حد يساعدنى مش لاقى لوحات فى المرور

[starpro]

اشتريت سيارة ماتريكس و مش عارف ارخصها و منذ اسبوعين اذهب الى مرور فيصل و يقولوا لا يوجد لوحات ارقام رغم وجودها امامى على الارفف بالمرور ولكنها لا تخرج الا لمن عندهم وسطة فقط .
و سمعت من اشخاص اخريين انهم منتظرين منذ شهر و لا فائدة و المشكلة عامة فى معظم وحدات المرور .
يرضى مين اشتري سيارة جديدة علشان اركنها فى الشارع تتبهدل ياريت لو حد يقدر يساعدنى و اديلو اللى هو عايزه بس يجيبلى اى نمرة .

[grgabra]

أولاُ مبروك على السيارة
ثانياُ واحد صاحبى لسه مرخص صنى يوم الخميس الفات ، دفع 300.00 جنيه لأمين شرطه خرج له نمر وركبهاله بره المرور

[السيد أحمد]

اخى العزيز
انا الحمدلله لسه النهارده مرخص العربية فى مرور عين الصيرة وفعلا كان كل ما اى حد يروح عشان
النمر الموظف يقوله فوت علينا بعد 15 يوم اسال ؟
انا كنت سامع الكلام ده بس لم اصدق الا لما سمعت بصراحة كنت زعلان جدا
المهم انا مان معايا صديق بيخلصلى الاجراءات قاللى عشان ميحصلش معانا كده هندفع من 100 الى 300 جنيه للموظف عشان يدينا نمر المهم قولت ناشى المهم مجيش هنا تانى .
راح جابله شاى وانتظرنا شويه لحد ما استلمنا رخصة العربية وصاحبى قاللى طبق 100 جنيه وحطها تحت الرخصة واديهم له عملت كده ادانى النمر.
على فكرة انا مش راضى عن اللى حصل ولا عن انى بحكى ليكم ده بس للاسف لازم كنا نعمل كده احسن ما يتحرق دمى لحد ما تيجى نمر .

[starpro]

لقد فعلت كما قلتم و استلمت النمرة الحمد لله اخيرا و الشخص الى جابلى النمر لهف 300 جنية و كان مش عاجبه المبلغ.

و لا يسعنى الا ان اقول حسبى الله و نعمة الوكيل و علية العوض فى البلد دى . سرقة و نصب و فساد مافيش اى رحمة فى المرور و كأن اللى بيشترى سيارة شغال حرامى و بيغرف فلوس حاجة تقرف .
اقترح ان الامور تكون اكثر وضوحا و يكتبوا العبارات الاتية فى وحدات المرور كى نستريح من الاول.
( ان لم ترشى مصلحتك لن تمشى )
( خير الامور الوسطة )
( ان لم تغش لن تعش )
منه لله اللى فى بالى و حسبى الله و نعمة الوكيل فيه و الله ما انا مسامحه على اللى بيتعمل فينا دة بسببه ..

[hazem_khidr]

راح جابله شاى وانتظرنا شويه لحد ما استلمنا رخصة العربية وصاحبى قاللى طبق 100 جنيه وحطها تحت الرخصة واديهم له عملت كده ادانى النمر.
على فكرة انا مش راضى عن اللى حصل ولا عن انى بحكى ليكم ده بس للاسف لازم كنا نعمل كده احسن ما يتحرق دمى لحد ما تيجى نمر .

بعد اذنك يا استاذ سيد ازاي طلعتو الرخصه و بعدين اخدتم النمر؟؟؟؟؟؟؟؟
المرور مش بيطلع رخصه غير لما يبقي فيها رقم العربيه ....
و بعد ما بتستلم الرخصه بتروح تستلم اللوحات بامر صرف اللوحات و بيشوف الرخصهه في ايدك الاول.!!!!!!!!!!
يا جماعه مش كل حاجه في البلد كده
عندكو باب الشكاوي علي النت تبع السايت بتاع وزاره الداخليه و الشكاوي دي بيتحقق فيها كويس ممكن تبعتو ليهم
انما مش كل حاجه بالفلوس و لا الكلام دا
ما انا بروح مرور كتير عمري ما شفت موظف بياخد مليم

[starpro]

ما انا بروح مرور كتير عمري ما شفت موظف بياخد مليم

لو سمحت ممكن تقولى اين هى هذه المرور اللى الموظفين فيها ناس شرفاء و غير مرتشين كما تقول ؟؟؟!!!!
مع العلم انى تعرضت للعطلة كثيرا فى واحدات المرور الاتية بسبب اننى لم ارشى احد فيهم .
مرور المعادى
مرور عين الصيرة
مرور العتبة
مرور التبين
مرور فيصل
المرتشين دائما هم مهندس الفحص و موظف الشباك الذى يستلم الورق و موظف المخالفات اذا كانت المخالفات كبيرة يبدأ فى المساومة لتخفيضها .
فساد و سرقة علنى للمواطنين و هذا الكلام لا يحتاج لارسال شكاوى لانه معروف تماما و منتشر و اصبح امر طبيعى عند المسؤولين لذلك انا قلت انه من الافضل وضع اللافتات الاتية فى المرور علشان الناس تستريح و تفتح مخها من الاول بدلا من العطلة و وقف الحال
( ان لم ترشى مصلحتك لن تمشى )
( خير الامور الوســــــــــــــــطة )

[معاذ الشرباصى]

بعد اذنك يا استاذ سيد ازاي طلعتو الرخصه و بعدين اخدتم النمر؟؟؟؟؟؟؟؟
المرور مش بيطلع رخصه غير لما يبقي فيها رقم العربيه ....
و بعد ما بتستلم الرخصه بتروح تستلم اللوحات بامر صرف اللوحات و بيشوف الرخصهه في ايدك الاول.!!!!!!!!!!
يا جماعه مش كل حاجه في البلد كده
عندكو باب الشكاوي علي النت تبع السايت بتاع وزاره الداخليه و الشكاوي دي بيتحقق فيها كويس ممكن تبعتو ليهم
انما مش كل حاجه بالفلوس و لا الكلام دا
ما انا بروح مرور كتير عمري ما شفت موظف بياخد مليم

حازم باشا

الوضع هنا فى القاهرة صعب جدا جدا

لو مدفعتش, مش هيمشيلك اى طلب, و حتى لو معاك واسطة, بيغلسوا عليك بردوا

[NaderNabil]

أنا برده مش عايز اروح أرخص عشان حوار النمر ده...مع ان الرخصة هتخلص يوم الأربعاء اللي جاي...بس لو مشيت في اجراءات الترخيص هاياخدوا النمر القديمة و يقوللك مفيش نمر جديدة....طب اعمل اييييه!!!

[معاذ الشرباصى]

أنا برده مش عايز اروح أرخص عشان حوار النمر ده...مع ان الرخصة هتخلص يوم الأربعاء اللي جاي...بس لو مشيت في اجراءات الترخيص هاياخدوا النمر القديمة و يقوللك مفيش نمر جديدة....طب اعمل اييييه!!!

نادر لازك تلاقى واسطة, علشان يديك تصريح مؤقت بالنمر اللى معاك لحد اما ربنا يفرجها فى شهر 8 و عليك خير

[NaderNabil]

غالبا الموضوع هيبقي كده :(

ادعيلي بكره الدنيا تمشي كويس

[thatha]

على كدة انا حصل معايا معجزة . انا رخصت عربية 0 في 11 الي فات في مرور مصر الجديدة بالفحص وكلة خلص في 6 ساعات و اخت النمر والرخص ومشيت من غير وسطة ولا حاجة.دفعت 10 جنيه بس لواحد عشان يمضي ويمش الورق

[msalah2008]

thathaعلى كدة انا حصل معايا معجزة . انا رخصت عربية 0 في 11 الي فات في مرور مصر الجديدة بالفحص وكلة خلص في 6 ساعات و اخت النمر والرخص ومشيت من غير وسطة ولا حاجة.دفعت 10 جنيه بس لواحد عشان يمضي ويمش الورق
ده انت يا باشا تشكر ربنا وتصلى ركعتين شكر

[basha_2005]

وازودلك كمان من الشعر بيت

مرور حلوان

أمين الشرطة أرخم خلق الله

وجبت واسطة من رئيس الوحدة ( وطبعاً الواسطة نفسها درجات )

ورغم كده فضل يمطوح فيا يمين وشمال وبمنتهى الغلاسة والتعالى على البشر

وبرضه مخدتش نمر

وقالى روح قول للظابط الأمين بيقولك مفيش لوحات

مع العلم بإن اللوحات بتطلع قدامك عينى عينك بس لأصحاب الحظوة

حسبنا الله ونعم الوكيل

[Noha.M]

اه طبعا مرور المعادى زفت انتو بتتكلموو فى ايه !!!!!!!! الموضوع عندكو يا حازم

مش مميت زى عندنا كدة . المحلة برضه صغيرة

انا دخلت على مكتب النائب العام و بقو كل شوية يندهوني مثلا عشان امضي و كدة و

ارجع تانى أعد فى المكتب و شايفة الناس عمالة تزعق و تشتم و تقووول

كوووووووووووسة و بنت مييين دىىى و معرفش ايه لدرجة ان الراجل اللى كان

بيخلصلي ورقي جايبلى اللوح مخبيها فى هدومه و ركبهالى بره المرور عشان ميضربش لان الناس واقفة من 7 الصبح و هو قالى كدة بصراحة انا لولا الواسطة مكنتش رخصت فى سنتي كمان انا رايحة بواسطتين واحدة تبع الشرطة و التانية النيابة و لولا كدة كانو روحونى لانى اول ما دخلت بالعربية امين الشرطة قالى مافيش نمر يا مدااام P: قلتله افتح يابنى البوابة !!!

[معاذ الشرباصى]

وازودلك كمان من الشعر بيت

مرور حلوان

أمين الشرطة أرخم خلق الله

وجبت واسطة من رئيس الوحدة ( وطبعاً الواسطة نفسها درجات )

ورغم كده فضل يمطوح فيا يمين وشمال وبمنتهى الغلاسة والتعالى على البشر

وبرضه مخدتش نمر

وقالى روح قول للظابط الأمين بيقولك مفيش لوحات

مع العلم بإن اللوحات بتطلع قدامك عينى عينك بس لأصحاب الحظوة

حسبنا الله ونعم الوكيل

ده اسمه الامين مصطفى

ده انا هددته انى هأذيه لو متكلمش بأدب

هو كان عارف انا جاى من عند مين, فمقدرش يفتح بقه لما اتعصبت عليه

فى الاول كان بيغلس و حاجات من دى,

دخلت بعد اما زعقت له عند ايمن عبدالجبار, قالى تعالى يوم كذا ركب نمر, و قد كان