقص يرحل من خبطة يبقي المشكلة مش في المقص نفسه , المشكلة بتكون جاية من صدر العربية او شاسيه الركبة الأمامية تكون رحلت للخلف من الخبطة و ال5 سم اللي بيتكلم عليهم رقم كبير جدا ( يعني 1 سم أو 2 سم مقبولة ) و ده معناه ان الخبطة جامدة مش بسيطة

الخلاصة
المركز ده حيبتدي معاك برقم معين و كل شوية حيفتح معاك في حاجة زيادة يكتشفها بعد ما يفك العربية ( حيثما لا رجعة ) و التكلفة حتوصل معاك لتكلفة التوكيل لو ما زادتش
و كمان مستحيل ترجع زي ما التوكيل حيعملها لأن التوكيل بيكشف علي العربية بالأجهزة المخصصة له
التوكيل لو خدت العربية و لقيت فيها حاجة مش مضبوطة ( بعد ما دفعت ) بيصلحهالك بدون كلام و ده حصل معايا
التوكيل لو خرف معاك ممكن تطلب جهاز حماية المستهلك يجيبلك حقك
التوكيل مازال ملتزم معاك بضمان العربية بعد الحادثة لأنه حيكون هو اللي صلحها يعني المفروض تخرج من عنده زي ما كانت ميقدرش يقولك اصل انت خربت حاجة برة التوكيل

انا ممكن استمر في سرد تفاصيل معاك لكن انا والله بحيبلك من الأخر

و علي فكرة مصلحة شركة التامين انك تصلح في مركز غير التوكيل يكون بيتعامل معاهم لأن كل مندوب بيجيب عربية للمراكز الخارجية بيطلع له سبوبة حلوة من المركز بخلاف انه بيحملك علي العربية مصاريف كتير و يقولك ملكش دعوة انت تاخد عربيتك متصلحة و بيتعامل هوة مع التأمين و انت مبتدفعش حاجة ليه عشان مش بيحط كل قطع الغيار في عربيتك ده غالبا بيكون كلام علي ورق يعني يختصر و يرخص في قطع الغيار و يطلع فواتير بأرقام وهمية و تبقي دي السبوبة من شيك شركة التأمين

الأمر نتروك لحسن تقديرك و أن كانت النصيحة مركز مودرن اللي الأخ العزيز نصح به مادام عن تجربة

انا تجاربي كانت مع يونايتد جروب الدراسة و مكنتش بالأمكانيات اللي هو قال عليها يعني اتصلحت حلة اه بس رجعتلهم اكتر من مرة بملاحظات و صلحوها مش هم اللي عندهم ادارة جودة زي مودرن

و كان الله في عونك

[Bishoy.Girgis]

انا شايف ان شغل السمكرة غالية جدا جدا جدا يعني لو في التوكيل هتبقي اقل من كده
لألألأ انا من رأيي تودي العربية احسن للتوكيل لسبب ان لو في حاجه اكتشفها مركز الصيانة بعد كده و زودها علي الفاتورة يبقي لازم مندوب شركة التامين يروح يصدق عليها الاول قبل التركيب و ده انا متوقعه
انما لو روحت التوكيل هيبقي كل حاجه تحت السيطرة

[MOK3336]

خلاص يا رجالة أنا لسة مسلمها للتوكيل أنهرده و جى حالاً من هناك
و ربنا يستر و يسهل و ترجع زى الأول
بس مكتوب في نسخة إيصال تسليم العربية
أن العميل يراجع علي كل حاجة قبل ما يستلم العربية لكن لو ظهرله حاجة بعد ما يستلم التوكيل ملوش دعوة ؟؟؟
يعنى اعمل ايه انا دلوقت؟؟؟؟