انه حقا توكيل محترم

[mahamedaraby]

النهارده وانا كنت بعمله صيانه العربيه عند يونايتد جروب

بجد هناك خدمه فندقيه :k52: بجد المشروبات مجانا زمن قصير فى اصلاح العربيه

وكمان بعد كل ده يدخل عليك واحد معاه سى ديهات افلام تختار اللى انت عاوزه منها:k20: انا اخترت The lost World وكمان الاسطوانه مكتوب عليها نيسان

هى بجد حاجات بسيط لكن حلوه من التوكيل

[Amr Hussain]

نيسان اصلا عربية محترمة
فاكيد توكيلها يكون محترم

[smartman310]

لا فعلا ناس محترمين جدا ومش زحمه مافيش تلت ساعه ولاقيت العربيه جاهزه وانا اخدت فيلم ocean's twelve فعلا انا بأكد كلامك
وبعدين انا كنت بقولهم على مشكله الكراسى لما تيجى تفرمل مره واحده تلاقى الكرسى عاوز يطلع بيك ويزيق وبعد ما خلصو طلع المهندس معايا وهو الى ساق وجربها بعد ما ربط الكراسى فعلا ناس بتشتغل بجد

[mahamedaraby]

انا بجد عاجبتنى الفكره اوى والمعامله والفرع فاضى وعالطول العربيه بتخلص

[sab3aawy]

دول فين مكانهم؟

[MTAK]

انا على فكرة باعمل عندهم الصيانة منذ اكثر من سنه
ناس كويسة و رايقه
بس على فكرة المشروبات المجانية هى الساخنة فقط :k20:
و لو الناس بتوع البوفيه حلوين معاك يعملولك تانك
بس الصراحة مهندسين الاستقبال عندهم كويسين
و كمان مدير الصيانة عندهم اتعرفت علية
راجل محترم و طول ما انت قاعد فى الاستراحة بتشوفه يلف فى الورشه
-----
بس مش عارف ليه نفسيا مش مستريحلهم او يمكن نفسى اجرب حد تانى علشان اشوف الفرق

دول فين مكانهم؟

ما انا قولتلك عليهم يا باشمهندس فى المقابلة اليتيمة التى حضرتها من اكثر من سنه و قولتلى هاجربهم

هما فى الدراسة خلف بتدخل من جنب مسجد الشرطه و بعدين يمين
هتلاقى اعلانتهم كتيرة هناك

[mahamedaraby]

بس على فكرة المشروبات المجانية هى الساخنة فقط :k20:

معرفش انا طلبت شاى وجى احاسب قالى It's For Free

الطريق بالظبط من مدينه نصر

انت هتاخد صلاح سالم وتكمل هتلاقى عمارات العبور تكمل هتلاقى كوبرى امتداد رمسيس هتطلعه وتكمل هتمشى شويه كده هتلاقى كوبرى على ايدك الشمال ونفق على ايدك اليمين

هتاخد النفق واول فتح يمين هتدخلها قبل ما تخلص النفق هتلاقيه ادامك عالطول

على العموم هبقى اشرحها من على جوجل ايرث بس انت ابقى قولى فين بيتك علشان اوصفلك من البيت لحد التوكيل

هو احنا عندنا كام سبعاوى

[haneena]

ماهو توكيل مودرن موتورز ناس محترمة اهو امال فى قسم السوزوكى عمالين يقولوا فيهم قصائد ذم
انا برده شايفة انه من التوكيلات المحترمة القليلة فى مصر

[smartman310]

العنوان بالظبط لمركز يونايتد جروب

1 شارع مطبعه الحلبى - خلف مرور الدراسه - بجوار نادى اتحاد الشرطه الرياضى - العباسيه

والتليفون : 27872330/27872340/0165555145

ده لو حد عاوز يحجز بالتليفون

[sab3aawy]

ماهو توكيل مودرن موتورز ناس محترمة اهو امال فى قسم السوزوكى عمالين يقولوا فيهم قصائد ذم
انا برده شايفة انه من التوكيلات المحترمة القليلة فى مصر

يا haneena الناس فى الموضوع ده بتتكلم عن مركز صيانة يونايتد جروب مش مودرن موتورز

الفرق بين نيسان وسوزوكى ان سوزوكى مالهاش مراكز صيانة غير مودرن موتورز لكن نيسان ليها اكتر من موزع غير مودرن موتورز وعندهم مراكز صيانة زى السبع ويونايتد والعوض جروب

وكلنا هنا على فكرة مخنوقين و هربانين من مودرن موتوز علشان كدة بنحب نجرب البدائل

معلومة لباقى قراء الموضوع: انا هو الناس اللى عمالة تقول قصائد ذم فى مودرن موتورز فى ساحة السوزوكى :)

[haneena]

يا haneena الناس فى الموضوع ده بتتكلم عن مركز صيانة يونايتد جروب مش مودرن موتورز

الفرق بين نيسان وسوزوكى ان سوزوكى مالهاش مراكز صيانة غير مودرن موتورز لكن نيسان ليها اكتر من موزع غير مودرن موتورز وعندهم مراكز صيانة زى السبع ويونايتد والعوض جروب

وكلنا هنا على فكرة مخنوقين و هربانين من مودرن موتوز علشان كدة بنحب نجرب البدائل

معلومة لباقى قراء الموضوع: انا هو الناس اللى عمالة تقول قصائد ذم فى مودرن موتورز فى ساحة السوزوكى :)

متشكرة يا استاذ سبعاوى المعلومة دى ماكنتش اعرفها اصل عنوان الموضوع بيقول توكيل محترم وانا اعرف ان نيسان توكيلها مودرن موتورز احنا هنا غلابة ماعندناش مراكز الصيانة دى هو التوكيل وبس
بس متهايالى انه لو حتى مركز صيانة فهو المفروض بيبقى تابع للتوكيل وعليه رقابة منه انا بقول متهايالى مااعرفش ده صح ولا لأ
وكمان مش حضرتك بس اللى اقصده بالكلام فيه غير حضرتك بيذم فى التوكيل برده وانا برده مصرة انه توكيل محترم وبقول تانى بقالنا معاهم اكتر من تلات سنين ووالدى خلصت مدة الضمان بتاعته ومازال بيروح التوكيل يعمل صيانة عشان يحافظ على العربية

[sab3aawy]

بس متهايالى انه لو حتى مركز صيانة فهو المفروض بيبقى تابع للتوكيل وعليه رقابة منه انا بقول متهايالى مااعرفش ده صح ولا لأ

مهو برضه ده فرق تانى بين نيسان وسوزوكى، سوزوكى وكيلها فى مصر هو مودرن موتورز ، يعنى كل اعمال سوزوكى تحت اشرافه، لكن نيسان فى مصر وكيلها ليس مودرن موتورز، نيسان لها فرع فى مصر اسمه نيسان مصر يقوم بتصنيع مجموعة من الموديلات واستيراد مجموعة اخرى وهو المسئول عن اعمال نيسان فى مصر، يعنى نيسان فى مصر مالهاش وكليل ولكن فرع، زى جنرال موتورز ودايو كدة ، صحيح ان صاحب شركة مودرن موتورز رجل الاعمال القدير مهندس: عبد المنعم سعودى، شريك فى نيسان مصر ، لكن فى النهاية اداراتها تخضع لنيسان العالمية ولا علاقة لها بادارة شركة مودرن موتورز، اما دور مودرن موتورز فى نيسان فهو مجرد موزع تحت اشراف نيسان مصر، زيه زى السبع وناشيونال موتوزر والعوض جروب وايجبت اوتو....الخ صحيح انه اكبر موزع لنيسان مصر، لكنه فى النهاية موزرع مثل الموزعين الآخرين، يعنى مركز الصيانة بتاع السبع او يونايتد جروب لا تشرف عليه مودرن موتورز لانها زيها زيهم، لكن تشرف عليه نيسان مصر،

لعل كدة الصورة وضحت

[maged george]

على عموم يا جماعة احنا ممكن نعمل استفتاء على مراكز الصيانة بتاعة نيسان ونحاول نشوف انه احسن علشان الكل يستفيد من الاحسن وشكرا.

[sab3aawy]

على عموم يا جماعة احنا ممكن نعمل استفتاء على مراكز الصيانة بتاعة نيسان ونحاول نشوف انه احسن علشان الكل يستفيد من الاحسن وشكرا.

حتى هذة اللحظة انا شايف ان السبع افضل مركز صيانة انا تعاملت معاه

[eslamnabil]

على فكرة انا لسه مشترى نيسان صنى و كنت عايز اروح اعمل الصيانة الاولى فى مودرن موتورز لكن قلقت من كلامكم عليها و بفكر اروح يونايتد جروب بس مش لاقى حد بيقول ليه هى وحشه قوى كده و ايه الفرق غير المعملة