كفااااااااااااايه بقشيش للى بيمونوا

[Ashraf_Ibrahim]

لا انا بنزل اقف جنب الكنة ولازم اخد تفويلتي كاملة
واديله الفلوس يجبلي الباقي كامل -لو نقص منه حاجة مش بياخد مني حاجة اساسا وباخد الباقي وعندي استعداد اتخانق عشان الجنيه او النص جنيه دا - مش علشانه هو شخصيا
ولكن عشان الحاجة دي بتطلع مني بمزاجي ولكن هو يخليها فرض وبالاكراه والبلطجة فدا شيء غير مقبول اطلاقا !

[MaZaGAngeE]

من نص جنيه الى جنيه مهما عمل حتى لو مشي على الحيطة ... مش المفروض ادفع بقشيش لأن الناس دي المفروض تاخد مرتبات من الشركات بتاعتهم .... مش ناقصة رمي جتت على العالم

[Bonanza]

ممكن ادفع بقشيش للي بيمون
من نص جنية لجنية
مفيش مشكلة في دي طالما ماخدش من نفسة
لكن اللي بيغيظ فعلا
اللي تلاقية رشلك صابون و مسحلك الزجاج من غير مانت تطلب منه
اول ما بشوفة عمل كده بقوله امسح الصابون ده انا مطلبتش منك حاجة ابقي اسألني الاول
و لو راكن في شارع او اي مكان لوحدي من غير ما حد يركني و ارجع الاقي مساحات العربية مرفوعة
و اجي اطلع الاقي واحد واقفلي و بيقولي تعالي و اي خدمة بقولة انت مين قالك ترفع المساحات دي و بتيجي جنب العربية ليه
طبعا بيقولي مسحتلك العربية يا بية
بقولة محدش طلب منك تمسحلي حاجة و مفيش فلوس و بسيبة و بمشي
تلقيح جتت و شوية صيع

[mr_vampire]

ساعات لما بمون بطلب بعشرين جنيه او تلاتين يعني مش باللتر فلقيته بيقوله واحد وعشرين فبقوله ازاي يعني .قالي ده جنيه سجايرنا قولتله طب وهو انتا اللي بتحدد انا اديك كام ؟؟؟؟؟؟ قالي ياباشا ده حاجة معروفة قولتله انا معرفش والزقو يلفطة اكتبه عليها ( تمن البنزين + جنيه اتاوة ) قالي ياباشا مش اتاوة بس البنزينة مش بتدينا مرتب والحسنة ده هي مرتبنا قولتله لما تمون فاليوم ٣٠٠ عربية يعني ٣٠٠ جنيه فاليوم يعني ٩٠٠٠ جنيه فالشهر ده بقي اسمه ايه ؟؟؟؟؟؟ ده اللي راكبين عربيات دول مابيقبضوش نص المبلغ ده.

[asemx1]

تحياتى لكل الى ردوا على الموضوع دا وكل الى معارض

خلاصه الكلام ان صاحب البنزينه اساسا هوا الى جشع ومفترى فى ارباحه لدرجه انه بيشغل الناس بالبقشيش بدون مرتب وياخد هوا فرق الارباح دى فى جيبه

احنا يا جماعه بقينا فى الحضيض والله وكل يوم البلد دى بتسوء اكتر واكتر والنصب فيها بيكتر اكتر واكتر

انا لما كنت بره كان التموين بالكريدت كارد وممافيش حد يمونلك اساسا انتا بتكتب عدد الليترات وتقوم حاطط الكريدت يسحب الفلوس وبعدين يشغل الطرمبه اوتوماتيك

انا بجد ما عنديش اى مانع فى ان كل واحد فينا يدى نص جنيه صدقه واهو بدل ما الرجال دا يشحت او يسرق
لكن يا جماعه مش كل حاجه بالفلوس انتا ممكن ياخد النص جنيه دا وانتا مش راضى عنه ساعتها تيجى فى اولاده او فى اى حاجه

وتانى حاجه انا واحد من الناس بمون كل يوم تقريبا ( بعمل كيلوهات كتير ) تخيلوا بقى لما كل تموينه ياخد جنيه او نص جنيه من دا مبلغ برضو على المدى القريب والبعيد ؟؟

مش انا اولى بيها

مش انا ممكن اديهاله لما اكون راضى عنه

فعلا عايزين حل للمشكله دى انا كنت فاكر ان امريكا كل حاجه فيها بالبقشيش عايز اى حاجه تعملها لازم تسيب بقشيش فى امريكا

لا الوضع هنا بقى العن واضل سبيل من امريكا بكتييييييييييييييييييييييييييير دا انتا ناقص لما تستخدم اسانسير بيتك تدفع بقشيش ولما تمشى على الرصيف او الشارع يعنى تدفع بقشيش ولما تهرش فى راسك تدفع بقشيش

للناس الى معارضه على كلامى افتكروا كلامى لو كل صاحب محل او مصلحه اعتمد على البقشيش كمصدر رزق ليه يبقى صدقونى كل حاجه فى حياتنا هتمشى بالبقشيش

تحياتى لكم

[asemx1]

يا جماعة الناس دي فعلا مالهومش مرتبات وانا واثق تماما من اللى بقوله . كل عمال البنزين وعمال الغسيل شغالين على البقشيش. فمش مشكلة لما يطلع منك جنيه اللى هو اصلا اصبح بلا قيمة . لكن يكون بمزاجك طبعا مش غصب عنك.
ثانين حتى لو الناس دي ليهم مرتب هايكون كام ؟ 500 ؟ 700 ؟ 1000 ؟
كل واحد يفكر كده ازاي يفتح بيت وعيال بالمرتب ده .
انا بقى اللى بيضايقني مش اللى بيحط بنزين . انما الاخ اللى بيجي يرش مياه على الزجاج من غير ما تسمحله .
انا بقى اللى بيعمل معايا كده بتنح معاه .

معلش انا هعلق على حضرتك

انا مرتبى لا يتعدى ال 600 جنيه والحمدلله عايش وربنا كارمنى وبخرج وباجى ومش بحتاج لحد

بس الى عايز اقولهولك انى بيطلع عين اهلى على ال 600 جنيه دول وعلى فكره فى ناس كتير مرتبها اقل من دا بكتير فانتا جاى تقول لعامل بنزين 1000 جنيه ؟؟؟ او 700 جنيه

فانا بقولك دا اغنى منى وبياخد من الغلابه زىى

[aymansaad]

انا واحد معلرفة كان شغال فى محطة بنزين مكنش لهم مرتب كان مرتبهم البقيش بيتقصم عليهم بعد تسليم الورادى وصاحب البنزينة فى ايام الزحمة كان بيقاسم ماهم البقشيش

[specialist50]

فعلا عايزين حل للمشكله دى انا كنت فاكر ان امريكا كل حاجه فيها بالبقشيش عايز اى حاجه تعملها لازم تسيب بقشيش فى امريكا

لا الوضع هنا بقى العن واضل سبيل من امريكا بكتييييييييييييييييييييييييييير دا انتا ناقص لما تستخدم اسانسير بيتك تدفع بقشيش ولما تمشى على الرصيف او الشارع يعنى تدفع بقشيش ولما تهرش فى راسك تدفع بقشيش

تحياتى لكم

فى امريكا محدش بيفرض البقشيش - يعنى فى محلات للسندوتشات بيحطوا صندوق جنب الكاشير لو مش عاوز الفكة بترميها فى الصندوق
ولو دخلت محل واشتريت حاجة سعرها 99.99$ بير جع لك الباقى بتاعك اللى هو واحد سنت - الفرق كبير جدا بين هنا وهناك.

[essamenen]

فى حاجه مجننانى
فى محطه وطنيه لما بمون منها فى بنها بياخد جنيه او جنيه ونصف انا مش عارف البقشيش ده بيروح فين هما لسه فاتحين المحطه من اقل من سنه وكنت بزعقواتخانق مع العساكر علشان الجنيه وفى مره من المرات لقيت العقيد الى ماسك المحطه فقلتله
هقلك حاجه وياريت ترد عليا
فقلى ماشى
فقلتله الخنيه الى بتخده العساكر بيروح لمين
فرد على بتريقه انا بخده وبعمل بيع جمعيه
فقلتله ردك ده مش حلو
فقلى انتى شغال ايه
فقلتله عامتا انا مش بخيل والحمد لله مستريح ماديا بس عاوز اعرف انتم عندكم فكره عن الموضوع وبيروح فين
فرد عليا انتى عالرف ان العساكر مبتكلشى فبيجيبو اكل للعساكر بيه وكفايه انك بتلاقى بنزين ( زى مايكون بيشحتنى البنزين )
طبعا مشيت وانا مش مقتنع بالكلام ده كان الموضوع ده فى ازمه البنزين الى فاتت الى بعد الثوره
فقلت امشى الحال لحد لما الامور تهدى وابقى اشوف هعمل ايه فى الموضوع ده لان ممنوع اخذ بقشيش فى محطات وطنيه وكان رد الظابط مستفز
لاكن فى المطات الاهالى العمال الى بيمونو مبيخدوش مرتبات من صاحب البنزينه لكن من البقشيش لذالك مبدققشى فى الموضوع ده

[beckeryahia]

ياباشا المحطات لو بتكسب 1000 جنية في اليوم كانت قفلت من زمااااااااان , اقل محطة 4000 جنية يوميا وفي يوصل ل10000 جنية مكسب بس .

[saadelden]

انا بالنسبالي بحسبها
انا مهما عملت ممكن امون في الشهر 6 او 7 مرات بالكتير اوي
يعني هدفع 7 جنيه ف الشهر
و ساعات بردو مابدفعش
و ساعات بقابل عالم بتستهبل

لكن فيه بنزينات محترمه مفيش فيها الكلام الفارغ دا
لكن عموما لو هدفع 7 جنيه في الشهر تبس اني بساعد حد انه مايشحتش او يبقى حرامي

[أبو إياد]

انا ضد فكره صاحب الموضوع ورايك يحترم وعلى فكره انا عن نفسى بدخل بنزينات موبيل اللى مافيهاش غسيل لانهم بيقوموا بتنظيف السياره وتلميع الزجاج ومنها موبيل البطل احمد عبد العزيز وموبيل شارع رمسيس (التوفيقيه)

[SYD]

بص حضرتك في ناس مستغلة
وفي ناس بجد مش بياخدوا مرتبات، ودة بالنسبالهم مرتبهم

حرام تقطع عيش حد لو انت مش عايز تدفع ماتدفعش بس بلاش تحرض الناس علي عدم الدفع

سيب الناس تاكل عيش

انت لو لفيت بعربيتك علي بنزين وخلاص هتقطع منك هتتمني تلاقي بنزينة وانشالله حتي ياخد جنيه قصاد كل جنيه

اعتبر النص جنيه الي بتدفعه دة كأنه جزيه او أتاوة او اعتبره صدقة او اعتبره مرتب او اعتبره اي حاجة فأي حاجة

والله المستعان
،
،

[amrelserw]

بص حضرتك في ناس مستغلة
وفي ناس بجد مش بياخدوا مرتبات، ودة بالنسبالهم مرتبهم

حرام تقطع عيش حد لو انت مش عايز تدفع ماتدفعش بس بلاش تحرض الناس علي عدم الدفع

سيب الناس تاكل عيش

انت لو لفيت بعربيتك علي بنزين وخلاص هتقطع منك هتتمني تلاقي بنزينة وانشالله حتي ياخد جنيه قصاد كل جنيه

اعتبر النص جنيه الي بتدفعه دة كأنه جزيه او أتاوة او اعتبره صدقة او اعتبره مرتب او اعتبره اي حاجة فأي حاجة



1+++++++++++++++++++++

والله المستعان
،
،

[shaddadfalcon1]

انا ال 3 بنزينات اللي بقول منها دايما بيغسلولي القزاز الامامي والخلفي وبيدولي الفلوس كامله وانا بردله جنيه واجب كده يعني ومش بياخد من نفسه الا اذا كان في كسر يعني 49.45 مثلا ياخد ال 50 ومش هقوله يجيب 55 قرش يعني

لكن طبعا لو 49 ومداش حاجه اكيد دي بلطجه وهقوله هات الباقي