بلطجة الشوارع .. لحد أمتي ؟؟

[ashouhdy]

- طيب ... أيه رأيكوا في الباركينج الموجود بين كل مجموعة عمارات بمدينة الرحاب ؟؟
- هل معني كده أن الباركينج ده مخصص لسكان العمارات دي فقط و لو ضيف جه يزور حد من السكان يسيب عربيته في الشارع بره الرحاب ؟؟
- لكن اللي بيحصل عكس كده تماما ... ساعات و الله بأرجع بالليل مالاقيش مكان أركن فيه في الباركينج الواسع اللي عندنا و معظمها بيكون عربيات غريبة عن المكان خاصة يومي الخميس و الجمعة كل اللي بأعمله اني بأدور علي باركينج تاني قريب و فيه اماكن فاضية بهدوء و من غير مشاكل لأن رغم كده الباركينج ده مش من حقي لوحدي ده ملكية عامة

- أمتي يكون المكان اللي بأركن فيه من حقي أنا بس ؟؟
لما اكون دافع ثمنه أو بأدفع أيجار شهري عنه للجهاز ساعتها يحق لي أعمل فيه مابدا لي لكن اني أحتل جزء من الشارع أو مكان أنتظار بدون وجه حق الهم ألا أني ساكن في المكان ده فدي تبقي بلطجة و شغل عافية و عدم أحترام لباقي الناس اللي في المكان و عدم مراعاة لحقوق الجيرة

- علي فكرة ... اللي أنا عملته امبارح سمع و حصل كلام اخر النهار بين سكان الفيلات و البوابين و رجال الامن و يبدو علي ماسمعت برضه أن فيه حد من مديرية الامن جه و تحري الامر و لسه ....
بصراحة أنا خلاص طفح بي الكيل و ناوي أصعد الموضوع ده مش بس للداخلية لأ لوسائل الاعلام كمان

مش لازم نسكت علي أي حاجة غلط نشوفها و لازم يكون فيه عندنا أيجابية و مانرميش كل اللوم علي الداخلية أو المرور أنهم مش شايفين شغلهم , أحنا كده هانشغلهم

مع خالص تحياتي
م/ سمير الشهاوي

لما باجى أختار المحافظة مش بيحصل حاجة اتصرف اذاى

[MMamdouh]

طب انا عندى جراج خاص وليه مدخل خاص

مش من حق حد يسد المدخل بتاعك

MMamdouh

[D . a .\ AYMAN]

قانونا الرصيف ده ملك ليه أساسا

ياجماعة القانون مش بالمزاج ... القانون واضح ومش محتاج جدال .. بصراحة كل المناقشات دي القانون حاسمها تماما ... الرصيف ونهر الطريق ملكية عامة وليس لأحد إحتكار جزء منه لنفسه وحرمان الآخرين منه (ده عدم وجود جراج ليك داخل فيلتك مخالفة أساسا

الفيلا الموجودة في منطقة سكنية صرفة بيبقى ليها وضع فعلى خاص شوية لأن أصلا نادرا ما هاتلاقي حد ييجي يركن قدام بيتك لأن المنطقة السكنية بتكون كلها عارفة بعض ومش هاتلاقي حد بييجي يركن قدام حد عشان الكثافة قليلة أصلا ودا حاصل حاليا في مناطق زي القاهرة الجديدة مثلا .. لكن تعالى شوف مصر الجديدة اللى كانت كلها زمان فلل خاصة ومحدش بيركن قدام .. دلوقتي حتى لو هاركن قدام قيلا خاصة ماحدش بيجرؤ يقوللي حاجة المهم بس ماسدش المدخل والمخرج بتاعه

زائد إن القانون أوجب على كل عمارة أو فيلا خاصة وجود جراج بها لكن بطبيعة الحال الشعب المصري مش بيحب ينفذ القانون .. وهو ده مضع الشعب وهو معجب بنفسه كده

عارفين إيه اللى بيحصل في القاهرة الجديدة .. ييجي صاحب الأرض يبني فيلا من الخارج وشقق من الداخل ويخلص تشطيباته ويسيب الجراج عشان مش هايقدر ياخد أوراق ملكية الأرض من الجهاز من غير الجراج وبعد ما ياخد أوراق مليكيته للأرض يقوم مكسر الكلام ده كله ويضم الجراج للدور الأرضي ويبيعه على إنه فيلا خاصة لوحده والأدوار اللى فوق شقق لوحدها ... كل ده طمع في مليون جنيه زيادة .. كده الجراج بخ مابقاش موجود وسكان الفيلا دي بقى يركنوا في الشارع قدام الفلل التانية .. المشكلة إن كل الفلل التانية نفس الوضع يبقى السكان كلها مش هاتلاقي مكان تركن فيه

العيب الأساسي بقى على
الراجل اللى قبل يشتري شقة في الفيلا دي وذنبه على جنبه لأنه هوة اللى قبل يشتري في مكان بدون جراج والراجل ده هو الشعب وبعدين ييجي يشتكي إنه مش لاقي مكان يركن فيه والبلد والحكومة ولاد الـ ....... مش موفرين أماكن !!!!! نروح نشتري شقق في عمارات 30 دور من غير مانسأل هانركن عربياتنا فين هل ده كلام

أنا اللى أعرفه إني ماشتريش أبدا حاجة مش عاجباني مهما كان السعر مغري ومهما كنت هالف وأدور تاني لغاية ما ألاقي اللى عاجبني

(بالضبط زي اللى بيبني على الأرض الزراعية وبعدين يقول هو الأكل غالي ليه وليه بقينا بنستورد أكلنا كله ... أنا شفت بعيني الشجر والمحاصيل اللى كانت مكفية أسر عمرها ما راحت إشترت أكل من السوق وهية بتختفي بإيد الأسر دي نفسها تحت العمارات اللى بنوها لنفسهم وباعوها طمعا في مسكن رخيص أو مكسب من البيع .. وفي الآخر بقوا يروحوا يشتروا الخضار من السوق ومتضايقين إن الأكل غالي ... !!!)

ييجي الجهاز بقى يعمل إيه مع الناس دي .. كل اللى يقدر يعمله إنه بيعمل محضر مخالفة وبيتحول على النيابة وبياخد غرامة أو حبس .. (وعمري ماشفت الحبس بيطبق على حد) وخلاص كده خلصت الحدوتة

و بما ان المشكلة فى قلة الاماكن يبقى مينفعش كل واحد يبقى راكن قدام شغلة و حاجز مكان ركنة تحت بيتة و مكان عند حماتة و مكان عند اصحابة و مكان قدام القهوة بتاعتة... اللى يلاقى حتة فاضية يركن فيها

mmamdouh

يعني هوة يبقى حاجز 5 أماكن وسايبهم فاضيين وغيره مش لاقي خرم إبرة .. هلى ده عدل ؟ .... ماهو غيره ده أخوه برضه ومواطن زيه ..

[ashouhdy]

يا جماعة لما بختار المحافظة فى موقع الداخلبة دة مش بيجيلى حاجة حلها اية ؟؟؟؟

[MMamdouh]

يعني هوة يبقى حاجز 5 أماكن وسايبهم فاضيين وغيره مش لاقي خرم إبرة .. هلى ده عدل ؟ .... ماهو غيره ده أخوه برضه ومواطن زيه ..

مهو انا قصدى كدة

MMamdouh

[hossaam]

نروح نشتري شقق في عمارات 30 دور من غير مانسأل هانركن عربياتنا فين هل ده كلام

حضرتك كلامك مضبوط جدااا

والله انا اضطرت ظروف شغلي ان انتقل مؤقتا لاسكندرية

ولما حبيت ااجر شقة...كان شغلي الشاغل الاقي حاجة يتوفر فيها الجراج او على الاقل في مكان مفتوح يتوفر فيه باركنج
بس للاسف كان الموضوع صعب جدا..وكان كل اللي اكلمه على شقة سواء معرفة او سمسار وأاكد عليه ان مكان الركن هو الاولوية عندي..كان يستغرب جدا وشايف ان الموضوع ده ثانوي..بمبدأ يا عم اسكن انت بس والركنة ربك يسهلها؟؟؟
يا ناس هو بالعافية؟!!


على فكرة الطلب بتاعي ده كلفني شهور بحث وتدوير لغاية مالقيت المكان المناسب..بس للاسف كان على حساب المسافة لشغلي..بس كله يهون قدام اني ابقى راجع بيتي مش شايل هم هبيت العربية فيين؟

[ashouhdy]

عرفت الحل استخدم ال انترنت اكسبلورر موقع الداخلية مش بيشتغل مع الفاير فوكس

[kh_talaat]

عرفت الحل استخدم ال انترنت اكسبلورر موقع الداخلية مش بيشتغل مع الفاير فوكس

ياه ...هو انت كنت بتستخدم فايرفوكس

نصيحة متستخدمش الفاير فوكس مع المواقع الخدمية ابدا زي المواقع الحكومية ومواقع البنوك وخلافه

هما دايما بيبقوا مظبطين الموقع على انترنت اكسبلورر بس

[D . a .\ AYMAN]

بمناسبة الموضوع ده

لو حد شاف فيلم Mr. & Mrs. SMITH في اللقطة اللى كانوا فيها كل واحد واخد عربية وعايز يلحق يدخل البيت قبل التاني أول ما إكتشفوا الحقيقة .. هية سبقته الأول وهوة عشان يسبقها تاني ساب العربية على الرصيف قدام باب الجراج بتاعه اللى ملكه وحقه بعرف المصريين .. قبل مايدخل راح جاي جاره مستنكر الجريمة اللى عملها بن أفليك إزاي يسيب العربية على الرصيف كده ... برغم إنها فيلا خاصة وبرغم إن الجراج بتاعه وملكه ومن حر ماله وبرغم إنه ساب العربية قدام مدخل جراجه هو مش قدام الفيلا بتاعة جاره مثلا

لكن هو كده ده الصح الرصيف والطريق ملكية عامة في كل الدنيا ما عدا مصر .. لو حد ركن قدام بيتك حتى لو 5 دقايق يبقى قليل الذوق ولو حد ركن قدام المحل بتاعك يبقى خلاص قطع عيشك

[yascro]

بمناسبة الموضوع ده

لو حد شاف فيلم mr. & mrs. Smith في اللقطة اللى كانوا فيها كل واحد واخد عربية وعايز يلحق يدخل البيت قبل التاني أول ما إكتشفوا الحقيقة .. هية سبقته الأول وهوة عشان يسبقها تاني ساب العربية على الرصيف قدام باب الجراج بتاعه اللى ملكه وحقه بعرف المصريين .. قبل مايدخل راح جاي جاره مستنكر الجريمة اللى عملها بن أفليك إزاي يسيب العربية على الرصيف كده ... برغم إنها فيلا خاصة وبرغم إن الجراج بتاعه وملكه ومن حر ماله وبرغم إنه ساب العربية قدام مدخل جراجه هو مش قدام الفيلا بتاعة جاره مثلا

لكن هو كده ده الصح الرصيف والطريق ملكية عامة في كل الدنيا ما عدا مصر .. لو حد ركن قدام بيتك حتى لو 5 دقايق يبقى قليل الذوق ولو حد ركن قدام المحل بتاعك يبقى خلاص قطع عيشك

كده الناس تفكر كده الناس تعيش
هو البطل اللى كان مع انجلينا 0000
براد بيت؟؟؟؟؟؟؟؟؟؟؟؟؟؟؟؟
صح
مش بن افليك

[sara2001]

بس مش كل الناس عندها رفاهية اختيار السكن مع إشتراط وجود الجراج
حتى العمارات اللي فيها جراج بيكون صغير جدا ولا يكفي عدد السكان
واغلب اصحاب العمارات الموجود بها جراجات سواء عمارات سكنيه او إداريه بيتحجز
الجزء الأكبر في الجراج للمالك وبعد كده السكان لو في مكان

اللي مستفز فعلاً هو اللي بيشتري او يبني فيلا من غير ما يكون فيها جراج يكفي عربيتين على الأقل

وعلشان المنظومه كلها خطأ مفيش حد من حقه يحجز مكان في الشارع حتى امام مداخل العمارات او الفيلات إلا إذا كان امام فتحة الجراج الخاص به

[Dr_Mido]

لهو محدش قلكم ان الحكومه نفسها بتبلطج فى الركن


لو فى حد بيروح منطقه كوبرى القبه الشارع اللى مابين محطه كوبرى القبه و محطه حمامات القبه من جوة الحى جه قفله باقماع و اقفال و بقى بفلوس وكان فى خناقات بين سكان الابراج لان المنطقه دى كلها ابراج لدرجه ان كان فى ضرب وجنان بيحصل توقعو كدة قريب فى اماكن تانيه

[D . a .\ AYMAN]

كده الناس تفكر كده الناس تعيش
هو البطل اللى كان مع انجلينا 0000
براد بيت؟؟؟؟؟؟؟؟؟؟؟؟؟؟؟؟
صح
مش بن افليك

براد بيت ... خطأ مطبعي ... عذرا

[D . a .\ AYMAN]

بس مش كل الناس عندها رفاهية اختيار السكن مع إشتراط وجود الجراج
حتى العمارات اللي فيها جراج بيكون صغير جدا ولا يكفي عدد السكان
واغلب اصحاب العمارات الموجود بها جراجات سواء عمارات سكنيه او إداريه بيتحجز
الجزء الأكبر في الجراج للمالك وبعد كده السكان لو في مكان

اللي مستفز فعلاً هو اللي بيشتري او يبني فيلا من غير ما يكون فيها جراج يكفي عربيتين على الأقل

وعلشان المنظومه كلها خطأ مفيش حد من حقه يحجز مكان في الشارع حتى امام مداخل العمارات او الفيلات إلا إذا كان امام فتحة الجراج الخاص به

كلامك مظبوط 100 %

ربنا يصلح الحال

[kh_talaat]

على فكرة انا سمعت انك ممكن تأجر من الحي مكان لعربيتك في الشارع وساعتها تقدر تقفله بجنزير مقابل ايجار شهري للحي .... حد عندة فكرة عن الكلام دة ؟؟