تحذير من اصلاح الكاوتش في بنزينة مصر للبترول أول عباس العقاد

[Islam_galal]

السلام عليكم

مع تكرار الحدث و حدوثه لي شخصيا ، أعتقد إن وجب التحذير من التعامل مع بنزينة مصر للبترول أول عباس العقاد - مدينة نصر في إصلاح الكاوتش فالضمير معدوم للأسف و بتواطؤ الإدارة بها سواء بالعلم أو بالجهل (سوء إدارة)

جرب تصلح فردة كاوتش هناك و حتطلع دافع علي الأقل 100 ج و حتخسرلك فردتين كاوتش علي الأقل، و أفضل إن محدش يشتري بنزين كمان منها أحسن يمكن يفهموا

و بشكل عام:
- لا تصلح كاوتش سيارتك في بنزينة.
- لا تصلح الكاوتش باستخدام الخابور أبدا.
- احتفظ بإطار داخلي (كمرة) في شنطة العربية ليوم تضطر آسفا فيه تدخل تصلح اطار في بنزينة (بدل ما تصلح ركب الكمرة و بعدين صلح الاطار عند حد محترم)

تم التثبيت بواسطتي للمنفعة
الادارة 1

[fiatmomo]

اضم صوتى لصوتك .. عن تجربه حقيقيه من حوالى سنة فى نفس المحطة الحقيره ديه ...دخلنا نزود هوا ... ( ابن ال******** ) قالى الكاوتش فى 6 اخرام ؟؟؟؟؟؟ وراح الناحية التانية قالى فى 4 مش فاكر ولا 3 اخرام ؟؟؟؟؟؟؟؟؟؟؟وهو اساسا بيبقى جاهز بالمسمار الرفيع فى ايدة ومن غير ماتحس يخرم فى الكاوتش من غير ماتحس ... وبعد كدة بيبقى معاة ازازه فيها مية بصابون يرشها على الكاوتش وهو راكب و تطلع فقاقيع .. ويقولك يا بيه اية دة انتا ماشى كده ازاى ... وطبعا حينصحك بالخابور الامريكانى ( خابور لما يخرم دماغة).. ويقولك دة ممتاز يا باشا وعلاشان يحرق دمك اكتر يقوم جايب مفك ويقوم موسع الخرم اكتر !!!!!!! وبعد كدة يحط الخابور الزفت الى بيحطه . يارب يركبو 100 خابور فى دماغهم و 100 كمان فى قلبهم ..

وتطلع من المحطة وكاوتش عربيتك باظ تماما لان الخوابير دية اسوا حاجة تتحط فى الكاوتش وحتى لو ركبتها تتركب بشكل مؤقت لحد متروح مركز كويس ولازم تتغير باللزق العادى

اوعىىىىىىىى حد يصلح كاوتش فى بنزينة وحتى اوى تذود هوا فى كل بنزينات التعاون ومصر و موبل و اسو ... وانتا بتذود هوا حيخرمو الكاوتش حتى لو انتا مفتح اوى هما ليهم طريقة .

بس بالاخص بقى ... اوعىىىىىىىىىى حد يدخل بنزينة مصر الى فى اول عباد العقاد ... لان فعلا حتخرج دافع 100 جنية على الاقل اوىىىى

نفس الكلام فى بنزينة التعاون الى فى صلاح سالم بعد البانوراما .

[fakoussa]

فعلا الكلام مظبوط و حصل مع والدى و دفع حوالى 85 جنيه اصلاح كاوتش .
الموضوع بيبدا و انت بتحط بنزين العامل يقولك الفردة دى شكلها مريح شوية و فيه عندنا خدمة كاوتش و تبقى انت كده بلعت الطعم . بصراحة حاجة حقيرة و زبالة .

هى دى مصر . لما عامل بيقولى كده و انا بحط بنزين مابديلوش بقشيش علشان يبطلوا الوساخة دى

[Islam_galal]

أنا متأكد إن الموضوع مش صدفة دي منظومة في المحطة دي بالذات
برجاء ممن تعرض لموقف مشابه المشاركة للمنفعه العامة
و أناشد كل أعضاء المنتدي عدم التعامل بأي صورة مع المحطة دي و ابلاغ كل معارفهم بذلك

[ows212]

أفضل إن محدش يشتري بنزين كمان منها أحسن يمكن يفهموا

اللى هايغش فى الكاوتش اكيد ها يغش فى البنزين طبعا المفروض ماحدش يشترى منها

[د.أحمد سمير]

تحذير آخر من محطة التعاون على ناصية شارع مصدق بالدقي .. نفس القذارة

والحل لكل من يحتاج خدمة كاوتش في نطاق شارع عباس العقاد .. التوجه لمركز خدمة بريدجستون ببنزينة كالتكس تقاطع عباس العقاد مع مصطفى النحاس .

أو الدخول في شارع مصطفى النحاس حتى الحي السادس أمام المدينة الجامعية لجامعة الأزهر حيث سيجد عشرات المراكز المتخصصة
تقبلوا خالص مودتي

[abdelaziz-waleed]

انا مشعارف ازاي الناس ديه بيجيلها نوم واكلها وشربها وعيشتها كلها من حرام. لا حول ولا قوة الا بالله

[shrofa]

أنا حصل معايا الحركة ده من سنتين تقريبا فى بنزينة مصر الى فى شارع القصر العينى ...والراجل عملى فيلم هندى ساعتها ...

وقالى فيه 6 خرام واشتغالات بس الحمد الله مكنش معايا فلوس أصلا ساعتها ...هههههههههه

[Adham_Sabry]

نفس الموقف في البنزينه اللي علي الكورنيش في الملك الصالح (اظن تعاون او مصر للبترول)

[kh_talaat]

- لا تصلح الكاوتش باستخدام الخابور أبدا.

أنا طول عمري بصلح الخرم الناتج عن مسمار بالخابور والعملية وماشية والحمد لله وأعتقد إنه الأصلح في حالة الخرم الناتج عن مسمار

إنما اللزق العادى دة بيستخدم لما يكون الكاوتش به قطع كبير نتيجة المشي على لوح زجاج أو ما شابه ذلك

[Khalid_Mostafa]

الصراحة بالفعل محطات البنزين ميتصلحش عندهم كاوتش و ديه نصيحه قالهالي واحد صحبي بتاع كاوتش (طبعاً هو مالوش مصلحه معايا لأني كده ولا كده بصلحها عنده وببلاش غالباً :) )
انا في مره كنت داخل ازود هوا في محطة تعاون عندنا في إسكندرية في جليم علي ابوقير وهوب لاقيته بيرمي في حاجات كده من ايده وهو بيزود هوا وانا كنت مشغول بأرد علي الموبيل ..بس اخدت بالي فقلتلوا انت بتعمل ايه!!! وايه الي عمال ترميه ده !!! راح قالي "دي بلوف العجل عندك غيرتهالك كلها عشان بتسرب هوا ...اصلها معووجه" طبعاً اول شيء جاء في دماغي الإعلان بتاع صيانة هيونداي الي الميكانيكي بيقول فيه "السبراتير بينقط كهرباء" طبعاً اتغظت جداً وكنت حضربه وقلتله بلوف ايه الي معووجه دي ...ده عجل لسه جديد ...انت حتسطعبط ...اتفضل لموهم يا مفتح وركبهملي تاني وانا عايزهم معووجين زي ماهما " ولسوء حظه كان فيه واحد لسه جاي يصلح كاوتش وطبعاً انا عليت صوتي و سيحتله والراجل حتي تضامن معايا ..
الخلاصه ان مبقاش فيه ضمير دلوقتي و لو الواحد مش فاهم فعلاً حينضحك عليه ومن هنا تبان اهمية منتدي زي المنتدي بتاعنا يقوم علي توعية الناس ورفع المعرفة بالمعلومات البسيطه الأولية الي لازم تكون عند كل واحد

[KarimAbulEla]

ا
الخلاصه ان مبقاش فيه ضمير دلوقتي و لو الواحد مش فاهم فعلاً حينضحك عليه ومن هنا تبان اهمية منتدي زي المنتدي بتاعنا يقوم علي توعية الناس ورفع المعرفة بالمعلومات البسيطه الأولية الي لازم تكون عند كل واحد

+1 +1 +1

الصراحة اصلا قبل هذا المنتدى لم يكن هناك فرصة لتبادل المعلومات و و توعية المجتمع فيما يخص السيارات و مختلف النواحى الاجتماعية بشكل عام و الحمدالله الان على ما وصلنا اليه جميعا من تضامن و تكاتف و تبادل المعلومات و المحاذير و الاستفسارات مع العدد الكبير للاعضاء الموجود حاليا

[tmz9111]

شكرا على التحذير

[Adham]

ماهيه البنزينات القذرة دي كلها كد

و البنزينة التانية اللي جنب فايزر اللي قبل سينما الماظة برضة كدة

اعتقد انها التعاون او مصر للبترول مش متذكر

[ashour]

اول ما جبت العربيه برده حصلى نفس الموقف و كمان اكمنى كنت لسه فى الاول فكنت موسوس...
طالع على الصحراوى فقلت احط نزين من اسو اللى فى شارع فيصل لانها اخر بنزينه ممكن نقبلها قبل موبل اللى عند البوابات و قلت بالمره ازود الكاوتش
المهم قالى العاجلتين اللى قدام مرياحين اكشفلك عليهم؟
طبعا خفت و قلتيلو يا ريت.
هوب هوب 15 خابور امريكانى... بقولوه كام الحساب يقولى 150 غير الشاى
المهم اتخانقت معاه و بالصدفه بضرب عبنى لقين غطاطى بتاع الكاوتش قلتيلو هانروح نسأل.. روحنا و خليته قاعد منزلش عشان ميتفقش معاهم قالى ان الباكيته اللى فيها 5 ب 10 جنيه.
جبت 3 باكتات و رميتهم فى وشه.. المهم عرفت ليه متصلحش الكاوتش عند بنزينه لان اداره البنزينه بتبقى مأجره المكان ده للكلاب دول باليوم او بالشهر بس بسعر غالى اوى مش متزكر كام.. فبيبقى عايز يلم الفلوس بأى شكل.
اللى اتعلمتوه كمان انى اول ما اسمع كلمت الكاوتش مرايح اكشفلك عليه اعرف ان ده نصاب و كمان لو المياه اللى معاه فيها صابون ده يبقى حرامى.