هام جدا بخصوص بنزين 80

[Elmokadim]

السلام عليكم ورحمة الله وبركاته

النهردا كنت بغسل عربيتي في البنزينة



وكان متوفر بنزين 80 بس طبعا كان في زحمة كبيرة جدا حوالي 4 طوابير

بس المشكلة مكنتش في كدة

اسيبكم مع الصورتين دول





طبعا زي ما انتم شايفين

الينترا 2012 بتحط 80

وفي لانسر 2010 وقف بظهره برضه بيحط 80

وكان واقف في نهاية الصف تيوتا كرولا 2010 برضه هيحط 80

هل دا طبيعي ؟

ومش المفروض ان العربيات دي انجكشن ؟

وهل هو دا سبب عدم توفر ال 80 في بلدنا ؟

وهل العربيات دي بتمشي يا جماعة لما بيتحط ليها 80 ؟

منتظر ارائكم في الموضوع

تحياتي

[SYD]

طبعا أكبر عك في الدنيا

وهو دة عدم وصول الدعم لمستحقيه بأبلغ معانيه

فاما دوول سواقين عليها وبيمنوا ويضربوا فلوس في جيوبهم
اما ناس مش عارفة انه هيبوظ عربياتهم وفاكرها شطارة

وفي الحالتين هو صورة من صور عدم وصول الدعم لمستحقيه

فكيف لي ان اساوي بين مالك سيارة موديل 2012 بمبلغ اكبر من 100,000 جنيه
وبين مالك سيارة موديل 81 لا يتعدي ثمنها ال10,000 جنيه ؟؟؟؟؟؟؟؟؟؟؟؟؟؟؟؟؟؟

انها المحروسة

بالتأكيد هذه السيارات غير مجهزة للعمل بالبنزين 80 وهذا يضرها اشد الضرر

انا عربيتي موديل 99 ولأسباب ما أضررت للتموين ببنزين 80
وكانت المأساة

ولم يستقر حالها الا بعد صيانات كلفتني ما يزيد عن 300 جنيه

شكرا لصاحب الموضوع

والله المستعان
،
،

[mrghost]

كنت بشوف واقف معايا ف الطابور فيكترا 2000 وبوما

[modo88]

دا بجد اسمه غباء واهمال من اصحاب العربيات دي
بالنسبة للسؤال ان دا سبب عدم توافر بنزين 80 ؟ طبعا لا مش سبب ولا حاجه
السبب الرئيسي في عدم توافر بنزين 80 هوا التوكتوك والمتوسيكل الصيني اللي اكلوا البنزين كله من يوم مانزلوا مصر (الله ينتقم من اللي نزلهم مصر وبلي مصر بالبلوه دي)
لو تلاحظ من زمان عمر ما كان فيه ازمات في البنزين ومظهرش الازمه الا بظهور التوكتوك والموتوسيكل الصيني الللي عددهم كبير جدا في شوارع المحروسه وطبعا اصحابهم بيجيبوا جراكن وبيخزنوا فيها بجد الله يحرقهم

[nicegypt]

انا كان معايا لانسر زيرو كنت مستحيل افكر ف 80
وحاليا معايا ريجاتا موديل 85 قديمة ومستحيل افكر ف 80 باردو !!
مش غنا ولا حاجة .. اولا زحمة شديدة جداَ ووجع دماغ ووقتى اولي بالوقت دة
ثانياَ ..بنزين 80 اختراع مصري فاشل رغم انة شغال ف عربيات كتير الا ان السحب مختلف تماما ف الريجاتا
ما بين 92 و 80 .. وطبعا ممكن يطلع لي مشوار سفر ف اي وقت يبقى راحة انا شخصياَ ال 92

[mikho83]

حاجة تجنن ، لا تعليق

[romieh]

ههههههههههههههههههه

النترا 2012 وفيكترا وبوما بيمونوا 80 وزعلانين

امال انا بقى أعمل ايه؟ اروح انتحر

انا فى مرة كنت داخل امون 80 ولاقيت الافندى ده بيمون وصورته

بجد انا كنت بشاور عقلى انى انزل اخده قلمين على اللى هو بيعمله ده



سكودا Suberb 2012 نفس موتور الباسات اللى هو TSI يعنى المفروض مايفكرش فى 92 حتى

المصيبة بقى ان اللى سايق باين عليه مش انه سواق عليها مثلا او سواق فى معرض (صاحب العربية هو اللى واقف جنب الطرمبة ولابس نضارة شمس)

الراجل باين عليه شكله محترم وكويس جدا، مش عارف هو كان بيعمل كده ليه

كان فعلا نفسى أمشى وراه بتاع 10 كيلو كده أشوف العربية هتعمل معاه ايه

[MohammedAladel]

اللى بيعمل كدا فعلا صعب تكون عربيته أو يكون مأجرها مثلا أو يكون صاحبها ومعندهوش فكرة ثقافته بتقوله مثلا هو مياه هنشربها ؟ دا بنزين وكله هيمشى فيه ناس ممكن تكون مش بتصدق إن بنزين 92 مصمم لعربيات و80 ليه عربيات

[mohammedabdallh]

ممكن انه مش لاقى بنزين او مهمعهوش حق 92 او 95

[tarek_2005]

اسف في التشبيه دي ناس متعرفش عن العربيات الا اديها برسيم وكرباج ورا

[mohammedabdallh]

اسف في التشبيه دي ناس متعرفش عن العربيات الا اديها برسيم وكرباج ورا

[mr_vampire]

فرضا عربيته وجابها ومش عارف يصرف علي بنزينها ال 90 او ال 92 فبدل مايركنها عايز يستغلها بدل مايتبهدل في مواصلات... فين المشكلة بقي ؟؟؟؟؟؟؟؟؟؟

[MohammedAladel]

فيه حد يا راجل يا طيب معاه سوبيرب ومش قادر على مصاريفها ؟؟ كان باعها وجاب حاجة أقل لو هو فعلا مش قادر على مصاريفها لكن دى لامبالاة أو عشان أزمة البنزين برضه ومفيش 92 أو 90 والراجل وراه مشوار ضرورى أنالو مكانه لو ورايا أيه أركنها وأنزل مواصلات دى عربية بتمن برضه

[nicegypt]

فرضا عربيته وجابها ومش عارف يصرف علي بنزينها ال 90 او ال 92 فبدل مايركنها عايز يستغلها بدل مايتبهدل في مواصلات... فين المشكلة بقي ؟؟؟؟؟؟؟؟؟؟

باشا .. كلام الناس مش على النقطة دي خالص نهائى
الكلام هنا من الناحية الفنية .. ان المواتير دي انضغاطها مش 81 وكلام من دة علشان
يحط لها بنزين قليل .. دة كدة بيضر موتورة وهيسقط موتور ف القريب العاجل
غير انها مستحيل تبقى مظبوطة معة

[mr_vampire]

فيه حد يا راجل يا طيب معاه سوبيرب ومش قادر على مصاريفها ؟؟ كان باعها وجاب حاجة أقل لو هو فعلا مش قادر على مصاريفها لكن دى لامبالاة أو عشان أزمة البنزين برضه ومفيش 92 أو 90 والراجل وراه مشوار ضرورى أنالو مكانه لو ورايا أيه أركنها وأنزل مواصلات دى عربية بتمن برضه

والله ياباشا منعرفش ظروفه واولوياته..... انا اعرف واحد معاه مازدا ثري 2012 واتزنق فبيحطلها 80 ومش عايز يبيعها عشان ميخسرش عشان يوفر فرق السعر لاولويات عنده.

- فمش شرط تكون لامبارلاة ولا عشان ازمة بنزين....ممكن ووارد جدا برده عشان ياكل ولاده وتولع العربية.... ومتهيالي تصرف يحترم عليه....

فياريت ياشباب نسيب الناس باللي هي فيها اللي يحط 80 يحط واللي يحط سولار يحط.... الله يعين الناس علي اللي بتعيشه.