هم يضحك وهم يبكي

[friendship7897]

امشي عدل يحتار مرورك فيك
قليل البخت يلاقي العضم في الكرشة
دي شوية أمثال بلدي من اللي شوفته إمبارح
أنا هحكي لكم موقف حصل لي أمبارح بعد ما فطرت علبة زبادي (كل حاجة والعكس)
نزلت من بيتي صباحاً رايحة لشغلي وكل يوم لازم أقدم ريبورت الساعة 9
المسافة من بيتي للشركة لا تتعدى ربع ساعة ، وكانت الساعة 8.30
لاقيت الدنيا زحمة جداً وكل الناس بترجع وتمشي عكس
شغلت الإنتظار حتى أقرر هعمل أيه - لأن عمري ما مشيت عكسي ولا كسرت إشارة ، وبحاول أكون مثالية شوية وبتبع قواعد المرور وأدب المرور ، وخاصة بعد ما أخدت مخالفة قبل كدة صف تاني وهي دي المخالفة الوحيدة اللي أخدتها خلال فترة سواقتي للعربية من أكثر من 15 سنة
لاقيت كل العربيات بترجع وتمشي عكسي شارع شمال
فأنا وأعوذ بالله من كلمة أنا – بس أنا برضوا – قررت أمشي عكسي زيهم بس في شارع يمين
عند المنطقة الحرة
وما بيا ولا عليا لاقيت عربية جيب عاااااليا سوداء اللون على شمال الطريق ( يعني يمين طريقي الخطأ )
فخفت هذه العربية السوداء الضخمة تخبطني
فضربت لها الإضاءة العليا أكثر من مرة لكي تتنحى جانباً ( فلاشر يعني )
وإذ بموتوسيكلات ضابطين تجمعوا حولي (وكان هذا موكب لأحد الرجال المهمة في البلد )
وطلب منى أحد الضباط رخصتى الخاصة ورخصة العربية وقال لي أتبعيني دون أن أخذ وصل
فترجيته أن يتركنى وأدفع له أي مبلغ ( على فكرة أنا مقصدتش رشوة لا سمح الله – أنا كنت أقصد أدفع دلوقتي بدل ما أدبهدل في المرور ) ، وأعرف إن في ناس عملت كدة بوصولات
تركني بسرعة وكأنني شتمته
فحاولت متابعة وسط الزحام بناءاً على طلبه ولكن هيهات
فتركت الطريق وذهبت لعملي لكي أستفسر ماذا أفعل في هذه الحالة
فلم يفيدني أحد في الشركة .
فكررت أنزل لأقرب كمين لأسأل الضباط المسؤولين عن الكمين
فوجدت رائد فسألته فحاول باللاسلكي معرفة من الضابط اللي أخذ رخصي ولكنه لم يعرفه لأنه لم يكن كمين ثابت بل من حراس المسئول
فقال لي : أذهبي إلى قسم مدينة نصر وأسأل على الرخص وصلت ولا لأ وقال لي اسم عقيد
فعدت إلى الشركة مرة أخرى – لإستشير محامين القطاع القانوني
فتضاربت الأقوال : من قال لي : أوعي تروحي هيتقبض عليكي
ومن قال لي : روحي ولا فيها أي حاجة هتدفعي فقط
المهم قررت الذهاب وتوكلت على الله
وذهبت للعقيد هناك : من أكثر الناس إحتراماً وخدوم وكأنني روحت له بواسطة
جزاه الله خيراً
وأول ما قولت له : أنا رخصي أتسحبت في المنطقة الحرة : قال لي أنتي العربية اللانوس برقم كذا وأسمك كذا
أنت هربتي ليه ؟
هربت !!! أنا لم أهرب !!!
فقال : الضابط قال لكي أتبعيني ، فلماذا لم تتبعيه
قلت له : ما حدث أني لم أستطيع متابعته ولم أهرب ، فتعاطف معى وبعد عدة مكالمات على الموبايل واللاسلكي
قال لي إذهبي إلى العميد / فلان في مرور الدراسة
وحد فعلاً أكثر ذوقاً وإحترام جزاه الله خيراً أيضاً ، وما حدث مع العقيد اللي في قسم مدينة نصر تم مرة أخرى
وأول ما قولت له : أنا رخصي أتسحبت في المنطقة الحرة : قال لي أنتي العربية اللانوس برقم كذا وأسمك كذا
أنت هربتي ليه ؟
هربت !!! أنا لم أهرب !!!
فقال : الضابط قال لكي أتبعيني ، فلماذا لم تتبعيه
فحسيت في الوقت دا أني مطلوبة ومقبوض عليا
وكنت عايزة أخلع بجلدي بأي طريقة
وقولت له : هو الموضوع صعب كدة
فقام بعدة مكالمات – ليتوصل إلى رخصي ، فوصل للضابط
وسأله هل فيه أوامر معينة من المسؤل الكبير
وفعلاً كان متوصي ضدي
والحمد لله الحمد لله – وبعد عدة مكالمات لبعض الأقارب والمعارف – تم دفع الغرامة فقط دون التحويل للنيابة .
أنا حبيت أحكي لكم علشان نخرج ببعض الإستفادة
أولاً : توكل على الله
ثانياً : أياك وترك إذكار الصباح والمساء
ثالثاً : تذكر دعاء ركوب الدابة
رابعاً : إياك والمشي العكسي
لأني رغم بداية الموضوع الغير موفق
إلا أني والحمد لله شعرت أني ربي بجانبي ( وما توفيقي إلا بالله ) في نهايته

[mado83]

والحمد لله الحمد لله – وبعد عدة مكالمات لبعض الأقارب والمعارف – تم دفع الغرامة فقط دون التحويل للنيابة .

لسه البلد ماشيه بالاتصالات برضو زى ماهيا
وعلى فكره لولا انك بنت علشان كده ماتبهدلتيش انما لو راجل كان اتروق مشاوير


كان نفسى اجيلك بالعيش والحلاوه بس مالكيش نصيب تاكليهم
وكانو هيصوروكى من التلات جوانب وتتحط فى الفيش

[Elsebily]

انا مش فاهم انتو ليه بتعتبروا اني اما حد من الناس دي يعاملكم كويس انه بيتفضل عليكم بكده بالعكس ده واجب عليه انه يتعامل باحترام وبعدين الناس بقت تمشي عكس من الاستهبال بتاع المرور والدنيا اللي كلها واقفه بسببهم وكونهم يوصلو واحده زيك ملتزمه من 15 سنه معملتش الا مخالفه واحده انها تمشي عكس يبقي العيب من عندهم ومكنش مفروض اصلا تديلو رخصه من غير ما يديكي الوصل وتعرفى هتاخديها منين

[المنسي]

الحمد لله انك بخير

[mo3tazanas]

واللهى كويس ان لسة فى مرور اساسا

[S O P H O S]

الحمد الله انها عدت علي خير
معلش

[rompo10]

حمد الله علي سلامتك اهم حاجه المسئول الكبير مايكنش زعلاان مننا ربنا ياخده هو واكبر راس في البلد

[Sehsss]

قدر الله وما شاء فعل

[mohamed_selim]

مين المسئول الكبير؟ :)

[friendship7897]

مين المسئول الكبير؟ :)

هرد على حضرتك على الخاص
علشان ما تتسحبش رخصتي دلوقتي
وأرجوك ما تضحكش

[SHNORY]

فكرتيني بمره كنت مزوغ من المدرسه ومسكني مفتش جاي من القاهره يفتش علي مدرستنا ههههههههههههههههههههههه
مكانش فيه واسطه تنفع تتجابله ده الا وزير التعليم هههههههههههه
انتي برضه موضوعك ده مينفعلهوش واسطه الا الريس او رئيس الوزراء

[sakr_skoda]

صحيح والله قليل البخت يلاقى العظم فى الكرشة:::::: على فكرة انا برضو باحب التزم بقواعد المرور جدا جدا ومنتظر حدث يحدث شبيه موقفك لأن بساطة الماشى غلط فى البد دى اليومين دولا بيعدى والصح هو اللى بيقع ياعنى عليه........

[calipha3]

الشعب يريد معرفة مين المسئول ده :d

[mamo1700]

الحمد الله انها جات علي كده

[M.Ayman]

هاهاهاهاهاهااها والله عندك حق هم يبكي و هم يضحك ، عموما العقيد اللي في مرور رابعه فعلا اتعاملت معاه راجل محترم لابعد الحدود و قبل كده والدتي كانت بترخص و موظفه خلتها تروح تعمل مشوار ملوش لزمه كان ممكن متعملوش راح للموظفه و غسلها لدرجة ان وادتي قالتله معلش مش مشكله انا مش متضرره من المشوار بس هو اصر انه يعلم الموظفه متتعبش الناس علي الفاضي و موقف ليه تاني مع واحد صاحبي في شرطه كان مرخص عربية واده فيميه زمان وجيه علي العربيه مخالفات و تظلم و الها بقت حاجه بسيطه فراح للمرور علشان يسقط المخالفات دي و يدفعها و لما العقيد شاف الرخصه اللي مثبوت فيها الفيميه اتجنن و جاب الموظفين كلهم و شدهم و خدهم جزاءات و حتي صاحبي منجيش من كلامه ...... مرور الدراسه متعاملتش معاهم بس ربنا يكت من النوعيات اللي بتعرف تعامل الناس و عندها ضمير في شغلها .... الجزء اللي مشتيه مخالف في المنطقه الحره ده تقريبا زحمه علشان المجاري او ماسورة مياه ضاربه في اتجاه و مش ممشيه غير حاره و الكل بياخد الجزء ده مخالف فعلا انا مخدتوش مخالف علشان مكنتش مستعجل بس لو كان ورايا حاجه كنت اضطريت اطلع مخالف برضه .... ده غير ان كان في فتر طويله جدا المياه كانت مغرقه الشارع ده و تصميمه غبي مبيهربش المايه اللي فيه و كان سادد الحرات كلها و العربيه اللي تعدي تبوظ في النص من ارتفاع المياه لدرجه انه في الاخر جابوا عربيه نقل شفطت المايه دي