ما هي اكثر أخطاء القيادة التي تستفزك في الشارع المصري

[sab3aawy]

أنا عندي حاجات كتير بس حقول بعضها مع العلم إن كلها بتكرر معايا يوميا :

1-أي واحدة سايقة في الشارع سواء غلطانة ولا لأ بتستفزني جدا

بص، انت تشوفلك عقد عمل فى السعودية هتنبسط أوى

يا عم الستات مضايقينك فى ايه بس، يعنى غلطانة وفهمناها، لكن لو مش غلطانة تستفزك ليه؟

الست اللى بتسوق بتحل مشاكل كتير جدا فى بيتها،وبتشيل هم كتير جدا عن زوجها او ابوها، لكن الرك فى الأول وفى الآخر على اللى علمها علمها إزاى

[Karim_Monir]

اكتر ما يستفزني فعلا سواقة التريلات على الشمال سواء بسرعات عالية او متوسطة
خاصة لما يكونوا اتنين وبيشدوا مع بعض
تحس ان التهريج فيه غباوة
ولما تقلبلهم نور او كلاكس وما ادراكم ما كلاكس الكرولا (اكتر كلاكس مزعج في فئة العربيات الجديدة)
ولا حياة لمن تنادي
اخرها امبارح قادتني الظروف لزيارة عائلية في اخر شارع الهرم
من بيتي في اخر جسر السويس مسافة حوالي 50 كم
قررت اطلع ناصح واخد الدائري-فعلا الطريق زي الفل وواسع و4 حارات بس الاربعة تلاتة منهم تريلات
فضلت متمالك اعصابي لحد ما واحد من اللي بيجري على الدائري بسرعة 120 وعلى الشمال بهدلي العربية الزلط الصغير
وكانت القشة
جبتة من اليمين وطلعت قدامة ومن عند كارفور تقريبا لحد منزل البحر الاعظم وانا مروقة ومضحك علية الطريق كله
لا عارف يطلع من اليمين ولا من الشمال لحد ما لم نفسه وجاب ورا لاني كنت ممشية 60
فعلا بقت بلد السواقة فيها مغامرة وانك تروح بيتكم كانك رجعت من معركة حربية

[Ahmad Allawy]

تعليق صغير علي الناس اللي بتمشي عكس..
المصيبة لما تلاقي واحد ماشي عكس.. وكمان منور النور في وشك..
والله انا بانور النور العالي وبافضل ضاربه في وشه لحد ما يمشي من قدامي..
والحاجة الجديدة اللي منتشرة بعبط في المقطم للناس اللي ساكنة هناك هتلاقيهم بيشدوا في شعرهم منها ..
العربيات اللي بتلف في اليو ترن الغلط.. يعني مش بتاعته.. بيلف في بتاعت الاتجاه التاني..
دي انا باموت منها بصراحة.. مش باقدر امسك نفسي عن الشتيمة..
ربنا يعافينا..

[شاهين - بنز]

بص، انت تشوفلك عقد عمل فى السعودية هتنبسط أوى

يا عم الستات مضايقينك فى ايه بس، يعنى غلطانة وفهمناها، لكن لو مش غلطانة تستفزك ليه؟

الست اللى بتسوق بتحل مشاكل كتير جدا فى بيتها،وبتشيل هم كتير جدا عن زوجها او ابوها، لكن الرك فى الأول وفى الآخر على اللى علمها علمها إزاى

لإن غير أغلاطهم إلي متعودين عليها, أكتر من مرة كنت على حافة الموت وربنا نجاي بأعجوبة كنت ماشي على المحور بسرعة 120 على الشمال وسرحت لمدة ثانيتن (طبعا لإني على الشمال ومش متوقع أي حاجة) وفجأة أفاجأ بسيدة ركنة عربيتها على الشمال وعديتها بالعافية ومرة تنايه ماشي في صلاح سالم وألقى واحدة بترجع بعربيتها في نص الشارع وكنت حلبس بس عدت على خير وغيره وغيره إلخ.... ولزلك جتلي عقدة من سواقت الستات والبنات

[MMamdouh]

الستات بتسوق بنفس مفهوم مشيهم على رجليهم فى مول تجارى... ممكن تقف فى اى وقت عشان تبص على جزمة و تلف الناحية التناية عشان فيه فستان عجبها و مفيش مشاكل... انا مراتى كانت فاكرانى بتحامل على الستات بس بعد ما ركبت معايا كام مشوار كدة اقتنعت بكلامى

مرة كنت ماشى على الدائرى على 90 و لقيت تريللا بتقلبلى نور و اول ما مسكت يمين طلع منى زى الصاروخ و مشوفتوش تانى (انا كنت ماشى 90 خلال كل القصة دى)

و انا رايح للمحامى من اسبوعين لقيت واحد واقف فى نص صلاح سالم قبل مطلع كوبرى الفردوس... الراجل مش بيعدى لكن واااااقف فى نص الشارع

ساعات كتير شارع اتجاهين تلاقى واحد داخل عكس فى الحارة بتاعتك و ساعات بيزل لو موستعتلوش

و التكسجى اللى يمشى يحسس على الطريق عشان يدور على زبون... و لو راكب معاه زبون يبقى عايز يطير من فوقك و يا سلام لو هدى بس عشان يسمع الزبون و انت حاولت تعدية و طلع الزبون مش على هوى الباشا السواق... تلاقية مصر يقفل عليك برضة ولا اكنك راكب تاكس زيه و ختاخد الزباين منه

سواقين الفزب و خاصة بتوع الدلفرى

بصراحة يا جماعة الاجانب قالوها حكمة: قود سيارتك بطريقة دفاعية

drive defensivly



MMamdouh

[Xpert]

هع هع .. درايف ديفنسيقلي ... تحت شعار ... "السواقه .. بالدراع "

[OlaOsman]

ما ورد في هذا الموضوع مرعب لي لأقصى درجة

اما انتوا العتاولة في السواقة بتعانوا المعاناة دي.. امال انا لما آجي أسوق هاعمل ايييييييييييييييه؟ و هتعامل مع الأنماط الغريبة من البلطجة المرورية دي ازااااااااااااااي؟

[turboman]

اكتر حاجات مقرفة هي عدم فهم الاشارات يعني مثلا كنت مرة بلف شمالو طبعا رجاي على الفرامل من بدري عشان اهدي و مدي اشارة يعني تقريبا كل الاشارات الخلفية منورة جة افندي من ضهري و هوب فرملة تسمع لجنوب سينا و نازل بيزعق فكان لازم افهمة الفارق بين الانسان و القرد ....................واحد تاني النهاردة على طريق المنصورة دمياط و بيلف بس من اقصى اليمين لاقصى الشمال و انا في الشمال جاي على 140كم وكالاكسات ولكن لاحياة لمن تنادي و ربنا سلم بالعافية

[sokasoon]

بص يا سيدى او حاجة تبقا ماشى وفجأة تلاقى واحد طلع وماشى فى نص الشارع وتديلو

كلاكسات وهو ولا هو هنا والرصيف اليمين والشمال موجود تقريبا المفروض اننا نمشى

عليه بالعربية مش الناس

وساعات تلاقى واحدة سايقة العربية وسرحانة وماشية واحدة واحدة وبتبص على المحلات ومعطلة

الطريق واللى يخنقك اكتر التاكسى والمينى باصات تلاقى المينى باص فجأة يكسر عليك علشان

يقف وتديلو فى كلاكسات ولا هو هنا اما التاكسى يروح واقف فجأة فى اى مكان ولما تكلمو يقولك فى ايه

[turboman]

نسيت اقول على الكارو يبقى ماشي باسلوب غير ادمي مخالف او سادد الشارع تيجي تديلة كالاكس يبصلك بكل احتقار ويشاور بايدة الشمال ويقولك عدي يا بية تبص تلاقية سايبلك متر على شمالة تعدي منة ولا النص نقل مرة كنت معدي بجوار سوق خضار وعربيتين سادين الطريق كالاكسات قام واحد خنيق قالي ربع ساعة و هنخلص يا بية ...........................يا عم اقفل الموضوع دة انا جالي ضغط

[Karim_Monir]

ما ورد في هذا الموضوع مرعب لي لأقصى درجة

اما انتوا العتاولة في السواقة بتعانوا المعاناة دي.. امال انا لما آجي أسوق هاعمل ايييييييييييييييه؟ و هتعامل مع الأنماط الغريبة من البلطجة المرورية دي ازااااااااااااااي؟

افضل حاجة تاجريلك سواق وتتفقي معاه بارت تايم وانتي برضه تكوني متعلمة كويس
بس عشان مشاوير وسط البلد
ويا سلام لو راجل معدي ال 40 او اكتر عشان تكون سواقتهم هادية
وكمان توفير اجرة الباركينج والسايس لانه هايخد العربية يركنهالك في الروقان وتطلبيه يجيلك بيها
وقاعدة مستريحة ومش محروق دمك
وتنسي بقي المخالفات صف تاني وركن ممنوع وكل الحوارت دي

[badblood]

الاقي ناس كتير جدا قافل النرايه اليمين ليه مش عارف
ومرة لاقيت واحد راكبه فيرنا جديدة كان لسع الورق عليها ولاقيتها قافلة المرايات (اليمين والشمال)
الله اعلم واصحاب العقول في راحة

[pcegypt]

لما يبقى الطريق ثلاث حارات والناس ماشيه أربع صفوف ومش بس كده لأ يجيلك واحد عبقري عايز يعمل صف خامس كمان ولما تكلمه يقولك إييييييه إنت عايز الطريق ليك لوحدك !!!.

على فكره ده بيحصل دايما ، فعلا حاجة تجيب الضغط .

تحياتي .

[marsguy]

قمة الرعب إنك تكون ماشي في الدائري على سرعة 100 وتلاقي مقطوره جايه من وراك وبترعشلك عشان تطلع منك!!!!

على الأقل بتكون ماشيه على سرعة 130!!!

عارفين المقطوره دية عشان تفرمل محتاجه مسسافه أد إيه؟

ربنا يستر علينا جميعاً

[marsguy]

من الحاجات المستفزه جداً برضه هو إنك تكون ماشي قي شارع واقف ويا دوب العربيات كلها ماشيه على 20 وتلاقي اللي وراك معلق إيده على الكلاكس بصوره مستفزه والمفروض منك إنك تدوس على الزرار اللي بيخلي عربيتك تختفي عشان اللي وراك يقدر يتقدم مسافة 3 متر وبعد كده يعيد القصيده مع المسكين الي كان قدامك.