وأخرتها مع التاكســـــــــــــى !!

[AhmedGen2]

السلام عليكم

انا مش عارف اعمل ايه مع سواقين التكوسة ، كل ماركب مع واحد لازم يقولى هات جنيه / 2 جنيه زيادة ، وانا مش بعرف امشى كدة واسيبه ، يفضل ينادى عليا يا كابتن يا كابتن ويعملى فضيحة فى الشارع عشان جنيه ، وبقيت حاجة غريبة جدا دة حتى لو سكت مطلبش زيادة تلاقيه يبص فى الفلوس كدة ويتمتم ببقه متعرفش بيقول ايه ومش عاجبه حاجة ..

يعنى مثلا مشوار من ميدان صلاح الدين لجامع الفتح اديته 5 جنيه ، راح لاقيته بيقولى هات كمان 2 جنيه ، ومرة تانية راكب مع واحد من ميدان الحلمية لهليوبليس مكنش معايا فكة 20 ، فراح ادانى 15 بقوله هات كمان 2 جنيه ، قالى لا هو كدة كفاية ونفس الحوار مع سواق تاكسى تالت مشوار من هليوبليس لروكسى خد 5 جنيه ابن ال...

والله انا بقيت استخسر فيهم الفلوس واخد المشوار جرى احسنلى لغاية ماربنا يسهل واجيب العربية ... وهما كلهم بيحطوا بنزين 80 ابو ربع جنيه دة ولا معرفش كام ومش عاجبهم حاجة...

حاجة تقرف :(

انتوا ايه اللى بيحصل معاكوا احكولى ..

[Noha.M]

هههههههههههههه

لأ انا بطلته من زمان التاكسي دة من زماان الحمد لله من 6 سنين كدة دة انا لو همشي على رجلى 100 كيلووو مركبش التاكسي بس انا برضه كان بيتقالى كلمة هاتى 2 جنيه كمان يظهر دى اسطمبة التاكسيات كلها ههههههه

بس انا كان على طول بيضحك عليه دة اساسي بيستغلوا انى بنت بأة و هتكسف و كدة بس كان عندى صاحبتي بأة كانت مفترية كانت مطلعة عينهم
مرة ركبت مع واحد من عندنا في المعادى لحد جامعة القاهرة ب 7 جنيه !!! و اقل حاجة بندفعها اصلا 12 ويفضحك كمان بس هي قادرة حبتيين و مبتكسفش من الفضايح اللى في الشارع دى و قلها برضه هاتي 3 كمان قالتلو واديني القسم طيب و خدهم من هنااك:D:D قام قالها مداام مش قد ركووب التاكسي بتركبوه ليييييييييييييييييييييييه :D:D:D

[hamedo0]

دا انا كده بقي مفتري باخد تاكسي من عند الشغل في شارع بيروت في الكربه الي البيت
في خلف قسم عين شمس باديلو 5 جنيه

[fahd_628]

انا ساعات بيحصل معايا كدة بس مش بسيبة و بتخانق معاة بس انا بكون مديلة اجرتة مظبوطة لا زيادة ولا قليل و لما بتبقى الدنيا زحمة بديلو ساعات حسب المشوار يا جنية يا نص زيادة و مش بديلة مليم زيادة لأنى انا على حق و ساعات يقولة حرام عليك انا بحط بنزين 90 ( عربية لادا قديمة تمشى ب 80 تمام ) اقولة و انا مالى و بعد جدال بيمشى بجد لما باخد العربية بيبقى اريح بكتييييير اوى اوى اوى

[AhmedGen2]

انا بقيت كل ماركب تاكسى قاعد قلقان من اول الطريق لآخره هديله كام ، ولما يقف فى اشارة اقوم قايل خلاص هزودله نص جنيه او جنيه على اللى كنت هديهوله وهكذا .. موضوع كله قلق ..

طب انا مرة راكب تاكسى من جنينة مول لسيتى ستارز يعنى مفيش فردة كعب ، التاكسى شبه علبة الكبريت بالظبط انا كانت رجلى تقريبا مدلدله من الشباك ، اديته 2.5 ، لاقيته بيقولى ايه دة يا كابتن هات 5 جنيه ، والله لو كان قال هات نص جنيه .. جنييييييه ، كنت اقول ماشى لكن دة عاوز الضعف ابن ال .. ، رحت بصيتله كدة وقلتله 5 جنيه ؟ .. وفتحت الباب والله كان هيتخلع فى ايدى ورحت ماشى وسايبه ، وهو طبعا من ورا يا كابتن يا كابتن ومش معبره ، والأمن بتوع سيتى ستارز بصوا للسواق و ياللللله يا حاااااااااج اطلع ....

اتوقع إن لولا الأمن كان زمانه نزل ورايا وحدفنى بالكوريك ولا حاجة ..

[OsKaR]

عشان تعرفوا ان الصعايده في نعيم عندك في سوهاج ابعد مشوا بتلاته جنيه و في اسيوط اكبر مشوا ب 2 جنيه و سلملي عالمحروسه

[OlaOsman]

و عن التاكسي و سواقين التاكسي.. حدث و لا حرج و مغامراتي معاهم تاخد صفحات و صفحات.. بس برضه الواحد يقول اللي ليه و اللي عليه.. زي ما العيشة غليت علينا فهي برضه غليت على سواقين التاكسي.. و زي ما احنا بنشتري البيضة ب جنيه، و احنا الحمد لله نعتبر عايشين في مستوى كويس، برضه هو بيشتريها بجنيه و الله يكون في عونا جميعا. عشان كده كل كام سنة بازود العادي اللي بادفعه في التاكسي.. بس اللي احس انه طماع باديله فوق دماغه.. و دول كتير للأسف :(

المفروض بأه ان الحكومة هي اللي تتكفل بفض الاشتباك بين الراكب و سواقين التاكسي و تعمل حاجة ستاندارد.. اللي هي طبعا مش السيتي كاب.. مع انه أحيانا بيكون أرخص من التاكسي العادي، خصوصا في الطرق الواقفة و الزحمة.

ادعوا لي بأه ربنا يسهل لي شراء العربية عشان أرتاح من حسبة برمة بتاعة أجرة التاكسي دي

[Noha.M]

ادعوا لي بأه ربنا يسهل لي شراء العربية عشان أرتاح من حسبة برمة بتاعة أجرة التاكسي دي

ان شاء الله يا علا ربنا هيكرمك ان شاء الله و تجيبي السيريون اللى نفسك فيها:):)

[OlaOsman]

ان شاء الله يا علا ربنا هيكرمك ان شاء الله و تجيبي السيريون اللى نفسك فيها:):)

;) ;) ;)

متابعاني و كاشفاني انتي يا أونا ;)

[دموع الثلج]

انا عن نفسسسسسسسى ممكن اكتب مجلدات فى علاقتى مع سواقين التاكسسسى

انا هعترف بكل صراحه :o

انى بخـــــاف من سواقين التاكسسسى موت لان فيه فئه منهم قمه فى السفاله وقله الادب ممكن يزعق ويعلى صوته ومش بعيده لو رديت عليه يشتم ودول شكلهم معروف باين علي وشهم الاجرام ومينفعش اوقف ارد عليهم نهائيا
لو كان مشواره ب8 جنيه اديلوه العشره وانا عارفه مفيش حاجه اسمها باقى طبعا وبنزل المصيبه بقى واللى بيجبلى الضغط لما انت تبقى عارف قيمه المشوار وسايب له زياده من نفسك وتلاقيه يقول ايه ده مينفعش هات اثنين جنيه انا عن نفسى بدفع وامشى بدل ما اتخانق على اثنين جنيه ب مش بسامحه لانه نصب عليا طبعا
وفيه سواق تاكسى رخم هو شكله كده رخم لو قلت له مثلا المهندسين يقولى هتدفعى كم ؟

او بعد ماااركب يقولى هتدفعى كم انا هاخد عشرين جنيه انا بقوله وقف على جمب وبنزل لان الاسلوب مش محترم يمكن انا كنت هدفع له اكثر من نفسى هو بيشترط عليا ليه


صحيح الاسعار غليت ماهى علينا وعليهم هو احنا اللى غلينا الحاجه ماهو بندفع برضوه ولا الدنيا تغلى واحنا اللى ندفع للناس فرق الاسعار حاجه تقرف بصراحه

كنت فى ميدان الجيزه ورايحه لحد نص شارع الهرم عند كايرو مول لو حد يعرفه سواق التاكسى مش راضى ياخد ااقل من عشرين جنيه علما بان المشوار المفروض لو راجل هيدفع له خمسه جنيه

بالله عليك ماذا تفعل لو كنت مكانى ؟:(:(:(:(

[Noha.M]

:Dوالله العربيات سترة ليييناااا

قال و مش عاوزينا نسوووووووووووووق:D

احنا على قلبهم ان شاء الله :p:p:p

[OlaOsman]

صحيح الاسعار غليت ماهى علينا وعليهم هو احنا اللى غلينا الحاجه ماهو بندفع برضوه ولا الدنيا تغلى واحنا اللى ندفع للناس فرق الاسعار حاجه تقرف بصراحه

طيب تعرفي يا دموع اننا دلوقتي بقينا ندفع تمن زحمة الطرق؟.. لما آجي اتفق على الأجرة مع سواق تاكسي و استكتر اللي هو طالبه يقول لي الطرق كلها واقفة و انا طلعان عيني من الصبح :(

انا على اي حال بازود الأجرة لما الاقي الطرق منيلة كده كالعادة.. بس ساعات الواحد بيقع في سواقين عايزين الحرق في ميدان عام

[fady.bekatcho]

احنا عندنا فى بنى سويف
اجرة موحدة ب 2 جنية الا لو عدى بنى سويف نفسها يعنى راح المدينة الجديدة او قرية

وفى اسيوط بديلة جنية ونص ولو بعيد بديلة 2 جنية مع ان الاجرة موحدة فى اسيوط جنية وربع

بس فى مصر لما ببقى هناك علشان الكلية بيبقوا حرامية فعلا

يعنى انا كنت راكب من المترو فى المعادى لغاية العرب كان عايز ياخد 7 جنية بس على مين بقى

[ahmedsrs]

لما بركب تاكسى ببقى حامل هم لحظة الدفع وده طبعا لأن العداد محطوط زينة

[OlaOsman]

هو ممكن اللي ساكنين برة القاهرة ما يغيظوناش اكتر من كده؟