أنا اتضربت يا جدعاااااا ن !!!!!!!

[AhMeD MeTwAlY]

حضرتك غلطان
اولا احنا في الوضع الحالي حققك بدراعك انا واحد حاوي يزنق عليه بالعربيه كنت هموته وهخليه يتفرم تحت عربيه جمبو بسيطه لما واحد همجي يموت ولو العربيه الجامبو فرمته ولي اعرفه
ثانيا حضرتك قفل عليك الطريق مكنتش نزلت من عربيتك ولما نزل يزعق مكنتش سبت ليه فرصه انه يقرب منك تفتح عربيتك ولو بايد الكوريك او الصليبه او الطفايه ودغدغه وخد عربيتك اومشي "اعمل حسابك في اي حجاه حديد جمبك"
شرطة مين يا باشا الي هتجيب حققك دا واحد معانا انضرب قدام القسم محدش عمله حاجه
انا حصلي موقف مشابه وجري ورايا بالعربيه وكنت هموته ولو كان كمل جري كنت هنزله بالشومه الي معايا ادغدغه وادغدغ عليه العربيه

[S O P H O S]

معلش يا باشا
محدش بيقف فعلا لان في حوارات اكبر من كده كانت ممكن تحصل

[Ahmed_selmy]

قلبى عندك والله, وانا قاعد اقرا حطيت نفسى مكانك لاقيت انى لو كنت تعرضت لنف الموقف كان حيحصلى زى اللى حصلك بالضبط .........وخصوصا انن ملناش دهر.........ربنا يسترها

[mesaharaty]

يا أخى لا تحزن واحتسب عند الله سبحانه وتعالى
الحمد لله إنك والوالد بخير ولا يهمك أى حاجة

[ahmed88]

يوم الدين - إن شاء الله - هتاخد حقك تالت و متلت ...
قال صلى الله عليه و آله و سلم : لتؤدن الحقوق إلى أهلها يوم القيامة حتى يقاد للشاة الجلحاء - التي بدون قرون - من الشاة القرناء ...

و قال أيضا : الكبائر : الإشراك بالله و عقوق الوالدين و قتل النفس و اليمين الغموس .
و اليمين الغموس هي اليمين الكاذبة التي تغمس صاحبها في النار ...
دا عشان اللي كان بيحلف بالله كدب قدام الضابط عشان ميديكش حقك .

بس بردو الحمد لله انها جت على قد كده ... لإن الظابط ده كان هيقولك لو عايز حقك تتحولوا انتوا الاتنين ع النيابة و طبعا إذا كان الراجل بسهولة بيحلف بالله كدب فمش بعيدة يجيب كمان شهود زور و يلبسك الموضوع كله .

فانتا احمد ربنا على لطفه بيك و أنك الحمد لله بخير ووالدك بخير .
محدش عارف كان ممكن في الغابة اللي احنا عايشين فيها دي كان يحصل أكتر من كده .

بس هقولك حاجة بردو - وأنا عارف انك في الخناقة مفتكرتش الموضوع ده .
النبي - صلى الله عليه و سلم - قال : إذا قاتل أحدكم فليتجنب الوجه .


وخليك فاكر : " ما يصيب المؤمن من وصب و لانصب و لاسقم و لا حزن حتى الهم يهتمه إلا كفر به من سيئاته " .
والحمد لله على سلامتك انتا ووالدك .

[mzkader]

مع كل الأحترام لأراء السادة الزملاء لكن موضوع أنك تجيب الكريك أو الصليبة و تدغدغهم و تكسر عربيتهم و تفرمهم ده كله كلام غلط مليون % لأن من الواضح أن حضرتك مش بتاع مشاكل و لا بلطجى و كنت واحد و هم ثلاثة و لو أنت كنت طلعت حاجة كانوا ممكن يطلعوا ثلاث حاجات و كان ساعتها الأضرار هاتكون أكبر بكثير من الــ حصل و كان ممكن يبهدلوا والدك و زى ما أنت قلت ماحدش سأل فيك غير العسكرى و الناس كلها مطنشة يعنى ماكنش حد هاينفعك.
لكن تعال نتكلم على الأخطاء و علاجها
أولا مش عشان انت مدى إشارة ده يديك الحق فى الانتقال من حارة الى حارة خاصة أن أحنا كلنا كامصريين أول ما نشوف عربية الاسعاف بنلزق فيها عشان بتفتح الطريق :) فا لازم تتاكد من عدم وجود سيارة مسرعة خلف سيارة الأسعاف أو اي عربية تانية او لو حتى مافيش عربيات خالص لازم نتاكد من ان الحارة الثانية فاضية او بدون سيارة مسرعة.
و طبعا انا لا أبرر العنف من أصحاب السيارة الاخرى لان ده همجية و ربنا يبعدنا عنها.
ثانيا فى حال شعورك بالخطاء حاول الاعتذار لان ذلك بيخفف و يلطف الموضوع جامد انا فى مرة على الاوتستراد راميت على واحد بدون قصد و ماكنتش شايفة فضل يشتمنى بالكلاكس حوالى دققتين و انا رافع ايدى باعتزر ليه مع ان كنت انا و اصحابى اربعة فى العربية و كنا ممكن نضربه بمنتهى السهولة و ماشاء الله انا و اصحابى صحتنا حلوة شوية :) بس كبرت دماغى و لما هو قرب منى و شافنا اربعة و لقانى بعتذر هو كمان اعتتذر :)
ثالثا زى ما كثير من الزملاء وضحوا بلاش تنزل من العربية و خليك عامل لوك و لو لقيت فى عينهم شر يبقى الجرى ثلاث تربع الجدعنة :)

[FBIAhmed]

طبنجتك اللذيذه في درج عربيتك و انت نازل هي في ضهرك و في دماغ امه لان فيه واحد زميلي حصله الموقف ده و نزل زيك كده و الاتنين اللي كانوا معاه كانو بيحاولوا يفتحوا باب العربيه اليمين لولا مراته قاعده قفلت السنتر كانت العربيه اتاخدت و من ساعتها لازم تشيل اي حاجه معاك مفيش قانون عشان تبقى عارف حقك تاحده بدراعك مكنش اقل واجب اكسرله فانوس و امامي و قول انه خبطك من ورا هايطلع هو غلطان

[saint2011]

حمدا لله على سلامتك وسلامه والدك وربنا يكفيك ويكفينا شر الطريق

[john55]

النهارده كنت رايح جينز كار علشان أعمل فرش للنيو صنى وأنا فى طريقى على المحور من اكتوبر فى اتجاه ميدان لبنان بعد مطلع الدائرى بشوية كده كان فى عربية اسعاف ورايا وانا فى الحارة الشمال خالص فقمت دخلت فى الحارة اللى فى النص علشان أعديعا وبعد ما عدت جيت أدخل الحارة شمال تانى علشان أمشى وراها وبصيت فى المراية الشمال الأول واديت أشارة شمال وكان فى الانترا ورا بس بعيده شوية قمت كسرت شمال بس مش بسرعة وهو فى الوقت ده زود بنزين جامد فالاكصدام الى ورا عندى من ناحية الشمال اتحك فيه وهو كمان الاكصدام اللى قدام عنده اتحك ودخل جوه سنة صغيرة كنت انا خلاص دخلت فى الحارة الشمال وقلت فى نفسى يلا هوه اللى غلطان مش مشكلة مش لازم اكلمه وامشى وخلاص لاقيته هو بقى عدانى من اليمين وكسرعليا شمال علشان يوقفنى فوقفت فنزلت وهو نزل حاجة ما شاء الله طول بعرض بكرش وانا مع انى مش قصير 175 بس كان طويل بالنسبالى قوى ومش فى دماغى خالص انى انزل اتخانق معاه فأول حاجة قولتله انا مديك اشارة على فكرة من الأول قالى وزعق يعنىىىىىى ايييييييييه اشااااااااارة يعنىىىىىى ايييييييييه اشااااااااارة يعنىىىىىى ايييييييييه اشااااااااارة انا استغربت جدا ولقيته جايلى بسرعة وبيزق فيا ناحية العربية بتاعتى جامد وعمال يشتم بكل اللى نفسك فسه وابتدا يضرب فيا قمت رازعه قلم على وشه فاتصدم ثانيتين كده وبعديها عينك ما تشوف إلا النور لقيت اتنين جايين افتكرتهم بيحجزوا لكن طلعه معاه وضربونى على عينى ومبقتش شايف حاجة قولت احمى وشى بقى دول ثلاثة يعنى خلاص مش هاقدر اعمل حاجة ومطر من الضرب بقى من الثلاثة باليد وبالشلاليت وفين يوجعك و فوسط الضرب ده العربية كانت ورايا وكانو زنقنى ناحيتها فضربة من رجله فلتت وماجاتش فيا وجت فى باب العربية والصاج اتطبق شوية ياريتها كانت جت فيه انا
وهو انا كان معيا والدى بس راجل كبير 60سنه كان قاعد فى العربية ونزل من العربية حاول يحجز لما شافنى باتخانق بس ما عرفش وانا كنت بزقه بعيد عنهم علشان ما يتبهدلش لحد لما جه عسكرى المرور وفض الخناقة وقال انا شفت كل حاجة وشاهد ان الراجل ده ضرب وشتم وقل ادبة هو واللى معاه وهو غلطان اصلا من الأول لما حك فيا لانه فى ظهرى
المهم العسكرى قالنا هاتو الرخص انا اديته الرخص التانى مرضيش يديله الرخص وقاله جبلى الظابط هنا انا مش هتحرك من هنا غير لما الظابط يجى ومش هاديك رخص وزق العسكرى وكان هيضربه و فضلنا مسنيين بقا ساعة او اكتر لحد لما الظابط جه ورحنا عند نقطة المرور اللى عند طلعة الدائرى
شوفو بقى اللى حصل ايه بقى هناك
1. قالهم انى انا شتمته اول ما نزلت من العربية :l_bhuhhh[1]: .. مع انى اول حاجة قولتها انا مديك اشارة لكن مشتمتش خااالص غير وانا بتضرب الصراحة
2. قال انى انا ضربته هو وال2 اللى معاه ... مع ان هما 3 وانا واحد غير ان اللى كان سايق يقوم بيا لوحده من غير حد وفرق الجسم بااااااااين قوى وده يبقى عيب عليه اصلا لو انا عرفت أضربه بجسمه ده
3. قال انى انا اللى غلطان وخبطه علشان كده طلع قدامى ووقفنى بعد كده
4. فى وسط كلامه بقى ده كله كمية حلفان بالمصحف وبالدين وبربنا على اللى بيقولو كله
انا وسط اللى بيقوله ده كنت عمال بضحك وعمال اخبط كف على كف ومش مصدق اللى بيحصل وكنت قربت اتجنن قام الظابط قالى اهده شوية مش هينفع كده وحسيت ان الظابط اللى بيكتب المحضر ما اقتنعش من كلامه قوى وسالنى انا ووالدى على اللى حصل وكان مقتنع بكلامنا اكتر بس كان فى ظابط رتبه اكبر منه كان عايز يخلص الموضوع ودى وكان شايف ان احنا الاتنين غلطانين علشان وقفنا المحور والموضوع مش مستاهل واللى انا فهمته من طريقه رؤيتهم للموضوع انه مش فارق معاهم اصلا ان احنا نولع فى بعض المهم الطريق والمرور والعسكرى اللى كان هيتضرب غير كده لأ ملوش دعوة مين اللى ضرب واتضرب ولا اي حاجة وبعدين اتحل الموضوع ودى لأن مش هاخد حاجة اصلا ده اللى فهمتو من والدى ودفعنا غرامه تعطيل المرور 250 ج وخادنا الرخص بس الراجل التانى خد رخصة العربية بس مخدش رخصة القيادة
بعدين الراجل قالى حقك عليا وباس راسى وراس ابويا علشان كان غلط فيه برده وكان الراجل مبسوط اوى وعمال يضحك ويسلم على الظابط ويقولو متشكريييين يا باشاااااا :f_eyeb1[1]:
انا كنت هاموووووت من الغيظ بعدها :019f3b~14: وكنت عمال افكر يعنى هو اللى خبطنى وشتم واتخانق معايا هو وال2 اللى معاه وبهدلونى كدمات واتخانق مع العسكرى وشتمة ومرضيش يديله الرخص ووقف الطريق وطبقلى حتة فى الباب برجله وما خلنيش اروح المشوار اصلا وبعد كل ده ادفع 250ج انا وهو وخلااااااااااص كده يعنى زيه زييي ؟؟؟!!!!!!

بعد كل ده عايز اعرف من الأعضاء المفروض فى موقف زى ده من الأول اعمل ايه؟؟؟ وهل فى حاجة انا عملتها غلط ؟؟ وهل ينفع اى حد يضرب اى حد بالغباوه دى كده بدون سبب حقيقى؟؟

على فكرة انا من بعد موضوع ده كنت حاسس بقهر فظيع وان الدنيا بقت غابة فعلا وانى ماخدتش حقى بل وطلعونى غلطان كمان :_alshmokh11:
وكنت حاسس انى لو فضلت اتضرب لغاية بليل ما كنش حد هيسأل عليا لحد ما العسكرى يجي الناس كانت ماشية ومفيش ولا حد نزل يحجز ده والله لو عايزين يموتونى ما حد كان هايقولهم حاجة يعنى لو عايز تاخد حقك فى البلد دى خده بدراعك لو معرفتش يبقى خلاص ملكش مكان ولو عايز تبلطج على حد ما فيش مشكلة بهدله وبعدين اعتذرلة وبوس راسه فى القسم قدام الظابط وخلاص

وأنا اسف جدا جدا جدا جدا جدا على الاطالة وبعتذر لو كنت زهقتكو معايا بس كنت عايز افضفض بكلمتين واخد برأيكم
تحياتى

مش عارف ليه انا عيني دمعت وانا بقرا اللي حصلك فين الكرامه وايه اللي حصل علشان هنموت بعض ايه يعني العربيه اتحكت في عربيه انا كنت في دوله اوروبيه الناس لو حصلت مشكله زي دي بيقفوا مع بعض ويسنوا العسكري يعمل المخالفه وكل واحد في حاله بعد كدا والتامين بيقوم بتصليح بعد كدا انت عارف ليه لان هناك الانسان له كرامه لكن هنا لو انت حتي مؤدب وهتتعامل مع الناس بادب هيقولوا عليك انت خواف اهبل البلد دي عايزا الراجل اللي يزعق يسب في الناس ياخد حقه بدراعه والناس تلاقيها رفعاله احلي سلام واحترام لكن اللي زيك وزي غيرك من الناس مش عارف اقول ليهم ايه وشكرا

[HaNo_ELBeh]

أولا حمد الله على سلامتك انتا والوالد
تانى حاجه للاسف هو ده بقى حال الشارع المصرى احتقان لدرجه الموت
وده اكبر دليل على اللى اجنا وصلنا ليه
ياريت ماتزعلش كلنا معرضين للصدمه ديه وانا بعتبرها صدمه وخصوصا لشخص محترم ذى حضرتك مافيش فى ايده غير التعامل بروح الادب لانك ممكن تخسر حياتك بسبب خناقه
انا عن نفسى بعمل كده بس بيبقى غصب عنى كل مابفكر فى اسرتى وبقول لا انا مش هتخانق علشانهم
قدر الله وماشاء فعل
تحياتى لحضرتك


حمى الله مصر...

[MaHmOuD MaGdY]

طبنجتك اللذيذه في درج عربيتك و انت نازل هي في ضهرك و في دماغ امه لان فيه واحد زميلي حصله الموقف ده و نزل زيك كده و الاتنين اللي كانوا معاه كانو بيحاولوا يفتحوا باب العربيه اليمين لولا مراته قاعده قفلت السنتر كانت العربيه اتاخدت و من ساعتها لازم تشيل اي حاجه معاك مفيش قانون عشان تبقى عارف حقك تاحده بدراعك مكنش اقل واجب اكسرله فانوس و امامي و قول انه خبطك من ورا هايطلع هو غلطان

ما اعتقدش ان الطنبجة هى الحل لان لو فرضنا واستخدمتها هاندم اشد الندم بعد كدة والله اعلم العواقب بعد كدة ممكن تكون ايه
هى فكرة الفانوس ديه حلوة الصراحة بس انا للأسف عارف انى ماكنتش اقدر اعملها وبرده ممكن احس بالذنب بعديها مع انى عارف انه يستاهل اكتر من كده كمان

[MaHmOuD MaGdY]

حمدا لله على سلامتك وسلامه والدك وربنا يكفيك ويكفينا شر الطريق

الله يسلمك يا باشا وربنا ما يوريك ولا يورى حد اللى انا شفته وربنا يستر علينا فى الأيام دى

[MaHmOuD MaGdY]

مش عارف ليه انا عيني دمعت وانا بقرا اللي حصلك فين الكرامه وايه اللي حصل علشان هنموت بعض ايه يعني العربيه اتحكت في عربيه انا كنت في دوله اوروبيه الناس لو حصلت مشكله زي دي بيقفوا مع بعض ويسنوا العسكري يعمل المخالفه وكل واحد في حاله بعد كدا والتامين بيقوم بتصليح بعد كدا انت عارف ليه لان هناك الانسان له كرامه لكن هنا لو انت حتي مؤدب وهتتعامل مع الناس بادب هيقولوا عليك انت خواف اهبل البلد دي عايزا الراجل اللي يزعق يسب في الناس ياخد حقه بدراعه والناس تلاقيها رفعاله احلي سلام واحترام لكن اللي زيك وزي غيرك من الناس مش عارف اقول ليهم ايه وشكرا

ما هو اللى مدايق الواحد انه اتبهدل علشان سبب تاااااااااااافه جدا ومن غير ما اخذ حق ولا باطل واطلع غلطان وللاسف هو ده حال بلدنا دلوقتى وماتحاولش تقارن ابدا بينا وبين اى بلد تانية لأن احنا عدينا كل الحدود ومفيش حد زينا

[MaHmOuD MaGdY]

أولا حمد الله على سلامتك انتا والوالد
تانى حاجه للاسف هو ده بقى حال الشارع المصرى احتقان لدرجه الموت
وده اكبر دليل على اللى اجنا وصلنا ليه
ياريت ماتزعلش كلنا معرضين للصدمه ديه وانا بعتبرها صدمه وخصوصا لشخص محترم ذى حضرتك مافيش فى ايده غير التعامل بروح الادب لانك ممكن تخسر حياتك بسبب خناقه
انا عن نفسى بعمل كده بس بيبقى غصب عنى كل مابفكر فى اسرتى وبقول لا انا مش هتخانق علشانهم
قدر الله وماشاء فعل
تحياتى لحضرتك


حمى الله مصر...

الحمد لله انها جت على اد كدة الواحد فكر بعد كده وقال طب ما هو كان ممكن واحد تانى كان يعورنى باى حاجة معاه ويأذى والدى مثلا والموضوع يبقى اكبر من كده بكتير وممكن كان حد تانى يعمل الموضوع ده علشان اقف و يسرق العربية مثلا فالحمد لله وقضاء اخف من قضاء

[FBIAhmed]

ما اعتقدش ان الطنبجة هى الحل لان لو فرضنا واستخدمتها هاندم اشد الندم بعد كدة والله اعلم العواقب بعد كدة ممكن تكون ايه
هى فكرة الفانوس ديه حلوة الصراحة بس انا للأسف عارف انى ماكنتش اقدر اعملها وبرده ممكن احس بالذنب بعديها مع انى عارف انه يستاهل اكتر من كده كمان

الطبنجه صوت بس هو مش هايعرف يفرق و لا اللي معاه فهيلم الدور