مش ممكن كل الكمية دى من الحوادث

[mshaheen1]

أرجو منكم إلقاء نظرة على صفحة الحوادث بجريدة الاهرام

الصفحة تقريبا 75% من الحوادث اللى فيها حوادث سيارات

عناوين الأخبار كالتالى

مصرع 8 أشخاص وإصابة 8 اخرين فى حادث تصادم مروع بطريق القطامية

9 أشخاص يلقون مصرعهم فى حادث تصادم بين مقطورة وميكروباص بالبحيرة

سائق يلقى مصرعه وإصابة 12 فى تصادم بالمنيا

توك توك يقوده طفل يتسبب فى مصرع 3 أشخاص بالتل الكبير

ياجماعة الرجاء توخى الحذر مالهاش لازمة نجرى ومافيش حد ضامن الطريق .....ممكن فى لحظة لاقدر الله

يقابلك واحد ماشى فى نهر الطريق ...عربية كارو ماشية بعرض الشارع .......عيل سايق توك توك

سواق مقطورة متهور ......او سائق ميكروباص سابق .....حالياد سائق محترف بالفورميلا وان خط السلام - السيدة عائشة ....ولا واحد ضرب فرامل مرة واحدة علشات يتفرج على حادثة

بجد القيادة فى مصر بقت من أخطر مايمكن بسبب حالاة التسيب والامبالاة والاهمال بداية من النظام المرورى ونهاية بالثقافة المرورية للسائقين

ربنا يحفظنا ويحفظكم جميعا من كل مكروه

[M.Mosaad]

عدد اللي بيموتوا يوميا في مصر نتيجه حوادث الطرق اكتر من عدد اللي بيموتوا في العراق برصاص الامريكان و عدد الفلسطينيين اللي بيموتوا برصاص الاسرائيليين

عدد رهيب فعلا كتير اوي

لو حرب مش هيموت الناس دي كلها

و كل حادثة اكتر من التانيه تحس ان في تنافس مصرع 8 و بعدين مصرع 10 و شوية مصرع 15 اعداد رهيبه و كل واحد منهم عنده اسرة و بيت و عيله

ربنا يستر طريقنا

فعلا السرعه و لا ليها اي لازمه و الكسر علي الغير و السير عكس الاتجاه كل الكوارث دي من وراهم لما بشوف حد ماشي عكس الاتجاة ببقي نفسي اتف في وشة

[Samir Elshahawy]

و ليه جرايد , لو حضرتك بتسافر كل يوم زي حالاتي كده هاتشوف مالايقل عن 3 أو 4 حوادث في كل مرة و كلها بسبب الاهمال و الرعونة في القيادة

[د.محمود صلاح]

مصر الأكثر عالميا الآن في وفيات الحوادث , اللهم احفظنا جميعاً .

وبالطبع السبب في عوامل مشتركة

[tamertamer]

رقم واحد هى السعودية حسب ما نشر فى الجرائد العالمية وتاتى مصر ثالثا

[Mohamed.Raafat]

رقم واحد هى السعودية حسب ما نشر فى الجرائد العالمية وتاتى مصر ثالثا

برضه مركزنا سيء جدا
نفسي الناس تبطل فهلوة و تسوق باحترام

[kemoelord]

ازاي يا بيه بس الارقام دي اشاعه وليست حقيقه ده قانون المرور الجديد اعاد النظام والانضباط الى الشوارع المصريه والكل بقى ملتزم والطرق بقت على اعلى مستوى من الامان والجوده والتخطيط حتى السيارات بقت مطابقه لوسائل الامان ... والله انا مش فاهم هم الشرطة ولا المرور هل بيبقى ليهم وظيفه غير ان يحرصوا على انضباط الطرق ومراقبه الشوارع من المتهورين والمخالفين وفرض العقوبات عليهم , يعني هما مثلا بيشتغلوا دكاتره ولا مهندسين ولا اي حاجة تانيه ومش عندهم وقت لاداء وظيفتهم ومهامهم الفعليه !!!!!!!!!!!!!!!! ربنا يستر طريقنا واخرجنا منها سالمين يا رررررررررررررررررررررب

[Abo_Lina]

لأ كله كوم و حادثة سواق الأوتوبيس اللي ضرب الناس بالنار النهارده كوم
احنا بقينا في شيكاجو يا جدعان

[pharonicking]

ربنا يسترها علينا

[devilishtigers]

ازاي يا بيه بس الارقام دي اشاعه وليست حقيقه ده قانون المرور الجديد اعاد النظام والانضباط الى الشوارع المصريه والكل بقى ملتزم والطرق بقت على اعلى مستوى من الامان والجوده والتخطيط حتى السيارات بقت مطابقه لوسائل الامان ...

[icehearted girl]

النهاردة يوم غريب اتنين من زمايل والدتيي في الشغل عربياتهم اتقلبت بيهم واتوفوا

وخالتي النهاردة فطريق مطروح العربيية دخلت منها فلصحرا ولبسست فعمود نور جاب الكبوت نصين

[Miss_Pharma]

لا حول ولا قوة الا بالله ..
ربنا يستر علينا جميعا ..
السواقة ملهاش كبير .. والطريق خاين ..
ربنا يستر

[omaroof]

ده عشان مصر محسوده عشان الطرق الدوليه اللى عندنا والشوارع مافيهاش اى عوائق وده بيخلى السائقين بيقودو بتهور
ارحمنا يارب

[omar-saad]

يا جماعة كل دة تخفيف من الزيادة السكانية اللى عندنا

[M.Osman]

انا متأكد ان 90% من اسباب الحوادث غباء بشري
10% بس سوء تخطيط طرق