هي خبطة العربية دي حاجة عادية؟

[OlaOsman]

مش عارفة ليه لاحظت ان في المنتدى هنا الناس بتتكلم عن عربياتها اللي اتخبطت بطريقة عادية خااااااااالص كإنه daily routine و بيحكوا عن حوادث حصلت لهم وهمه ريلاكسد خالص و مافيش اي حاجة

و من فترة بدأت ألاحظ العربيات في الشوارع لقيت ان فعلا معظم العربيات مخبوطة.. و تبص على العربية من دول تلاقيها جديدة و زي الفل انما واخدة خبطة يا اما في الاكصدام او من الجنب.. هو لازم اساسي يعني العربية تتخبط؟

طيب و اللي لما يسوق مش عايز عربيته تتخبط يعمل ايه؟

[ecybrarian]

العربيات في مصر تتخبط وهي واقفة في مكانها تحت بيتك أو عند شغلك......ربنا يهدي الناس على بعض

[m10_10]

طيب و اللي لما يسوق مش عايز عربيته تتخبط يعمل ايه؟

مايسوقش في مصر...

[thatha]

طيب و اللي لما يسوق مش عايز عربيته تتخبط يعمل ايه؟

بصي لو قلت ليكي .سيبيها مركونة في الشارع او حتى جراج برده ممكن تتخبط . فا الحل الوحيد انيك تركينيها فوق سطح بيتكوا . شوفي ماالاخر سيبيها على الله الخبط والحجات دي في مصر نصيب.

[mig44n]

الحمد لله انا لسه مخبوط امبارح من سواق ميكروباص خبطنى فى الرفرف الى وراء من جانب السواق والرفرف اطبق ودخل لجوه ونزلت اتخانقت للصبح بدون فايده وفى الاخر مشيت...........
الموقف كان كالاتى الميكروباص واقف وسادد الطريق وازمر ومفيش حد وعلى فكره الميكروباص كان واقف شمال....المهم طلعت منه يمين ورديت شمال تانى راح هو مزود معايا بنزين وخبطنى فى الرفر......

[analyzer]

فعلا حاجه عادية جدا من كتر ما اصبحت بتحصل ونشوفعا فى اليوم الواحد اكثر من مرة
وربنا يسطر طريقنا جميعا

[ahmedezzat78]

مش عارفة ليه لاحظت ان في المنتدى هنا الناس بتتكلم عن عربياتها اللي اتخبطت بطريقة عادية خااااااااالص كإنه daily routine و بيحكوا عن حوادث حصلت لهم وهمه ريلاكسد خالص و مافيش اي حاجة

و من فترة بدأت ألاحظ العربيات في الشوارع لقيت ان فعلا معظم العربيات مخبوطة.. و تبص على العربية من دول تلاقيها جديدة و زي الفل انما واخدة خبطة يا اما في الاكصدام او من الجنب.. هو لازم اساسي يعني العربية تتخبط؟

طيب و اللي لما يسوق مش عايز عربيته تتخبط يعمل ايه؟

و الله انا بحاول قدر الامكان ما انزلش القاهرة بالعربيه لان لازم يحصل حاجة ........ حكه خبطه او حد يرمى حاجة من البلكونه لكن فى شرم العربيه الحمد لله صحتها كويسه

فعلا حاجه عادية جدا من كتر ما اصبحت بتحصل ونشوفعا فى اليوم الواحد اكثر من مرة
وربنا يسطر طريقنا جميعا

حلوه اسطر دى:D:D

[memoz]

حتتخبط يعني حتتخبط متحاولش و لو متخبطش حيجي واحد ابن ..... بمسمار ولا حاجه و يرسم بيه علي العربيه و يبدع بقه ب اروع الخارابيش .
حاجه تقرفففففففففففففففف و الله

[MMamdouh]

welcome to Egypt

MMamdouh

[ahmedezzat78]

انا واحد راسملى فن تجريدى بمسمار على شنطة العربيه يوم ما اشتريتها

و خلال الاسبوع الاول اتحكت كتير قوى و هيه واقفه مكانها

مش عارف ده حقد و الا صدفه ؟؟؟ الله اعلم

[h.s.abdelhamid]

السواقة في مصر بقت قلت ادب انا غيرت عربيتي الانسر98 من شهرين و اشتريت سيات قرطبة2002ايام الانسر كانت بجري بالعربية وغرز ذي اي شاب و مش مهم حكة هنا خبطة هنا وكانت كلها بسيطة و بعد ما جبت العربية الجديدة قلت العربيات دي قطع غيارها غالية و لازم احافظ عليها وبقيت ماشي احسس عليها ومن يومين و انا واقف في اشارة سمعت صوت فرامل قوي جدا من ورايا وخبطة قوية جدا لدرجة ان العربية تحركت وخبطت في نصف نقل كانت واقفة امامي واتبهدلت العربية من الامام و الخلف نزلت اتخانقت و عملت محضر بس العربية اتبهدلت

[SEATLOVER]

-لما تلاقى وانت واقف لا بيك و لا عليك سمعت تكككككك وواحد ريح عليك
-لما تنزل الصبح و تلاقى مرايتك الشمال جنب الجنط الشمال و مكان اللى كان راكن جنبك شمال فاضى
-لما تنزل من شغلك تلاقى دعوة على قص شريط معرض رسوم الاطفال على عربيتك
-لما تمشى ورا واحد مدى اشارة يمين و فجأة يفتكر ميعاد على الشمال و يركب جنبك على الكرسى اليمين
-لما تلاقى عربية راكنة و فجأة بابها اتفتح عشان يكعبلك و انت معدى من جنبة
لما تخل شارع جانبى وتلاقى مقابل يطمنك بنظرات كلها ثقة بعدين ياخدلك جنبك الشمال سكينة .


ساعتها ماتستغربش خالص وهاتحس بقلبك وتتأكد................. انت اكيد فين ؟

[Karim_Monir]

و الله انا بحاول قدر الامكان ما انزلش القاهرة بالعربيه لان لازم يحصل حاجة ........ حكه خبطه او حد يرمى حاجة من البلكونه لكن فى شرم العربيه الحمد لله صحتها كويسه


حلوه اسطر دى:D:D

احمد باشا والله من كام شهر نزلت لقيت مرمي على العربية من قدام طوب اه والله بتاع نص طوبة كدة وسايبة اثر رائع على الكبوت من قدام في حتة ما ينفعش فيها رد عشان تحتها عضم
-----------
ع دي بقت حاجة عادية ولا تتنرفز ولا تتعصب ولا تحرق دمك
هاتتخبط هاتتخبط
زمان وانا بطلع الرخصة وكانو مشددسين قوي وكنت الوحيد من 29 واحد دخلوا ياخدو الرخصة وانا الوحيد الي خدتها ومش واسطة والله مع ان والدي كان جايبلي كارت رئيس نيابة شرق بس ولا طلعتوا
المهم بسال الظابط مدير الوحدة بتاعت شبرا انتم مشددين قوي كدة ليه قاللي ماهو لو الناس بتعرف تسوق مش هانزل من مكتبي في عز الحر او عز المطر اسلك المرور عشان البية عربيتة مش عارف يجيب ورا او الهان خبطت واحد ومصمم يعملها محضر وغيرة وغيرة
كان الكلام ده بعد بدء تطبيق قانون المرور الجديد من سنين طويلة
دلوقتي بقي
مش قادر انطقها

[memo_hefnawy]

أنا مش عايز أعلق فى الموضوع ده بس هاقولك إللى مش عايز عربيته تتخبط فى مصر يعمل إيه :)










يركبلها جناحات :) هو ده الحل الوحيد يا علا و ماتزعليش منى :) بس حتى لو عملتيه كالعادة كل مصر أول ما يشوفوكى هايقلدوكى :) و يطلعوا يزنقوا عليكى فوق :))


كان غيرك أشطر يا بنتى


أنا أتحدى إنى أنا لو عايش فى بلد تانية أنا ممكن أفضل لحد ما أموت من غير ولا خبطة فى العربية إللى أنا سايقها و أنا عارف أنا بقول إيه لكن فى مصر أنا بنزل تحت شغلى ألاقى كشاف مشروخ ولا إكصدام و رفرف محكوك كل ده بالرغم من أن عندى تحت الشغل سايس (موظف تبع الشغل مش من الشارع) + عساكر شرطة مقيمين أمن - و تحت البييت برده ...... و كل مكان لازم الواحد يلاقى واحد أو واحده بقر مابيعرفوش يسوقوا أو مفيش عندهم دم . كفاية كلام عشان هابتدى أتنرفز سيبينى ناسى أحسن :)

[ahmedsrs]

احسن حاجة الواحد ميحرقش دمه ويسيب الخبطاط والكدمات ذى مهيه وفى اعادة البيع بتكون اثبات ان العربية فبريكة