قولوا هندى قولوا صينى برضه النيو صنى مكسرة الدنيا فى المبيعات

[adel_edrees]

أنا بس عايز أقول لكل اللى بينتقد العربية النيوصنى قالوا هندى قالوا صينى قالوا خفيفة بعد 10 كيلو قالوا فراملها مش كويسة قالوا صاجها ضعيف و منيلة بستين نيلة قالوا الأيرباج ما بيفتحش قالوا الكنترولر مكانه وحش كل ده و لا الهوا أنا لى واحد جارى من قيمة شهرين أبن خالتى عمل حادثة بالعربية النيوصنى فأنا جبتها عندى في البيت المهم لقانى فاتح الكبوت المهم قالى أيه رأيك في العربية دى قولت له عربية مش كويسة أفتكر أنى بأضحك عليه و قاللى أيه رأيك في المصرية للسيارات قلت له وحشة سمير ريان برقبتها المهم أمبارح لقيته بيخبط عليا قالى أنا عايزك قولت له خير المهم نزلت تحت معاه ورانى النيسان الجديدة اللى أشتراها من المصرية هو في أيه في العربية دى دى كده أرزاق علشان بعد كده اللى له نصيب في جاجة حيشتريها يعنى حيشتريها

بس واضح أننا هنا في المنتدى في وادى و الناس بره في وادى تانى خالص

[hugan]

فعلا مبيعاتها مرتفعه

[J A G U A R]

ثقافه شعب بقى

[Adnfalcon]

ما الفيرنا منتشره جدا والصيني منتشر بردو بس تقول ايه ف بلد عشان تركب عربيه فيها وسائل أمان معقوله تدفع 200 ألف جنيه وطالع !!

[Omar Mahmoud]

الفيرنا و اللانوس و الافيو منتشرين اكتر من عربية زي اللوجان بمراااحل
هل ده معناه إن هما احسن من اللوجان سواء القديم او الجديدة؟؟؟؟

[john55]

في بنها عندنا كتير اوي بجميع ماركتها عادي او سوبر صالون بس هقول لحضرتك لو هدور علي مثلا عربيه كوري فيها مانع انزلاق ومانع سرقه واير باج وجنوط اسبور مش هتقل عن 140 الف يبقي الصني تكسب وشكرا

[grumby78]

عربية زي الفل بدون اي مشاكل في العفشة او الموتور او الجيربوكس وحمارة شغل وعالية وواسعة جدا وشنطتها كبيرة وتوكيلها محترم ماتبعش ليه ؟ خلي اللي يتكلم يتكلم العربية ملت الشوارع في اسكندرية

[eng.m7md.ali]

الناس بتشتري علامة .. ممكن اجيب عربية اي كلام واحط عليها علامة نيسان ومبروك كدة جبت نيسان -_- .. شعب متكحول في نفسه

[Mostafa.Mahran]

واحد زميلى معاه النيو صنى و كان معاه قبلها صنى 2010 بس عملت حادثة و اتباعت متكسرة و اشترى الجديدة بيقولى بصراحة مفيش مقارنة فى الثبات نهائى بين العربيتين و انا حاسس انى نزلت مش طلغت لمستوى اعلى

[monamize4]

واضح أننا هنا في المنتدى في وادى و الناس بره في وادى تانى خالص

like

احيانا (مش كتير) بحس الحكاية دى اوى ف مواضيع معينة
تحس ان كلام بعض الاعضاء خارج من واحد ملوش اى خبرة واقعية
ماهو الا كلام انترنت و بيتردد من غير تجربة واقعية

[Moh. Elnagar]

الحمد لله العربية معايا زي الفل مفيهاش أي مشاكل وكفاية إني بدخل أي مطب مهما كان عالي ومهما كنت محمل وأنا مطمن لأنها مبتحكش في أي مطب مهما كانت محملة أنا قريت كلام كتير هنا قبل ما إشتريها وبصراحة مقتنعتش بإللي بيحصل هنا لأني حسيت إن في ناس بتتكلم وخلاص من غير حتى ما تركب العربية ودا بردو إللي حصل معايا من واحد صاحبي كان بيحاول يكرهني فيها من غير ما يركبها ويعدين هي عفشتها وسحبها ممتازين وفراملها الحمد لله أنقذتني كتيييييييييييييييييييييييير أعلى إمكانيات بأقل سعر هذه هي النيو صني

[adel_edrees]

طيب تعالوا نتخيل الوضع حيبقى عامل أزاى لو مسئول في شركة نيسان مصر أعلن أن صنى ما بقتش تحت أسم نيسان و أن نيسان باعت الأسم لشركة صينية و أن العربية موتورها بييجى من الصين و الشاسيه بييجى من الهند و نشوف حجم المبيعات حيبقى عامل أزاى و الله أستمر على الارتفاع المبهر ده يبقى ماحدش يتكلم تانى عن عيوب العربية و أن العربية فعلا كماليلتها كتير و أن العربية كده بتبيع و أن الشعب المصرى شعب تمام و ناصح وعارف هو بيشترى أيه و العربية فعلا كويسة و ولو طلع الراجل ده و قال الحقيقة و أنخفضت المبيعات يبقى الشعب كان واقع تحت خديعة أنه بيشترى عربية صيني على أنها ياباني بس اللى مخلينى مستغرب أن العربية بتبيع تحت أسم نيسان اليابانية يعنى بعلم من اليابان غريبة دى !!!!!!!!!!!!! يعنى لو روحت أشتريت عربية نيسان صنى من مصر و لقيت فيها العيوب اللى موجودة في النيسان صنى عمرى ما حأفكر أنى أشترى عؤبية نيسان تانى أيا كانت قشقاى أو جوك أو حتى ارمادا حأتعقد من أسم نيسان بجميع موديلاته و الدليل على كده أن العربية الصنى ما تتبعش في أوربا بالكامل في حاجة غلط أزاى نيسان تضحى بأسمها في العالم علشان عربية فيها مشاكل و عيوب في حاجة مش مفهومة طيب هما لما بيبعوها في أي دولة تانية غير مصر بيفهموهم الحقيقة أنها مش ياباني بمعنى الكلمة طيب الخبراء اليابانيين اللى جاىين من شركة نيسان اليابانية وبيشرفوا على أنتاج نيسان اللى هي مش يابانية أرحموا دماغى أنا خلاص حأتجنن !!!!!!!!!!!!!!!!!!!!!!

[adel_edrees]

يبقى العربية كده تمام و احنا ظالمينها و أنها أفضل قيمة مقابل السعر

[mohamed boy]

الصراحة العربية كويسة ومنتشرة انتشار رهيب فى كل الشوارع ودة حال الشعب المصرى بيتكلم فى اى حاجة وخلاص انا فاكر اول ما جبنا هيونداى اكسل 94 الناس فضلو يقولو دى كورى حد يجيب دى دلوقتى هيونداى من اكبر الشركات فا الواحد متعود يسمع كلام وبس

[د.هشام]

عيوب الصناعة بتتغير في التوكيل تبع الضمان، وده متوقع من شركة زي نيسان علشان تحافظ على اسمها.