ما هي اكثر أخطاء القيادة التي تستفزك في الشارع المصري

[aif]

طبعا الاخطاء اكتر من ان تحصي لكن اكثر شيء بيحرق دمي هو الناس اللي بتسوق بالليل وطافيه النور
آل يعني بيوفر
وفاكر انه طالما هو شايف من غير نور يبقي النور مالوش لازمة

[sab3aawy]

انا اكتر حاجة بتشلنى هى السير فى عكس اتجاه الطريق

دى السفالة بعينها

[analyzer]

انى ابقى ماشى على الطريق السريع خاصة الزراعى وييجى واحد من يمينى او شمالى ويحطلى كبوته امامى مرة واحده والمسافة لا تسمح يعنى بيجبرنى ادوس فرامل بس فى الحقيقه انا مبدوس وبكبس عليه وكمان ازنقه واوقفه واهزقه شويه وبعدين امشى .

[AlmAhAtmA]

طبعا الاخطاء اكتر من ان تحصي لكن اكثر شيء بيحرق دمي هو الناس اللي بتسوق بالليل وطافيه النور
آل يعني بيوفر
وفاكر انه طالما هو شايف من غير نور يبقي النور مالوش لازمة

حسبي الله و نعم الوكيل
فعلا انا مع حضرتك انا بشوف مهازل علي الصحراوي كل اسبوع
اخر مره حصل الله كنا خايفين منه
الباشا سايق بعربيه لوري
و محمل حموله خشب عامله زي الكرش باظه من كل اتجاه
و تقريبا مكتفي ان ساعته بتنور
و هيونداي اكسيل قديم هوبا طخ بم

فعلا من اكتر الحاجات اللي بتغيظني علي الطريق

[MMamdouh]

ان واحد فى الحارة اللى جنبك يقف قدامة واحد يقوم ببساطة رامى عليك عشان يسلك نفسة بدل ما يقف

MMamdouh

[memoz]

ان في ناس في اليو تيرن لازم لما تيجي تلف تلف من نص الشارع ده حاجه مستفزه بغباوه

[aif]

وكمان لما تلاقي السائق بيكلم اللي جنبه وعمال يشاور بأيده من الشباك
هو طبعا مش قاصده يشاور للسيارات اللي حوله لكن الكلام كان سخن شوية وكان بيحاول يمثل الموقف اللي بيحكية بالتفصيل
واللي حوله مش مهم...... يتحرقوا

[emadkamel]

هو الاخطاء اللى تنرفز كتير ... وفى شوارع مصر الاخطاء اكبر من انها تنرفز .. يعنى ممكن الواحد يتشل وهو سايق .. ده حتى فى اخطاء بتبقى جديده لانج وليها حقوق ملكيه فكريه فى مصر خد عندك:

1- الاتوبيسات والميكروباصات اللى "بتركن" فى نص الشارع (وساعات على الشمال) علشان تنزل الركاب

2- لورى مطفى النور على طريق سريع عشان فاتورة الكهرباء جاتله عاليه!!!

3- عربيه كارو توقف الشارع كله علشان الحمار بيتزحلق على الاسفلت وهو بيعدى من اقصى اليمين لاقصى الشمال

4- الباشا اللى يكسر عليك ببوز العربيه وانتو فى اشاره علشان يطلع قبلك

5- الناس اللى بتعدى اى طريق فى اى وقت من غير حتى ما يبصوا عليك ولما تفرمل مره واحده تتشتم لانهم مش عارفين انت "مستعجل على ايه ... وراك الديوان ياخى؟"

6- واحد راكن فى نص الشارع قدام تسيباس وسايب العربيه خالص والعسكرى لما قلتله قاللى معلهش اصل مافيش مكان يركن !!!! العسكرى نفسه كان مشغول بيطلع عربيه من الركنه وبياخد حسنته !!!!!!!!

7- غير طبعا حبايبنا بتوع التوك توك اللى ماسكين الشمال على طول وبيكسروا فى اى وقت لاى اتجاه

على فكره .. كل ده حصللى فى 10 ايام بس فى آخر اجازه جيت فيها مصر ... ومش عارف هانوصل لفين فى مصر بعد كده

[SEATLOVER]

لما تكون طالع كوبرى و تلاقى كلة راجع عليك بضهرة !!!!!

[tutankhamoun]

الشارع المصري كله يشل
أنا مشفتش حاجة صح خالص و بتاتا
و السواقة في مصر من أكتر الحاجات اللي مكرهاني في البلد
بس أكتر حاجة بتخنقني
الغرز و أصحابها قلالاة الأدب
و فعلا أنا بكره السواقة في مصر جدا و كرهت العربيات كمان بسبب الطريق المصري

[شاهين - بنز]

أنا عندي حاجات كتير بس حقول بعضها مع العلم إن كلها بتكرر معايا يوميا :
1-أي واحدة سايقة في الشارع سواء غلطانة ولا لأ بتستفزني جدا

2-الناس الأغبية إلي بتركن على الشمال مرة والله كنت حعمل حادثة مميتة بسبب الموضوع ده بس ربنا ستر

3-الناس إلي ماشيين براحة على الشمال وآجي أكبسلهم ميرضوش يعدوني برضه

4-سواق الميكروباص إلي أول مايشوف زبون يجي من أقصى الشمال لأقصى اليمين وللأسف هي دي مشكلة الحشيش

5-طبعا زي ماذكرتو الشاحنات إلي بتمشي من غير نور خصوصا على الطرق السريعة

6- الستات إلي بيلفوا من غير إشارة وللأسف نسبتهم 100%

7-الناس إلي بتعدي الشارع بدون مبالاة ومرة خبط ست بسبب الموضوع بس كنت فرملت شوية

8- الستات إلي بيمشوا يطوحوا في الشارع

9- سواقين التاكسي إلي بيعدوا 20 زبون وبرضه مابيركبوش حد

10-إلي شاري باجيرو ب 600 ألف وفرحان ميعرفش إنه دافع ثلاث أرباع المبلغ جمارك

11-إلي يعمل يوترن وبدل مايمشي بعد اللفة يقعد يتسارع نص ساعة عشان يوصل لسرعة 60 ويكون عطل جيش وراه

12- طولت لسان الشعب المصري

13- أما يكون يوترن إتجاه واحد ويجي واحد بالعكس عشان يوفر مسافة

14-الناس البيئة إلي بتشتري عربيات نضيفة ويظبتوها تزبيط ميكروباصي ويخلوا شكلها أعفن من ال 128 مع إحترامي لأصحابها

15-سواقين الميكروباص إلي عشان يوفرو وقت يلفوا من أقصى اليمين

16-الناس إلي بيمشوا براحة جدا في نص الشارع وقافلينة ومش عارف أعدي منهم

17- الستات إلي بيقطوا الطرق الفرعية للرئيسة من غير مايشوفوا فاضي ولا لأ

[شريف]

الترلات ثم الترلات فى الصرق السريعة و بيمشو على الشمال ببطا
اللى بيغرز من اليمين
مفيش حد عندة صبر و اياكش يولع

[OlaOsman]

أنا عندي حاجات كتير بس حقول بعضها مع العلم إن كلها بتكرر معايا يوميا :
1-أي واحدة سايقة في الشارع سواء غلطانة ولا لأ بتستفزني جدا

2-الناس الأغبية إلي بتركن على الشمال مرة والله كنت حعمل حادثة مميتة بسبب الموضوع ده بس ربنا ستر

3-الناس إلي ماشيين براحة على الشمال وآجي أكبسلهم ميرضوش يعدوني برضه

4-سواق الميكروباص إلي أول مايشوف زبون يجي من أقصى الشمال لأقصى اليمين وللأسف هي دي مشكلة الحشيش

5-طبعا زي ماذكرتو الشاحنات إلي بتمشي من غير نور خصوصا على الطرق السريعة

6- الستات إلي بيلفوا من غير إشارة وللأسف نسبتهم 100%

7-الناس إلي بتعدي الشارع بدون مبالاة ومرة خبط ست بسبب الموضوع بس كنت فرملت شوية

8- الستات إلي بيمشوا يطوحوا في الشارع

9- سواقين التاكسي إلي بيعدوا 20 زبون وبرضه مابيركبوش حد

10-إلي شاري باجيرو ب 600 ألف وفرحان ميعرفش إنه دافع ثلاث أرباع المبلغ جمارك

11-إلي يعمل يوترن وبدل مايمشي بعد اللفة يقعد يتسارع نص ساعة عشان يوصل لسرعة 60 ويكون عطل جيش وراه

12- طولت لسان الشعب المصري

13- أما يكون يوترن إتجاه واحد ويجي واحد بالعكس عشان يوفر مسافة

14-الناس البيئة إلي بتشتري عربيات نضيفة ويظبتوها تزبيط ميكروباصي ويخلوا شكلها أعفن من ال 128 مع إحترامي لأصحابها

15-سواقين الميكروباص إلي عشان يوفرو وقت يلفوا من أقصى اليمين

16-الناس إلي بيمشوا براحة جدا في نص الشارع وقافلينة ومش عارف أعدي منهم

17- الستات إلي بيقطوا الطرق الفرعية للرئيسة من غير مايشوفوا فاضي ولا لأ

هو حضرتك مش شايف انك متحامل شويتين على الستات اللي بتسوق عربيات؟ :)

هو مافيش غلطة من اللي حضرتك خصيت بيهم الستات دول بيعملها راجل سايق عربية برضه؟ و لا الأخطاء دي تخصص سيدات بس؟

[aif]

بصراحة يا أخت علا الرجالة والستات بيعملو اخطاء تفرس لكن نسبة الستات اكتر بكتيييييير

[Xpert]

طب خد دي .. البلد الوحيده اللي النقل يلزم : اليمين .. و الشمال .. و منتصف الطريق .. و فوق العربيات كمان :d