سيفيك 2008 كادت أن تكون أسطورة هوندا لولا عيب قاعدة الماتور(موضوع للنقاش)

[Hondawy_2008]

صباح الفل على رجالة هوندا

أنا عندي سيفيك 2008 بعد 4 شهور هتكمل 5 سنين ان شاء الله هي lxi و كانت ب 143 ألف

بصراحة أنا ركبت عربيات كتير و لكن العربية دي بعشقها و هي ممتازة في كل حاجة تنفع شبابيةأو عائلية واعتمادية جدا و على فكرة مش واطية و متحكش الا لو الحمولة 5 أشخاص و المطب غبي لكن حتى لو 4 مش بتحك

العربية محتاجة صيانة عادية دون أي مصاريف أخرى عدا الكارثة اللي هحكيها دلوقتي

نيجي بقى للمشكلة اللي زهقتني من العربية و اللي لولاها كانت هتبقى العربية دي تمسح أي عربية في فئتها و سعرها أو حتى أغلى منها

المشكلة هي قاعدة الموتور و هي في الأغلب عيب صناعة

أنا عامل بالعربية حوالي 86 ألف كيلو بعد 50 ألف العربية جابت قاعدة موتور و اتغيرت في الضمان و قولت خلاص المشكلة خلصت

للأسف المشكلة رجعت تاني الايام دي ( هزة رهيبة و صوت يدوش و لا اللي راكب 28 ) و بعد الكشف أتأكدت أنها قاعدة زفت برده و المرة دي هتكون على حسابي ب 1250 جنيه بالتركيب في التوكيل بس لسة معملتهاش عشان الفلوس مقصرة اليومين دول

المهم يا جماعة بحسبة بسيطة مع نفسي لاقيت أن قاعدة الموتور دي بتقعد 50 ألف كيلو أو سنتين أيهما أقرب و دي مدى الحياة أفضل ألبس 1250 جنيه كل مرة

على فكرة مشكلتي مش فردية لان واحد صاحبي معاه 2009 غير القاعدة ديه عند 50 ألف كيلو برده

الموضوع دة طارحه للنقاش لاني عايز أفكر معاكم هل في حل يتعمل لمنع المشكلة نهائيا أو لاطالة عمر القاعدة بتاعة الموتور ديه لضعف العمر الافتراضي مثلا ؟؟؟

و هل ممكن عمل تصفيح أسفل الموتور يحمي القاعدة ديه ؟؟؟

حرام يا هوندا الحلو ميكملش فعلا


مستني أرائكم

[S O P H O S]

والله يا باشا بالرغم من المشكلة دي
الا بردوا انها مش هتأثر علي العربية دي
مفيش عربية كاملة (راي شخصي) ..

[haissam24h]

فى ناس بتصب قاعده الماتور لاى عربيه

بتروحلهم

بتديله القديمه بيصبلك وحده جديده ذيها
اسئل عليهم وان شاء الله خير ومش هتكلفك كثير كبيرها 150 ج صب لو نفعت يبقى تمام اديك عرفت دواها

[salah_86]

متابع

[MohammedAladel]

بصراحة عنوان الموضوع يخطفك كل دا عشان قاعدة موتور !!!! ما هى بتبوظ فى اى عربية يا راجل دا جلد فى الاول والآخر

[Hondawy_2008]

والله يا باشا بالرغم من المشكلة دي
الا بردوا انها مش هتأثر علي العربية دي
مفيش عربية كاملة (راي شخصي) ..

يا باشا أنا قولت العربية ما شاء الله حلوة بس هوندا عارفة أنه عيب صناعة المفروض يتعالج مجانا أو يتحل حل جذري ما هو حرام أدفع 1250 جنيه برده كل فترة العربية مش رخيصة يعني

[Hondawy_2008]

فى ناس بتصب قاعده الماتور لاى عربيه

بتروحلهم

بتديله القديمه بيصبلك وحده جديده ذيها
اسئل عليهم وان شاء الله خير ومش هتكلفك كثير كبيرها 150 ج صب لو نفعت يبقى تمام اديك عرفت دواها

بس يا باشا بالنسبة للزيت اللي جواها ؟ + أنها عمرها مهتعيش زي الأصلية طبعا صح ؟ الأصلية بتقعد حوالي سنتين دي أكيد مش هتكمل 6 شهور

[Hondawy_2008]

متابع

و أنا كمان :))) منور الموضوع يا ريس

[Hondawy_2008]

بصراحة عنوان الموضوع يخطفك كل دا عشان قاعدة موتور !!!! ما هى بتبوظ فى اى عربية يا راجل دا جلد فى الاول والآخر

يا باشا أنا معاك بتبوظ في أي عربية بس كل 5 سنين على الأقل

ده أنا صاحبي معاه لانسر القاعدة باظت بعد 100 ألف كيلو مش معقول أتا تاني مرة تحصل و أنا مكملتش 90 ألف كيلو

جلد ايه يا باشا بقولك ب 1250 بلبل :)))

في عيب صناعة في العربية دي و هو قاعدة الموتور اليمين ولازم يكونله حل

العربية غالية و أغلى من اللاتسر بكتير

بكدة أقول بكل صراحة أن اللانسر البومة تتفوق عليها و أرخص منها بكتييييييييييييير

ولكن أنا بدور على حل جذري للمشكلة ديه

[MohammedAladel]

شوف يا باشا الشركة ممكن تتعاقد مع أى مصنع تانى غير اللى بيصنعلها دلوقتى أو تحاول تشوف برا ماركة تانية بتصنع غير الماركة اللى عندك

سيبك من التوكيل أسعاره مبالغ فيها

[hany63]

يا راجل ده افتكرت فيه حاجه بجد بصراحه بتهزر
امال اللي عنده عيب في عربيته ٨٠ الف جنيه كل ٢٤ الف كيلو
عايزها تقعد ميتين الف بطل تسحب بال d3 و تشيل رجلك و تدوس تاني عشان الحركه دي من عزم الموتور عندي بحسه هيطلع من الكبوت

[salah_86]

بس يا باشا بالنسبة للزيت اللي جواها ؟ + أنها عمرها مهتعيش زي الأصلية طبعا صح ؟ الأصلية بتقعد حوالي سنتين دي أكيد مش هتكمل 6 شهور

والله ياباشا لو كل 6 شهور يعنى هتدفع 600 جنية فى السنتين اللى هتدفع فيهم 1250 بس طبعا مش حل دا برضة مش حل جذرىىىىىىىىىىىىى

[MohammedAladel]

بالتأكيد الكيك داون والحرق المفاجئ كتير بيأثر عليها

[Formulator]

شوف ياباشا،
فيه عربيات كتير عزم مواتيرها بيخليها تجيب قواعد موتور (وقواعد فتيس بسرعة)؟!! دا عادى!!
- اللى مش عادى انها تضرب بدرى بالمعدل ده؟؟!!!

ودى مشكلة common فـ الـ8th.gen.. (وفـ مواتير السيفيك الـi-VTEC من زمان) بس فيه حاجة:
المشكلة فـ القطعة مش فـ العربية-الموتور؟!!
- حضرتك بتروح تجيب بتاع الوكيل الـoem الأصلية.. وده الغلط؟!!

الحل اللى شفت ناس بتعمله -وهتلاقيه على كل كل منتديات الـ8thgen والـcivic-club (مش بس فـ مصر):

1- هتجيب قاعدة aftermarket نوع مشهور أوى إسمه Hasport -دا مخصوص للسيفيك
2- أو هتجيب القاعدة الأصلية بتاع الـintegra Type-R أو الـGSR 1.8 الجديد بتركب perfect-fit هى هى!!
(والإثنين أنا شوفتهم بيتعملوا فـ مصر -سواء القاعدة البديل أو بتاع الـintegra بتعيش أكثر)!

Rgds،

[Kareem.ElAraby]

Formulator
Hats off for you
You rock !