الحمد لله ركبت الأوسرام نايت بريكر بلس

[goudamahdy]

ا

لحمد لله ركبت الأوسرام نايت بريكر بلس

القصة تبدأ بأني سألت أخويا وحبيبي الكبير وعمدتنا كلنا .....أحمد tv - سألته عن الطريق للوصول إلى محل المدينة بشارع دمشق .....علشان أشتري اللمبات ....
وحيث أنه عندي امتحان بالقصر العيني اليوم ... قلت فرصة أروح روكسي أشتري اللمبات .. وبالفعل اتصلت بالاستاذ احمد وبالباشمهندس حسين ووصفولي الطريق من عند القصر العيني ... وهو كالآتي :
تركب اي حاجة رايحة التحرير ( من جنب القصر العيني الفرنساوي ) ومن التحري تتمشي لغاية تحت الكوبري تحديدا ( اللي ورا المتحف المصري ) تركب اتوبيس 356 اللي رايح روكسي وتقوله شارع دمشق " وهو متفرع من شارع الأهرام ؟؟؟؟!!!!!! والسواق هينزلك هناك قصاد شارع تمشيه لآخرة تلاقي شارع دمشق ... ومحل المدينة هتلاقيه قصاد بنزينة التعاون...
ومن الجيزة ممكن تركب اتوبيس 357 CTA وبيروح برضه نفس المكان ... وده هو اللي هنرجع بيه لميدان الجيزة ....

ووصلت المحل واشتريت اللمبات بـــ 125 جندي ... واشتريت حاجة كدة بتضاف في قربة المياه بتاع المساحات بــ 13 جنيه ... واشتريثت مساحات ( الجلدتين بس ) طقم كامل بـــ 45 جندي .. وبكده خلصت كل الفلوس اللي كانت معايا !!!!!!!!!!

والحقيقة الراجل قمة الذوق والخبرة في التعامل ...وأمين جدا

نيجي بقي لتركيب اللمبات ....
طبعا ما صبرتش لما اروح لكهربائي اركبها وركبتها بنفسي والخطوات كالتالي :
1- تفك الفيشة بتاع اللمبة من ظهر الفانوس .
2- تشيل جلدة دائرية الشكل من على اللمبة الأصلية .
3- هتلاقي كلبس بطرفين ماسك اللمبة تفكة برضو وبكدة اللمبه تبقى حرة .
4 - تشيل اللمبة بكل حرص وتمسكها من الدواية المعدن واوعى تلمس الزجاج بتاع اللمبة علشان ما تخيمهاش.
5- تبدأ تركب اللمبة الجديدة وتعكس الخطوات الأربع السابقة .


ومش هاقولكم بقي علي الإضاءة .... ما شاء الله لا قوة الله بدأت أشوف كويس والرؤية واضحة جدا والعالي بتاع اللمبات جميل جدا لونة ازرق فاتح وقريب من الزينون .... ومداه كويس جدا .

ما علهش طبعا التقريير غير مدعوم بالصور لأني من الفرحة ما حبيتش أأخر التقرير .

وأخواني طبعا ما نيسوش يتصلو بي يطمنوا عليا وانا راجع اتصل بي الاستاذ احمد والباشمهندس حسين وطمنتهم اني الحمد لله اشتريت اللمبات وراجع وكله تمام .

وباكرر الشكر تاني لاخواني أ.احمد ومهندس وحسين والجندي المجهول د. يوسف ... ربنا يعينة على شغله.

متأسف ع الإطالة,,, ويا ريت التقرير يعجبكم
-----

تم نقل المشاركة بناء على طلب من منسق القسم
لافادة الاعضاء جميعا

مشرف القسم
1ب

[Ahmed.TV]

الف مبروك يا دكتور .. والله لو ما كنت فى اليوم ده عندى ضغط .. كنت روحت معاك ومش سبتك ابدا
ومبروك اللمض الجديدة
وشاكر تقديرك
ويارب نشوفك على خير

[zangry]

مبروك على اللمض ياباشا .. هى جميلة جدا فعلا

[Manchestrawy]

الف مبروك يا باشا والتقرير اكتر من رائع بس ما تقولنا شوية معلومات عن " الأوسرام نايت بريكر بلس " للي ميعرفهاش زيي كدا .. :d

[Land_Cruiser]

الف مبروك بس لو عندك fog lights حتحتاجلهم لمض نايت بريكر برضه و كمان اللمبات الصغيره علشان كده هتلاقى كل القديم عندك اصفر فى حين ان الجديده بيضاء فجهز شويه فلوس تانيه

[Dr'AhmZZong]

ما شاء الله لمض بجد تحفة .. أنا عندي في صني

[Sehsss]

ألف مبروك يا باشا، واللمض فعلا عن تجربة سنة عندي ممتاااااااااااازة

[ahmad--ezzat]

الف مبروك بس لو عندك fog lights حتحتاجلهم لمض نايت بريكر برضه و كمان اللمبات الصغيره علشان كده هتلاقى كل القديم عندك اصفر فى حين ان الجديده بيضاء فجهز شويه فلوس تانيه

قلبت الدنيا علي فوج لايت h3 الاضائه الزرقاﺀ فيليبس مالقتش خالص
كل المحلات بتقولي مبقاش ينزل,,,واللي موجود الكوري وده اخره اسبوع ويتحرق

[ahmad--ezzat]

واللف مبروك

[SonaSteel]

ماشاء الله الف الف مبارك يا دكتور ...... ربنا يرزقك خيرهم ويكفيك شرهم وتدوبهم في عرق الطريق :))
اقعد بالعافية :d :d

[Land_Cruiser]

قلبت الدنيا علي فوج لايت h3 الاضائه الزرقاﺀ فيليبس مالقتش خالص
كل المحلات بتقولي مبقاش ينزل,,,واللي موجود الكوري وده اخره اسبوع ويتحرق

فعلا ابعد عن الكورى دى وحشه قوى. ممكن تجرب تسأل عند ارابكوم اللى جنب سيتى ستارز احتمال يكون عنده

[ahmad--ezzat]

ههههه ارب كوم عنده الكوري وبيقلك 150
سرقه رسمي

[szaalouk]

الف الف مبروك علي اللمض يا دكتور
هما فعلا أدائهم فوق الممتاز و عن تجربه داخله علي سنه دلوقت .

[Land_Cruiser]

ههههه ارب كوم عنده الكوري وبيقلك 150
سرقه رسمي

انا سألتلك عند المدينه اللى فى شارع دمشق فاللى هى مش عنده دلوقتى لكن متوقع تيجى على اخر الاسبوع و قاللى انها المانى و ممكن تبقى تتابعه بالتليفون حتى

[ghostmido]

الف مبروك.
تقرير محترم.