اركن على جنب !!!

[Yones]

كنت لسه شاري GPS جديد للعربية وكنت راكن في جراش سيتي ستارز

بعد ماحطيت الكارت وانا وخارج بيكون الجراش طالع طلعة غبية كدة عشان تطلع منه

في اثناء مانا بطلع قلت احط الGPS يشحن اول ماحطيته في الشاحن لقيت العربية فصلت

ادور مش عايزة تدور ,, ادور مافيش وانا على مطلع الجراش والعربيات ورايا كلاكسات

واي تريحية او حركة غير متوقعة هلبس في اللى ورايا علطول عشان ده مطلع جامد

المهم بعد عدة محاولات العربية دارت بس مافيش كهرباء ! الفتيس مش عايز يتحرك الدركسيون تقيل جدا جدا لان الباور كهرباء وفصل

والكاسيت والعداد وكل حاجة ليها علاقة بالكهرباء مش شغالة

حركت الفتيس بالزرار بتاع التحريك المانويل ورحت ماشي بحارب مع الدركسيون وقدرت اطلع من الجراش وركنت على جمب

كانت الساعة 1 بليل ادور على اي كهرباء او اي ميكانيكي قريب مافيش

سبت العربية ورحت لاقرب بنزينة مالقتش عندهم كهربائي

رجعت فتحت الكبوت وطبعا انا مش فاهم انا بفتحه ليه بس فتحته وخلاص مع اني عارف اني مش هفهم حاجة بس ملاحظتش اي حاجة غريبة او دخان او ريحة شياط او ما الى ذلك !

ادور العربية بتدور بس مافيش كهرباء الدركسيون تقيل جدا جدا والفتيس مش بيتحرك وكل حاجة مش شغالة

الساعة بقت 2 وانا مش عارف اتحرك بالعربية وقفت واحد بتاع تاكسي

الراجل طلع رجولة وبعد عدة محاولات اكتشفنا ان العيب من الفيوزات بس منين بالظبط مش عارفين

يمين شمال الراجل طلع عينيه ومعرفش يوصل لحاجة

الساعة بقت 3 الفجر وداخلة على 3.30 رحت قلت لسواق التاكسي تعبتك معايا ومتشكرين الراجل الصراحة رفض ياخد فلوس لكن اصريت اني اديله

بعدها كان قدامي 3 حلول

اما اسيب العربية في مكانها وارجع تاني يوم بميكانيكي يشوفها ! وطبعا في ظل ظروف البلد دي ده كان حل مرفوض
2- اشوف اي ونش يقطر العربية لحد البيت وده حل مكلف فرفضته الى غير اني مش معايا ارقام ونشات
3- ادور العربية وامشي بيها من غير كهرباء بالشكل ده لحد البيت

واستقريت على الحل التالت ومش عايز اقولكم بقى شعورك وانت ماشي على كوبري اكتوبر الساعة 4 الفجر والعربية عطلانة مافيش كهرباء الدركسيون بيتحرك بالعافية وكل حاجة مش شغالة

العداد واقف مش شغال وكل حاجة بايظة بس كنت تقريبا ماشي على سرعة 20 او 30 كم بالكتير

والعربيات من جمبي صواريخ والطريق فاضي وقمة الرعب لو العربية عطلت على كوبري اكتوبر في الوقت ده

كانت هتبقى كارثة

الحمد لله الموقف عدى على خير لحد ماوصلت البيت وتاني يوم وديها لكهربائي واكتشفت ان الشاحن عمل قفلة وحرقلي الفيوز ال starter ومنها العربية فصلت كهرباء !

ولاني مابتعلمش بعدها بكام يوم قلت استخدم الشاحن يمكن يكون كان عيب فيوز وبرضوا حرقلي الفيوز تاني بس سعتها كنت عرفت الدنيا فقدرت اتعامل علطول

ولاني برضوا مافيش فايدة لسه من كام يوم قلت اجرب بقى اخر مرة يمكن يظبط وبرضوا حرقلي الفيوز تالت

لدرجة اني دلوقتي حرقت كل الفيوزات الاسبير وشايل فيوز الولاعة وفيوز الفوجات وفيوز حاجة تانية مش فاكر هي ايه لان كل مرة كان بيتحرك الفيوز الstarter كنت بحط اي فيوز مكانه عشان يشتغل ! !

موقف بايخ اخر حاجة وخصوصا فى الوقت المتاخر ده وعلى فكرة ال Mp3 ممكن يعمل نفس الموضوع ده

[Yones]

قعدتوا تقولوا اركن على جنب .. اركن على جنب ... ادينى امبارح ركنت على جنب .
كان يوم غريب من أوله ... ناس بتزنق عليه وناس عاوزة تلبسنى فى حاجة من غير سبب ده كان الصبح وانا رايح الشغل .
فى الرجوع بقى عينى ضربت على مؤشر الحرارة لقيته رفع سنة من مكانه (دى تعتبر ثالث مرة من ساعة ما جبت العربية ومبتحصلشى عندى خالص الا لو في حاجة غلط حصلت)
المهم موقفتش وكملت عادى وقلت يمكن الميه بقالى فترة طويلة مزوتش القربة ويمكن نقصت ... بعد شوية لاقيتها بدات ترفع بنسب اكتر وتنزل تانى شكيت ان مروحة من الاتنين علقت ومشيت بيها لحد ما لاقيت مكان فاضى عند سيتى ستار وفتحت الكبوت ابص على مية القربة لقيت فيها ميه .
استنيت شوية اشوف المراوح شغالة كويس ... الاقيها شغالة كويس بس بتطول اوى ومبتفصلش بسرعة .
ابص تحت العربية يمكن بتسرب ميه ... مفيش حاجة برضوا .
ساعتها عرفت ان اكيد الميه اللى فى الردياتير ذات نفسه ناقصة ومبتعوضشى من القربة .
رحت مبطل العربية بعد ما المراوح اشتغلت شوية تانى ... وجبت فوطة عندى وبدأت افتح الردياتير سنة سنة .
بدأت احس بكبس هواء جامد جداً عاوز يخرج ... بدأت اطلعه سنة سنة لحد ما خلص .
وبعدين دورت العربية وزودت ميه فى الردياتير مباشرتاً (عمرى ما عملتها قبل كدة) وخدت منى حوالى لتر وربع كدة واستنيت لحد ما المراوح اشتغلت وفصلت بسرعة تانى زى الأول وحطيت غطاء الردياتير ومشيت .
دلوقتى أغلب الظن ان غطى الردياتير فيه حاجة ... او فى وصلت القربة مع ان مش باين عليها حاجة .
النهاردة شيكت قبل ما اخرج على الميه اللى فى الردياتير مباشرتاً ولاقيتها زى ماهى من امبارح منقصتش ... وهتابع الايام اللى جاية لحد ما اعرف العيب من ايه .

بتحصل كتير جدا ياباشا وزى ماقال سمسم باشا لما البلف الخاص بالغطا بتاع الردياتير بيمنع تعويض الميه من القربة للرادياتير فبيقفل المسار وبالتالى بترتفع درجة الحرارة المياه فى الردياتير وبيحصل نقص فى مستوى المياه فبيظهر ارتفاع فى مؤشر درجة الحرارة

[zago]

يعني لو كنت حطيته في ولاعه 28 كان هو اللي شاط

[Eng_hatemfathy]

كنت اول ماجيبت العربية الهوندا العربية مرة واحدة وقفت مكانها وبطلت بدور لقيت ان البطارية فضيت نهائى ومش عايزة تدور ولا زق ولا اى حاجة خالص وكانت الساعة 11 بليل وفى منطقة قدام ملاهى السندباد وكان يوم ( الاحد ) يعنى متقفلة من كل ناحية طبعا انا عارف انها بطارية دوخت بتاع ساعة على واحد بتاع بطاريات يكون فاتح اشترى منة واحدة مالقيتش لحد فين وفين لما لقيت كهربائى راح باعت عيل صغير عمرة 12 سنة روحنا انا وهو وكنا بتاكسى وقعدنا بنلف جوة النزهة الجديدة وبعد كدة الواد راح مديها توصيلة دارت على طول الحمد لله وروحت غيرتها على طول
اللى انا طلعت بية من الموضوع دة

1- ان مافيش حد فيكى يامصر ماشى بكابلات توصيل بطارية لان لو كان فية جد كان زمانى مشيت من خمس دقايق من بعض الوقفة اللى وقفتها
2- سواق التاكسى مارضاش ياخد منى مليم بعد الدوخة اللى داخها معايا ( كان لسة فية خير فى البلد ) بس انا سيبتلة مبلغ ومشيت وقولتلة كفاية تعبك معايا وعطلتلك






3 - انى ماتعلمتش من الموقف دة وسيبت البطارية الجديدة بعد ماقعدت سنتين فى العربية لأ وكمان مشغل التكييف وكاسيت ب6 سماعات وهوب ركنت اشترى حاجة وبدور مافيش البطارية ريحت وحلفت تانى ماتدور , وبردة الحمد لله ربنا كان معايا فى اليوم دة ولقيت واحد بتاكسى شاهين كان عطلان اصلا راح مدينى بطاريتة ادور بيها العربية وفعلا ادهالى وبعد كدة روحت غيرتها على طول

* النتيجة : لو البطارية بدأت بس تضعف هروح مغيرها فورا ودة اللى انا طلعت بية

والحمد لله ماعملتش اى موقف معايا

الحمد لله انا اشتريت كابلات مخصوص علشان المواقف دلى والحمد لله مش بسيب حج واقف الا اديته وصله وكمان اشتريت سلبه من كارفور ونفعتنى فى يوم غرست قدام العماره فى شوية رمل واضظريت اجيب نص نقل علشان يقطرنى ومكنش معاه حبل ونفعت الحمد لله -الخلاصه ان الكوريك والاستبن ومفتاح العجل ووصله الكهرباء والسلبه لا يمكن يتشالوا من اى عربيه حتى لو سايقاها واحده ست لانها وسائل الانقاذ الوحيده فى المواقف الرخمه ودمتم بخير

[Ahmod]

وربنا انت كوميدي
ايه يا عم عايز الشاحن يتكلم ويحلفلك انه بايظ
ع العموم دي ضريبة التكنولوجيا
يعني لو كنت حطيته في ولاعه 28 كان هو اللي شاط

مانا جيه في دماغي انه عشان الفيوزات يمكن ماكنتش متركبة صح عشان كدة ضرب

فقلت اجرب تاني ولما ضرب تاني

قلت اجرب بقى احطه والعربية مش دايرة وبعدين ادور واشوف ايه اللى هيحصل

برضوا ضرب :019f3b~14:

[tarekzein]

مانا جيه في دماغي انه عشان الفيوزات يمكن ماكنتش متركبة صح عشان كدة ضرب

فقلت اجرب تاني ولما ضرب تاني

قلت اجرب بقى احطه والعربية مش دايرة وبعدين ادور واشوف ايه اللى هيحصل

برضوا ضرب :019f3b~14:

هههههههههههههه

هوه موقف ينرفز فعلا

بس أنك تجرب 3 مرات كمان

بصراحه كده :019f3b~14:

[Yones]

مانا جيه في دماغي انه عشان الفيوزات يمكن ماكنتش متركبة صح عشان كدة ضرب

فقلت اجرب تاني ولما ضرب تاني

قلت اجرب بقى احطه والعربية مش دايرة وبعدين ادور واشوف ايه اللى هيحصل

برضوا ضرب :019f3b~14:

ده انت مصمم بقى ههههههههههههههه

[SAMEH_FOUAD]

انهاردة حصلى موقف صعب جدا

المشكلة تكمن انى بمون 95 وطبعا انا ساكن فى وسط البلد ومشاويرى كتير جدا , المهم عملت انهاردة بتاع 120 كم وطبعا مش عارف اروح البنزينات اللى فيها 95 بسبب المظاهرات , وانا ماشى على الدائرى لقيت اللمبة نورت قولت امون من اى بنزينة 92 مش مشكلة واذ الاقى البنزينة قافلة اول مرة اشوفها , وانا ماشى لقيت العربية بتقطع وهوب راحت واقفة فى وسط الشارع طبعا كان موقف بااااااااااايخ جدا , روحت زقيت العربية لحد الرصيف وروحت ادور على بنزين لفيت اربع بنزينات مش لاقى غير 90 ومنين من بنزينة مصر طبعا اضطريت اجيبة مافيش غيرة وحطيت البنزين والعربية دارت واتحولت الى تقطيع وكركرة راحت واقفة تانى وطبعا من منظر العربية وطريقتها عرفت ان الطلمبة سحبت كل الشوائب اللى موجودة + البنزين السىء وكل دة اثر على العربية روحت جايب اكتر من 10 للتر على 3 مرات 92 بعد مادوخت علية , والحمد لله دارت وربنا يسترها

بجد الواحد مش عارف يعمل اية انا الثورة اللى جت دية معطلة الدنيا عندنا جدا ومش عارف امون من البنزينة بتاعتى لانى مش بمون غير من موبيل

ادى حكايتى انهاردة وبجد كنت مضايق جدا ان الناس تشوف كدة الهوندا عطلانة على الطريق ودية كانت اكتر حاجة مضايقانى واكتر من الموقف نفسة

[محمد-علام]

اخر مره اركب العربيه بالموتور القديم بعد مارجعت من السرقه وانا راجع من عند الميكانيكى علشان سمعت صوت حشرجه كبيره فى الموترو وبعدين لما فكينا لاقينا ان صاموله التاكيهات مفكوكه وواقع فى الزيت والحمد لله ركبناها ورطبناه وانا بقى مروح وعند مديريه امن الجيزه لاقيت العربيه قطعت خالص ومش عاوزه تدور قمت زى الباشا نازل ملغوص شويتيتن فى الفيوزات والحمد لله العربيه دارت وقبل ميدانالجيزه لاقيت مؤشر الحراره ارتفع ولتانى مره زى الباشا وبهدووووووووء فتحت الريداتير لاقيته ناقص ميه وقبل ما ازود الميه فى العربيه لاقيت طلمبه المياه اتكسرت ونزلت كل المياه اللى فيها وللمره الثالثه زى الباشا دورت على عربيه وقطرتنى لغايه البيت وبعد 4 ايام قطرتها ع الحرفيين وغيرت الموتور كله

hahahahahahahahahahahahahahahahahaha....واللهِ العظيم أنا ضحكت من قلبي ....إنت وهمي مووت ...كوميدي جدا ودمك خفيف مووووت ....ربنا يباركلك في المطر الجديد ويكفيك شر عين الناس