السيارات الصينية..!

[m.salama]

السلام عليكم كنت عايز اتكلم معاكم في موضوع بفكر فيه كتير اوي وهو السيارات الصينية أنا كنت واحد من المعترضين عن السيارة دي أول لما نزلت بس أنا شايف إن السيارة دي موجودة حوالي من 2006 أو 2007 مش متذكر اوي ومش باسمع حد كتير بيشتكي منها بالعكس مريحة ناس كتير واعتقد إن انتشرها ده مأكد كلامي يعني أنا بقيت أشوفها أكتر من سيارات تانية كتير وسؤالي ياترى احنا علشان مجرد إن العربية دي صيني خلاص كده منفكرش فيها؟ ولا أصلا العربية مش كويسة ومش حتعمر؟ مع احترامي الشديد لكل من يمتلك هذه السيارة..أنا عارف إن جودة الصين في حاجات كتير مش كويسة خالص بس العرفتوا إن مثلا سوء الصين في america كويس ومحترم جدا مش بس امريكا بس في دول تانيا كتير وعرفت برضوا إن الصين بتقدر كل دولة في المزنية بتعتها بتقليل أو تزويد ال quality للمنتج..في هذه الحالة تقيمنا يكون إيه عن ال quality لهذه السيارات في مصر؟مع العلم بمزنية دولتنا وحالها.

[eng.octooo]

مفيش عربية بتبان جودتها اقل من 5 : 7 سنين
وانت قبل ما بتجيب عربية انت بتجيب وسيلة نقل المهم تكون امان
شوف اختبارت السلامة الاوروبية وانت تعرف الى انت محتاجة وسيبك من كلام الناس لانة لا بيودى ولا بيجيب لف المنتدى من اولة لاخرة هاتلاقى فية عيوب وتحذيرات من المرسيدس لحد الموتوسيكل الصينى ...يعنى كلة فية عيوب بس عيب عن عيب يفرق

[pedooooo]

انا بفكر زيك بالظبط يا باشا
فعلا العربيات دى وحشه ولا الكل بيقول كده لمجرد انها صينى
انا من فتره فكرة فى عربيه اسمها تيجو
العربيه دى جميله او و منتشره و محدش بيشتكى منها
و عجبانى جدا شكلها و امكانيتها
لدرجة انى فكرة ابيع الفيرنا و اشترى تيجى
بس برضه مقلق مع انى مقتنع ان العربيه كويس
بس فكرة انى هبقى راكب صينى مقلقانى او (مع احترامى الشديد لكل اصحاب السيارات الصينى)

[snakeson2]

العربيات الصيني بلغة السوق بتعجز بسرعة ! ودة واضح جدا . كفاية ان الصينيين نفسهم مبيشتروهات ؟ طب ودة لية ؟
العربيات الصيني مشروع فاشل بكل المقاييس !

[m.salama]

مفيش عربية بتبان جودتها اقل من 5 : 7 سنين
وانت قبل ما بتجيب عربية انت بتجيب وسيلة نقل المهم تكون امان
شوف اختبارت السلامة الاوروبية وانت تعرف الى انت محتاجة وسيبك من كلام الناس لانة لا بيودى ولا بيجيب لف المنتدى من اولة لاخرة هاتلاقى فية عيوب وتحذيرات من المرسيدس لحد الموتوسيكل الصينى ...يعنى كلة فية عيوب بس عيب عن عيب يفرق

تمام ساعدتك أنا متابع بـاهمتمام اختبرات euroNCAP بس البينزل مصر غير الإحنا بنشوفه ودا علشان معندناش موصفات خاصة ده بغض النظر عن فئات معينة للسيارات واعتقد إن مثلا speranza a516 فيها ايرباج وفرامل ebd أنا مش فاكر هي مجهزة بـإيه علشان مالغبطش بس أعتقد إنها safety أكتر من verna مثلا أنا معاك في نقطة 5-7 سنين نحكم عالعربية وانا كان قصدي إن لحد 3 سنين أنا شايفها منتشرة بشكل ممتاز..ومعاك أيضًا إن كله في عيوب بس أنا مسمعتش عن مشكلة متعسرة فيها زي ودا في حدود رؤيتي..متشرف بنقاشي معك :)

[m.salama]

انا بفكر زيك بالظبط يا باشا
فعلا العربيات دى وحشه ولا الكل بيقول كده لمجرد انها صينى
انا من فتره فكرة فى عربيه اسمها تيجو
العربيه دى جميله او و منتشره و محدش بيشتكى منها
و عجبانى جدا شكلها و امكانيتها
لدرجة انى فكرة ابيع الفيرنا و اشترى تيجى
بس برضه مقلق مع انى مقتنع ان العربيه كويس
بس فكرة انى هبقى راكب صينى مقلقانى او (مع احترامى الشديد لكل اصحاب السيارات الصينى)

هو مع مرور الوقت حنعرف

[m.salama]

العربيات الصيني بلغة السوق بتعجز بسرعة ! ودة واضح جدا . كفاية ان الصينيين نفسهم مبيشتروهات ؟ طب ودة لية ؟
العربيات الصيني مشروع فاشل بكل المقاييس !

ما هو زي قال eng.octoooمافيش عربية بتثبت حالتها إلى بعد 5-7 سنين واعتقد أيضًا إن معدش عليها المدة دي مش معنا كده إنها عربية تورث بس في تخيولي إنها حتفضل مدة كويسة يبقى مينفعش نقول دلوقتي إنها فاشلة ووحشة وحتعجز بسرعة..أنا ماقدرش أرد عليك في موضوع ليه الصين مش بتركب صيني لأني معنديش معلومات هم أصلا بيركبوا إيه..بس حضرتك بتقول إنها بتعجز بسرعة ودة واضح جدا ياريت حضرتك توضحلي إزاي عرفت؟ أصلa516 مع واحد صاحبي من 2007 وماشية حوالي 55.000 سفر كتير ولما بركب معاه بأحس إنها في حالتها!

[د.محمود صلاح]

تجربتي في الصيني : -
اشتريت جيلي CK1 زيرو سنة 2006 من توكيلها المعتمد ناشيونال سايمكس .. العربية كانت شبة المرسيدس سي كلاس بالضبط 1600 سي سي جميع الكماليات فرامل abs ..

الموتور كان صيني بالكامل ( هو موتور واحد في معظم العربيات الصيني ويبدو ان ماعندهومش غير شركة واحدة بتنتج المواتير دي ) ,, والموتور ده شبه مواتير الكرولا الملكة الإنجكشن وكان فيه مكونات المانية زي البوبينة - بوش -

وباقي اجزاء العربية كان صيني مختوم بشركة جيلي

أول ما اخذت العربية حسيت بسوء التقفيل والعزل وضعف الأداء الشديد والأصوات من كل مكان كأنك راكب شخليله

وروحت بلدي المنيا وبدأت معاناة اكتشاف الأصوات ومحاولة حلها


(يتبع )

[د.محمود صلاح]

وبعد دوخة مع بتوع العفشة لقينا بلاستيكاية من تحت المساعدين بتخبط في السوست وتعمل أصوات

وبعد فترة لقيت الزجاج الأمامي ينزل ولا يطلع بداية من الساعة 12 ظهراً الى الثانية عصراً فقط ( والله العظيم كما أقول بالضبط ) ,, طبعاً روحت لكهربائي عشان انا من المنيا وصعب اروح التوكيل عملنا عدة محاولات لحد ما عرفنا وجود خلل في بوردة التحكم وغير المقاومة البايظة واتحلت المشكلة

ولما روحت التوكيل وسألتهم على البوردة قالوا ب 1100 ج وما بتتصلحش ومارضيتش اغيرها ولقيت الناس هناك تبدي تذمراً شديداّ من السيارة ومشاكلها

وبعد شهر جابت زيت باور من تحت والعلبة الباور باظت .. غيرتها على حساب التوكيل

أقصى سرعة لها كانت 160 بدون تكيف بالطبع ولو شغلت التكييف العربية تسخن

وبعد شهر لقيت مؤشر البنزين بيلعب .. روحت لنفس الكهربائي فكينا التانك ونظفنا العوامة واتصلحت وبعديها بشهر كررنا نفس الحكاية مرتين وسلمتها للمشتري بنفس العيب

وبعد سنة بالتمام والكمال لقيت التوكيل شال اسم الشركة من على الصيانة وبطل يستورد عربيات تاني ومخزون قطع الغيار فضى لدرجة عدم وجود زجاج او فوانيس او اي حاجة

دب الرعب في قلبي بعد ما كنت مصبر نفسي


قررت البيع فوراً


بعتها بعد اعلان في جريدة الاهرام ولم يتصل بي احد نهائي الا بعد اسبوع من الإعلان واحد منن الزقازيق
قال لي انه عارف العربية دي ولها فرع صيانة في الزقازيق
واشتراها مني ب 41 الف يعني خسارة 23 الف جنيه في سنة ونصف ( كانت ب 64 الف ج ) وبعد بيعها ب 9 شهور مسكها توكيل تاني أظن انه محترم شوية عن السابق

وبالتالي لا أنصح بالصيني بتاتاً ,, اشتري أي حاجة من شركة عريقة توكيلها محترم

[ابو فرح]

العربيات الصيني بلغة السوق بتعجز بسرعة ! ودة واضح جدا . كفاية ان الصينيين نفسهم مبيشتروهات ؟ طب ودة لية ؟
العربيات الصيني مشروع فاشل بكل المقاييس !

1+++++++++++++

[walidzakzok]

دكتور محمود هو انت ليه جبتها من الاساس مع ان سوء التقفيل دة باين من وهية فى المعرض انا كنت باشوفها فى الشارع تحس انها مش راكبة على بعض وتلاقى الصاج مفارق فى حتت بتاع 1 سم...يعنى الحسبة فى دماغك لما اشتريها كانت ازاي ياريت توضح عشان نستفيد؟

[snakeson2]

بالنسبة ليه الصيني مبيركبش عربية صيني : لان المستهلك معندوش ثقة في منتج بلدة اولا ثانيا لان الصين لم تنتج لحد الان محرك سيارة وكل الموجود تجميع في الصين بس مش متصنع بالكامل في الصين وهوة دة السر الي مخلي الدول العظمي متتطورة والصين مش عارفة تحصل تقدمها
الدول الكبيرة تنتج منتج كويس وتبيع منة فترة لغاية الصينيين لما يبداو يقلدو المنتج دة وينزلوة ارخص في الوقت دة بتكون الدول دي خدت مكاسب كفاية ومش هتدور مين الي قلد بل ستستمر في انتاج منتج احدث!
والدليل علي دة الاي بود!
اكبر سوق في الصين لسيارات الفولكس

[elassar2010]

مفيش عربية بتبان جودتها اقل من 5 : 7 سنين
وانت قبل ما بتجيب عربية انت بتجيب وسيلة نقل المهم تكون امان
شوف اختبارت السلامة الاوروبية وانت تعرف الى انت محتاجة وسيبك من كلام الناس لانة لا بيودى ولا بيجيب لف المنتدى من اولة لاخرة هاتلاقى فية عيوب وتحذيرات من المرسيدس لحد الموتوسيكل الصينى ...يعنى كلة فية عيوب بس عيب عن عيب يفرق

+999999999999999999999

[M.Osman]

الصين معروفة بقلة جودة منتجاتها و العمر القليل .... و التالي السعر الرخيص اللي الناس بتدور عليه

انا مقاطعهم و عمري ما هشجع صناعتهم و الحمد لله قدرت اني اقنع كل اللي اعرفهم انهم يبعدوا عن شراء منتجاتهم و الإتجاه لعربيات تانية غير-صيني في نفس الفئة السعرية

و مازلت مستغر الناس لية بتشتري صيني طالما فيه زيها في نفس الفئة السعرية ... ؟؟؟؟

يمكن الحالة الوحيدة المتميزة هي التيجو ... بس برضه مش مبرر اسيب عربيات كوري و ياباني عشان اركب عربية 1600 suv !!!!!!

"وجهة نظر شخصية متحجرة"

[د.محمود صلاح]

دكتور محمود هو انت ليه جبتها من الاساس مع ان سوء التقفيل دة باين من وهية فى المعرض انا كنت باشوفها فى الشارع تحس انها مش راكبة على بعض وتلاقى الصاج مفارق فى حتت بتاع 1 سم...يعنى الحسبة فى دماغك لما اشتريها كانت ازاي ياريت توضح عشان نستفيد؟

الكلام ده كان في 6 - 2006 الوضع كان ازاي ؟

كنت عايز 1600 بها جميع الكماليات وفي حدود ال 70 الف فقط
ماكنش فيه الا الفيرنا 1500 او الشاهين 1600 في التوقيت ده واللانوس الكاملة كانت بالحجز ولفيت على المعارض على واحدة كاملة ما لقيتش حتى عند ابو غالي
وكان الجيلي والشيري لسه جداد في السوق
ذهبت جربت الشيري جوه معرض الفرسان ما عجبنيش صوتها من داخل الكابينة
ذهبت للشاهين عند شيرين كار الراجل صاحب المعرض كان بيبيعهالي وهو مكسوف وقال لي بالحرف الواحد بعد ما خلصت وقررت اني اشتريها " تعالى لي بكرة نمر على المصنع نربطها شوية " !!! روحت خالع منه يا فكيييييك

اعلانات الجيلي كانت بالهبل في الجرايد

ذهبت للمصرية قال لي ب 66 ذهبت للتوكيل كان عامل عرض ب 63900 ج
زي الأعمى خلصت فيها بدون مخ من زهقي وكثرة لفلفتي على المعارض