غفوة أثناء القيادة ( كيفية تجنبها للنقاش)

[Haitham10]

اولا بشكرك يا دكتور علي فتحك موضوع مهم فعلا
انا زمان كنت ممكن اقعد يومين وتلاته مطبق وكمان سايق والحياه عادي
واوقات ممكن اعدي مشاوير 600 كيلو خبط لزق
بس دة كان زمان
بقالي سنة وشوية بدات احس بموضوع النعاس دة فعلا فكل مرة ببقي فيها لوحدي ودي حاجه بتنرفزني جدا في وقتها

والحل كتير من الاخوة قالوه وهو غالبا غير وضعيتك حتي لو هتنزل شوية من العربيه تمسح ازاز تعمل اي حاجه
وانا بالنسبالي بستمتع جدا لما الاقي اي واحد بيفهم علي الطريق بيبقي اجمل ونس
لان الجري بيفوق اه بس هتنام لانك مش هتلاقي حد بعد كدة وهترجع لنفس القصه
فااحسن حل لما بلاقي حد بيسوق كويس واشارات وماشي 100 فيما فوق بفضل وراه شوية وقدامه شوية بدون سباق او رخامة وفي الغالب ولظروف البلد حاليا الكل بيراعي النقطة دي وبيمشوا مع بعض ونس

بس لو الطريق مفيهوش حد او الطريق روتيني وممل الواحد بيمل ويشعر بالنعاس جدا وفي الحاله دي مبلاقيش طريقه غير اني اوصل بسرعه قبل مااسقط خالص

في الي يقولك خد افيون او تمول وخد من الكلام دة كتير

وانا مقتنع كليا ان ممنوع علي الطريق اي نوع من الادوية لانها بتأثر في التصرفات والاستجابه للانسان سواء للبرد ولا مسكنات اياها

[koshary]

انا باكل لبان كلورتس لما ببقا تعبان بيخلى الواحد منعش جدا ومخلى منو دايما فى العربيه

[M.Ayman]

موضوع ممتاز ....

انا لما بانعس باعمل الأتي بالترتيب :

1 - بافتح القزاز و اطلع ايدي بره
2 - باظبط الكرسي في وضعية مزعجة مش متعود عليها
3 - باشغل ميتال هبد ورزع
4 - اجري بقى و امري الى الله ...الجري و السرعة بيفوقوا جداااا

فعلا مضوع الجرى ده بيفوق جامد و خصوصا فى الطرق اللى مش سفر علشان بتحس بسرعه كبيره نسبيا علشان فى ناس حواليك بس لو متعود على الجرى على طول مش هيفرق معاك للاسف يعنى نفعت معايا كام مره بس بعد كده مفيش غير لو جريت برضه اكتر من الطبيعى بتاعى

[SASA3]

كلنا نسينا حاجة مهمة .....

دعاء الركوب والسفر

+1111111111111111

[AhMeD MeTwAlY]

عن نفسي لما بحس ان نام بشغل اغنيه راب واعيش معاها

[MNabeih]

يا جماعة انا ما بيحلليش النوم غير و انا سايق اساسا ربنا يستر علينا يا رب
بس الحل السحري بالنسبالي اللب الاسمر و السوداني و الحمص أقعد أأزأز لحد اما اتعمي

[moh19227]

محاولة قزقزة لب او مسليات حيث ان مخك لن ينام وانت بتاكل

دي بقي اجمد حاجه فعلا
المهم انك تكون نايم كويس قبل متسافر
المشكله بقي فعلا لما تكون مسافر لوحدك ومش نايم
اما لو معاك اي حد فهتديها رغي لحد متوصل ان شاء الله
بس نقطه الركن في اي حته وتاخد غفوه كده معتقدش الوضع دلوقتي يسمح
وربنا يكفينا جميعا شر الطريق

[M.Osama]

الموضع ده حصل معايا كتيير اوى اوي.. ومهما بعمل مفيش فايده

في الاوبل بفتح الازاز واعلى الكاسيت عالاخر مفيش فايده

فالسيراتو بفتح السقف وببقي ناقص اطلع بوشى منه برده مفيش فايده

النوم سلطاااااااااان دنا مره صحيت لقيت نفسي طالع من تحت كاوتش عربية نقل