ملاحظات على قطر السيارات

[Ahmed Samy]

اللي خلاني اعمل الموضوع ده حاجتين :
الأولى اني كان عندي بيجو 504 79 (بتاعة الوالد رحمه الله) و بيمر 80 E21 و طبعا كانوا مهريين قطر :D

الثانية موقف حصللى امبارح و حسسني بضرورة عمل الموضوع ده

-------------------------------------------------------------
الموقف بتاع امبارح:
و أنا مروح بالليل متأخر جدا بتاع الساعة 3,5 صباحا لاقيت تاكسي لادا و صاحبه بيزقه على طريق شبه سريع .. هديت و لاقيته يا حبة عين الست الوالدة بيفرفر من التعب

جيت جنبه و قولتله عايز وصلة ؟؟؟ قاللي لأ دي قاطعة غاز
طب بنزين علشان تدورها ؟؟؟
قاللي لأ :) دي مابتحضرش الا غاز بس (رداخ البنزين ودع)

طب انت هاتعمل ايه ؟؟؟؟؟
هازوءها للمحطة
- ملحوظة- المحطة كانت في اخر بلاد المسلمين

طب ارحم نفسك , انا هاشدك .......معاك حبل ..أو سلبة ؟؟؟؟
لأ
و قعد يقلب في العربية لحد ما لاقاش حاجة
عمل اييييييييييييييييييييييييييييييييييييييييييييييييي ه ؟؟؟؟؟
قطع حزام الأمان اللي ورا

ماااعلينا المهم
انا خدت طرف و ربطته في انشوطة الجر (الهوك) الموجدة في نهاية السيارة
و هو ربط الحبل بتاعه اسفل امام سيارته (و عرض يربط بتاعتي و أنا رفضت)

و مشينا ........تا تا ..........تاتا على ال L طبعا
و بصراحة ..موتور اللانسر بسم الله ماشاء الله كان تمام

و جينا عند مطب .......سيبت العربيتين يريحوا علشان ماشدش على المطب
بس الناصح ضرب فرامل وهووب الحزام فك (اتقطع)

و صلناه و جينا عند ملف و لاقيت صاحبنا ما بيلفش و قام لابس في الرصيف و طااااااخ
نزلت اشوف الصوت .....
كان مش فاتح الكونتاكت فالعجلة كلبشت
و كمان :D:D:D:D
كان رابط الحزام في عمود الميزان (stabilizer bar)
اللي لاقيناه مدلدل من عربيته قدام بعد ما رزع في الرصيف و اقتلعته اللانسر بمجهودها الجبااااار

لا تعليق:p
-----------------------------------------------------------------
و دي مجموع نصائح من واقع خبرتي في الشد و القطر :

1 - احتفظ بحبل سميك (او كابل القطر المعدني) في سيارتك حتى لو جديدة لأنك ممكن تضطر تقطر حد
2 - حند ربط السيارات ببعضها لا تجعل طول الوصلة يزيد عن 3 امتار و لا يقل عن مترين
3 - لا تربط الوصلة في أي جزء من أجزاء العفشة (مهما بدا قويا) و لكن اربط في المكان المخصص
4 - في السيارات الغير مجهزة بمكان مخصص ممكن الربط على القنطرة (القضيب الحامل للموتور)
5 - اتفق مع السائق خلفك على اشارة للتوقف - اشارة لبدء التحرك و ذلك باليد (او بالموبايل لو انت خط:D) (او ب ووكي توكي لو انت عيل صغير أو فرد أمن او امين شرطة:p)
6 - لا تتجاوز سرعة ال 20 كم بالساعة مهما كانت الظروف مناسبة
7 - اعلم ان السيارة المقطورة فراملها ضعيفة (لأنها غير مدعومة بقوة الموتور)
8 - عند المطبات اترك السيارتين تنزلقان على المطب بالترتيب بدون بنزبن ولا فرامل و بعد المطب اعط علامة بدء التحرك و ابدأ في التسارع
9 - التسارع يجب ان يكون تدريجيا - اي تغير مفاجئ في العجلة قد يؤدي الى فصل السيارتين و يضر بمحرك السيارة القاطرة (النتشة)
10 - عند المنعطفات يجب دخول المنعطف من زاوية واسعة قدر الإمكان (زي التريلات)مع الحفاظ عل معدل الجر الثابت
11 - الـ U-turn : يفضل تفادي ال يو تيرن عند جر سيارة مع عدم وجود خبره جيدة
12 - لاتقطر سيارة محملة و لا بسيارة محملة
13 - لاتقطر سيارة باطار مفرغ الهواء او بمشكلة في العفشة لأن هذا يؤدي لاى زيادة الحمل على محركك مع صعوبة الجر و زيادة احتمالات فشل الوصلة .
14 - أضواء التحذير اساسية في كلا السيارتين القاطرة و المقطورة
15 - الزم يمينك
16 - لا تنشغل بالنظر الي السيارة المقطورة عن الطريق امامك فالسيارة مسؤلية قائدها راعى دورك و اترك للسائق الآخر دوره

و بكره هاكمل النصائح للسواق المشدود
و دمتم

الجزء الثاني من الموضوع
نصائح لمن يتعرض لموقف يقتضي (سحبه بسيارة اخرى)
يعني لو حضرتك اللي هاتتشد :)
=========================================
1 – لا تربط سيارتك من مكونات الجر – مهما كنت مضطرا-.

2- عند بداية الحركة تأكد من الأتي :

- وجود مسافة لا تقل عن المترين بينك و بين القاطرة

- ان يكون العجل في وضع امامي مستقيم

- ان يكون الكونتاكت مفتوح حتى لا يعمل قفل الأمان في المنحنيات

- ان يكون الجير في الوضع الـ neutral N للسيارات الأوتوماتيك و المور للسيارات المانيوال

- يفضل الضغط على دواسة الدبرياج لتقليل مقاومة سيارتك

- الفلاشر (الانتظار) في وضع التشغيل

- تشغيل أضاءة السيارة - المستوى الأول

- افتح زجاج سيارتك فقد تحتاج لاستعمال اشارات الذراع

3 – عند المنحنيات :::: تابع السيارة القاطرة لتوسيع قطر الدوران (خد اللفة من بعيد شوية)

4 – لاتنس أن المؤازرة الآلية لن تعمل (مافيش باور)

5 – لاتنس ايضا ان الفرامل بعد اول ضغطتين ستكون شديييدة الثقل لعدم دعم الموتور لسيرفو الفرامل و قد تستعمل فرملة اليد في تهدئة السرعة (عند الحاجة)

6 – لا تستعمل الفرامل بشكل منفرد بدون اشارة مع قائد القاطرة

7 – عند المطبات ::::: لاحظ ان القاطرة عند صعودها المطب ستقل سرعتها فجأه و سترتفع مؤخرتها مما يعرضك لضرر اذا اصطدمت بها من الخلف (الحل لمسة فرامل اول ما القاطرة تركب المطب)

8 - في المنازل :: غالبا يتم تبادل الأدوار (يعنى انت اللي هاتتحكم في معدل الهبوط بالفرملة و هتكون القاطرة معلقة في سيارتك)
=========================================

أرجو ان أكون قدمت ما يفيد في هذا الموقف النادر الحدوث و لكن الخبرة تقلل من اضراره بشكل معقول

تم الدمج بمعرفة مشرف القسم

[Chicco]

ألف شكر يا باشا ...ربنا ما يكتب على حد .....في إنتظار الجزء الثاني

[FLYINGPEUGEOT]

ايه يا احمد باشا الحلاوه دى.....موضوع هاااااااااااااااااااااااااااااااااااااااااااااايل
ومفيد جداجدا ...وفى انتظار الجزء الثانى ..ودمجه مع الجزء الاول

وياريت الموضوع يتثبت...لو الاداره شايفه كده....نظرا لاهمية الموضوع

بس انا شايف ان مكانه..احسن يكون فى المنتدى التعليمى...عشان ما يتهش فى زحمة المنتدى العام

[فادى]

القطر أو الجر مضر جدا لأى سيارة ملاكى, فالسيارات الخاصة ليست مصممة لمثل هذه الأشياء, حتى سحب المقطورات و العربات التى تحمل المراكب لا ينصح بها.
المشكلة ليست فى المحرك, المحرك يمكنه أن يتحمل القطر, المشكلة الأساسية فى اسطوانة الدبرياج, و هى ناقلة لعزم المحرك, ففى السيارة الخاصة هى مصممة لحمل السيارة بالاضافة الى وزن اضافى يترواح ما بين ال300-400 كغ على الأكثر فى السيارة.
اذن ما هى الأضرار:
- انهاك المحرك, ووضعه تحت حمل كبير, مما يتسبب فى تقليل عمره الافتراضى.
- انهاك الشاسيه, و خاصة اذا ما كانت السيارة ذات جسم أحادى, مما قد يؤدى بعد ذلك الى تفككه تدريجيا.
- استهلاك اسطوانة الدبرياج بمعدل سريع جدا, مما يعرضها للتلف و التأكل بمعدل سريع جدا, لأنها أثناء الجر تتعرض للانزلاق, فهى ليست مصممة لنقل كل هذا العزم من الناحيتين (ناحية المحرك, و الناحية الأخرى مقاومة المقطورة).
و "قطره" أخرى من هذه النوعية, و سوف تحتاج الى طقم دبرياج كامل!!
لذا فلا ينصح أن تقوم بقطر سيارة أخرى سوى بالسيارات المجهزة لذلك(سيارات النصف نقل, سيارات ال4*4 الكبيرة), أما السيارات العائلية و الصغيرة فمن الخطأ استخدامها لجر أى جسم خلفها.

[ابو سيف]

القطر أو الجر مضر جدا لأى سيارة ملاكى, فالسيارات الخاصة ليست مصممة لمثل هذه الأشياء, حتى سحب المقطورات و العربات التى تحمل المراكب لا ينصح بها.
المشكلة ليست فى المحرك, المحرك يمكنه أن يتحمل القطر, المشكلة الأساسية فى اسطوانة الدبرياج, و هى ناقلة لعزم المحرك, ففى السيارة الخاصة هى مصممة لحمل السيارة بالاضافة الى وزن اضافى يترواح ما بين ال300-400 كغ على الأكثر فى السيارة.
اذن ما هى الأضرار:
- انهاك المحرك, ووضعه تحت حمل كبير, مما يتسبب فى تقليل عمره الافتراضى.
- انهاك الشاسيه, و خاصة اذا ما كانت السيارة ذات جسم أحادى, مما قد يؤدى بعد ذلك الى تفككه تدريجيا.
- استهلاك اسطوانة الدبرياج بمعدل سريع جدا, مما يعرضها للتلف و التأكل بمعدل سريع جدا, لأنها أثناء الجر تتعرض للانزلاق, فهى ليست مصممة لنقل كل هذا العزم من الناحيتين (ناحية المحرك, و الناحية الأخرى مقاومة المقطورة).
و "قطره" أخرى من هذه النوعية, و سوف تحتاج الى طقم دبرياج كامل!!
لذا فلا ينصح أن تقوم بقطر سيارة أخرى سوى بالسيارات المجهزة لذلك(سيارات النصف نقل, سيارات ال4*4 الكبيرة), أما السيارات العائلية و الصغيرة فمن الخطأ استخدامها لجر أى جسم خلفها.

دة على اساس ان دة بيتكرر كل يوم؟؟؟

[Nile_Storm]

موضوع جديد و جميل و مفيد فعلا
كمل بانتظار الجزء التاني

[hamedo0]

الف شكر علي الموضوع

[wildwest100]

ايه المواضيع الجامدا دى بجد موضوع هايل و اول مرة حد يتعرضلوا

[eng_mkhalaf]

إلف شكر موضوع هايل

[ASD peugeot]

شكرا علي الموضوع وكويس جدا انك بتحاول تساعد في اي مشكله لعربيه علي الطريق
لان ممكن يجي اليوم و انت تكون محتاج مساعده

[tawfi2]

ماشاء الله . تسلم ايدك يا أحمد باشا ع الموضوع المهم فعلا ....... أفادكم الله يا زعيم :)

[MMamdouh]

مش عارف ليه السيانريو دة جه فى دماغى...

واحد من اصحابنا الفهلوية اللى بيحبوا يعدوا وسط العربيات نزل من الرصيف و حب يعدي بين عربيتين بينهم 3 متر... و الباشا مخدش بالة ان العربيتين قاطرين بعض فا اتكعبل فى السلبة ووقع قدام العربية المقطورة

العربية المقطورة مش دايرة و بالتالى السرفو مش شغال و اللى راكبها معرفش يفرمل قبل الزبون الفهلوى.... الباقى انتوا عارفينة

يا ريت محدش يعمل فهلوى و يعدى وسط العربيات

MMamdouh

[mada121977]

ماشاء الله موضوع جميل يا احمد باشا ... بس اوعى تقولى انك كنت عاوز توديه المحطه اللى فى طلخا :):)

[Ahmed Samy]

القطر أو الجر مضر جدا لأى سيارة ملاكى, فالسيارات الخاصة ليست مصممة لمثل هذه الأشياء, حتى سحب المقطورات و العربات التى تحمل المراكب لا ينصح بها.
المشكلة ليست فى المحرك, المحرك يمكنه أن يتحمل القطر, المشكلة الأساسية فى اسطوانة الدبرياج, و هى ناقلة لعزم المحرك, ففى السيارة الخاصة هى مصممة لحمل السيارة بالاضافة الى وزن اضافى يترواح ما بين ال300-400 كغ على الأكثر فى السيارة.
اذن ما هى الأضرار:
- انهاك المحرك, ووضعه تحت حمل كبير, مما يتسبب فى تقليل عمره الافتراضى.
- انهاك الشاسيه, و خاصة اذا ما كانت السيارة ذات جسم أحادى, مما قد يؤدى بعد ذلك الى تفككه تدريجيا.
- استهلاك اسطوانة الدبرياج بمعدل سريع جدا, مما يعرضها للتلف و التأكل بمعدل سريع جدا, لأنها أثناء الجر تتعرض للانزلاق, فهى ليست مصممة لنقل كل هذا العزم من الناحيتين (ناحية المحرك, و الناحية الأخرى مقاومة المقطورة).
و "قطره" أخرى من هذه النوعية, و سوف تحتاج الى طقم دبرياج كامل!!
لذا فلا ينصح أن تقوم بقطر سيارة أخرى سوى بالسيارات المجهزة لذلك(سيارات النصف نقل, سيارات ال4*4 الكبيرة), أما السيارات العائلية و الصغيرة فمن الخطأ استخدامها لجر أى جسم خلفها.

سيدي الفاضل بالطبع هو تحميل على معدات الطاقة و ألات الجر و خلافه
ولكن مين قال ان سيارات الركوب (غير مجهزة) ؟؟؟؟؟
اي عربية فيها قاطرة بتركب من ورا أو من قدام للغرض ده (سواء علشان تشد أو تتشد)
و عموما اللي بنتكلم عنه ده ممكن يحصل مرة في السنة و للضرورة كاجراء طارئ فقط و لمسافات ليست بالطويلة طبعا
فلو تم هذا بدون أخطاء سيكون تأثيره على سلامة مكونات السيارة معدوم تقريبا

[ams]

, ففى السيارة الخاصة هى مصممة لحمل السيارة بالاضافة الى وزن اضافى يترواح ما بين ال300-400 كغ على الأكثر فى السيارة.
.

أعتقد ان حمل قطر السيارة لا يرقى الى هذا الرقم
لان الرجل العادى بامكانه دفع السيارة و تحريكها من السكون
فى حين انه لا يستطيع حمل 150 كجم مثلا