هل بتتحول لما تركب عربيتك؟

[marsguy]

عندي سؤال

هل من الممكن التحول يبقى بالعكس؟

يعني هل ممكن واحد عصبي بطبيعته يتحول إلى إنسان هادي عند القياده؟

انا بصراحه مافتكرش إني شفت حد كده؟ حد فيكم شاف؟

[hesham2004]

يا راجل حرام عليك...دا بمجرد ما الإسكندرانية يشوفو لوحة عربيتك إنك قاهرة ولا جيزة ولا قليوبية بتلاقي الكل بيزنق عليك ويكسر عليك و بيبقى نفسه ينزلك من العربية و يقولك خدها مشي...

حلوه اوى دى ( خدها مشى )
حجربها ، لأ فعللا حجربها

[R A N A]

عندي سؤال

هل من الممكن التحول يبقى بالعكس؟

يعني هل ممكن واحد عصبي بطبيعته يتحول إلى إنسان هادي عند القياده؟

انا بصراحه مافتكرش إني شفت حد كده؟ حد فيكم شاف؟

انا عمري ماشفت حد كده قبل كده :Angel_anim:

مستحيل على فكرة لو الانسان بطبيعته عصبي بيتحول لمجنووووووون لما بيسوق ويمشي يخبط في خلق الله

انا لما بكون مضايقة بيبقي ماليش نفس اسوق عشان عارفة اني هاضايق اكتر واتوتر عشان المعاقين ذهنياً اللي الواحد بيشوفهم خصوصاً بقي سواقين الميكروباص ويليهم في المرتبة الشرفية سواقين التاكسي وفي بعض الملاكي برده تصرفاتهم غريبة بس بتبقي متعقلة شوية يعني عشان خايفين علي عربياتهم لا تتبهدل :)
بس الحق يتقال برده عشان مبقاش بعمم فعلا واقول علي المساوئ فقط ونننسي الحاجات الكويسة :)
انا برده وانا ماشية بلاقي ناس في منتهي الذوق يشوفني جاية بعربيتي يشاورلي بإيده اني اعدي من غير عقدة ( انا اللي هاعدي الاول ومتشدش متشديش انتي ، متشدش متشديش انتي :boxing_smiley:) ومرة حصلت معايا برده كنت طالعة على صلاح سالم من شارع جانبي ووقفت (انا اتعودت اني اقف تماماً عشان أأمن نفسي من المفاجآت) وكان مطلع بسيط الشخص الاولاني عدي ومسمحليش والتاني هكذا والتالت شرحة الرابع بقي وقف فبشاورله بيأس كده واقوله عدي (وببرطم وعلامات الأسي تبدو علي وجهي وبقول في سري اه عدي عدي طبعا مش هاتسناني زي غيرك) لكن اتفجأت والله لاقيته توقف تماما ووقف العربيات اللي وراه وشاورلي عشان اعدي وفضل واقف لحد ماطلعت علي الطريق بسلام طبعا شكرته في المرايا ومشيت (هو يستحق الشكر بصراحة في الزمن ده اللي يسمحلك تعدي يبقي عمل فيك جميلة) :Angel_anim:

ومرة تانية برده كان في ملف كده الناس بتدخل فيه من اليمين فأنا دخلت وعايزة اعدل عربيتي بقي فكل ماطلع سنة عشان اعدل الناس من الناحيتين تزنق عليا ومتعدينيش وانا برده اسيبهم يعدوا مش مشكلة خلييكي انتي العاقلة اجي اتحرك سنة تانية الاقي الناس برده تصمم انها تزنق ومتعدينيش :angelsad2: لحد ماخلاص كنت هاعيط لاقيت ربنا بعتلي واحد وقف تماما برده ووقف اللي وراه وشاورلي اني اعدي ومتحركش غير بعد ماعديت خالص بجد ربنا يكرمه هو والناس الذوق اللي بتساعد الناس التانية خصوصا البنات الغلابة اللي سواقتهم علي قدهم :Angel_anim:
علي فكرة انا زيي زي بنات كتيير مش بنحب نزنق ولا ونغلس في سواقتنا عن قصد علي حد ولا ناخدها بالدراع زي بعض الناس وده طبعا مش بيعجب ناس كتير ورانا تفضل تدي كلاكسات لحد ماتجنني ويبقي هاين عليا انزل من العربية واسيبها في نص الشارع كده

[noon_eg]

الواحد بيبعيش بخمسين شخصيه فى اليوم الواحد !!

الموضوع ده الحقيقه اثار فى ذهنى حقيقه انا باعيشها ويمكن اغلب الناس بيعيشوها فى الوقت الحالى وهى الحياه باكتر من اسلوب وطريقه فى اليوم الواحد والتحول من حال الى حال كانك عده اشخاص بعده شخصيات

الصباح الواحد فى البيت - شخصيه الاب الحنون الهادى

الطريق الى العمل - شخصيه سواق ميكروباس محترف تزنيق

العمل - شخصيه السيطره على الخصم والانتقام من الاعداء

الطريق الى البيت - شخصيه سواق نقل بطىء نتيجه للرهاق الزائد

المنزل مساء - شخصيه المطحون بعد عناء يوم كامل


الحقيقه ده راجع فى وجه نظرى الى ان كل الناس ماعندهاش اى تسامح ولا رحمه وظروف الحياه بقت صعبه وكلها ضغوط وكذلك البعد عن الدين

الحقيقه انا فى بعض الاوقات باقدر اخرج من الجو ده لو قرات قران او اذكار او تسبيح مع الصلاه فى اول الوقت حتحس براحه نفسيه وان الدنيا مش مستاهله كل ده
ربنا يرحمنا من انفصام الشخصيه اللى احنا عايشين فيه

[Dr Ahmed]

التحول حتمى مهما كنت طيب وهادئ ومنخفض الصوت ومسالم
بل بالذات لو كنت محترم جدا فستتحول جدا
لأن سلوك الشارع منحرف جدا جدا ولازم هيصطدم بسلوكك وفى الصدام دا لازم تتحول لذو أنياب ومخالب وإلا ضعت وسط الضباع والحمير والجُحُشة والمناطيع

أنا بخاف جدا من السماعة البلوتوث لإن عندى هاجس إن الخط هيكون فى يوم من الأيام مفتوح وحد يعرفنى يكون سامعنى وأنا باتحول فى موقف من المواقف اللى غالبا بتكون فاصل من الشتايم والأعاصير والبراكين والزجاج مقفول ومحدش سامعنى!!

!مفروض إختيار كمان فى الاستطلاع: "غالبا متحّول بس باحاول متحوّلش!"
نفسى أكظم غيظى طول الوقت لكن لحد دلوقت مجموعى فى الموضوع ده من 15 - 25 %

[ahmedfawzy14]

يا راجل حرام عليك...دا بمجرد ما الإسكندرانية يشوفو لوحة عربيتك إنك قاهرة ولا جيزة ولا قليوبية بتلاقي الكل بيزنق عليك ويكسر عليك و بيبقى نفسه ينزلك من العربية و يقولك خدها مشي...

مرة كنت في طريق العجمي "من 5 أيام كدا" و الطريق كان واقف و عينكم ما تشوف إلا النور و كأن الكل أتحولو لسواقين ميكروباصات و هوبا تزنيق من كل حتة و اللي يخش ببوز العربية لدرجة ان لازم العربيات تبقى لازقة في بعض بس متتجرحش.....ياراجل دنا حلفت مش نازل إسكندرية تاني بسبب سواقينها و شوارعها

اللى عامل كده فى العجمى سواقين السوزوكى الصغيرة عشان كلهم شباب صيع
والعربيات اصلا مترخصة ملاكى ومفيش حاكم هناك


بس اللى حصل معاك ده عشان العجمى فيها قاهروية اكتر من الاسكندرانية :laugh:

[Defender]

انا الحر هو اللي بيساعدني علي الحول
وانا من اول الربيع اللي فات وانا متحول
بس فس الشتاء مقلشليك بقي ولا بعمل اي حاجخ

بس انا لما بتحول بتحول مع نفسي
مش بشتم حد بكلم نفسي يعني اكلم نفسي واقول هو ايه التخلف دة
ممكن اجيب سيرة الحمير بس ونا بكلم نفسي بردوا

واخري لما اكون بزعق مع واحد اقوم ماشي جنبه وامشي سرعته و ابصله نظرات غضب

[shanodaa]

طبعا ممكن اتحول لو دخلت منطقه زحمه وجانبي متوسيكلات وميكروباص وناس تحب الفهلوه

[ZIMOFOX]

أقولكم نصيحة..............
بجد عاوزين تنسوا موضوع التحول
1-عند الركوب مراعاة دعاء الركوب والبسملة

بسم الله الحمد لله
( سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ )
الحمد لله، الحمد لله، الحمد لله، الله اكبر، الله اكبر، الله اكبر، سبحانك اللهم إني ظلمت نفسي فاغفر لي،إنه لا يغفر الذنوب إلا أنت"

2-ليه منسمعش قران كريم واحنا سايقين؟
لو مفيش شرائط قران او سيديهات ليه منشغلش اذاعة القران الكريم.

ربنا يحفظنا جميعا شر الطريق وشر انفسنا

[Mystique]

موضوع جميل فعلا..
أنا عن نفسي فعلا بتحول وأنا سايقة..أنا عموما ذوق ولو وقفت ف طابور ف مصلحة وحد زنق عليا بسيبه يطلع قدامي..هبل يعني..بس ساعة السواقة ببقى حاجة تانية كأني تحت تنويم مغناطيسي..سرعة وأحيانا لو استدعى الموقف باخد غرز بس مش عمال على بطال يعني..وسبحان الله بوصل أسرع مما لو كنت مشيت بالراحة. بس عمري ما زعقت ف حد إلا لو كان غلط غلطة كادت ان تسبب في حادث جامد..وممكن لو شتمت اقصاها بيبقى جوة نفسي.

[the_wheel_man]

انا الصراحة التحول عندي دة بقا حاجة طبيعية و مش بحس بيها و لو راكب جني رئيس الوزراء
عادي جدا نمشي في اي وقت و اي شارع غرز و سرعة و هبل و تقفيل علي الناس الغلابة و لو حد اجنن في عقلة و عمل علية غرزة (اجارك الله) علي العبط الي هتلاقية بيحصل في الطريق العربية تتخبط بقا تتحك تولع بس لازم اجيبة يعني لازم اجيبة (اسيبة يسبقني يعني)
و بنسبة للميكروباصات دول حبابيبي و مش بتفرق معايا يقف ولا يسد الشارع (اخدنا علي كدة خلاص) بس الصراحة بترعب من حاجة اسمها نقل عام لانة لو ريح عليا في مطلع هيجبلي ربع
و بس
و بعدين السواقة الهادية الي هو تكيف و موسيقي رومانسية و حركات كدة تنعس الواحد و كدة هننام علي الدريكسيون لكن الحوارات بقا و السرعة بترفع الضغط و تزود تركيذك و كدة متنامش
و لا انتو مش معايا
و كل سنة و انتو طيبين

[Amrrr]

عمري ماتكلمت مع حد في الموضوع دا وكنت فاكرها حاجة شخصية بتحصلي انا بس
بتحول لما حد ينرفذني ( اي عربية غير الملاكي & والملاكي اللي راكبها سواق ) غير كدة لما حد بيبقى سايق عربية بتاعته اكيد بيبقى كويس وسواقتة هادية عشان تعبان فيها غير كدة اي نوع تاني بيبقى سايق محتاج علاج نفسي عشان بياخد الموضوع على نفسة لو عديت من قدامة في تقاطع او حاجة زي كدة
زي مثلا لما تبقى عايز تكسر على حد مثلا وتلحق ملف مفيش اي حد هيقف الا اذا بصيت له وطلعت ايدك في حركة تشبه الاستئذان مثلا هتلاقيه سابك ومفيش مشاكل لكن تدي اشارة وتدخل !لأ طبعا !!!
لاحظوا معايا لما تنزل يوم الجمعة وتروح اي مشوار اغلب العربيات اللي حواليك بتكون ملاكي وسرعتها هادية والناس ماشية باحتها كدة وغالبا مش بيكون في تحول في اليوم دا !!

[Amrrr]

طبعا ممكن اتحول لو دخلت منطقه زحمه وجانبي متوسيكلات وميكروباص وناس تحب الفهلوه

انت جبت من الآخر كنت عايز اقول كدة

[MedaSam]

ايه ده ...... أخيرا وجدت ناس متحوليين زي .... أنا كنت فاكر اني الوحيد اللي عيان ....... يا سلام كده الواحد يتحول براحته :k16:

أنا أول ما باركب العربيه بحس اني في سباق م لازم اكسبه .... أي واحد بيعدي جنبي يبقي بيتحداني ...... مش عارف ليه بفكر كده ...... عيان بقه ربنا يشفي .... و أحاول أعدي منه و لما أسبقه بكون فرحان جدا جدا ... مع انه مش بيسابقني أصلا ...... عيان بقه ربنا يشفي ..... و تلاقيني عمال أراقبه في المرايه علشان ميعديش مني

ده احدى الحالات اللي بتحولها ..... في حاله تانيه ..... ساعات أغلس علي سواقين التاكسي اللي بيستهبلوا ..... الحاله بتيجي لما أجد سواق تاكسي يقف مره واحده في وسط الشارع علشان زبون شاورله ..... أو يلاقي حارته وقفت يقوم يحود علي الحاره التانيه بدون ذره تقكير ..... أقوم أجي جنبه و أزنقه علشان ميتحركش ..... و اقعد ابصله بهبل كده ...... مره قفلت الشارع كله ورايا من الحركه ديه ....... عيان بقه ربنا يشفي

المشكله اني ساعات بسخن أصحابي و انا راكب معاهم و همه سايقين ....... مره سخنت واحد صاحبي علشان عربيه 128 عدت جنبه علي المحور بسرعه .... قام شادد وراها و كان اتجنن خالص .... بس حصل خير الحمد لله

عموما حاله السواقه في البلد تساعد بشده علي التحول .... أنا حالتي متأخره مش كده .... متخبوش عليا الحقيقه

[ahmad7610]

فعلا ... الواحد فى الأول كان بيحس انه واحد تانى لما يسوق العربية .. واى حد يضايقه لازم يشد و يجيبه وكده .. وكلاكس و شتايم احيانا و عصبية عند نزول القاهرة .. لكن دلوقتى الحمد لله هدوء
بس لما حد يغلط ويزنق كلااااااااااااكس و تكشيره ... ده لو فى حد معايا .. لو لوحدى ابتسامه لطيفة :)
----------
مش ده تحول برضه :)