عيوب سيارة نيسان صني 2014 الشكل الجديد

[Muhammad Momen]

أنا بكتب الرساله ده، علشان محدش يرتكب نفس الخطأ اللى عملته لما ييجي يشتري عربية ..... وبكتبها لأني سلكت كل السبل المباشرة للتواصل مع شركة نيسان وفي الآخر عملولي بلوك على الصفحة بتاعتهم ومبقوش يردوا على التليفون، فبقت هى ده الطريقة الوحيدة اللي ممكن أوصل بيها المشكلة الموجودة في العربية لكل الناس .....




الحكاية بدأت إني زى خلق الله اللي عايزين يعيشوا بكرامة على قد ميقدروا في مصر بعيد عن المواصلات التي تمتهن فيها آدمية الإنسان، والعربيات القديمة اللي بهدلت الواحد فلوس لتصلحها ووقفه في الشارع، خصوصا بعد مالواحد مبقاش بطوله وبقى في زوجة وأولاد....ربنا كرمني وقلت أدفع اللي معايا واشتري عربية جديدة، سألت على العربيات ولقيت إن أقرب عربية مناسبة ليه هى العربية النيسان .
اشتريت سيارة نيسان صني 2014 الشكل الجديد في شهر يونيو الماضي، وبدأ تيل الفرامل (يصفر) بعد 3 الاف كيلو متر ، قلت لمهندس الصيانة الكلام ده، ورد إن ده رايش ونضفناه وكله تمام !!!
واستمر الصوت حتى الكيلو 13 ألف، طلب المهندس في توكيل أوتو إيجيبت تغيير التيل !!! قلته إزاى التيل يخلص بعد 13 ألف كيلو ؟!!!! قال لي ده رجلك واستخدامك!!! مع العلم بأن هذه هى السيارة الخامسة التي أمتلكها ولم يحدث ذلك في أى سيارة من قبل ولا حتى الفيات، فالتيل بيقعد مش أقل من 25 ألف كيلو في العربيات العادية.!!!!!!
قلت خليها على وغيرت التيل ودفعت تمنه !!
وبعد الكيلو 17 ألف – يعني بعد أربعة الآف كيلو بالتيل الجديد، بدأت الصفارة ترجع تاني كلمت الصيانة وحددت موعد ....)
فأخبروني إن التيل تمام ومفهوش حاجه وإن الصفاره ده رايش : ) زى بتاع المرة اللي فاتت!! ... وتم قياس الطنابير وقالوا فيها ريجه بسيطة وبعتنا للتوكيل وهيرد علينا، المهم يعدي أسبوع في التاني لحد ميبقوا شهرين ولاحد سأل فيا !!
رحت أعمل صيانة ال30 ألف كيلو ...... كانت الطنابير والتيل ادمروا لأن التوكيل الغير محترم مردش!!! وعايزني أغير الطنابير واغير التيل!!!
المهم بكل تكبر واستعلاء وكأني شاحت العربية منهم، التوكيل فضل يكابر وأكن المشكلة مشكلتي
يعني أيه واحد يروح يشتري عربية من شركة المفروض إنها محترمة يطلع فيها عيب صناعة في الفرامل ....ولما لاقدر الله حد من ولادي ولا مراتي يجرالهم حاجه هتقوليلي معلش أحنا آسفين!!!!
أنا اشترتيت عربية على إنها سليمة وطلعت عربية خربانة وفيها عيوب صناعة ... وأنا هاخد حقي بإذن الله في النهاية
ولو مكنش في استجابة سأتبع كل الوسائل المحترمة علشان آخد حقي
العربية مرمية في توكيل أوتو إيجيبت في أبورواش بقلها شهر لإنهم بيتبعوا منهج خليه يضرب دماغه في الحيطه ... ومش هيعرف يعمل معانا حاجه!!!
أرسلت رسائل متعددة لشركة نيسان في اليابان ومحدش رد ........
كلمت نيسان في مصر وبيقولوا أى كلام ومش عايزين يعترفوا بغلطهم
سأحصل على حقي في النهاية بإذن الله ومش أنا بس ، لا وهجيب حق كل واحد خدعته هذه الشركة الغير محترمة.
….
*ملحوظة نيسان سحبت 8 الاف عربية من السوق وقالت إنها حلت المشكلة في العربيات اللي انتجت من بعد الشاسيه رقم 8 الآف ... وأنا شاسيه عربيتي رقمه 23 ألف واشتريت العربية على الأساس ده بس للأسف المشكلة لسه موجودة.




جلسة حماية المستهلك الاولى


"انشرها على قد متقدر ...حذر الناس ... احمي ولو واحد من إنه يتغش أو يضيع حقه"
-------------------------------
"متجيب بوسه – هكذا قال لي في النهاية"
المكان : 96 ش أحمد عرابي – المهندسين - جهاز حماية نيسان
الحضور :
أولاً: جهاز حماية نيسان
اللجنة الفنية للسيارات برئاسة اللواء احمد بركات، محمد أنور – مدير إدارة شكاوى السيارات، د.أحمد عمران – منتدب من كلية الهندسة – جامعة عين شمس، وكان في واحده بتكتب
ثانياً: شركة نيسان
ثلاث ممثلين عن شركة نيسان منهم واحد اسمه (طارق سعيد هو اللي بتكلم والباقي مشاهدين
ثالثا: الشاكي
محمد مؤمن (صاحب العربية) .. أ/ عاصم الخولي – محام – د.هشام خشبة
سوف أختصر الجلسة قدر المستطاع
اللواء أحمد بركات: فين صاحب العربية؟
رديت: موجود
اللواء أحمد بركات: ومين دول ، قلتله أ/ عاصم الخولي المحامي – د.هشام خشبه صديق ، رد قال : لأ مش قانوني مينفعش صديق لازم يخرج الأستاذ عاصم ماشي ...طب والتلاته بتوع نيسان دول (قانوني) أنا صاحب الحق، هو: معلش دا القانون (هشان خرج)
اللواء أحمد بركات: العربية نيسان صني اشتريتها يوم 19مايو 2014 ، مشيت بيها كتير ماشاء الله ، اللي حوليه آه كتير
رديت عليهم: ما أنا جيبها علشان أمشي بيها ، مش جيبها علشان أركنها
اللواء بركات: أيه مشكلتك؟
رديت : أولا حضرتك أنا عربيتي ده جبتها بالقسط ...مش أبويا ولا أمي اللي جيبنهالي (ولو حتى كده فده حقي )
أنا رحت لشركة نيسان بعد مشتريت العربية بـ 3 أسابيع كان التيل بيصفر وقالولي ده رايش ونضفناه، بعدها فضل التيل يصفر لحد مرحت عند الـ 12 ألف كيلو قالولي غير التيل، قلتلهم إزاى التيل يخلص بالسرعة ده؟!! قالولي ده مشكلة رجلك بتدوس كتير على الفرامل، وبكل حسن نية دفعت (650 جنيه) ثمن التيل وغيرته!
بعد كده مشيت أقل من الفين كيلو على التيل الجديد لقيته بدأ يصفر، رحت التوكيل وقلتلهم في صفاره، ولكن لاحياة لمن تنادي قالولي الطنابير فيها ريجه وبعتنا نشوف الضمان وهنرد عليك هنغيرهالك ولا لأ ....وسابوني شهرين بمشي بالعربية معايا مراتي وعيالي وبمشي في وسط الناس، وهمه ولاهمهم حياة الناس وأنا معرفش إن المشكلة كبيرة، لحد موصلت لـ 29 ألف كيلو قالولي التيل والطنابير باظوا .......!!!!!!!!
طيب التيل بلعناه، طب في طنابير في الدنيا كلها تبوظ بعد 29 الف كيلو ..إزاى!!! وغير كده كلموني في الأول بكل تكبر وقالولي بالأدب :إضرب دماغك في الحيط مش هتعرف تعمل حاجه، ولما بعتلهم رسالة على الفيس بوك عملولي بلوك وبعد كده واحده من خدمة العملاء كلمتني وفي آخر المكالمة قفلت السكه فوشي وأنا بتكلم وقالتلي مع السلامه!! !!!!
جيت أكمل الكلام : قال لي، خلص علشان في ناس تاني بره (كان في 8 مشتكيين شركة نيسان)
رديت: يعني أيه أخلص!! أنا كان معادي الساعة 11 ودخلت واحده هو حضرتك جايبني علشان أشتكي وتكتبوا ولا في حاجه تاني؟!!!
اللواء بركات: قال لي هو أنت ليه Aggressiveكده ( هو كان عايز تلميذ في الفصل يقعد ساكت!!) المهم الراجل مستحملش 5 دقايق وقام (اللي هو رئيس الجلسة) قال معلش يا جماعة أنا آسف عندي مشوار وقام ماشي ومرجعش تاني.
قعد د.إبراهيم عمران يدير الجلسة: إنت عايز أيه؟
أنا: عايز شهادة بسلامة العربية، تفيد بمطابقة التيل والطنابير للمواصفات القياسية العالمية، وتحليل للمواد المصنوع منها التيل والطنابير أو ياخدوا عربيتهم ويدوني فلوسي.
رد قال : مفيش إلا المواصفات القياسية المصرية .... (قلتله ماشي) هاتوهالي!!
رد د. إبرهيم عمران تاني قال : خلاص يعني أيه المطلوب؟
رد: أستاذ عاصم (المحامي): عايزين الشهادة أو ترجعوا العربية،
رد عمران قال يبقى نعمل لجنة فحص من كلية الهندسة
ملحوظة: بدفع في اللجنة ده (1.5%) من ثمن العربية حوالي ألفين جنيه (وكنت مستعد أدفع) ....
قم قال د.عمران (وكأنه لايعرف اللي جى) :نسمع نيسان
ها يطارق بيه!!!
رد نيسان (طارق سعيد) : إحنا اللي يهمنا رضى العميل ( ومكنش بيبوص لي أصلا وكان في واحده جنبه عماله تبصلي وتضحك وتحس إنهم جايبنها تنرفزني علشان أغلط فيهم) قلتله عميل أيه: هو أنت بصتلي أصلاً!!
نيسان (طارق سعيد): بيوجه كلامه لإبراهيم عمران (اللي هو المفروض فني ومش مختص قانونيا) يا فندم العميل جه من أسبوع – والعربية بقلها 5 أسابيع - علشان يصلح العربية (أنا كنت رايح أعمل الصيانه الدورية مش أصلح العربية) وخدمة العملاء كلموه وقالوله يصلح العربية و إحنا صلحنهاله وغيرنا التيل والطنابير!!!!! بس هو امتنع يخدها !!! وكله تمام ولو عايز يجربها يجربها!!!!!!!!!!!!!!!!
أنا طبعا قعدت أقول دول مبيقلوش الصدق، إزاى يتعمل كده من غير إذني، ياريت تثبت كل الكلام اللي قاله في محضر الجلسة وبعد أصرار مني كتبوه، وقلتلهم مش إنتم بتقولوا إني وافقت هاتوا لي دليل إني وافقت .....وطلبت تفريغ المحتوى الصوتي مع خدمة العملاء .....
رد: د.عمران ..... طيب تمام يعني إنت مصمم على لجنة الفحص؟ (طبعا لجنة الفحص كده اضربت بس هو عايز يقللي خلاص مفيش فايده من اللى انت بتعمله) ...رديت قلتله وهو ده ينفع يغيروا قطعة في العربية من غير موافقتي هى بتاعتهم ولا بتاعتي!!وبعدين لما حضرتك تروح .... لجنة الفحص هتلاقي أيه؟!!! تيل جديد وطنابير جديدة وطبعاً القديم بخ رااااااح !!!
على الرغم من إن المفروض لجنة الفحص لمجرد إنها عرفت إن في طنابير اتغيرت في 29 ألف كيلو ده كارثة لوحدها !!!!!
وبعدين قلتله طيب مش هو غيرها خليه يديني شهادة بإن قطع الغيار ده آمنه ومطابقة للمواصفات القياسية ويديني تحليل المواد
رد: عمران ومحمد أنور على التوالي: إن المسئول عن الفحص معندوش إمكانية يحلل المواد ....
رديت : تمام بس أكيييييد نيسان عندها تحليل المواد المصنوع منها التيل والطنابير خليهم يدوهاني ....
قام محمد أنور: موجه الكلام لمندوب نيسان "طارق" : أدوله الشهادة
فأجاب (طارق نيسان) بحرف واحد : لأ
قلتله: طيب أنا كده عرفت اللي فيها خلاص، أنا عايز أقلكم حاجه ....إنتم حولتم الشركة ده للنيابة في 12 إبريل 2014 وبعد كده حولتوها 3 مرات للنيابة ولسه سايبنها بتنتج عربيات وتعرض حياة الناس للخطر !!! إزاى بتعملوا كده هو مش إنتم انتخبتم الرئيس وصوتوا على الدستور اللي بيتكلم عن كرامة الإنسان وآمنه وإن ده حق من حقوقه.... ليه بتخلفوه !!
قام د.عمران قاللي : الموضوع أكبر من كده، و إحنا مينفعش نتهم الناس بدون دليل وفي 25 ألف عربية نيسان في الشارع واللي اشتكوا أقل من 1 % ... فمنقدرش نقول إن ده ظاهرة!!!!
قلتله عند الناس المحترمين واحد زى مليون !!!
رد قال: وهو يتبسم خلاص يا باشمهندس خد عربيتك ولو في أى حاجه إحنا معاك ....والكلام اللى إنت عارفينه ده
قلتلهم موجه كلامي لإبراهيم عمران ومحمد أنور .....
إنت عايزني اسكت وروح استلم العربية وامشي بيها معايا مراتي وعيالي وحوليا ناس أعرض حياتهم للخطر، و مش عارفين تجيبوا لي ورقه من شركة إن العربية آمنة للاستخدام ...هى حياة الناس ملهاش قيمه .....فسكتوااااااا
وبعدين فجأة قالوا ياريت كله يتفضل بره علشان اللجنة هتتداول:
3 دقايق وبعدين ندونا :
وكانت توصية اللجنة إني استلم العربية ولو في أى مشاكل ابقى ارجعلهم !!
مضيت على الورقة "برفض توصيات جهاز حماية نيسان، واتخاذ كافة الإجراءات القانونية ضد شركة نيسان.
وبتوع نيسان يبصولي ويضحكوا وأنا بمضي، والناس الي المفروض من الجهاز يبقوا في صفي أو على الأقل محايدين، البنت اللي بتكتب منهم والله العظيم بتكركر من الضح هى وبتاعت نيسان !!!!
في النهاية
قمت أمشي، وأنا ماشي ناداني د.إبراهيم عمران و قال لي: مش تجيب بوسه قبل متمشي!!!!!!!!!!!!
------------------------------------------------------------------
نفسنا طويل بإذن الله، مش مهم أنا دلوقتي ( أنا هاخد حقي في الآخر بإذن الله وهى مسألة وقت) المهم إننا نقدر نحمي أكبر عدد من الناس إنهم ميشتروش العربيه ده، "وبالمناسبة كان معايا 8 بيشتكوا من موديلات تانيه زى التيدا والكشكاي)
ده واجبنا وده اللي هيوجع نيسان وهيردع أى شركة ممكن تفكر في غش الناس أوي وهم موجعين بالفعل .....

[eslam atia]

راجل والله

[ENG.MaRk]

لو عرفت توصل لحاجة ابقي قول عشان ناس كتير زيك نفسهم يلاقوا طريقة يظبطوا بيها التوكيل الغير محترم ده

[ENG.MaRk]

عموما ربنا معاك

[Muhammad Momen]

عشان نرجع حقنا من شركة نيسان ونحافظ على أرواحنا وأرواح ولادنا و صوتك يوصل للجهات الإعلامية والصحفية بشكل مباشر سجل بياناتك وتفاصيل مشكلتك

ولو عندك أي صور أو فيديوهات أو تقارير إثبات حالة حابب تضيفها لتفاصيل مشكلتك، سجل في الموضوع هنا

اوعى تفرط في حقك لإنه مش بتاعك لوحدك !
وتابعوا معانا بننزل مشاكل ناس كتير حالها زينا وأسوأ،

#نفسنا_طويل_بإذن_الله

[hatemfox2005]

اسم التوكيل ايه عشان انا في صيانه 20000 عند اوتو ايجيبت الصراحه ناس محترمه غيرو التيل والطنابير والكليبر علي حساب التوكيل

[Samah AbdAllah]

اسم التوكيل ايه عشان انا في صيانه 20000 عند اوتو ايجيبت الصراحه ناس محترمه غيرو التيل والطنابير والكليبر علي حساب التوكيل

كاتب فوق اوتوايجيبت

[ahmedwagdy03]

أصلا نيسان صنى واخدة بالجزمة فى السعودية - حيث وجود رقابة و مراجعة على المواصفات -و كلها مشاكل

فما بالكم فى مصر !!

[mhmd_farouq]

ربنا يعينك عالظلم وبالتوفيق انشاء الله

[prooo]

انا عملتلك شير لمشكلتلك على الفيس بوك والناس كلها معاك

[Muhammad Momen]

انا عملتلك شير لمشكلتلك على الفيس بوك والناس كلها معاك

شكراً جزيلاً يا م. عمرو .. أستأذن حضرتك تبعتلي لينك المشاركة على الخاص :)

[ali_omer440]

ربنا معاك فعلا نيسان ما بيحلوش ابسط المشاكل
انا اشتريت نيسان صني الشكل الجديد 2015 من شهر بس وروحت اعمل صيانة الاف وكانت شكوتي اني لما بدور العربية الصبح بتدور بعد فترة طويلة بصوا على البطارية في اتو ايجيبت ابو رواش وقالولي البطارية عايزة تتغيير !!!!
قلتلهم دي العربية لسه شريها مكملتش شهر قالولي ما تقلقش ها نغيرها على الضمان وبعدها لقيت في الفاتورة 110 جنية سالت دول بتاع ايه قالولي فرق البطارية اللي كانت راكبة من الجديدة !!!
اتصلت بنيسان وحكيت ليهم اللي حصل وانا لسه في التوكيل قبل ما ادفع قالولي لا طبعا متدفعش فلوس وادينى مدير الاستقبال نكلمه وبعد ما دار ما بنهم الكلام قالولي للاسف دي تعلمات المصنع انه فيه فرق سعر بين البطاريتين قولت ليهم خلاص غيرو القديمه بجديدة نفس النوع قالوا لا اصل المصنع مش بيبعت نفس اللي راكبة كقطع غيار !!!!
ملخص اللي فهمته ان نيسان بتحط قطع غيار رديئة في السيارة اثناء التصنيع وتروح حضرتك تغيرها على حسابك بشئ افضل في الصيانات !!! طبعا نصب عيني عينك وبكل بجاحه
ربنا معانا

[صالح رشدى]

Mohamad Momen

جلسة حماية المستهلك + نيسان


مدة الجلسة: ساعة ونصف

الحضور
م.محمود حلاوة – نائب رئيس مجلس إدارة شركة نيسان
اللواء عاطف يعقوب – رئيس الجهاز
نفس المجموعة من الجهاز اللي كانت موجودة في الجلسة السابقة + مستشار من وزارة العدل
محمد مؤمن + د.هشام خشبه

النتيجة : إحالة شركة نيسان للنيابة

ماحدث في نقاط:

*المواصفات القياسية العالمية للسيارة = 159 مواصفة
*مصر تطبق 11 مواصفة فقط !!!!!!!!!!

توجهت بالسؤال لأعضاء الجلسة:

هل من الطبيعي أن تتآكل الطنابير عند 29 ألف كيلو

الجهاز جاوب بالإجماع + نائب رئيس مجلس إدارة نيسان أنه ليس من الطبيعي مطلقا ماحدث للأجزاء التالفة في العربية وأشار د.إبراهيم عمران أن عمر الطنابير على الأقل 80 ألف كيلو ....
.......

*شركة نيسان أعتذرت عن سوء معاملة موظفيها لي، وعايزه ترجعلي حق التيل القديم وتركب تيل وطنابير جداد وقال لي نائب رئيس الشركة "وهنغيرهولك مرة واتنين وتلاته" أكن ده شىء طبيعي إن الطنابير تبوظ مرة واتنين وتلاته!! وأكن المشكلة مشكلتي أنا وهيرضوني وهسكت.

*الشركة ترفض بإصرار شديد وغريب و بدون أسباب تسليم شهادات المواصفات القياسية ونتائجStatic testing,Dynamic testing, Crash test التي أجريت على هذا الموديل ولو حتى لجهاز حماية المستهلك.

*ومع كل ذلك الجهاز لم يستطع أن يرد حق المستهلك...... وأثبت أنه لايحمي المستهلك ....ولم يستطع أن يجبر الشركة على تسليم تلك الشهادات التي تفيد بأن العربية آمنة ومطابقة للمواصفات القياسية !! ولم نجني إلا اللقاء الحلو والكلام الطيب....

*الجهاز قال لي : أن دورهم ينتهي عند هذا الحد وإذا كنت أرغب في تصعيد الموقف، فعلى أن أتقدم بطلب لتحويل الأمر للنيابة العامة، فتقدمت بالطلب ............. وتم إحالة شركة نيسان للنيابة العامة.
------------------
لسه الموضوع مخلصش ....

*الكلام ده مش هيكون له أى تأثير لولم ينضم كل المتضررين من نيسان ويحرروا محاضر ضد الشركة.... هيبقى انتصار مزيف

* زرت اليوم مسئول إحدى الهيئات التصنيعية الرقابية المسئول عن السيارات " وأخبرني أن نظام فرامل نيسان بالكامل غير مطابق للمواصفات القياسية، فسألته : أعمل أيه ؟ قال لي بالحرف الواحد والله شهيد على ما أقول " عايز تعرف تعمل أيه في مصر ولا في أى دولة محترمه تانيه؟ " فقلت له: تمام عرفت الإجاب .... ومشيت

لو مصر فيها حجات كتير مش محترمه فأرجوك بلاش ثقافة ضربوا الأعور على عينه .......والله العظيم ولاتفرق معايا طنابير ولاتيل ولا العربية كلها ..... أنا فارق معايا وتبكيني تلك الثقافة اللى هتودينا في داهية أكتر بكتيييييييير مما نتخيل.......خلينا نحاول نعمل على قدنا ولو حاجه واحده محترمه فبلدنا .....فمن قال هلك الناس فهو أهلكهم ..... ولو موصلناش لللعايزين بالضبط يبقى أحنا لسه محتاجين نتعلم ..... واهى النيابة خطوة لولا الضغط مكنتش حصلت ولاكان جه رئيس نيسان ولاحد عبرنا أصلا.

أرجو أن يصل هذا الكلام إلى أكبر عدد من الناس ....Share


شكراً جزيلاً


#نفسنا_طويل_بإذن_الله
#تمرين_إزاى_ نجيب_ حقنا
#متشتريش_نيسان_فيها_عيب_صناعة_في_الفرامل

[abou-yahia]

مش حقدر اواسي حضرتك

لاكن حقدر اواجهك بالمشكله اللي حتقابلك

نسبه اللي حيتضامنوا معاك حتكون قليله ليه

غشان اغلب الناس ومعاهم حق العربيه راس مال ليهم فكون ان راس الكال ده يصبح بلا قيمه او يبخس من تمنه

حتي لو علي حساب مخاطر فقد الحياه او الاضرار بيها

فاغلب الناس هنا في مصر مستعده لقبول هذا

مشكله راكبي نيسان ان في معظمهم ديه ثاني ان مكنش اول عربيه ليه هيه الصني

تخيل حضرتك ان اغلب الاعضاء هنا كانوا بيمارسوا ادوار تضليليه للتغطيه علي هذه العيوب متعمدين

وكانوا بيشكلوا ومازالوا جبهات هجوم واستعداء ضد اي حد يوجه انتقاد للصني

مما ساهم في تعاظم المشكله

لا يسعني ان اوجه التحيه ليك علي رجولتك وربنا يوفقك للخير

تحياتي

Sent from my SM-N900 using Forum Runner

[كمزى]

ربنا معاك وكل التوفيق ليك وواله العظيم لو كان معايا العربية دى كنت انضميت ليك بلا شك وانا متابع الموضوع من اول يوم نشرته فيه وبادعو الله ان ربنا ينصرك ويرجعلك حقك وحق كل الناس اللى معاهم الموديل ده
ربنا يوفقك وينصرك امين يارب