انا جبت السيبا برايد الجديده

[moshaks83]

قبل ما تستلم السيارة خد بالك من التابلوه لانه بيعمل صوت وش شوية وانا ماشية في المطبات كأن في مسمار نسينه جوه كده مش عارفة اوصف اوي ... بس اتضح ليه بعد كده ان التابلوه مفتح ومش متقفل شوية ولما ذهبت للتوكيل قالو هو كده ... وانت بتسلم خذ بالك من التقفيل الداخلي للعربية واختار واحدة كويسة[/quote]


اخد بالى ازاى من التابلوة انه مفتوح او بيعمل صوت قبل ما استلمها ؟

[b_samy11]

الكاتالوج

استاذنكم يا جماعة الاقى عندكم الكاتالوج بتاع السيبا برايد 132
علشان مش موجود فى التوكيل وقالولى لسه هايتاخر شوية
فاذا حد يقدر انه مثلا يعملة سكان ويحوله (pdf)ويرفعة على النت او اقابله واصوره منه
اى حاجة المهم انى اقراة علشان اعرف اتعامل ازى مع العربية فى التليين
وشكرا

[totta44]

الف شكر ياجماعة على التغطيةالممتازة دة وشكر خاص لالاستاذ توفيق بجد ياريت كلنا نعمل كدة فى كل حاجة بحيث نستفيد من خبرات بعض ولى طلب من استاذ توفيق ياريت تلخصلى كدة استخدام السنة من حيث المشاكل والاداء بتاع العربية وانطباعك عنها عشان انا قررت ان شاء الله ان اشتريها وعايز اعرف اكتر عن العربية بعد سنة من الاستخدام والف شكر ياباشا

[wael2518]

ربنا يباركلك فيها ويكفيك شرها

[ahit]

السلام عليكم ورحمة الله وبركاته

أنا سمعت إن شركة ناشيونال عاملة عرض على موديلات 2009
تدفع 50% مقدم و الباقى على 48 شهر بدون فوائد
و سعر السيارة 55000 الكاملة

حد عنده معلومات عن الموضوع ده ؟ و هل الكلام ده صحيح فعلاً ؟ و إيه الفرق بين موديلات 2009 و موديلات 2010 ؟؟؟

ولى طلب من استاذ توفيق ياريت تلخصلى كدة استخدام السنة من حيث المشاكل والاداء بتاع العربية وانطباعك عنها عشان انا قررت ان شاء الله ان اشتريها وعايز اعرف اكتر عن العربية بعد سنة من الاستخدام والف شكر ياباشا

فى إنتظار الرد من الأستاذ الفاضل توفيق

[totta44]

انا حجزت العربية ياجماعة وبصراحة خايف تحويشة العمر تضيع فى الارض فياريت حد يطمنى ياجماعة العربية تستاهل ولا انا اشتريت التروماى

[tawfic]

اولا انا بعتذر عن التأخير وذالك بسبب ظروف اشغل
ثانيا بالنسبه للاداء حتى الان

السياره شاريها يوم 14 - 1 -1 2009
واليوم 9 - 4 2010
يعنى 15 شهر
عامل بيها 21000 كيلو الى الان ( منهم شهر كنت مسافر فيه بره مصر والسياره راكنه تحت البيت )
نجى لتقيم العام طوال هذه الفتره
المزايا :-
السياره وربنا يشهد على كلامى ممتازه خصيصا انى محمل عليها كتير جدا يا فى المشاوير يا اما فى اسلوب السواقه بتاعى
لم يختلف ادائها طوال هذه الفتره نهائى
سهوله شديده فى صيانتها وتوافر قطع غيارها فى كل مكان ( هى نفس قطع غيار البرايد تماما ما عدا الانشجكشن وفوانيس الامام والخلف ) ودول متوفرين فى مراكز الصيانه وكل قطع الغيار متوفره فى مراكز الصيانه حتى الزجاج

العيوب :-
مازلت اشك فى قدره المتور على اساس انها 1300 cc والاسباب كتير
اولا كانو بيقول 62 حصان وبعدين صححو المعلومه سريعا ووضحو انها 92 حصان
واننا اشك انها 100 حصان ( والله بتكلم بجد )
العربيه ادائها مش اقل من 1500 cc حتى استهلاكها للبنزين قريب قوى من استهلاك الانوس
فا بجد مش عارف ايه اللى ورا الموضوع ده
انا عن نفسى مش مضايق بالعكس انا بشد مع اللانسر والتيوتا اليارس حلو قوى كمان
بالنسبه لنظام التعليق ممتاز والثبات هايل لغايه 120 كيلو
الكاوتش الاصلى بتاعها وحش جدا جدا وماينسبش الاراضى والشوارع المصريه ده عايز شوارع حرير وبالتالى انا غيرتهم اول 500 كيلو
بعد فواصل الابواب عن بعضها بيخلى الهواء بيعمل صوت على السرعات العاليه
الفرامل الفبريكه بتاعتها بتصفر لغايه 1000 كيلو ( انا ماستحملتش اوصل لكده وصممت اغيرهم بعد 3مشاوير ليهم بنوع كيا برايد الكورى ومن ساعتها زى الفل )
لابد الكشف على الزوايه كل 3 شهور مره لضبطها
التكيف ممتاز ممتاز ولايقصر على السحب بدرجه كبيره
الباور هايل جدا


دى كل ملاحظاتى على السياره طوال هذه الفتره واى استفسار انا تحت امركم واسف مره تانيه على التاخير

[hussein20777]

ربنا يباركلك فيها ويستر طريقك

[tawfic]

انا حجزت العربية ياجماعة وبصراحة خايف تحويشة العمر تضيع فى الارض فياريت حد يطمنى ياجماعة العربية تستاهل ولا انا اشتريت التروماى

ربنا يكرمك فيها انشاء الله ولو فيها خير ليك ربنا يقربها منك ولو فيها شر ليك ربنا يبعدها عنك

انشاء الله السياره هاتعجبك

[totta44]

الف شكر ليك يااستاذ توفيق بجد ربنا يباركلك على الموضوع دة بس سوال تانى بعد اذنك انا اول مرة اشترى عربية ومش بافهم قوى فى التصلحيات والحاجات دة فلو ممكن تقولى اعمل اة لو حسيت ان فى حاجة مش مظبوطة فى العربية وشكرا كمان لكل الناس الى طمنونى وموضوع الكاوتش دة ضرورى ولا ممكن يستحملنى شوية عشان انا دفعت كل الى ورايا فى العربية دة

[totta44]

وكجزء من شكرى لاستاذ توفيق عشان بصراحة انا اعتمدت كتير على الموضوع دة فى قرارى انا هاقولكم اية الى حصل معاى فى نظام التقسيط اول باول عشان يبقى الموضوع دة كامل لجميع الناس الى ناوي تشترى البرايد
اولا انا روحت الفرع الى فى شارع جامعة الدول العربية ودفعت 500 جنية حجز والراجل قالى البنك هايعمل التحريات بتاعتة وبعد ماتيجة الموافقة هادفع 26500+1500 تامين اجبارى+400 مصاريف بنكية واستلم وكل شهر 810 لمدة ال 3 سنين و 1100 لسنتسن وكل سنة 1500 تامين
وسالت الراجل هو الترخيص بيتكلف كام قالى حوالى 600 ل 700 جنية وسالتة فى فترة الضمان لو حصلت حاجة لاقدر الله قالى بروح التوكيل وبادفع المصنعية بس ولااستلام فى خلال اسبوعان

[tawfic]

الف شكر ليك يااستاذ توفيق بجد ربنا يباركلك على الموضوع دة بس سوال تانى بعد اذنك انا اول مرة اشترى عربية ومش بافهم قوى فى التصلحيات والحاجات دة فلو ممكن تقولى اعمل اة لو حسيت ان فى حاجة مش مظبوطة فى العربية وشكرا كمان لكل الناس الى طمنونى وموضوع الكاوتش دة ضرورى ولا ممكن يستحملنى شوية عشان انا دفعت كل الى ورايا فى العربية دة

وبأذن الله ربنا هايباركلك فيها
اما بخصوص الاعطال
اولا لابد من الذهاب للصيانه الدوريه كل 5000 كيلو لتغير الزيت والفلاتر واللذى منه
وهما هناك بيكشفولك على كل شى ولو فيه حاجه هاتتغير هايغيرهوا طول فتره الضمان على حسابهم وانته هاتدفع المصنعيه بس
لكن فى اعطال اخرى ماتستناش للذهاب للصيانه الدوريه وهى
الفرامل لو لقيتها خفت عن الاول لازم تروح للصيانه فى اى وقت وبسرعه
مؤشر الحراره الطبيعى بتاعه من النصف الى فوق ال 3/4 بشرطه لقيته دخل على اول شرطه من المنطقه الحمراء توقف فورا وتسيب العربيه تبرد وتدورها تانى وهاكذا لغايه برضه ماتروح الصيانه فورا
غير كده انته هاتلاحظ اى تغير فى العربيه تروحلهم تبلغهم بيه وهما هايكشفو عليه وواحده واحده هاتلم بكل شى فيها بس اوعى تستهتر بأى مشكله او احساس ان فيه حاجه مش مظبوطه وتكسل
---------------
اما بخصوص الكاوتش المشلكه عندى انا بسبب اسلوب سواقتى علشان انا بجرى جامد والكاوتش مابيسعدنيش فى الوقوف زى ما انا عايز
الى جانب انى بروح كتير اماكن غير ممهده بسبب ظروف شغلى وبالتالى الكوتش نوعه بيعمله لبه فى الاراضى دى
بس كل اللى اشتراها ماشتكاش من الكاوتش بس انا ما ارتحتش معاه
وضرورى تقيم تجربتك انته مع اى شى تتعامل معاه دون التأثر بتجارب الاخرين وذالك لاختلاف اساليب السواقه من شخص للتانى واذواق الاشخاص ايضا بتختلف
بس اهم حاجه تحافظ عليها وصدقنى هى كمان هاتحافظ عليك
بس انا ليه رجاء عندك تقريبا لو ربنا وفقك هاتستلم فى خلال ايام وده معناه انك داخل على بدايه الصيف فرجاء ماتشغلشى التكيف وانتى ماشى قبل صيانه الالف ولو لابد حبيت تجربه وهى واقفه لمده 5 دقائق غير كده بلاش وده علشان تعدى مرحله التلين بسلام انشاء الله

[MEDO84EG]

بجد ربنا يبارك فيكم انا كنت فاقد الثقه فيها بس بجد حببتوني فيها اوي

[may_moon911]

السلام عليكم و رحمة الله

انا داخل علشان اسال سوال صغير بعد ازنكو...انا متابع الموضوع من بعد شهرين مما الاستاذ توفيق او الاستاذ ابو توفيق اشتري عربيته


انا الصراحة داخل اشكر لان الصراحة الموضوع رائع رائع رائع و المشاركات فعلا جدية و دا لمساعدة الناس المقبلة علي شراء العربية وربنا يرزقو زي ما ساعتدو الناس اللي اشترو العربية دي بناء علي تجربتكو و ردكو عليهم


انا و والدي شوفنا العربية دي من اكتر من سنتيين و اللي شكلها كان شكل البرايد الكيا ....و احنا معانا الكيا البرايد من سنة 2000

يعني بقالها 10 سنيين و بسم الله ماشاء الله عليها صامدة و ماسكا نفسها لحد دلوقتي مع ان سواقة والدتي صعبة جدا و ما دفعنالهاش غير 650 بس السنة دي كانت عفشة (مساعدين ورا بس و مقصات و كبالن ) الحاجت العادية اللي ما غيرنهاش من 10 سنين (ماعدا الكبالن طبعا)

و الصراحة بعد اللي هيا شافتو و بعد طبعا تجربة استاذ أبو توفيق و الاخوة الاعضاء كلهم والدي قرر يجيب واحده و نبيع اللي معانا

لان بجد البرايد فعلا فعلا فعلا عربية كويسة جدا و مش عارف ليه بعض الناس بتتكلم عن التقفيل و سايبين الكفاءة و قطع الغيار و السعر بردوا مع اني من راي العربية تقفيلها عادي بالنسبة للعربيات اللي في فئتها

يا رب يا رب يا رب يخليهالكو كولكو و ان شاء الله تعد معاكو العمر كولو و تيجو تقولولنا انكو جيبتو البي ام و اللي احسن منها كمان ان شاء الله



بس كان عندي سوال صغنتووت خالص
اللي معاه البرايد العادية الكيا و جاب السايبا حاسس بفرق في السحب بينها و بين البرايد الكيا
لان البرايد الكيا لغاية التالت سحبها 10\10 و الرابع بتقل سنه و الخامس بتقل كتير شوية (من غير قرص علي الموتور)
ف البرايد السايبا اخبار السحب فيها في الرابع و الخامس اية


و مرة كمان الف الف شكر علي الموضوع الجميل دا و اسف جدا علي التطويل

[ABoZYAD]

السلام عليكم ورحمة الله و بركاته

تصدقوا انا قاعد بقالى 5 ساعات تقريبا ع الموضوع ده ؟؟!!!

ودى اول مرة اشكر الايرانيين ع العربية اللى سببت معرفتى بناس غاية ف الاحترام

وشكر خاصصصصصصص جدا للاستاذ / توفيق !!