الحمد لله استلمت السيفيك بس مفيش نمر في المرور الا بالرشوة آه يا بلد!!!!!!

[NaBeLeOn]

الف مبروك على الطيارة .. ربنا يباركلك فيها و يديك خيرها و يكفيك شرها :)

[hazem_khidr]

الف الف مبروك ربنا يديك خيرها و يحميك من شرها يا رب :)

أنا بفكر أطلع على وزاره الداخليه أعمل شكوى خصوصا ان والدي عقيد بالجيش ومشجعني على الخطوه دي ايه رأيكم ؟؟؟؟ ولآسف للاطاله

ادخل علي موقع وزاره الدخليه و اعمل شكوي و مساعدين الوزير نفسهم بيشفوها و يحل المشكله اذا امكن انا جربتها مره و نجحت

[محمد قاسم]

ألف مبروك علي العربيه

[M_HaFeZ]

أولاً مبروك العربيه
ثانيا انا معاك فى موضوع الشكوى ده
عيب اوى البجاحه ووقف حال الناس ده غير ان الرشوه دى حرام

[أبو عبدالرحمن]

ألف مبروك ،،،ربنا يباركلك فيها ويكفيك شرها ويؤتيك خيرها،،،،،،
قال رسول الله صلى الله عليه وسلم: "من استطاع منكم أن يغير منكرا بيديه فليفعل فإن لم يستطع فبلسانه فإن لم يستطع فبقلبه وذلك أضعف الإيمان وفي رواية وليس وراء ذلك حبة من خردل من إيمان"
أو كما قال الرسول صلى الله عليه وسلم ،،،
شوف حضرتك تقدر تعمل إيه واعمله وربنا معاك وإن شاء الله ربنا ييسرلك الأمر

[Hondawy_2008]

متشكر أوي على ردودكم يا جماعة وأنا للأسف معظم الناس نصحتني اني مرحش ولا اشتكي لأني هضيع وقتي على الفاضي و أنا كمان بشتغل في 6 أكتوبر يعني مشوار كبير المهم أنا عملت حل وسط :

رحت أنا ووالدي المرور انهارده الصبح كان لسه المقدم مجاش سألت على الأمين اللي بيسلم النمر وعرفت مكانه وقلت لوالدي طلع كارنيه الجيش و المحاربين القدماء و دخلنا بيهم عليه فقال لوالدي تحت أمرك يا باشا روحوا هاتولي صاجتين 16*40 ورشوهم دوكو وتعالوا.

خرجنا خلصنا القصه دي ب 50 جنيه صاجتين مصديين ب 40 جنيه ورش وش واحد بس في كل صاجه ب 10 جنيه مع اني دافع 30 جنيه في الورق تمن لوحات هقول ايه خلينا نخلص!!!!!!!

المهم رجعنا كان المقدم وصل و الأمين قالنا ادخلوا للمقدم شوفوا في أرقام ولا لاء صراحه المعامله اختلفت عن لما كنت لوحدي لما شاف كارنيهات والدي وقالنا جايبين الصاج بكام فقولتله ب 50 جنيه قال ولاد **** ده ب 15 جنيه وخلاني أوصفله المكان اللي اشتاريناه منه والأمين كان واقف أنا رأيي ان الغرض من السؤال انهم هيخدوا من بتوع الصاج و الدوكو المعلوم

المهم قالنا روحوا مع الأمين سلموه الصاج فالأمين قالنا اكتبوا الاسم عليه وبكره تيجوا تشوفوا فيه نمر اتكتبت عليه ولا لاء ؟؟؟
تفتكروا الموضوع كده تمام وهستلم إن شاء الله النمر بكره ولا ايه؟؟؟؟
أنا على فكره قولت للأمين "ليك الحلاوه لما تيجي النمر " علشان ميلعبش معانا(على فكره عرضت عليه فلوس انهارده بس رفض ياخد الا لما النمر تيجي وده اللي قالقني ) أنا تعبت والله يا جماعه أنا عارف ان في ناس هتقول اني استغليت سلطه ابويا و عرضت رشوة و.. و.. و.. و..... بس قولولي كنت هعمل ايه ده في ناس قابلتهم بقالهم 3 شهور دايخيين على نمره وأنا بصراحه عايز اركب العربيه ولا ابقى رميت فلوسها في الأرض!!!!!!!! ومعنديش وقت اضيعه في كلام زي ما الناس قالتلي لا هيودي ولا هيجيب كل اللي أقدر اقوله حسبي الله ونعم الوكيل بدفع فلوس زياده علشان آخد حقي اللي المفروض انا اصلا دافعله قبل كده!!!!!!!!!!!

[Walidghali]

ألف مبروك...
ماتدفعش فلوس وخلي نيتك خالصة انك ترضي ربنا واستحمل
انا مشيت شهر ونص من غير نمر ولسة مركبهم من أسبوع ، تبت مع المقدم وقول له انا بقالي كتير ولو غلس قول له اعملهم على حسابي برة واجي اختمهم يعني قفلها له
وماتدفعش رششششششششششوة
سلام

[Hondawy_2008]

علي فكره أنا مدفعتش لسه أي رشوه لحد دلوقتي بس بكره لو جت النمر بصراحه هدي الأمين حاجه يعني 50 جنيه ولا حاجه كده أهو ابقى قللت المبلغ و خلاص ......انما لو مجتش بكره وقالولي معاد تاني مش هديله ولا مليم طبعا حتى لو استلمت بعديين.

[Mohamed-Saoud]

شوف يا أستاذ Hondawy_2008 بكره ان شاء الله ما تمشيش من المرور غير لما تاخد النمر (و كمان الرخصة لو أمكن) لأنهم بصراحة مابيخترعوش الذرة يعني!!!

[Ahmed Taha]

إلي إيدو في المية

يا جماعة ياريت حد ياخد 300 جنية يديني نمرة في مصر الجديدة العربية معاية من 15 يوم دلواقت و إمبارح إطلب مني 600 جنية بعد المفاصلة من 750.

طبعا مدفعتش و توكلت على الله.

و حسبي الله و نعم الوكيل فالفشل الي إحنا فيه.

[Hondawy_2008]

يا جماعة ياريت حد ياخد 300 جنية يديني نمرة في مصر الجديدة العربية معاية من 15 يوم دلواقت و إمبارح إطلب مني 600 جنية بعد المفاصلة من 750.

ممكن أعرف يا باشا عربيك ايه؟؟
أنا متهيألي أكيد هامر ولا حاجه علشان يطلبوا منك الرقم الفلكي ده!!!!!!!!!!!!!!!
فعلا زي الصوره اللي كانت في الامضاء بتاع أحد الأعضاء هنا البلد بقى كل واحد حاطط ايده في جيب التاني..........

[أبو عبدالرحمن]

الغريب بأه إن النمر الجديدة المفروض المرور بيرتب لها علشان يبتدي العمل بيها قريبا ،،يعني المفروض النمر اللي على اللوحات دي خلاص مايبقالهاش أي قيمة،،،مش فاهم ايه اللي بيتعمل ده،،؟؟!!

[Hondawy_2008]

الغريب بأه إن النمر الجديدة المفروض المرور بيرتب لها علشان يبتدي العمل بيها قريبا ،،يعني المفروض النمر اللي على اللوحات دي خلاص مايبقالهاش أي قيمة،،،مش فاهم ايه اللي بيتعمل ده،،؟؟!!

يا باشا ليه تدفع مره واحده لما ممكن تدفع مرتين ؟؟؟ ويلا خليهم يجيبوا 300% بدل 30% و على رأي رئيس أنتيكا الدكتاتور محمد صبحي "ماشي يا شعب يا أنا ينتوا في البلد دي.......هههههههه "

[M_HaFeZ]

هو النمر وصلت لكام دلوقتى ؟
دخلنا فى ال 7 ارقام ولا لأ
انا شفت ال 998 من فتره مش قريبه

[dynamic_alpha]

ههههههههههههههههههههه
ايه البلد المحترمة ده .... الناس هي اللي بقت تعمل النمر بنفسها ؟؟!!!