المتسبب الحقيقي لمذابح السيارات علي كوبري المنيب

[Samir Elshahawy]

الاخوة الكرام ...

أسعد الله مسائكم بكل الخير ...
و كل عام و حضراتكم جميعا بخير و يارب 2011 تكون سنة سعيدة عليكم و أفضل من سابقاتها ..

اليوم أثناء عودتي من الاسكندرية و بعد أن وصلت القاهرة و وصلت الي أول كوبري المنيب و أذا بالميكروباص الذي علي يساري يخفض من سرعته بشكل مفاجئ و سمعت صوت الفرامل و علي الفور و بشكل تلقائي خفضت أنا أيضا سرعتي و هنا كانت المفاجأة

واحد من السادة المشاة (الغير محترمين) بيجتاز الطريق ووجد نفسه محاصر بين الميكروباص و سيارة أخري فقفز امام الميكروباص الذي أضطر سائقه للتوقف المفاجئ و هنا اكمل السيد الغير محترم عبور الطريق ليتفاجئ بي هذه المرة و قد أضطررت أيضا للتوقف و انا في أنتظار السيارات التي خلفي أن تصطدم بي و فعلا جاءت سيارة ربع نقل لتتوقف مابيني و بين الميكروباص
دخل بيننا أزاي ؟؟ الله أعلم

و يبدأ بعدها هرج و مرج علي الكوبري لدرجة أن أحدي السيارات شاهدتها في المراية و هي تنحرف في أتجاه اليمين و تستعرض الطريق لتبدأ جميع السيارات في التوقف بشكل مفاجئ و غير منظم لكن الحمد لله ربنا ستر و لم تصطدم أي سيارة بأخري

كل هذا بسبب أنسان (و أسف في أستخدام هذا اللفظ) غير مسؤل كاد أن يتسبب في كارثة جديدة علي كوبري المنيب

أغرب و أخطر مافي الموضوع أن علي يمين الطريق مباشرة و علي بعد 10 امتار بالظبط مني تقف سيارتي دورية و بعدهم رجال المرور الذين لم يحركوا ساكنا و هم يشاهدون بوادر كارثة تقع أمامهم و لم يتدخل أحد منهم بالامساك بمن كاد أن يتسبب في هذه الكارثة

بجد مش أقل من 30 سيارة كادت أن تصطدم ببعضها البعض بسبب شخص واحد

و السؤال الان الذي يطرح نفسه :
- ماذا يفعل المشاة علي طريق سريع كالدائري ؟؟
- و ماهو دور وواجب رجال المرور لمنع مثل هذه الظاهرة ؟؟
- الي متي تستمر هذه الفوضي و هذه اللامبالاة من المشاة و من رجال المرور ؟؟
- و هل هذا الشخص لو صدمته ألف سيارة و سيارة علي طريق سريع هل له دية ؟؟ و هل يتفرق دمه بين القبائل (أقصد بين السيارات) ؟؟

أعتقد أنكم عرفتم الان من المتسبب الحقيقي في معظم حوادث الطريق الدائري ؟؟

مع خالص تحياتي
م/ سمير الشهاوي

[احمد ابراهيم]

طيره و ادفع فيه 50 جنية

[mahmoud_afifi]

فعلا ده المتسبب الحقيقي وبمعنى اصح العقليات بتاعت البشر لأن نفس البني ادم ده لو كان راكب عربيه كان هيعمل كوارث اكبر من كده وقيس على كده لو كان سايق عربية نقل كان هيعمل ايه في الخلق !!

[Hany A Fattah]

طيره و ادفع فيه 50 جنية

هو حلال فيه الموت بس مش للدرجه دى

[amr mokhtar]

حمد لله على سلامتك و الحمد لله ان مفيش حوادث حصلت

مش عارف لحد إمتى هنفضل نعانى من التصرفات الغير مسئولة
محدش بيتعظ لما بيشوف او بيقرأ عن مشاه بيتخبطوا على الطرق دى

و يبدو ان المسبب للحوادث على كوبرى المنيب هو نفسه المسبب للحوادث على كورنيش الإسكندرية
و يمكن على طرق تانية برضه

ربنا يستر علينا

[amr mokhtar]

طيره و ادفع فيه 50 جنية

المشكلة مش فلوس و لا هيدفع فيه كام
المشكلة هو الإحساس بالذنب
المشاة هم أكتر حاجة بتخوفنى على الطريق

[Samir Elshahawy]

طيره و ادفع فيه 50 جنية

الحمد لله ان سرعتي و سرعة معظم العربيات ماكانتش كبيرة لأن الكوبري كانت عليه كثافة مرورية علشان كده كلنا لحقنا نقف

لكن انا لما وقفت في نص الطريق و الراجل قدامي بيني و بينه يادوب سنتيمترات بدأت أشوف المرايات و انا متوقع أن عربية تيجي تخبطني انا و هو و بدات أستعد نفسيا للحظة دي و انا بأسترجع المناظر اللي شوفتها قبل كده علي الكوبري ده و أن الدور جه عليا علشان أكون النهاردة جزء منها بل في مقدمتها

حقيقي أحساس صعب و مخيف

أنا مش عارف ازاي قدرت اكمل بعد كده لحد البيت انا لحد دلوقتي رجلي فيها ألم شديد من الخضه

ربنا يهدي الجميع و ان لم يهتدوا فليرحمنا منهم

م/ سمير الشهاوي

[Hazeeeeem]

ماهو ده العادى والله يا باشا ده الواحد بيعانى وهو ماشى ع الدائرى خاصا بالليل وتفاجىء بواحد طلعلك من تحت الارض وبيعدى الطريق ولك ان تتخيل عرض الدائرى حوالى 25 متروده اقل واجب او اكثر طبعا والعربيات طايرين ومع ذلك برضو بيعدو . ولما حد من دول تموته عربيه يحاسبو السائق طب ما تروحوا تحاسبوا المتخلفين اللى بيعدو الطريق الاول . بس هتقول ايه هى دى مصرنا الجميله

[Dr.SherifMansy]

الحمد لله ان ربنا ستر ...

أنا دمى محروق على طول من النوعية دى من المشاة ...

تلاقى الواحد فيهم بدون سابق انذار يروح رامى نفسه و العربية جاية عليه و يبدأ فى عبور نهر الطريق بدون ادنى مبالاة ، لأ و فيه منهم الى بيعدى على مهله مش بيمد شوية ، تحس ان الواحد فيهم متخيل ان كل عربية فيها باراشوت لتهدئة السرعة زى اللى فى مكوك الفضاء و ان السواق هايرمى هلب يرشق فى الأرض و العربية تقف فى الحال !!... لأ و لازم دايما يشتم السواقين ... ازاى ما وقفوش له؟؟؟

لكن اكمالا لمسلسل حرق الدم ، يمكن اللى بيعدى الدائرى مالوش مكان عبور مشاة (طبعا ... مش طريق سريع) ... و لكن هانقول يمكن مضطر يعدى فبيعمل كده ، ده مش عذر و لكن هانقول كده ... لكن تقول ايه فى طالبة جامعية قدام الباب الرئيسى لجامعة القاهرة تجرى لغاية اما تبقى فى وسط الشارع و فجأة تروح واقفة ... ليه ؟؟؟
علشان تطلع الموبايل من شنطتها ... تمشى بعد كده ؟؟... لأ طبعا ... وقفت فى نص الشارع بتتكلم ...
ربنا ستر انى من كتر ما اتلسعت فى المنطقة دى بقيت بامشى بالراحة ... لكن اللى يغيظ أكتر انى لما زمرت علشان توسع و امشى تفتكروا عملت ايه ؟؟؟ لفت و ادتنى ظهرها بدون ما تتحرك ...كل ده علشان مكالمة الموبايل ...

تفتكروا دى لو بتعدى الدائرى كانت لبست كام عربية فى بعض ؟؟؟

هى دى ثقافة المشاة عندنا فى عبور الطريق ... و على قائدى السيارات مراعاة فروق التغتيت.

و تحياتى

[محمد ابراهيم 1]

الطرق فى مصر محتاجة إعادة هيكلة وبناء أسوار تمنع المشاة من السير فيها مع عمل أنفاق كثيرة للمشاة

[most_wanted]

و هل هذا الشخص لو صدمته ألف سيارة و سيارة علي طريق سريع هل له دية ؟؟ و هل يتفرق دمه بين القبائل (أقصد بين السيارات) ؟؟

لو علي طريق سريع او قريب من كوبري مشاه او نزله او طلعه كوبري ملهوش ديه طبعا ولو خبطته ممكن تدفعه اي تلفيات حصلت في عربيتك

[M.Osman]

ربنا ياخد العالم دي و يخلصنا منهم و من جهلهم

[Mohamed_Hegazy]

على فكرة المشكلة متشابكة ليس المشاه فقط هم السبب ولكن عدة اسباب
+ لايوجد طريق للمشاه فى اى مكان وان وجد تجدة مشغول بالباعة
+ سلوك المواطن غير منضبط
+ نظام العقاب غير رادع وذلك للسبب الاول
واخيرا ربنا يرحمنا

[abd_el_7amid]

طب بصوا بقه بجد واسمعوا اللى حصل معايا
انا كنت راجع من المعادى على الدائرى وبعدين لاقيت العربيية اللى قدامى كانت ماسكة الشمال هدت مرة واحدة.. المهم الحمد لله انى ما اخدتش يمينى عشان افادى العربية اللى شبه وقفت قدامى
والاقى ايه بقى بعد العربية ما ابتدت تاخد سرعتها .... راجل وبنت صغيرة بيعدوا الطريق
بس ارجع واقول الناس دى تعدى ازاى للجهه الاخرى .... ومفيش انفاق او كبارى علوية؟؟؟؟؟

[احمد ابراهيم]

طب بصوا بقه بجد واسمعوا اللى حصل معايا
انا كنت راجع من المعادى على الدائرى وبعدين لاقيت العربيية اللى قدامى كانت ماسكة الشمال هدت مرة واحدة.. المهم الحمد لله انى ما اخدتش يمينى عشان افادى العربية اللى شبه وقفت قدامى
والاقى ايه بقى بعد العربية ما ابتدت تاخد سرعتها .... راجل وبنت صغيرة بيعدوا الطريق
بس ارجع واقول الناس دى تعدى ازاى للجهه الاخرى .... ومفيش انفاق او كبارى علوية؟؟؟؟؟

يقف نص ساعة او حتى ساعة لغاية لما لطريق يتصادف ان مفيش اى عربية معدية و يعدى هو

امال يعنى يلبس 30 واحد فى بعض و احتمال ان تحصل خسائر فى الارواح يكون كبير جدا او ممكن يحصل اى شرز مع تنقيط بنزين عرية تنكها اتخرم و تبقى كارثة

استاذ سمير كان بيقول ان بسبب اللى كان بيعدى ده كان فى عدد كبير من العربيات هتلبس فى بعض دا غير العربية اللى وقفت بعرض الطريق