نظام التعليق الخلفي للنيو صني

[hugan]

معلش يا جماعة بس كل المعلومات دى غلط انا مالك للسيارة سوبر صالون 2013 و بركب ورا عل طول والعفشة لا مالتى لينك و لا تورشن بيم
العفشة نوعها جديد شوية عشان كدة نوعها مش معروف العفشة نوعها maragehy و بالعربى مراجيحى يعنى مصممة عشان تمرجح اللى ورا و تمخمضه
و فيها خاصية القيء السريع يعنى بعد 5 دقايق بس ترجع على اللى قدامك عشان كده بفكر اركب ازاز بين الكنبة الخلفية و الكراسى الأمامية
و دى اسرع و احدث عفشة بنظام القيء السريع يعنى فى الياريس القيء بيبقى فى خلال 10-15 دقيقة لاكن ديه ما شاء الله اسرع حاجة
و على فكرة فيها برده خاصية الولادة السريعة يعنى لو المدام حامل فى الشهر الخامس مثلا الواد هينزل بعد ركوبها العربية ب 5 دقايق برده و اهو تبقى وفرت الأنتظار 4 شهور و وفرت مصاريف المستشفى

هههههههههههه

[john55]

اكسنت 2012 اللي يحب بطنه توجعه يركب معايا نفس العفشه تورشن بيم والدتي كل ماتركب معايا تشتكي من المغص هههههههههه وشكرا

[medo-312]

ياريت نفكر كويس قبل ما تغير من البرسونا الى الصنى
مع العلم ان البرسونا برضة ليها عيوبها

طيب طالما البيرسونا ليها عيوبها .. والصنى ليها عيوبها ليه بتخوف الراجل من الصنى ؟؟ .. هو الهجوم على الصنى بقى موضة اليومين دول !!

[amrelsaqqa]

طيب طالما البيرسونا ليها عيوبها .. والصنى ليها عيوبها ليه بتخوف الراجل من الصنى ؟؟ .. هو الهجوم على الصنى بقى موضة اليومين دول !!

بعيدا عن اي حاجة وعن الصنى والبرسونا اي تغيير في العربيات بيقابله اكتساب مميزات جديدة وظهور عيوب ، ولكن الفكرة في نوعية العيوب ايه هل حاجة حرجة وخطرة ولا حاجة عادية

مثال ممكن انزل من النترا اركب اوكتافيا ، المميزات امان اكتر ثبات وفرامل احسن ، متعة في السواقة اكتر ، رفاهية اكتر، جودة خامات اعلى ، صاج انشف ، العيوب عزم وسحب اقل ، قطع غيار اغلى ، مش اي حد يعمللها صيانة ، خسارة اكتر في اعادة البيع ( عيوب مش critical )

مثال تانى انزل من جولف 4 اركب نيو اكسنت
المميزات ، شكل احدث ، عزم وسحب اعلى ، صيانة ارخص، تكييف احسن ، اعادة بيع احسن ، العيوب فرامل وثبات وامان اقل ( عيوب critical )

[Ahmed Eraqy]

طلما موضوع دة في جزئية للبروتون هو مركز عصام صفا دة بيعمل كل حجات بروتن هناك بدون الخروج من الضمان

للاسف ملوش فرع فى اسكندرية و التوكيل نفسه ملوش فرع هنا بس فى المركز المصري الاوربي مركز معتمد من بروتون

[medo-312]

بعيدا عن اي حاجة وعن الصنى والبرسونا اي تغيير في العربيات بيقابله اكتساب مميزات جديدة وظهور عيوب ، ولكن الفكرة في نوعية العيوب ايه هل حاجة حرجة وخطرة ولا حاجة عادية

مثال ممكن انزل من النترا اركب اوكتافيا ، المميزات امان اكتر ثبات وفرامل احسن ، متعة في السواقة اكتر ، رفاهية اكتر، جودة خامات اعلى ، صاج انشف ، العيوب عزم وسحب اقل ، قطع غيار اغلى ، مش اي حد يعمللها صيانة ، خسارة اكتر في اعادة البيع ( عيوب مش critical )

مثال تانى انزل من جولف 4 اركب نيو اكسنت
المميزات ، شكل احدث ، عزم وسحب اعلى ، صيانة ارخص، تكييف احسن ، اعادة بيع احسن ، العيوب فرامل وثبات وامان اقل ( عيوب critical )

كلام سليم .. بس ايه هى عيوب الصنى ال critical ؟

[amrelsaqqa]

كلام سليم .. بس ايه هى عيوب الصنى ال critical ؟

الثبات والفرامل مقارنة بالبرسونا

[medo-312]

شكرا للتوضيح .. بس للأمانة فرامل الصنى 2014 كويسة جدا وأنا معايا العربية حتى عيب التيل تم اصلاحه فى الدفعات الجديدة وانا منهم وموضوع الثبات البيرسونا احسن معاك بس الصنى لحد 140 او 150 تمام يعنى مسألة فروق مش عيوب critical

[Mohamedarazak]

الثبات على حسب معلوماتى. بيقوم على العوامل دى
١. الوزن
٢. الارتفاع
٣. الاحتكاك مع الهواء
٤. عرض قاعدة العجلات
٥. العفشة و نظام التعليق

فموضوع نظام التعليق دا عامل و احد فين الباقى

[Mohamedarazak]

عن تجربة. انا كان معايا صنى ٢٠٠٨. ( ثبات افضل من نيو صنى). و جين 2.
بصراحة الجين ٢ كان عليها ثبات هايل
الصنى كانت ثابتة بس مش زى الجين 2

[tutankhamoun]

مبدئيا يا أستاذ أحمد ربنا يوفقك في الأختيار الصحيح .و كل العربيات في النهاية حلوة و شو فأنت عايز أيه من العربية علشان ترتاح نفسيا و أنت بتشتري .

أنا شايف أن الصني القديمة ينفع نقارنها بالجين 2 أو البرسونا

و لكن الصني الجديدة ........ لا وجه للمقارنة من أوجه عديدة أو البروتون تكسب فيها

أولا الثبات في الصني الجديدة على أده خالص (اللي عايز يعرف الثبات حلو و لا وحش ... يركب حاجة أعلى في الثبات )
علشان فيه ناس تجري بالعربية و العربية حلوة و زي الفل بس هو مجربش غيرها أو جرب حاجة أقل . و الثبات هنا فيه فرق شاسع ما بين الصني الجديدة و البروتون .

ثانيا الصاج في البرسونا أتقل و أقوى و دي ميزة قوية .

ثالثا ... الشكل العام للعربية ..... الصني الجديدة بصراحة شكلها غريب و مستفذ و لكن دي أذواق ممكن يكون ذوقي أنا كدا و ناس تانية يعجبها شكل العربية (و ربنا يبارك لملاكها )

-==================

بالنسبة للعفشة الخلفية للصني الجديدة
هي عفشة تورشن بيم .......... عمود أتصال و ليست متعددة و موقع نيسان مصر كذابين .
مينفعش نيسان تنزل العربية في العالم بنوع عفشة و مصر عفشة تانية علشان و بكل بساطة أنت محتاج تغير الشاسيه نفسه علشان تقدر تغير شكل العفشة (ده جزء من تصميم الشاسيه نفسه )

==================

عايز بس أضيف حاجة ......... مهمة
نيسان شركة كبيرة و شركة عريقة و قديمة ......... ده ما يخليش الحتة دي تدخل في أي مقارنة بين عربية من عربياتها امام شركة تانية

و إلا بقى الفورد و المرسيدس يكتسحوا سيارات العالم جميعا في أي مقارنة لأنهم من أقدم شركتين في العالم ... أيام ما اليابانيين كانوا بيقلدوا عربيات أوروبا .

المقارنات بتكون ........... منتج قصاد منتج ............... بس كدا .

لو كدا بقى يبقى 128 أحسن من الصني ........... لأن فيات أعرق و أقدم من النيسان

(أنا أصلا بعتبر نيسان أفضل من فيات - بس لزوم التوضيح المثال السابق تم أستخدامه )

في النهاية أنا بحب أشجع أي منتج خارج من أي مصنع مصري و أنا شايف أن الصني الجديدة لا غبار عليها و عربية كويسة .
و لكن التفاصيل أكثر يجب أن تبحث عنها مع مستخدميها

[yasserelsayad]

مممم طيب ممكن يا ياسر باشا تقوللى امثلة للعربيات المالتى وفي نفس الوقت ثباتها مش قد كدة ؟ ( مش بشكك في المعلومة ، عايز اعرف فعلا )

multi دى كذا شركة بطلقه وخلاص وكمان بقى مصطلح عام هنا فى المنتدى على اى عربية عفشتها مش torsion .. زى مثلا على الفيرنا والالنترا HD و الـ M11 وشوية عربيات صينى كل دول عفشتهم مش مالتى بس بقولوا عليهم كدا .. بالظبط زى ما صاحب الموضوع اول ما شاف كلمة مالتى فى البرشور فكر فى العربية على طول

وكمان مش اى عربية torsion باردوا وحشة عندك وحش زى الـ GTI دو torsion وكمان السيفيك Type R الهاتش باك وفيه طبعا عربيات كتير affordable

يعنى مش حاجة بتتعمم على كل العربيات
وبعدين الموضوع مش عفشة بس ممكن شاسيه كمان مش rigid كفاية او aerodynamics تعبانة او حتى ممكن الـ spring rate مش مظبوط او unsprung weight عالى
حاجات كتير بتأثر

وبعدين الدنيا مش نظامين بس
الصح ان هما 3 انظمة رئيسين تحتهم حاجات كتير وهما
dependent suspension زى الـ live axel
independent suspension زى الماكفيرسون والمالتى والـ double wishbone
semi-dependent suspension زى الـ Torsion beam

فا الموضوع يطول شرحه واتقال قبل كدا كتير فى المنتدى

[د.هشام]

انا حقول كلمتين بس في موضوع الثبات والفرامل علشان فيه تضارب في الأقاويل. بالنسبة للثبات فهو ممتاز حتى سرعة ١٤٠، بمعني ممكن تناور بمنتهى السهولة على الطريق، وممكن تأخد ملفات على السرعة دي من غير ما تحس ان العربية بتميل بيك أو حتخرج عن الحارة بتاعتك. لو سرعة الرياح شديدة حتضطر تنزل بالسرعة الى ١٢٠ علشان تحس بنفس الثبات. نيجي بقى للسرعة فوق ال ١٤٠، اللي عايز يشتري العربية دي مايحلمش انه يعدي ال ١٤٠، العربية تعدي ال١٤٠ بمنتهى السهولة وممكن توصل ١٨٠، بس مش حتبقى مبسوط، حتبقى جازز على أسنانك، وعضلاتك كلها حتبقى مشدودة وحتبقى قافش في الدريكسيون بإيديك الإثنين، علشان العربية دي فيها حاجة غريبة جدا، وإنت على سرعة ١٤٠ الثبات بيبقى ١٠٠٪ على سرعة ١٥٠ بيبقى ٨٠٪، السرعة تقرب بس من ال١٦٠ الثبات بيقع الى ٤٠٪، بعد ال١٦٠ ماجربتش، بس أوعدكم اني مش حجرب.
بالنسبة للفرامل الفرامل أكثر من ممتازة ولاغبار عليها وأحسن من عربيات كتير في السوق. أي حد عنده العربية وحاسس ان الفرامل ضعفت ولازم يدوس على بدال الفرامل للآخر، يتأكد ان فيه مشكلة في ماستر الفرامل، وبيتغير في التوكيل دلوقتي، بس أكيد نيسان عالجت المشكلة دي في الدفعات الجديدة.

[edodahab]

اللى شارى العربية دى مشتراهاش عشان يحرق او يجرى او يعدى ال ١٤٠
صنى عربية عائلية من الدرجة الأولى
و اى حد من هوات السرعات العلية و الحرق و المناورات ميفكرش فيها

[Ahmed TRAVCO]

هو مش عيب ابدا انها تكون torsion beam بس العيب ان الوكيل يستعبط الناس ويكتب حاجة مالهاش وجود في البروشور...

وبعدين حتى لما حبوا يكذبوا معرفوش... لان البيه العبقري اللي قالهم يعملوا كده شال كلمة torsion اللي الناس مش هتنبهر بيها وحط مكانها كلمة multi-link على اساس تجذب ناس كتير زي الاستاذ صاحب الموضوع... بس وسط ده نسي يشيل كلمة beam فطلعت في الاخر: multi-link beam هههههههههه!!! ولو نبص تاني على البروشور هنلاقيها واضحة جدا...