الكوريك التمساح مبيتصلحش ؟

[AHMED MOHSEN]

طب يا حضراااااات ماتقولونا اسم الراجل ده ايه لاني رحت هناك ولقيت واحد اسمه الحاج اشرف وعنده شب اسمه حماده علي نفس الخط بعد بنزينة التعاون ربنا لا يباركلهم نصابين واشرف ده مش سالك كده ملاوع
خدت من عندهم كوريك 1.5 مستعمل ب 70 جنيه لولا الواحد كان مستعجل بس
حسبنا الله ونعم الوكيل

[Nistelrooy]

بيتصلح يا باشا بس عايز اقولك ع حاجة اغلب اللي هتلاقيه بيتباع ع الواقف مضروب و الطن بيبعوه ع انه 2 طن يرشوه و يغيروا العلبة غير ان طبعا زي ما شوفت بيبوظ عالطول

عايز نصيحتي هات كوريك زي الفبريكة اللي اسمه العفريتة تقريبا اللي عامل زي السمبوكسة بصراحة برقبة التمساحة ملوش صيانة نهائيا غير انك لو حسيت بخشونة فيه حتة شحم ع المسمار الكبيرة
وزنه خفيف جداااا و تقدر تخطه ورا الجنط في الشنطة منها يصد اي خبطة لا قدر الله و منها مياخدش مساحة
ده توضيح ع ادي للي قصدي عليه معلش المستخدم برنامج الرسام هههههههه

عندي التمساح وبايظ في العربية
وعندي المثلث وبايظ في العربية ..

وكان موقفي وحش لما العربية عملتها علي الدائري واضطريت اشحت كوريك من تاكسي xD

الكوريك المثلث بيلف علي الفاضي لا بينزل ولا بيطلع !!

[Nistelrooy]

ياريت بالظبط فين ف شارع احمد سعيد علشان نروح احنا كمان اصلح الاتنين الي عندي ولا اجيب حاجة مستعملة !

[tarek l gammal]

بيتصلح

انا الكوريك فيه صاموله اتكسرت و فضى الزيت اللى فيه كله
و كل ما احط زيت يشتغل سنه و يقف و ينزل الزيت كله . روحت لواحد يصلحه طلب 120 ج
روحت لخراط يعملى صاموله غير اللى اتكسرت و هركبها و انزلك النتيجه

[akmm]

متابع ....................

[Mecha]

طب مين بيبيع اويل سيلات وحشو الكواريك في القاهره او الجيزه؟؟

[tarek l gammal]

انا خرط الصاموله و جبت زيت هيدروليك و كبست الكوريك كويس و الكوريك اشتغل تاني زي الفل

[omaroof]

مافيش حاجه ميكانيكيه ماتتصلحش وخير دليل عربيات مالهاش قطع غيار وماشيه للنهارده

[Ahmed Fakher]

المهم أولاً لازم تعرف ان الكوريك معرض انه يتعطل وده طبيعى جدا بعد فترة من تشغيله
ولازم تعرف انه لما يتخزن لازم يكون محطوط على عدلته يعنى ما ينفعش تحطه فى علبته البلاستيك ويكون واقف على سيفه ده حايخليه يفرغ الزيت كمان لازم لما اخزنه اكون قافل مسمار التفريغ على الأخر
طيب لو انا عملت كده و جيت احتجت الكوريك لقيت الكوريك مش عايز يرفع معايا او حاسس انه مش قادر يرفع للأخر
اجرب الاول اخد منه الهواء وده بيكون بأنى انزل بالكوريك لتحت لأخره وافتح مسمار التفريغ و احرك ذراع الرفع وانا فاتح مسمار التفريغ لأعلى واسفل من 5 الى 10 مرات ... بعدها اقفل مسمار التفريغ وجرب
طيب لو لقيت المشكله مازالت قائمة فغالبا بيكون الكوريك ناقص زيت
بسيطة حاتجيب زيت هيدروليك بتاع الكواريك وملو المساعدين
طيب ماعنديش يبقى زيت باور اللى هو زيت الفتيس الاتوماتيك
طيب ماعنديش يبقى زيت موتور نظيف خفيف يعنى 5w40 او 10w40 بلاش التقيل 20w50
وطبعا ممنوع زيت الباكم ( الفرامل ) لأنه حايدمر الاويلسيهات بتاعة الكوريك بسرعه جدا
حافتح مسمار التفريغ وارفع الصاجه اللى فوق فتحة التعبئة حالاقى سداده كاوتش افتحها بمفك عادة واملأ زيت لحد ما يبدأ ينزل من مكان مسمار التفريغ اللى انا فاكه خالص ...اقفل مسمار التفريغ وحط السداده الكاوتش وخد هواء زى ما قلنا سابقا وجرب
طيب شفت بعينى زيت بيتسرب من مكان مسمار التفريغ حتى وانا قافله للأخر يبقى تخرج المسمار بره خالص وتغيرله جلده فيه صغيره اسمها اورنج حاتلاقيها عند بتوع قطع الغيار فى علبة زى الصورة حاتاخد معاك القديمه تجيب نفس مقاسها وتمنها حوالى جنيه ومقاسها تقريبا اول درجه فوق اصغر مقاس يعنى تقريبا نمره 2 فى المقاس
طيب لو شفت الزيت بيخرج من تحت ذراع الرفع ... يبقى حاتفك ترملتين صغيرين ماسكين ذراع الرفع بيتفكوا بمنتهى السهوله و تخرج ذراع الرفع و تسحب العمود الرأسى اللى تحته برده حاتلاقى اخر العمود الصغير ده من تحت جلده نفس المقاس ونفس القصه واسمها اورنج غيرها ورجع كل حاجه تانى وماتنساش تزود زيت و تاخد الهواء
وعلشان ماتدهولش الدنيا وانت بتعبى الزيت عبى بسرنجه طبيه وهو ما بياخدش كتير يعنى تقريبا ملو غطا جركن الزيت يكفيه

[Mohamed Desoky]

السلام عليكم ورحمة الله وبركاته شكرا لحضرتك لمعلوماتك القيمه انا عندى كوريك صينى من 10 سنين كان 60 ج وشغال كويس لانى بخزنه زى ماقولت فى صندوقه وبقفل الهواء وهو عدل وبحافظ عليه لان التحميل الزياده بيبوظه لان فى ناس بترفع العربيه كلهامن قدام وده لرفع الاجناب فقط جنب جنب ومرسوم على اى كوريك حتى الاصلى لتغير العجل فقط وشكرا