استفدت ايه ومنتظر ايه من نايل موتورز

[Samir Elshahawy]

أولا.. صباح الفل يا كريم بيه فعلا موضوع جميل و مهم و في نفس الوقت خفيف علي القلب


نيجي بقي للمهم ....

انت دخلت المنتدى ازاي

عن طريق المستشار دمث الخلق الخدوم لكل من يعرفه و لايعرفه "محمد ممدوح"
كنت علي كونتاكت كارز و بأدور علي حل لمشكلة في العربية عندي وقتها (اللانوس حبيبة قلبي) و وجدت الحل عند احد الاعضاء و لما ضغطت علي اللينك وجدت نفسي داخل منتدي أخر أسمه نايل موتورز - قسم الدايو

بعد ماخلصت غرضك الي بتدور عليه في المنتدى
ايه اللي شدك تكمل فيه
الشكل-التنظيم-الادارة وسياسة المنتدى-تعاون الاعضاء- تعمل صداقات-الخ

بعد ماخلصت الموضوع اللي انا داخل له قرأت مواضيع أخري و شاهدت ردود الاعضاء و تعاونهم فأنجذبت للمنتدي و سجلت فيه علي طول و مع الوقت أندمجت داخله

ايه اكترما يميز نايل موتورز في نظرك

- تعاون الاعضاء
- حزم الادارة و تعاونها مع الاعضاء في نفس الوقت (زي ما حضرتك بتقول يعني : الحفاظ علي شعرة معاوية)
- طبعا الصداقات دي أحلي مافي المنتدي لدرجة أن ساعات لما اكون مخنوق من الشغل و ضغط الحياة و أقابل حد من المنتدي بأنسي الدنيا و مشاغلها و مشاكلها

ايه حصيلتك الفعلية من خبرات السيارات اللي طلعت بيها من المنتدى

صحيح انا ماكنتش أبيض ياورد يعني لكن أستفدت حاجات كتير جدا علي المستوي التقني و علي المستوي الاجتماعي
- فهمت حاجات كتير في العربيات الحديثة ماكنتش أعرفها
- فهمت تكتيكات القيادة في كلا من المانيوال و الاوتوماتيك
- أكتسبت خبرة مهمة جدا في أساليب الكتابة و النشر و فهم ذوق القراء
- نتيجة الخبرات اللي أكتسبتها أستغنيت عن التوكيل و أصبحت بأقوم بصيانة سيارتي بنفسي في الفترة السابقة
- طبعا بأستغل المناسبة دي و عايز أشكر كل أعضاء المنتدي اللي تحاورت معهم و أستفدت جدا جدا من أرائهم و تشجيعهم و حتي من نقدهم أحيانا فلكم مني جميعا خالص الشكر و العرفان بالجميل

عايز اعرف كل واحد خد ايه من المنتدى وفاده في ايه
ودور على ايه(كمنتدى مصري متخصص في السيارات فقط) ولم يجده
في انتظار ارائكم وكتابتكم باستفاضة من اجل تحسين وتطوير مكانة المنتدى

زي ماقولت أستفدت كتير من المنتدي و لكن اهم ما أطلبه من المنتدي أن يكون له دور فاعل و مؤثر كأكبر منتدي للسيارات في مصر في سوق السيارات و في الشارع
بمعني ... أن اعضاء المنتدي هم من خيرة و صفوة شباب و رجال هذا المجتمع لذا يجب أن يقود المنتدي حركة التطور في مجتمع السيارات و يكون له دور أرشادي و توجيهي لسلوك قائدي و مستخدمي السيارات كي نقلل من العيوب و نعالج الامراض المزمنة التي أصابت الشارع المصري

بصراحة الموضوع يطول شرحه و لكن لأني مش عايز أطول عليكوا أكتر من كده و نظرا لأني في الشغل و مخنوق جدا
فسوف أكتفي بهذا الرد حاليا و أن شاء الله لنا تكملة لما البال يكون رايق

مع خالص تحياتي
م/ سمير الشهاوي

[Esam Mosaad]

والله فعلا لولا المنتدى كان زمانى معرفش اى حاجه
واضحك عليه كتير وماختش خبره فى مجال العربيات
او حتى معرفتى بناس زى العسل وحجات تانيه كتير

وفعلا نايل موتورز اعتبرتوا كمدرسه ومرحله تعليميه لانى فعلا اتعلمت منوا كتير
ويستاهل فعلا يبقى احسن منتدى فى الشرق الاوسط

لو منتظر حاجه يعنى يوزعوا عربيات ببلاش او اكون واقعى
ان فعلا يفضل ديما فى التميز ده والى الامام دائما بأذن الله

[otefa]

كنت بدور عن معلومة عن جمارك الدراجات النارية وأسعارهم في مصر
أتشديت للموقع جامد سواء سيارات أو دراجات نارية
فنيا وميكانيكيا وكهربائيا الحمد لله أقدر أقول وأعوذ بالله من كلمة أنا عندي خبرة أكتر من 15 سنة في السيارات سواء عملية أو من المنتديات الأجنبية المتخصصة في المجال وبأحاول أفيد بالي ربنا يقدرني عليه.
ومؤخرا لقيت الأجتماعي من الأقسام المفيدة جدا لتبادل الأراء والمعلومات والخبرات الشخصية بمختلف شؤن الحياة.
تحياتي كريم باشا ولكل أعضاء المنتدي والي الأمام دائما

[heshamzaky]

انا عرفت المنتدى بالصدفة البحتة كنت بتكلم عن العربيات مع زميل ليا فى الشغل فقالى بص فية موقع للسيارات حلو اوى و هو شخصيا مش مشترك فية فدخلت على المنتدى و دة كان أول الخيط و طبعا فاتحة خير بالنسبة لى انا شخصيا لانى لما كنت بتكلم عن العربيات او التمبرا تحديدا كان عدد معارفى الى معاهم التمبرا محدود نسبيا و لما دخلت المنتدى قعدت ادور بأبرة عن كل كلمة تخص الفيات تمبرا و طبعا السؤال الى بتقولة لما خلصت غرضك اية الى شدك للمنتدى بص المنتدى غرضى منة لم ينتهى لانة متجدد بأستمرار و اصبح مثل الكيف الى صعب جدا جدا تتوقف عنة و اصبح بيجرى فى دمك بجد و الله مش مجاملة دة حقيقى و اصبح المنتدى صديق عزيز على قلبك بنفتحة من الشغل و من البيت كل وقت و كل شوية و بمرور الوقت تعرفت على ناس زى الفلو مهما كان عندك معلومات لقيت معلومة جديدة برضو ما كنتش تعرفه و اصبح عالم السيارات خريطة مقرؤة بالنسة لك نسبيا يعنى مثلا ممكن اكون بشترى قطع غيار من محل واحد و معرفش غيرة من الاعضاء عرفت تشكيلة متنوعة و كبيرة جدا و بمرور الوقت تعرفت على أصدقاء و اصبحنا أخوة و العلاقة الطيبة تجمعنا و تخطت المعرفة العادية و أصبحنا مثل اسرة تانية و عالم جديد و لو سألت عن معلومة ببتشوف اجابات متعددة و من وجهات نظر مختلفة و كثيرة و بتنتقى منهم الافضل و الاحسن يعنى مكسب معنوى كبير كبير جدا جدا جدا و ايقاع المنتدى جميل جدا و ماشى بمنتهى الجمال و بة اقسام متعددة يعنى مش عربيات و بس لا و اجتماعى و استشارات طبية و عيادات و استشارات قانونية و بجد حاجة مشرفة و ربنا يوفقك و مقابلات جماعية و علاقات عامة و أعلاانات مفيدة انا مثلا من خلال المنتدى قمت برش العربية الخاصة ب أخى من خلال المنتدى عند العقيد خالد و تعرفت على اشكال فرش جديد و حاجات كتيرة جدا من خلال الاعلانات و لو انا شخصيا ما اشترتش من عندهم لما حد بيسألتى بقولة على الاماكن دى ودة لما بشوف الناس بتشكر فى هذا المكان . من الاخر المنتدى دة بجد كان أحلى صدفة عرفتها من زميل ليا ولم اكن اعرفة من قبل

[mesaharaty]

أنا عرفت المنتدى من جوجل لما كنت عاوز أتعرف على دنيا السيارات وكنت لسه صفر فى كل حاجة
نايل موتورز جذبنى جدا لدرجة إنى مابقتش أعرف أعدى يوم إلا لما أدخل عليه . بعد كده أصبح بالنسبة لى - وبدون مبالغة - طقس يومى أو حاجة كده كالماء والهواء
شدنى فيه التنظيم-الادارة وسياسة المنتدى-تعاون الاعضاء
اكترما يميز نايل موتورز في نظرى التعاون-المحبة -الادارة-تنظيم المحتوى-جودة المحتوى-تجارب الاعضاء الفعلية
نايل موتورز تقدر تقول عليه كده مرجع عظيم ومهم بالنسبة لكل من له علاقة بالسيارات سواء مالكين أو مهتمين أو حتى فنيين .
نايل موتورز بصراحة حاجة كبيرة جدا وخطيرة فى عالم السيارات للمبتدىء والخبير لأن الإتنين بيتقابلوا على ساحة نايل موتورز وبتكون إستفادة كبيرة للأطراف كلها .
المنتدى أنا استفدت منه بحاجات كتيرة جدا لكن فيه حاجات ماعرفتش أستفيد منها زى ( موضوع طلبت فيه نعمل قاعدة بيانات لمراكز الإصلاح الشاملة مش الورش الفردية ) لكن لم أجد صدى له مع إنه اعتفد إنه موضوع مهم لنسبة كبيرة من الأعضاء

عامة لوبالنسبة المئوية أعطى نايل موتورز تقييم 99 % وأنا راضى جدا جدا جدا عنه
فللأمام وألف شكر

[kdosoki]

ربنا يكرمك يا كريم
ايه الشغل الجامد ده
انا عرفت المنتدى عن طريق سرش على النت
وانا من المهتمين بالسيارات وجذبنى ليه واستمريت فى الدخول علشان رابطة التمبرا بصراحة انا بحس انى وسط اخواتى لما بنتكلم مع بعض
وكمان لما بنتقابل
انا نفسى انك تدعوا مسؤلين من التوكيلات اللى ليها ماركيت شير كبير وتبتدى تعمل معاهم ضغط فى صالح المستهلكين
ايه الكلام ده ........؟
لأ بص يا كريم انت عارف فكرة جمعية حماية المستهلك والجمعيات الغير حكومية التى تبحث حقوق المستهلك
اقتراحى ان نايل موتوز تاخد على عاتقها هذا الموضوع
ويصب فى صالح المستهلك المصرى مش بس اعضاء المنتدى
واحنا عددنا كبير جدا ولو حبينا نكون جمعية تنادى بحقوق ملاك السيارات محدش هيعترض
ويبقى لينا وجاهة قانونية
وربنا يوسع على الجميع
مع تحياتى ودعواتى بالتقدم دائما

[JUVENTUS]

اولا طبعا انا عايز اوجه الشكر للاستاذ كريم منير و القائمين على هذا المنتدى الرائع
انا طبعا هبتدي اتكلم عن النقط المذكورة نقطة نقط
اولا : عرفت المنتدى ازاي
عرفته من خلال البحث على النت لاني كنت عاوز اسأل على حاجات في عربيتي الفيات تمبرا و بدات ابحث في النت و طلعلي في احد الصفحات من البحث موقع نايل موتورز فقررت اني اشترك عشان ابدأ اتفاعل مع ملاك العربية في المنتدى و احل بعض مشاكل العربية و بجد فعلا بدون مبالغة كتير جدا بتبقى ارائهم اصح من اراء الميكانيكية
ثانيا : ايه اللي شدني و خلاني اكمل
طبعا بعد ما اتعرفت على الناس المحترمة اوي اوي اوي في الرابطة بتاعت التمبرا حبيت اني اكون معاهم دايما و اني اشاركهم في كل حاجة حتى لو مكنش عندي مشاكل بس لازم دايما ابقى معاهم و ده كان اهم سبب للاستمرار
لكن كان فيه اسباب تانية طبعا زي
تنظيم المنتدى
تعدد الاقسام الخاصة به
زادت جدا معرفتي بعالم السيارات على كل المستويات
حبي الشديد لمجال السيارات
ثالثا : اكتر ما يميز المنتدى
التعاون و المحبة بين الاعضاء و السعي في المساعدة و بدون اي مصالح شخصية
التنظيم على كل المستويات
تبادل الخبرات بين الاعضاء حتى في المشاكل الاجتماعية
رابعا : انا اخدت ايه من المنتدى ده
احب اقول في الاول اني بالفعل اشتركت في منتديات اخرى في الاول و لكن بدون ذكر اسماء كنت بعاني من قلة التفاعل و منت بعرض مشكلتي و انتظر بالاسبوع عشان الاقي رد و لو جه كمان لمن نايل موتور بسم الله ما شاء الله حاجة تانية في الجزئية دي و انا في الاول قلت ان ده اهم سبب خلاني استمر
بالنسبة بقا لخبرتي من المنتدى
انا هتكلم مثلا عن عربيتي اللي مكنتش اعرف عنها غير معلومات قليلة اصبحت دلوقتي اعرف عنها حاجات كتيرة جدا و بشكر تاني كل اعضاء رابطة التمبرا انهم ادوني الفرصة دي و مبيبخلوش على اي حد بأي حاجة و مجهودهم مدعم بالصور و الشرح الوافي و انا لو كنت اخدت كورسات عند ميكانيكي مكنت هعرف كل المعلومات اللي عرفتها دي و كمان الناس دي ساهمو معايا في قرارات مهمة تخص العربية و الموضوع كمان وصل الى اني كنت بتصل بيهم عل هواتفهم و استشيرهم في بعض الامور و الله اعلم من غيرهم كان العربية حالها ايه دلوقتي و انا كمان بشاركهم على قد ما اقدر حسب معلوماتي
طبعا انا متأكد ان كل الروابط بالذات و كمان الاعضاء متعاونين جدا في كل الاقسام مش بس رابطة التمبرا و انا جربت ده لاني ساعات بسأل على حاجات لناس صحابي
على مستوى الخبرات عامة انا فعلا استفدت جدا و عرفت حاجات كتير اوي في المجال ده عن كل من
المحركات و التكنولوجيا الخاصة ببعضها ودي من الحاجات اللي بحبها اوي
معلومات عن سيارات عديدة تشمل ادق التفاصيل
اماكن محلات قطع غيار و فرش و غيره

و في نهاية مشاركتي بتمني التقدم و الرقي لاقوى منتدى مصري بدون مجاملة
و احب اني اوجه الشكر للناس دول
karim_monir
heshamzaky
caysersosaih
galilio_mad
Bonanza
kdosoki
zago
eng_tefa
ZALABANY
adelco
aliit
amrseba
hany121
kohana
mikology
mlav_cbr
yoyomano
reemnabel
و لو نسيت حد يا ريت يسامحني بقا ههههههههههه
مع تحياتي احمد سعيد

[kohana]

انا اولا عرفت المنتدى ده عن جوجل صديق لما فكرت انى عايز اشترى سياره دخلت ولقيت مقارنات وكل حاجه بالفعل عملت اكونت وبدأت الف ع جميع الاقسام وخصوصا قسم المقارنات لاجد ضالتى فاعجبت بالتمبرا والشرح الكافى الوافى لكل شيئ يخصها وحبيتها جدا من خلال مقتنيها ووصفهم ليها هو اللى شجعنى وحببنى فيها
ثم بعد ذللك شدنى التعاون الجميل الذى يوجد بين الاعضاء وان كل واحد ممكن يخدم التانى دون مقابل اى دون تبادل مصلحه كما هو شائع ف مجتمعنا الان
والترابط وكانى حاسس انى وسط عائلتى تمام والاحترام المتبادل والنظام والاداره الحاكمه والقادره ع الحفاظ على هذه المؤسسه لكى تكون ف المقدمه لان النظام هو اساس نجاح اى شئ وهذا هو مارايته هنا فى المنتدى

طبعا انا كنت داخل المنتدى ومعلوماتى عن السيارات قليله جدا ولكن بعد دخولى هنا تعرفت على كثير من المعلومات والاسرار والخبايا عن معظم السيارات وهذا ف حد ذاته شىء كويس جدا طبعا غير تجارب الاعضاء والمناقشات التى استفد منها كثير

[Amr Mohamed]

السلام عليكم ورحمه الله
الموضوع باختصار عن المنتدى وعنك انت شخصيا
انت دخلت المنتدى ازاي
وصلت ليه ازاي
بحث-صديق-اعلان-الخ الخ
بالصدفه البحته كنت بلعب كده ومن حبى للعربيات لقيته وتقريبا كان جوجل وقعدت فترة مش مسجل بع كده بقى لازم تسجل عشان تقرى المواضيع
بعد ماخلصت غرضك الي بتدور عليه في المنتدى
ايه اللي شدك تكمل فيه
الشكل-التنظيم-الادارة وسياسة المنتدى-تعاون الاعضاء- تعمل صداقات-الخ
كل حاجه فل اوى بس فى حاجات بتضايق ان الناس بتحب تسخن بسرعه وهاتك يا طحن فى بعض ههههههه
ايه اكترما يميز نايل موتورز في نظرك

التعاون-المحبة -المقابلات الشهرية-الادارة-تنظيم المحتوى-جودة المحتوى-تجارب الاعضاء الفعلية-الخ
كل اللى فااات
نيجي لاهم نقطة :
ايه حصيلتك الفعلية من خبرات السيارات اللي طلعت بيها من المنتدى
يعني كنت داخل ابيض يا ورد ماتعرفش العربية الملاكي من النقل
ولا عندك شوية معلومات ويا دوب بتعرف الرداتير من الموتور
ولا معلوماتك اشد وعايز تعرف الفرق بين المواتير
ولا عايز تعرف ازاي تصلح عربيتك بايدك
الخ الخ الخ
عايز اعرف كل واحد خد ايه من المنتدى وفاده في ايه
ودور على ايه(كمنتدى مصري متخصص في السيارات فقط) ولم يجده
في انتظار ارائكم وكتابتكم باستفاضة من اجل تحسين وتطوير مكانة المنتدى
تحياتي
كريم منير
رئيس مجلس الادارة

وبجد استفدت كتير اوى وربنا يجازيك خير يا كريم وكل الناس الموجودين فعلا استفدت كتير بس لما افتكر حاجه تانيه هبقى اقولها اصل كان عندى كام فكره بس الزهايمر اشتغل

[kohana]

معذرة
فى حاجة نسيتها
عايزين تفعيل للمنتدى فى الشارع المصرى ويكون له حضور
وكمان يكون فى مراكز كتيرة على مستوى الأقاليم يكون نايل موتورز متعاقد معاها
وياريت بقى لو نادى ويبقى اسمه نايل موتورز
فكرة هايلة

[الغزالى]

حتى لو مكنتش استفدت حاجة كفاية انى اتعرفت على كل الناس الى محترمه الى هنا من كبيرهم الى اصغر واحد فى المنتدى ,, بس دة مامينعش انى استفد كتير جدا جدا

[brown-eyes]

بعتبر المنتدي زي اخويا الكبير بقيت احب استشيره في حاجات كتير

[icehearted girl]

هرد بكرة ان شاء الله

[mhmdalsaadany]

كريم باشا
انا عرفت المنتدى هنا عن طريق جوجل ومن يومها انا ببات واصحى عليه وبجد الروح الجميله اللي بين الاعضاء هنا ممتازه وصعب تلاقيها في مكان تاني ابدا ودي اكتر حاجه شدتني عشان الحب في الله دا بقى عمله نادره جدا اصل للي بيكلمك دا وخايف عليك ممكن يكون في محافظه تانيه وممكن عمرك ما هتشوفه بس برضه بيديلك النصيحه والتجربه وكأنه اخوك والله العظيم
وبجد عايزين يكون للموقع مكان رسمي زي ما قال الاعضاء زي نادي او ممكن رعايه للاحداث والمعارض الخاصه بالسيارات
يعني تخيل حضرتك لو ان شاء الله في معرض الاهرام القادم كان لينا مكان كدا في اول صالات العرض هتكون حاجه جميله جدا ويا سلام بقى لو عملنا مجله و حطينا فيها اراء وخبره رجاله نايل موتورز زي قسم الورشه والمقارنات والجديد في عالم السيارات في مصر والعالم
ولكم منا كل تقدير واحترام والى الامام دائما نايل موتورز

[dr.hazem]

عرفت نايل موتور من بما كنت بدور على عربية اشتريها وربنا يسر الاحوال وعثرت عالمنتدى واشتريت العربية من احد الاعضاء اللي اكتشفت لما قابلته اننا نعرف بعض من تعاملات قبل كده في مجالات تانيه...
واللي خلاني اتمسك اكتر اني كنت بقرا عن العربيات اللي حاططها ضمن الاختيار مميزاتها وعيوبها وتصليهحا وهكذا لحد ما تم الاختيار على الماروتي ولله الحمد وجبتها...

انا معلوماتي عن العربيات كويسه ولله الحمد وبعمل شوية شغل خفيف بايدي
المنتدى خلاني اثق في نفسي اكتر واتجرأ واعمل حاجات اكتر واصلح بايدي ولما انطلق لمشوار صيانه ابقى عارف اتوجه فين ولمين وازاي

تبادل الخبرات شئ جميل
انك تلاقي ناس بتحب تفيدك بدون مقابل حاجه روعه ومشجعه انك تفيدهم قد ماتقدر ومتبخلش خالص بخبراتك

طبعا ده غير المقابلات اللي بتعرفك على ناس طيبين ملهمش مصلحه غير انهم يكونو اصحاب ليك....

العروض اللي بنحصل عليها بعد كل ده من ستيكر نايل موتور هي حاجه تكميليه وليست الهدف الاساسي واحنا نحب ندعم موقعنا باي شكل كان
....
مش قادر احكي كتير لكن فعلا انا مدمن على نايل موتورز


تحياتي