التاكسى القديم سيتحول الى فيرنا فهل ستصمد هذه السيارة فى شوارع القاهرة؟؟

[emam]

متنسوش ان الفيرنا واطية ودى هتعمل مشكلة لما تكون العربية محملة ويا سلام لو فيها شنطتين فى الشنطة كمان هتبقا مشكلة اكبر مع مطبات القاهرة الجميلة

[mohammedaly]

انا مش عارف ليه ما يوحدوش ماركات التاكسى ,,, يعنى يبقى السيارات التاكسى عبارة عن ماركتين او تلاتة ,,, وكل اللى معاه تاكسى قديم لما ييجى يغيره لازم يغيره بماركة من الماركات دى فليكن مثلا الفيرنا والشاهين والانوس ,,, وبعدين كمان المفروض لو الحكومة عايزه تعمل تجديد لموضوع التاكسى وتنضف شوارع القاهرة والوجه الحضارى والكلام ده يبقى تكلف بقى مش يرموا كل حاجة على اصحاب التاكسيات اللى لو كانوا قادرين كانوا جابوا جديد من نفسهم وماكانوش استنوا لما يعملوا قانون ,,, يعنى على الاقل ياخدوا منهم القديم ويخردوه ويدوهوم عربية جديدة معفية من الجمارك والضرائب والكلام ده وانتوا عارفين طبعا ساعتها العربية تقريبا هيبقى سعرها نص السوق ,,,,, انما يقولوا عايزين نضافة و هما ما يتحملوش مليم فده استهبال وتضييق على الناس الغلابة اصحاب العربيات دى

[فادى]

لن تصمد سوى سنة بالكتير,
الهيونداى فى الأغلب بتحتاج تغيير اسطوانة قبل ال100 الف,
و عمر المحرك ما بيكمل ال150 الف قبل ما يحتاج الى عمرة,
أما العفشة فبتنهار تقريبا بعد ال100 الف الاولى, التاكسى هيحتاج لعربية معمرة و قوية و قادرة على حمل عدد كبير من الركاب و هو ما لا يتوفر فى الفيرنا,
الشاهين أعتقد انها أنسب, محرك قوى قادر على حمل الأوزان الثقيلة, أجزائها الأساسية معمرة لأقصى حد, سيارة قوية البنية و متينة و جسمها متماسك فى مختلف الظروف بعكس الفيرنا.
و على فكرة فرق التكنولوجيا بين الفيرنا و الشاهين ليس كبيرا بل ربما تكون الشاهين أفضل فى كل شىء, لأن الكوريون يصنعون سيارات متخلفة تكنولوجيا لكن بغلاف حديث نوعيا,
الشاهين متخلفة تكنولوجيا بالنسبة للجيتا و البيجو 308 و الفيات برافو, لكنها متفوقة تكنولوجيا أو على الأقل تقف على قدم المساواة مع الهيونداى و اللانوس و اللانسر.

[Nile_Storm]

[quote=فادى;366835]لن تصمد سوى سنة بالكتير,
الهيونداى فى الأغلب بتحتاج تغيير اسطوانة قبل ال100 الف,
و عمر المحرك ما بيكمل ال150 الف قبل ما يحتاج الى عمرة,
أما العفشة فبتنهار تقريبا بعد ال100 الف الاولىquote]




اولا حضرتك الفيرنا من 2004 وهي ماشيه في الشارع مستمعناش الكلام ده كله
ثانيا من نفس المدهخ دي و هش يغاله تاكسي في الاقاليم و علي فكره الاقالبم مش الشوارع الرئيسيه الكويسه اللي بنشوفها دي لو دخلتو فيها جوه هتشوفو بلاوي اسوا من القاهره

ثالثا اقدر حبك للسياره الشاهين لكن صعب اوي انك تقول ان الشاهين تتساوي تكنولوجيا مع الدايو و الهيونداي
ممكن تقول تستحمل اه انما توازيهم و كمان تتفوق تكنولوجيا صعب اوي
علي فكره انا سقت الاتنين

[MMamdouh]

مش معنى ان عربية نجحت كا ملاكى انها حتنجح كا تاكسى... فيه فرق بين عربية بتمشى 20 كيلو فى اليوم و عربية بتمشى 24 ساعة لف فى البلد و بيتغير عليها 3 سواقين فى 3 ورديات

طبيعة القاهرة الكبرى تختلف تماما عن اى محافظة من حيث طبيعة المرور و المسافات و الزحام و مطبات و خلافة

اللانوس و الفيرنا يوم ما تتزنق اوى حتحط بنزين 90 و العربية مش حتبقى ماشية معاك 10 على 10 و فى الغالب الكل بيحط 92 لان الفرق بريزة... فى الشاهين اعتقد ينفع تستعمل 80 و بالتالى دى ميزة كبيرة من الناحية الاقصادية

و كمان قطع الغيار فى الشاهين ارخص كتير من الكورى بشكل عام دا غير ان اى حد ممكن يشتغل فيها لانها مش معقدة زى العربيات الحديثة

مش حينفع تحط شبكة على سقف الفيرنا ولا اللانوس لان صاجها اضعف من الشاهين ياما تحط شبكة من الصغيرة بتاعت العربيات الجديدة و دى زى قلتها فى حالة التاكسى

كل ما سبق ينطبق على اللادا

من ناحية تانية حيبقى فيه مشاكل لو انتشرت اللانوس و الففيرنا تاكسى منها اتجاه المستوردين لقطع الغيار الصينى و المضروب و خلافة عشان يوفروا قطع غيار رخيصة لشريحة التكسجية و بالتالى دة حينعكس بالسلب على راكبى الملاكى اللى مش حيلاقوا قطع غيار اصلية

تكلفة صيانة اى من الفرنا او اللانوس فى توكيلاتها مكلفة جدا الا اذا كنت ناوى تستغنى عن الضمان (3 سنوات او 60 الف حسب ما افتكر)

سواقين التاكسى اساسا مبيعرفوش يسوقوا او عفيجية او مبرشمين... ادى واحد من دول عربية حديثة و خفيفة و جراية... حوادث بالعبيط

كلمة اخيرة.... غبووووور

MMamdouh

[Ahmed Anwer]

انا فى راى انها هتصمد وتتحمل العمل كتاكسى

وطبقا لكلام مهندس فى شركة كار جاس ان محرك الفيرنا بيشتغل مع الغاز بطريقة افضل من غيره من المحركات , وطبعا ده اختيار كل سائقى التاكسى (التحويل للغاز)

كما ان اختيار الفيرنا كتاكسى هيزيد انتشرها اكتر ماهى منتشرة فعلا وبالتالى رخص قطع الغيار وزيادة الفنيين اللى بيفهمو فيها ويقل احتياجها للتوكيل

فعلا في بورسعيد التاكسي كله تقريبا بلا استثناء فيرنا و اكسنت قديمة

و كله محول غاز و لما ركبته كان ادائه عادي جدا

و طبعا مبيشفوش التوكيل

[Nile_Storm]

معتقدش ان غبور او ابو الفتوح او شركه النصر حتي هيبقي ليها دور في الموضوع ده
لانه ببساطه صعب اوي انك تلاقي سواق تاكسي بيصلح عربيته في التوكيل حتي لو كانت شاهين

[AHMEDCAR]

معتقدش ان غبور او ابو الفتوح او شركه النصر حتي هيبقي ليها دور في الموضوع ده
لانه ببساطه صعب اوي انك تلاقي سواق تاكسي بيصلح عربيته في التوكيل حتي لو كانت شاهين

مختلف معاك انا شوفت فيرنا 1600 ابيض و اسود على رائى الناس موجوده فى التوكيل بتغير و ش سلندر و كانت غاز و كان الكلام ده فى توكيل قليوب

[aif]

الحاجة ام الاختراع
لو مش ح تصمد .... الميكانيكية والعفشجية والصنايعية ح يخلوها تصمد ....وكل ما العدد زاد كل ما القطع رخصت

[MMamdouh]

الحاجة ام الاختراع
لو مش ح تصمد .... الميكانيكية والعفشجية والصنايعية ح يخلوها تصمد

يعنى ظهور او ازدهار فئة الصنايعية الفهلوية و الكوفتجية فى فئة الكورى... و الصنايعى المحترم حيبقى عملة نادرة

....وكل ما العدد زاد كل ما القطع رخصت

لانها حتبقى مضروبة... و القطعة الاصلى او حتى الصناعة النضيفة حتبقى زى المخدرات

MMamdouh

[AHMEDCAR]

مشكله حكايه الصانيعى المحترم دى اليومين دول بقى عامل زى الافيونه

[MMamdouh]

و لما الطلب على الفهلوية حيزيد... حتبقى مشكلة اكبر

MMamdouh

[AHMEDCAR]

انا معايا فيرنا 1600 بحط منه النوع اللى اسمه فيسكو 2000 بيقولى ده المفروض يمشى عشره الاف كيلوا انا بصراحه بمشى عليه 3000 او 3500 بالكتير نظرا لرخص السعر

[Ahmed Anwer]

يا جماعة مش مشكلة للدرجة دي ،،

انتوا نسيتوا ان الفيرنا اكبر حجم مبيعات ملاكي في مصر

يعني مش عربية غريبة و هيحصلها طفرة مرة واحدة

ده غير اخواتها الأكبر نفس الموتور ،،

انا سمعت من واحد في غبور

انها اكثر موديل سيارة مبيعا في تاريخ مصر ،، طبقا لتقرير ايميك

مفيش اختراعات يعني ،،

[mohammedaly]

سواقين التاكسى اساسا مبيعرفوش يسوقوا او عفيجية او مبرشمين... ادى واحد من دول عربية حديثة و خفيفة و جراية... حوادث بالعبيط
MMamdouh

مع احترامى لكلامك بس المواصفات اللى انت بتوصفها دى تنطبق على سواقين ميكروباصات مش سواق تاكسى مرمى فى الشارع على الاقل 12 ساعة بيسوق والشاذ منهم هو اللى بيبقى بالمواصفات دى ,,, يعنى ما ينفعش نعمم و مشكلة السواقة فى مصر عامة انه كله بيقول على غيره انه ما بيعرفش يسوق وبيبقى فاكر نفسه مايكل شوماخر للاسف ,,, يعنى انا النهاردة باشمهندس سايق عربية "ملاكى" وجايب الشارع بضهره وانا كان وشى لاتجاه العربيات والبيه خبطنى فى ضهرى وداس على رجلى وبيقولى معلش وكمل رجوع بضهره ولا كان فى حاجة حصلت ,,, هاقول انا بقى على سواقين الملاكى انهم ما بيعرفوش يسوقوا وعفجية لا طبعا لان مش كل اللى بيسوقوا وحشين ,,, وعامة انا فى امنية نفسى شركات العربيات تعملها فى العربيات اللى بتنزل مصر يلغوا الغيار بتاع المارشدير او يحددوله مسافة رجوع ما تزيدش عن تلات او اربع امتار عشان البهوات اللى فاكرين نفسهم فى الملاهى وبياخدوا الشوارع بضهرهم لما تفوته دخله ولا حاجة ويكسل يكمل شوية ويخش من دخله غيرها