اطول مسافة سوقتها كانت كام كيلو ؟

[lanos2004]

من القاهرة الى اسوان فى شدة واحده التوقف للبنزين وايضا اكلنا فول بالزبدة وبيض وجبنه وشاى فى عشه على الطريق

[elpasha1]

اطول مسافة كانت من الجيزة الي العريش بس معرفش كام كيلو

[abo_lamar]

اطول مسافة سوقتها من مكة للمدينة حوالي 550 كم

[D . a .\ AYMAN]

أطول مرة سواقة كانت من القاهرة للأقصر مرورا بطريق الصعيد الجديد الشرقي ثم أسيوط ثم زراعي لغاية الأقصر شوية غربي وشوية شرقي


حوالي 900 كيلو تقريبا من غير الفكة يعني دخلة أسيوط دخلة سوهاج دخلة قنا ... التوهان شوية جوة بعض القرى

كل ده مرة واحدة بدون التوقف غير للبنزين وشراء مياة وكدة


والعودة بنفس الطريقة


.... بس بصراحة برغم إن الطريق الزراعي لا يمكن أن يقال عليه طريق أساسا .. لكن المناظر الطبيعية والجبال والزراعات عليه مع النيل لما بيجتمعو الثلاثة بيكون رهيب .. من جمال الطريق ده أنا كنت ماشي عليه براحتي جدا لدرجة إني خدت 400 - 500 كيلو متر في حوالي 8 ساعات متواصل .. وبعد كدة طريق الصعيد الجديد بتاع الجيش حوالي 450 كيلو أخرى في 3 ساعات ونص



ودي بعض صور لطريق الصعيد الجديد اللي الجيش عامله

[mohamedxsayed]

ايام ما كنت فى السعوديه جده - الرياض تقريبا 950 كيلو او 1000

[أحمد جودة]

أنا بقي الوضع مختلف ويعتبر مشاركة كوميدية

اول ماتعلمت السواقة قولت اسافر من حلوان للشرقية وعلشان لسة متعلم السواقة ومكنتش بعرفش أولع سجارة وأنا سايق فقررت أخد معايا سندوتشات ومخبوزات وترمس الشاي وملاية لزوم الرست والاستراحات فى الطريق لاني كنت عامل حسابي ماضغطش على نفسي واسوق ساعتين ونصف متواصل ......... والغريب ان فى نص السكة اكتشفت اني ممكن اكمل الرحلة منغير استراحة فقررت اركن بس علشان اولع سجارة وكملت الرحلة اللي هيا 130 كيلو بالكتير بس طبعا عارفين فى مصر المشوار ممكن يبقي مسافة لا تتجاوز 50 كيلو وتاخدهم فى اربع ساعات عادي

تحياتي

[fghahkj]

اطول سواقه متواصله لى كانت من القاهره لبورسعيد لدمياط لحدائق القبه فى القاهره ثم لشرم الشيخ بدون راحه وكانت بعربيه فان 2004

[dr.hazem]

انا كنت فاكر انه اطول مرة سافرتها بالبر انما لو عالسواقه بنفسي فهي 400 كيلو من عمان الى العقبة :-D

العربيات الكبيرة السفر بيها مريح انما الصغيرة متعب..
تحياتي

Sent from my Xperia Arc S using Forum Runner

[Samir Elshahawy]

- القاهرة / الغردقة / خليج مكادي = حوالي 480 كم (دايو لانوس - تويتا ياريس)
- القاهرة / بورسعيد / دمياط / بورسعيد / القاهرة = حوالي 500 كم (هيونداي ألنترا md )

[damasry]

القاهرة - الاسكندرية - رشيد - مطوبس - رشيد - الاسكندرية - القاهرة حوالى 600 كم وشوية