هو انا غلطان ؟

[crazylambada]

السلام عليكم يا جماعه
امبارح كنت ماشي في صلاح سالم على الضهر و كده فجاه العربيه اللي قدامي وقفت انا ملكت نفسي و بقف قبليها بحوالي نص متر ببص ورايا لقيت ميكروباص طاير و بيفرمل و مش لاحق نفسه و حيخش فيا فكنت سايب الفرامل و العربيه في اخر الفرمله و دخلت في اللي قدامي ببراحه مش جامد علشان ادي المكروباص مسافه يلحق نفسه فيها بدل ما يلبس فيا و البس في اللي قدامي وتبقى سلسله حصلت معايا قبل كده
المكروباص لحق نفسه بغرزهوسابنا و مشي
و نزلت الحمد لله العربيتين محصلهومش حاجه و لا البويه اتاثرت الراجل لسه جاي يتكلم قعدت اعتذرله و ابينلع الوضع بس غالبا مهتمش بكلامي و قعدت اعتذرله و معرفتش انقله الصوره صح
اللي انا عملته ده كان اتقال ليا قبل كده ان اعمله لو على كورنيش الاسكندريه و ان لما افرمل لازم ابص ورايا مش قدامي
تفتكروا انا غلطان رغم النتيجه ان مفيش اصابات حصلت لا بشريه و لا في السيارات و لا ايه العمل

[ConDoR]

هو اكيد حضرتك الغلط الوحيد ان لازم تبص في المرايه قدامك ووراك وربنا يكفيك شر طريقك

[Imhotep]

لأ هو اللى انت عملته مش غلط لان انت عملت حل وسط لا يؤذيك و لا يؤذى من امامك و المفروض الراجل اللى قدامك طالما محصلش حاجة لعربيته كان يقول حصل خير و خلاص لكن طبعا لان احنا عندنا قاعدة اللى ورا تملى هو الغلطان عشان كده هو كان زعلان لانه مركز على حتة ان انت اللى خبطت فيه و هو شايف ان ده غلط حتى لو ما اتسببلوش فى خساير....
بس خلى بالك لو عربيتك فيها ايرباج لان ساعتها يفضل تسيب اللى وراك يخبط فيك احسن من خطر ان الايرباج يفتح لو الخبطة الامامية كانت جامدة..... انا اخترت كده لما حصل موقف زى بتاعك ده

[tamertamer]

بص هى عملية تقديرية فى الاول والاخر وربنا ستر

[mr_sameh]

اعتقد انك مكنتش لازم تلمس العربيه اللي قدامك لان المكروباص لو دخل في العربيه مش كان الجزء الصغير هيحوش الخبطه عموما حصل خير.

[وائل عطية]

لأ ما كانش لازم تلمس العربية اللي قدامك
أكيد ماينفعش الواحد يسبب ضرر لواحد تاني ملوش ذنب
زي اللي يبقى داخل فجأة على حفرة ولا حاجة في الأرض ..تلاقية قام رامي نفسه شمال ولا يمين علشان يتفادى الحفرة ومفكرش إنه ممكن يتسبب لنفسه ولغيره بضرر أكبر من الحركة اللي عملها

[powerofhelll]

الحمد لله انها سليمه

[crazylambada]

تمام كده بس هو الفكره ان لو مكنتش ريحت كانت الخبطه طالتني و طالت اللي قدامي لان الحاجات ديه لما بتحصل مش بتاخد عربيه واحده
وربنا يسترها علينا كلنا و شكرا جدا لكل الاعضاء للايضاح

[omar-saad]

حل كويس من وجهة نظرى لانة كدة كدة لو كان الاخ بتاع الميكروباص دة دخل فيك يعنى لاقدر الله كانت عربيتك هاتزحف وتخبط فيه برضة
فانتا لما خفف الحمل بتاع الفرامل كانت هاتريح الخبطة شوية وتحمى نفسك واللى قدامك
وربنا يستر طريقنا جميعا

[n8os]

الحمد لله ربنا سترها

[amr.elsayed]

هو انت عملت الصح بانك سيبت العربية تتحرك الى الامام شوية علشان تعطى للميكروباص
مساحة ياخد فيها قراره سواء بضرب فرامل خطر او انه يتفادى الموقف بغرزة
لكن فى نفس الوقت كان لازم تسيب العربية تتحرك للامام وتنتبه للامام مش للمراية
وتفرمل قبل ما تريح على العربية اللى امامك حتى لو مجرد ترييحة او خبطة صغيرة
وعموما قدر الله وما شاء فعل والحمد لله انها جت سليمة

[ابو فرح]

الحمد الله ربنا سترها

[Eng.Geo]

انت عملت الصح
انا عملت حاجة زي كدة بس كنت خارج من شارع جانبي وفجأة لقيت نفسي داخل علي الشارع العمومي بسرعة كبيرة فقلت ألحق نفسي قبل ما ألاقي حاجة تلطشني من العمومي وكان ورايا كورولا وكان هو كمان بيجري ورايا
وبعد ما ضربت فرامل لقيت نص العربية في الشارع العمومي ولقيت أوتوبيص كان جاي بسرعة هيشيللي الأكصدام ويفرتكة
المهم في ثانية العربية وقفت من هنا وانا أديت مرشدير ورجعت علي طول وكنت شايف الكورولا ورا واقفة بس ويا دوب هلزق فيه بس كان لازم أخبطة سنة عشان الأوتوبيس كان هيفرمني
وهوب خبطته حاجة بسيطة
الأوتوبيس يدوب عدي وكان في بتاع 5 سم مابيني وبينه
ونزلت أشوف العربية لقيت مفيش خربوش في أي عربية وأستنيت تعليق بتاع الكورولا
هو الراجل طلع زوق جدا وقاللي حاجة واحدة : أنا أرخص !!!!
وكان علي وشه ابتسامة كدة قمت ضاحك أنا كمان وقلتله أنزل شوف لو فيها حاجة
قاللي لأ ياللا مفيش مشاكل
:)

[crazylambada]

فعلا عندكم حق انا غلطت لما بصيت في المرايه كان لازم اريح لقدامي قبل ما اخبطه بسنه
بس المشكله ان كل ده حصل في جزء من الثانيه رد فعل
بس اوعد لا قدر الله ده حصل تاني ححاول اخد بالي من اللي قداميو انا ببص ورا
وربنا يخليلنا السواقه في مصر :)

[ahmdmagdy]

في رأي الشخصي حط نفسك مكان الراجل اللي انت لزقت فيه هل هترضي بالحصل ده و لا لأ