الــــشـــــبـــــــورة ! *فيديو*

[MoToRiZeR]

متفهموش إيه طلعها في دماغي أقضي عيد ميلادي في الساحل!

المهم سافرت و كان يوم جميل و راجع بقي .. خلصت طريق وادي النطرون زي الفل .. دخلت طريق إسكندرية .. مفيش 40 كيلو و هجمت الشبورة!!! الحتت اللي معمولة جديدة في الطريق الوضع كان كويس .. الرؤية كانت منعدمة بس كنت بلمح عين القط بتلمع و لو لقيتها بتلف أفهم إن فيه ملف و ألف معاها .. المشكلة بجد بقي كانت في التحويلة!!! كذا تحويلة و محدش كان بيشوف بتبتدي إمتي و تخلص إمتي خاصة إنها بتبتدي و تخلص بملفات حادة .. و يا تخش في اليافطة يا في الرصيف إنت و نصيبك طول منا ماشي سامع ناس بتخيش .. و وصلنا مدخل 6 أكتوبر عالصحراوي انا مشفتوش أصلاَ فا فضلت مكمل .. واحد جنبي كان فاكر إنه المدخل لسة موجود و إحنا كنا عديناه خلاص .. و قام هوب طالع عالرصيف .. انا كان معايا كاميرا الفيديو قلت حلو اما أصورهالكم .. طبعاَ هي لسة مستمرة لسة واحد صاحبي مكلمني الصبح بيقولي إلحقني يا محمود انا مش شايف مراتي جنبي في العربية

المهم انا كان عاجبني الجو أوي مع الضلمة و المزيكا و الشبورة كانت تجربة سواقة حلوة و يوم جميل .. كنت حاسس إن سايق في فيلم :D .. و انصح كل الناس تسافر إنهاردة تستمتع بالشبورة بس اللي عايز يعيش بلاش.

أسيبكم مع الفيديو (هتلاحظوا لوحديكم إنعدام الرؤيا تماماَ في نصه كدة)..

YouTube - Fog - Cairo Alex Road 25th of Dec, 2009

[ganash]

شكرا اخوى جزاك الله وايانا كل خير وبدأت منذ قليل بوادئ شبوره برده زى امبارح فارجو اخذ الحيطه والحذر

[Terrible_DaRsH]

الله على جو الشبورة لما البخار يطلع من الفم و الشوارع تحس انها مسحورة كده :)

بحب الجو ده اوى :)

[MoToRiZeR]

الله على جو الشبورة لما البخار يطلع من الفم و الشوارع تحس انها مسحورة كده :)

بحب الجو ده اوى :)

أجمد جو يا درش .. متتخيلش جمال الإحساس !

[ali.mahmoud]

صبااااااح الروقان تحس انك ماشى فى لوس انجلس :d

[WalidAdel]

انت معندكش فانوس شوبره ولا ايه ياباشا اعتقد ان الرؤيه كانت هاتبقي افضل من كده بكتيييييير يعني

انا بسافر كتير زقازيق و مناطق زراعيه و الشبوره بتبقي اتقل من كده بس فانوس الشبوره الصراحه بيعمل شغل جامد عموما ربنا يسترها معانا جميعا و هيا فعلا بتبقي سواقه ليها طابع خاص كده و جو ظريف
و بالمناسبه التراك اللي كان شغال ملائم بردوا للجو

[د.محمود صلاح]

يارب يحفظكم جميعا من خطر الطريق

[Dr Ahmed]

كان نفسى أصور اللى شفته امبارح لكن كنت لوحدى
اللى فى الفيديو صعب طبعا لكن اللى شفته امبارح كان أسوأ جدا خصوصا ان الطريق فردى رايح جاى ومافيش لا عواميد نور منورة ولا خطوط بيضاء على الأرض وطبعا ولا عيون نملة حتى ولا حتى رصيف
أظن دى بقى مش تبقى لوس أنجلوس خالص دى بالكتير House of the DEAD

[MoToRiZeR]

كان نفسى أصور اللى شفته امبارح لكن كنت لوحدى
اللى فى الفيديو صعب طبعا لكن اللى شفته امبارح كان أسوأ جدا خصوصا ان الطريق فردى رايح جاى ومافيش لا عواميد نور منورة ولا خطوط بيضاء على الأرض وطبعا ولا عيون نملة حتى ولا حتى رصيف
أظن دى بقى مش تبقى لوس أنجلوس خالص دى بالكتير House of the DEAD

لأ ده كدة رعب فعلاَ يا دكتور
house of the dead جداَ

انا كنت لوحدي برضه كنت بصور و انا سايق و ده اللي حسسني بالجو

و وليد معنديش للأسف فانوس شبورة .. شكراَ للجمارك.

[Dr Ahmed]

ونسيت أقولك إن فى الفيديو بتاع حضرتك فيه عربيات ونس
فى الفيديو بتاعى اللى مصورتوش 70% من الطريق مكنتش شايف ولا كان حواليا أى كائن حى فمابالك بعربية يعنى كمان Alone felbantaloon
ولما لقيت عربية أمشى وراها المنيل كان فاتح النور العالى ومش شايف أكتر منى وعمال يمشى فى خطوط زجزاج وخلانى أخاطر وأعديه وأمشى لوحدى أحسن بدل ما ألبس أنا فيه

[MoToRiZeR]

هههههههههههههه لأ انا كان فيه ناس تونسني كتير يا دكتور و كانوا كلهم بيخبطوا في بعض :d و كان فيه عربية عريس و عروسة و متزوقة و بتاع و جيت جنبيهم قعدت أعمل كلاكس الفرح لقيتهم مشغلين قرأن بصوت عالي و العروسة بتعيط :d

كمان المشكلة مينفعش تركن لأن ممكن واحد ميشوفكش و يخبط فيك و متضمنش الشبورة هتخلص إمتي!

[tigernet]

ياباشا انا كنت فى المحور امبارح و كانت الشبورة جمدة اوى لدرجة ان مش شايف 5 متر قدامك و الناس كلها مشغلة العالى و الانتظار و كانا مشين السرعة حوالى 50 60 كياو
وكانت شبة الى موجود فى الفيديو

[amr mokhtar]

حمد لله على السلامة ليك محمود و دكتور أحمد
ده رعب بجد
انا معاك ان الجو ده بيبقى شكله حلو.... بس لما تروح و تحس بالأمان
إنما فى لحظتها أعتقد انه مش لطيف خالص

بس هل فعلآ فوانيس الشبورة بتكون مفيدة فى الظروف دى؟

[dr.amr]

لأ ده كدة رعب فعلاَ يا دكتور
House of the dead جداَ

انا كنت لوحدي برضه كنت بصور و انا سايق و ده اللي حسسني بالجو

و وليد معنديش للأسف فانوس شبورة .. شكراَ للجمارك.

شكرا للجمارك هههههههههههههههههه :pointi~2[2]:

[Karim_Mohy]

كان فعلا يا محمود جااامدة جدا وخاصة في الفجر وكمان كانت جوا البلد وماكانش حد شايف متر قدامع في بعض المناطق

ربنا يسترها علينا جميعا