و ماذا بعد انخفاض سعر الدولار ؟

[zooma2009]

انا معاكو وشايف ان لازم يكون لنا رد ايجابي قوي ضد جشع واستغلال التجاار

سعر العربيات لما الدولار كان بيزيد كان بيزيد ف نفس اليوم علطوول .... ليه لحد دلوقت مشوفناش اي تخفيض عالعربيات

منبقاش رجاله لو سكتنا علي حقنا

[rompo10]

ممكن ندخل جهاز حمايه المستهلك

[shaddadfalcon1]

اللي بيحصل من التجار كالأتي:

الاسعار مثلا ب 100 الف وهووووووووب اي حاجه تحصل يقومو تاني يوم علي طول معليين الأسعار مع انهم عندهم مخزون بالأسعار القديمه

بعد ماالهووووووووب تعدي تلاقيهم برده بيبيعو بنفس الأسعار العاليه طيب ليه ياعم الحج؟ يقولك اصلنا شاريين المخزون بالعالي
ويفضل كده لحد مالناس تتعود علي السعر الجديده وهوووووووب يقوم عامل خصم 1000 ولا 2000 تقوم الناس زي الشاطرين شاريين كتييير وهووووب يرجع السعر تاني زي ماكان اللي هو عالي وبالتالي الناس خلاص تبقي متعوده ان ده السعر الطبيعي

[devil_storm]

الدولار نزل الدولار طلع العربيات بتزيد... سبحان الله!!' حتي الجمارك لما بتنزل برده الاسعار بتزيد

[د.اشرف هنداوى]

في انتظار (خلوها تصدي و موديلها يعدي 2)

[smsmsaad]

كل كلام الرجالة الافاضل صح مية فى المية
بس متهيألى مهاش حل لان العيب فينا احنا كمستهلكين، معندناش ثقافة المقاطعة زى الدول المتحضرة

[2CODE]

ده مش حل للازمة بتاعة الدولار يا شباب ده عطاء لمده وهيخلص انما الحالة الاقتصادية اخبارها ايه ؟

متضحكش علينا الحكومة - مش معني اني اضخ مبلغ من المال يعني انا كده حليت مشكلة الاقتصاد لا طبعاً

عارفين ده اشبه بأيه ؟

لما اجي اديك 100 جنية وانت ممعكش فلوس وتيجي انت تفضل تصرف في الـ100 جنية دي هتخلص طبعاً طيب وبعدها ؟ هترجع شحات تاني

اتمنى تكون وصلت وجهة النظر

[mohamed_selim]

الفكره ان فعلا الجنيه ضعيف امام الدولار بس هل فعلا قيمته ٨ جنيه زى ما شفنا؟
لا و الدليل ان مجرد ما اشاعه طلعت او خبر ان فى عطاء هينزل سعره نزل جامد
المفروض السعر يثبت على القيمه الحقيقيه اللى فى رايى حوالين ٧٢٥ فبالتالى الزياده و النزول ده دليل على المضاربات مش القيمه الحقيقيه .... ده لا يمنع ان المفروض نلاقى حل لان حتى لو زياده بسيطه بس هتفضل مستمره نتيجة الحال المتدهور

[SAMEH_FOUAD]

ازاى وامبارح كان الدولار رسمى ب 6.89 وانهاردة اصبح ب 6.91 قرش ؟؟؟؟؟؟؟؟؟

هو نزل بناء على اية ؟؟؟؟

[د.اشرف هنداوى]

هو بكدة السعر الرسمي بيقرب من سعر السوق السوداء يعني في حدود 7 جنيه و بكدة - نتمني- ان ما يبقاش فيه مضاربات و لا سوق سوداء

انا اتصلت النهاردة بنيسان علشان اعرف سعر التيدا الفئة التانية لقيتها ب 133 الف (زيادة 8 الاف ) يعني ما زادتش اي زيادات جديده - الجين 2 بنفس السعر 110 الف من فترة - يرليانس زادت 900 جنيه تقريبا بس

يبقي السؤال ليه توكيلات زي هيونداي و كيا و رينو علي سبيل المثال الاسعار بتتتتتتتتتتتتتتتنننننننننننننننط كل يوم؟؟

علشان الطلب عليهم كتير ؟ طيب ده مالوش علاقة بسعر الدولار

ده له علاقة بالجشع

يبقي - مثلا- نقدر نقاطع توكيلات جشعة زي دي

غبور المستفز كل سنة يزود الاسعار و بعدين يعمل تخفيض 3 الاف جنيه !!!!! حاجة في منهي الاستفزاز و القرف


باختصار الجشع - مش بس سعر الدولار - هو السبب في الازمات بتاعة البلد في العربيات و الاكل و اللبس و غيره

يبقي اللي مش مستعجل علي عربية ما يشتريش دلوقتي---- و اللي محتاج يجيب من توكيلات محترمة مش شغالة

زي المنشار كل اسبوع تقريبا

و هذا اضعف الايمان

[Hondawy_2008]

ده مش حل للازمة بتاعة الدولار يا شباب ده عطاء لمده وهيخلص انما الحالة الاقتصادية اخبارها ايه ؟

متضحكش علينا الحكومة - مش معني اني اضخ مبلغ من المال يعني انا كده حليت مشكلة الاقتصاد لا طبعاً

عارفين ده اشبه بأيه ؟

لما اجي اديك 100 جنية وانت ممعكش فلوس وتيجي انت تفضل تصرف في الـ100 جنية دي هتخلص طبعاً طيب وبعدها ؟ هترجع شحات تاني

اتمنى تكون وصلت وجهة النظر

+111111111111111111111

والله العظيم كنت داخل أكتب الكلمتين دول

يا جماعة ده مجرد مسكن يا فرحتي البنك اللمركزي ضخ فلوس و ضخ دولارات السعر دلوقتي 8 جنيه هو ضخ خلاه 7 صح؟

هيجي وقت مش بعيد بعد كام شهر مثلا مش هيقدر يضخ دولارات تاني هوب هيحصل تحرير سعر الصرف هوب الدولار بقا ب 9 و ممكن 9 ونص كمان على آخر السنة

هو أصلا معتمد أن لما يعمل الحركة الخايبة دي كل الناس اللي مخزنة دولارات تجري تغيرها مصري فتزيد عنده السيولة و السعر يقل بجد ابسيليوتلي لأ طبعا الناس مش هبل و هيشتروا دلوقتي بدل ميبيعوا فبالتلي السعر هيعلى تاني عشان المخزون كدة هيخلص أسرع

أخوان لكن ظرفاء رحمتك يا رب

انهيار سعر الجنيه مصدره حاليا وقوع الاقتصاد مش العرض و الطلب عشان احنا بنستورد أكتر مبنصدر بدل الاخوان ميحله المشكلة من جدرها و يعملوا مصانع و نصدر أكتر مبنستورد وساعتها الجنيه هيعلا فعليا لكن بدل دة يدوا الشعب حقنة عشان لما مفعولها يخلص نلاقي الدولار كسر ال 9 جنيه ايه الغباوة ديه !!!!!!!

[Land_Cruiser]

طالما مفيش إنتاج يبقي مفيش اي حاجه هتتحل. الفلوس هتتصرف في اي كلام فارغ كالعاده و عليها الفلوس اللي بيلموها اليومين دول عن طريق رفع اسعار كل حاجه دي كمان . لابد ان الفلوس تتصرف علي دعم الانتاج اللي بدوره هيجيب فلوس تانيه

[د.اشرف هنداوى]

طبعا كل دي حلول مؤقته لغاية ما ربنا ينزل علينا رحمته :

حكومة جديدة

او

رئيس جديد

او شعب جديد يشتغل

الهدف من الموضوع ان احنا نبقي ايجابيين لغاية ما ربنا يفرجها

[dede_dodo88]

"من يتحدث عن أنخفاض سعر الدولار.. هم المنخفضون"

أستنوا بس على رمضان كده و نشوف الجنيه هيبقى عامل أيه قدام كل العملات!!..

We're moving towards Dollarization baby!!

[mohamed_selim]

مهما اشخاص اتغيرت مفيش حاجه هتتغير
لازم ننتج و سياسات الحكومه تتغير سواء للحكومه دى او غيرها