نتشة في نقلات الفتيس الأوتومتك

[ahaleem]

أهلا بكم .....
أنا كنت بس عاوز أسأل إذا كان حد غير بطارية العربية بواحدة امبير و هل أثر ذلك علي نعومة نقلات الفتيس ولا لأ

أصل الفتيس عندي بينتش في النقلات و مش عارف هل أغير البطاريه ولا لإ

[Ahmed_Rahem]

متابع ، لان عندى نفس النتشة وبتبان قوى فى النقلة التانية

[fady_anis]

ياريت حضرتك تحدد نوع الفيتيس مانيوال ولا اوتوماتيك؟؟ علشان نقدر نفيدك

[kar!m]

ياريت حضرتك تحدد نوع الفيتيس مانيوال ولا اوتوماتيك؟؟ علشان نقدر نفيدك

مكتوب فى عنوان الموضوع اتوماتيك

[vet_hulk83]

غير فلتر الهوا وهتلاقي كل حاجه تمام

[ahaleem]

اوتوماتيك

super salon 2009

[Ali_Abo_Amr]

هى النتشه ممكن يكون سببها البطارية؟
الموضوع محتاج مناقشه صراحه لانى ساعات اشعر بيها وساعات لأ ....
وباقول ان السبب انى اكون كابس بنزين ... او تكون مشغل التكييف والجو حار جدا ... او تكون تموينة البنزين اى كلام ...
مش عارف سببها ايه صراحه

[Bishoy.Girgis]

النتشة ديه طبيعية و مفيش مشاكل و متحطش في دماغك
و لو مضيقاك اوي يبقي اعمل Reset لكمبيوتر العربية

[Ali_Abo_Amr]

غير فلتر الهوا وهتلاقي كل حاجه تمام

اكيد الموضوع ده ؟؟؟؟
طيب ينفع يتنضف ؟

[fady_anis]

حضرتك النتشه دى طبيعيه انا برضه عندى سوبرصالون 2008 وفيها نفس النتشه

[WalidAdel]

كان في موضوع عن النتشه دي يبقي بطاريه لان المهندس سبعاوي و هو مهندس ميكايكا سيارات اكرمه الله كان عامل موضوع عن النتشه دي لحد ماكتشف ان البطاريه ضعفت و كانت عايزه تتغير و غيرها بالفعل النتشه راحت
فياريت تقول البطاريه بقالها اد ايه

[Ahmed.TV]

الموضوع ده اللى حيحله وقولنا الزتونة.. الاعضاء اللى غيروا البطارية بتاعت العربية ببطارية جديدة الامبير بتعها اكبر من القديمة .. يعنى غيروا القديمة مثلا ب55 امبير

ولو قالوا ان النتشة دى لسه موجودة مع انهم غيروا البطارية يبقا الموضوع طبيعى فى عربيات نيسان الاتوماتيك كلها

عامة حنشوف ومستنين راى الاعضاء اللى غيروا البطارية القديمة بجديدة و55 امبير

[wesam_salom]

كنت قريت موضوع سبعاوى
وغيرت البطاريه من صديق ببطاريه جديده 55 امبير
وفى نفس اليوم عملت ريست للفتيس وكشف اعطال
النتشه خفت جدا او انا اللى وهمت نفسى بكده
تانى يوم مع التكييف والحر لقيتها موجوده ولا فيه فرق ممكن اقل حاجه بسيطه جدا
بحاول اتعايش معاها
واوقات مبحسش بيها بس فيه اوقات بحس انها ممكن تفك عفشه العربيه

[ahaleem]

كان في موضوع عن النتشه دي يبقي بطاريه لان المهندس سبعاوي و هو مهندس ميكايكا سيارات اكرمه الله كان عامل موضوع عن النتشه دي لحد ماكتشف ان البطاريه ضعفت و كانت عايزه تتغير و غيرها بالفعل النتشه راحت
فياريت تقول البطاريه بقالها اد ايه

االبطارية هية 44 أمبير الكلوريد الى كانت فى العربية من استلمها...........بس أنا لسا قايسها بس كانت كويسة جدا حتى مع التحميل عليها....

بس مش عارف هل لو اتغير بواحدة أكبر ..هل هيبقى في تحسن فى أداْء الفتيس و لالأ

و شكرا لكم

[Bishoy.Girgis]

تقريري كالآتي

انا غيرت البطارية الكولرايد بتاعة العربية بتاعتي نيسان صني 2009 اوتوماتيك بعد سنتين بالظبط و التغيير كانت ركنة العربية في الجراج اسبوع في ايام الثورة
كانت البطارية طبعا 45 امبير و لما غيرتها جبت بطارية جافة 55 امبير
لا يوجد اي تغيير جزري او حدث اي شيئ و لا يوجد فرق بين القديمة و الحديثة
الفرق الوحيد اللي كنت ملاحظه في دوراة العربية لما كانت البطارية القديمة كانت الدوراة مش عجباني
لكن لا يوجد اي نتشة ف الفتيس قبل التغيير او بعده و زي ما قولت و من الاخر اللي مش عاجبه موضوع النتشة .. يعمل Reset لكمبيوتر العربية و هيلاحظ الفرق طبعا

كيفية عمل Reset للعربية

في البداية احب انوه انك تكون قافل زجاج العربية عشان تسمع كويس اللي هيحصل جوا العربية :

هنحط مفتاح العربية في الكونتاكت و ندور المفتاح للوضع on بس مندورش العربية لغاية ما لمبة الاوفر درايف تنور و اول ما تفصل علي طول نقوم نلف مفتاح العربية علي وضع off و نستني حوالي 5 ثواني لغاية اما نسمع صوت تكة من الناحية اليمين للطابلوه و بعدين نقوم عاملين الخطوة اللي فاتت تاني ندور المفتاح للوضع on بس مندورش العربية لغاية ما لمبة الاوفر درايف تنور و اول ما تفصل علي طول نقوم نلف مفتاح العربية علي وضع off و نستني حوالي 5 ثواني لغاية اما نسمع صوت تكة من الناحية اليمين للطابلوه و بعدين نقوم مدورين العربية عادي جدا

في هذه الحالة تم عملReset للعربية ملحوظة هامه : اوعي و انت بتعمل الموضوع ده تكون دايس علي اي دواسة من الدواسات و خصوصا دواسة البنزين لأن و الريسيت بيحصل بيظبط حساسات و حاجات كتير في العربية منها TPS

ارجوا اكون افادتكم