كتالوج السواقة على الطريق الدائري

[mada_76]

بس 8 - 9 دي صعب قوي
انا ساعات بمشي 3 واخر مره وصلت الدائري علي 5 وكان ماشي يعني بقف شويه عند نزلة المعادي وقبل الكورنيش بشويه والمشكله اني مش ببشوف سبب للزحمه يعني تبقي ماشي زحمه وهوبه الطريق يسلك من غير اي سبب

هو الموضوع كله بيتلخص في نظرية عنق الزجاجة .
ودي بقت مشكلة الشوارع والكباري عندنا . يعني تلاقي الطريق واسع وماشي كويس ومفيش مشاكل وفجاة تلاقي منزل او مطلع او مخرج تتكدس عليه العربيات فاصبح ده عنق الزجاجة اللى هايخرج منها الطريق الواسع ده .

[mada_76]

نقلت الموضوع للقسم العام لاستفادة اكبر بعد اذن صاحب الموضوع

اكيد موافق واتمنى الفايدة تعم على الجميع .

[mada_76]

معندكش كاتلوج لكوبرى اكتوبر و 15 مايو

اعتقد ان دول مش محتاجين كتالوجات لانهم زحمة باستمرار .
ومشكلة الكوبريين دول ان لو عربية الكاوتش بتاعة ريح يبقى كده الكوبري كله بالشفا .
لكن بما انك جيبت سيرة كوبري اكتوبر انا عايز اعلق على حاجة ,
الواحد بياخد علقة جامدة عشان تطلع من المهندسين او الدقي وتبقى جاي مدينة نصر . وتفضل ماشي اول تاني لغاية لما تعدي الجز المعلق كده ويبدأ الطريق يفتح وبعدين ممكن تهدي شوية عند منزل صلاح سالم لكن مسافة لا تذكر يعني . وبعدين تقوم فاتح على الرابع لغاية لما تنزل من على الكوبري .
قاموا بتوع تخطيط الطرق عندنا عاملين مطلع امتداد رمسيس وده بقى بيوقف اخر جزء كان بيمشي في الكوبري .
هو المطلع مفيد بصراحة بس برضه عامل عنق زجاجة جديد .
انا بصراحة مش لاقي حل لمشكلة المرور في مصر .

[mada_76]

أنا الحمد لله بقالى أكتر من سنتين بسافر يوميا من الزقازيق للقرية الذكية.

3 ساعات رايح و 4 ساعات راجع .. يعنى ربع اليوم بقضيه فى المواصلات.

و الله المستعان.

ربنا معاك

[shaddadfalcon1]

هو الموضوع كله بيتلخص في نظرية عنق الزجاجة .
ودي بقت مشكلة الشوارع والكباري عندنا . يعني تلاقي الطريق واسع وماشي كويس ومفيش مشاكل وفجاة تلاقي منزل او مطلع او مخرج تتكدس عليه العربيات فاصبح ده عنق الزجاجة اللى هايخرج منها الطريق الواسع ده .

اعتقد دي ليها علاقه بثقافة السواقه في مصر وخصوصا في القاهره
الدائري بيبقي واسع جدا حتي في المنازل لكن تلاقي الاذكياء مش بيمشو يمين عند اي مدخل
بالعكس تلاقيه ماشي شمال علي اساس انه اذكي خواته ويجي قصاد المخرج يقوم داخل يمين وده في مش في الدائري بس ده في اي طريق فيه مخارج او يوتيرن وبالتالي بدل ماتبقي الحاره اليمين اللي فيها المخرج هي اللي وافقه مع ان الناس لو ماشيه في اليمين كلها مش هتقف لاتها هتبقي سلسله وفي اسوا الظروف هتبقي ماشيه بالراحه لكن علي العكس تلاقي الطريق كله واقف والناس بتمشي براحه جدا عشان الكل يبيجي قصاد المخرج ويقوم داخل وبالتالي يوقف الطريق كله واللي واقف يمين كمان وتحيا السواقه في القاهره

[mohamed_selim]

كوبرى اكتوبر : فى اتجاه المهندسين ... بمشى عباسيه و اطلع من غمره (و لو شايفه زحمه قدام بكمل و اطلع من رمسيس) أو بكمل صلاح سالم على وسط البلد (فى مليون تخريمه من وسط البلد للهروب من شوارع معينه) على التحرير على الزمالك و يا اما اكمل من عند الاوبرا للدقى او اخش الزمالك و اطلع الكوبرى من هناك

لو راجع من المهندسين عادة بيكون متأخر فبيكون سالك و ممكن من بعد عبدالمنعم رياض بشوفه واقف انزل منزل اول شارع رمسيس و اخرم من وسط البلد على نفق الازهر

الخلاصه ... ملوش كتالوج ابعد عنه على قد ما تقدر بالرغم من انه بيوفر كتير لو سالك ... لو :))))

[mada_76]

كوبرى اكتوبر : فى اتجاه المهندسين ... بمشى عباسيه و اطلع من غمره (و لو شايفه زحمه قدام بكمل و اطلع من رمسيس) أو بكمل صلاح سالم على وسط البلد (فى مليون تخريمه من وسط البلد للهروب من شوارع معينه) على التحرير على الزمالك و يا اما اكمل من عند الاوبرا للدقى او اخش الزمالك و اطلع الكوبرى من هناك

لو راجع من المهندسين عادة بيكون متأخر فبيكون سالك و ممكن من بعد عبدالمنعم رياض بشوفه واقف انزل منزل اول شارع رمسيس و اخرم من وسط البلد على نفق الازهر

الخلاصه ... ملوش كتالوج ابعد عنه على قد ما تقدر بالرغم من انه بيوفر كتير لو سالك ... لو :))))

كلام سليم 100 في ال 100

[shaddadfalcon1]

النهارده جي من علي الدائري من علي الصحراوي رايح المنطقه الحره واول مره يبقي زحمه كده

اغبي شيء في الوجود ان اول مابتطلع بتبقي الدنيا زحمه قوي وبااليل اساسا الصحراوي او بعد بوابة الجيزه بيبقي الطريق واقف بسبب الطلعه دي وكل ده بسبب ان فيه مطب اللي هو مش مطب ده مجرد فارق من الفوارق بتاعة الكوبري وعاليه شويه وكل العربيات بتهدي عندها وبتوقف الطريق كله
طيب يابشر صلحوها
وبعدين ايه التصليخات والتكسير اللي بيعملوه هناك ده اللي بقاله مليون سنه والناس الي شغالين زي مايكونو بيشتغلو نفسهم

[mohamed_selim]

حمدالله على السلامه ... لما تبقى جاى صحراوى الصبح تكمل للرمايه و تخش شارع الهرم و يمين من عند المريوطيه او المنصوريه و اطلع الدائرى من هناك

[shaddadfalcon1]

الله يسلم حضرتك
انا رحت منها مره بس فاكر ان دخلة المريوطيه دي تتوه لاني مشيت كتيير في طريق وحش وبعدين اخدت يوتيرن ورجعت تاني وبعدها طلعت الكوبري

[mohamed_selim]

هممم مش فاكر المريوطيه دايما باخودها منصوريه .. اول يمين فى الهرم و بتمشى من عند مخرج المنطقه الاثريه اللى من ناحية ابو الهول و طوالى جنب الترعه لحد ما تلاقى الدائرى فوقك بتخش شمال على المطلع على طول