ايجار السيارات مشروع ياريت حد يفيدنى فيه

[mimo_mohamed]

انا عندى متسوبيشى لانسر 2008 اوتوماتيك 1600
لسه زيرو مامنتيش عليها حتى
وعايز احطها فى شركه تاجرها منى مده طويله وباعلى ايجار ممكن وتكون مضمونه وامان وترجعلى العربيه بحاله كويسه
انا عرفت ان ايجار لانسر 2008 بيكون 4000 جنيه او 4500 فى الشهر
فى المكاتب بيقولوا 3500لانهم طبعا بيطلعوا بباقى المبلغ ليهم شهريا مكسب
عايز اعرف الموضوع ده كويس امشى فيه
ولا فيه مخاطر خصوصا انى معتمد على التاجير انه هيسد اقساط العربيه
وعايز اعرف ايه الضمانات اللى اخدها ولازم اامن ولا كفايه انه هاخد ضمان من الشركه انها ترجعهالى بحاله كويسه مثلا80%
وطبعا فيه حكايات نصب كتير ومش عايز اقع فيها
عايز النصيحه منكوا

[timo_crosswind]

والله هو موضوع حلو بس لو قدرت تاجرها لشركات كبيره عشان تستخدمها لتنقلات موظفنها تكون افضل بكتير وخصوصا انها مش هتتهان زي ما هتستخدم في مكاتب الايجار وإن شاء الله هتلاقي حد في المنتدي يفيدك ا زي تامن نفسك وتاخد كل ضماناتك
وربنا يوفقك

[X_MM_X]

طب يا جماعه انا عندي سؤال في نفس الموضوع أصل انا بفكر افتح مكتب تأجير واشتري كام عربيه قسط . بس لسه عباره عن فكره

بس ليا سؤال شاغل بالي اكيد كل واحد بياخد اعربيه يأجرها هيعمل مخالفات ايه الحل في كده؟

[mimo_mohamed]

ياريت حد يجاوبنا لان الموضوع ده مهم وفيه ناس بتتخدع فيه كتير

[magdy_momo]

مشروع جميل بس عايز خبره جامده
مش اي حد يشتغل فيه
و بالنسبه للتاجير لمدد طويله
في اعلانات ماليه الجرايد بس معرفش هجص و لا حقيقه

[mimo_mohamed]

طيب يا جماعه حد يقولنا المزايا والعيوب ويفيدنا
علشان منبقاش ضحيه نصب

[alaa_dash]

طب يا جماعه انا عندي سؤال في نفس الموضوع أصل انا بفكر افتح مكتب تأجير واشتري كام عربيه قسط . بس لسه عباره عن فكره

بس ليا سؤال شاغل بالي اكيد كل واحد بياخد اعربيه يأجرها هيعمل مخالفات ايه الحل في كده؟

تعليق اولي بس ..هوه على ما سمعت انه المواطن ما يقدرش يقسط اكتر من عربية بإسمه في نفس الوقت ..ممكن تكون المعلومة خطأ او صح ..
بالنسبة بقه للسؤال التاني فلازم تعرف ضابط او وكيل نيابة او اي منصب عشان يخفضلك المخالفات الي ممكن تاكل مكسبك كله .. :)

[MoToRiZeR]

بيبقي مكتوب كمان في عقود التقسيط حظر للبيع أو التأجير

[mimo_mohamed]

ياريت حد يرد بتفاصيل الموضوع ده ضرورى

[د.أحمد سمير]

الموضوع ده كتبته من فترة ولينكه أهه

http://www.nilemotors.net/Nile/showthread.php?t=14649&highlight=%CA%C3%CC%ED%D1+%C7%E1%D3%ED%C7%D1%C7%CA

تأجير السيارات يتخذ العديد من الأشكال ويحمل الكثير من الخطورة ..
أولاً : حالة تأجير السيارة لمكتب إيجار :
في هذه الحالة أنت أمام عدة خيارات والمكتب يطلب منك عدة مطالبات :
أما الخيارات فهي :
أن تترك السيارة بشكل كامل للمكتب وفي هذه الحالة تتفق على مبلغ شهري غالباً بيكون مبلغ مش قد كدة يعني هيقولك على عربية فيرنا أو لانوس زيرو 2000 2500 شهري ، والنتيجة انه هيفحت العربية ويركبها 24 ساعة في اليوم ، ومن يقوم بهذا العمل عليه أن يكتب عقد تأجير لعدة سنوات به شرط جزائي محترم حتى لا يردون لك السيارة بعد أن تتهالك .

أن تظل السيارة معك .. ويكلموك لما ييجي زبون ، وفي هذه الحالة الإيراد مش هيكون ثابت ولا مستقر .

أن تتفق مع عدة مكاتب شريطة أن تخرج السيارة بسائق تبعك انت ، وهو أمر غالباً يكون غير مقبول إلا لو كانت سيارة فارهة يعي نبدأ بالأوكتافيا وانت طالع .

الضوابط المطلوبة منك : تأمين شامل على السيارة ، أن تكون السيارة موديل حديث .
المخاطر : أن المكتب يساوم على السعر دائماً ، أن الضمانات التي يقدمها المستأجر هي ضمانات للمكتب وليست لك ، احتمالات استخدام السيارة في جريمة وده بيحصل كتير على فكرة ، احتمالات تدمير السيارة لأن أغلب مستأجري السيارات في الفئة العادية فيرنا لانوس لانسر صني كورولا من الشباب الروش اللي هيأمرك ويفحط ويخمس ويغرز مما سيهلك السيارة في خلال سنة أو اتنين ، إن لو حصلت حاجة بسيطة في السيارة خدش ، كسر ، خبطة ...الخ هيتصالح المستأجر مع صاحب المكتب ويعوضه هو مش انت ..

الحل : لا تسلم سيارتك أبداً إلا إلى مكتب تعرف أصحابه جيداً بدرجة تبدأ أقل من الصداقة بشوية ، وإذا سلمت سيارتك لا تدعها أبداً بدون سائق محترم تكون على معرفة جيدة به .

ثانياً : حالة تأجير السيارة لشركة لا تعمل في مجال السيارات :
في هذه الحالة ستتعب في إيجاد شركة ( غالباً تكون شركة بترول أو مالتي ناشيونال ) ولابد أن تتفق أولاً قبل شراء السيارة حيث أنهم يطلبون تسليم السيارة على الزيرو من ماركات محددة ، ويكتبون عقداً غالباً يكون ثلاث سنوات بمبلغ محترم وكويس يعني بيبدأ من 3000 إلى 5000 على حسب نوع السيارة ، وده بيكون استثمار جيد ومضمون لحد ما .

ثالثاً : حالة تأجير السيارة للسياحة :
وفي هذا المجال يمكنك السؤال في المكاتب العقارية الكبيرة التي تؤجر الشقق المفروشة للعرب ، وتحاول تشتري سيارة ذات مواصفات معينة يعني تكون عائلية ، واسعة ، مريحة في السفر ...الخ . وتثبت عليها سائق محترم ( أهم حاجة يكون محترم وابن ناس ) وتأجرها في مواسم السياحة الخليجية (حوالي 100 يوم سنوي ) سعر اليوم بيكون حوالي 400- 600 جنيه في المعدل العادي ، مع العلم إن فلوس السائق بتكون عليهم مش عليك ، ولو المسألة مشيت شوية هتلاقي زبائنك بيتصلوا بك مباشرة وهيوصوا أصدقائهم واهلهم عليك وعلى سيارتك والمحك الوحيد هنا هو السائق المحترم .
وهذه آمن طريقة لكن يعيبها كثرة الاحتمالات وصعوبة الوصول السهل للزبون .

مميزات وسلبيات كل طريقة حسب الدافع وراء الإيجار :
أولاً : أنت تؤجر السيارة للاستثمار ( يعني حاجة تجيبلك عائد ملموس وعندك غالباً عربية تانية ) في هذه الحالة التأجير لشركات البترول أفضل استثمار ، ولكن يعيبه صعوبة الوصول للشركات ، يليه التأجير السياحي الذي يعيبه صعوبة الوصول للزبون ، يليه التأجير لمكتب ( أصدقائك) وغالباً هيرمولك العربية بعد أول سنة أو مع تغيير الموديل .
ثانياً : تأجير السيارة لتقليل الأقساط : هنا يكون الدافع هو تأجير السيارة لفترة تضمن سداد قسطها وقسط التأمين ( وغالباً انت ممعاكش عربية غيرها ) ، يعني بحسبة بسيطة هتحتاج تأجرها 10 ايام في الشهر وتكون معاك بقية الشهر .. الإيجار السياحي هنا هو الأمثل فأنت تؤجرها 100 يوم بما يعادل تقريباً في الحد الأدنى 40 ألف جنيه سنوي ، وهتكون معاك بقية السنة ، يليه إيجار المكاتب اللي هتكون فيه تحت رحمتهم وتدخل في دوامات زي الحالة نايمة اليومين دول ، اتفقت معاه على 110 جنيه في اليوم بالعافية ، عمولة المكتب 40% يعني العربية هتلاقيها بتتأجر بسبعين جنيه لناس هتبهدلها . وطبعاً مسألة الإيجار الدائم هتكون مستحيلة في هذه الحالة .

ثالثاً : شراء سيارتين بحيث تأجر واحدة ويدفع ريع إيجارها قسط العربيتين ، في هذه الحالة أجر واحدة للشركات ، أو أجر الاتنين بالتبادل لموسم السياحة وابعد عن المكاتب نهائياً لأنهم هيلعبوا على وتر العربيتين ويقولك الزبون عايز عربة سوداء ، ولأ ده عايزها 1600 سي سي علشان ياخدوا خير العربيتين ، المهم في هذه الحالة أن تبعد مؤقتاً عن توريط نفسك في تأجير السيارتين وإيهام نفسك بشراء سيارة ثالثة ورابعة ، لأن حادثة واحدة أو جريمة ما أو أي مصيبة هتجيبك الأرض ، اعمل هذه الحكاية فقط بعد أن تنهي أقساط أول سيارة على ألأقل .

أرجو أن أكون قد أفدتكم
تقبلوا جميعاً خالص مودتي

[د.أحمد سمير]

وده موضوع تاني عن فكرة الإيجار نفسها وتقييمها ولينكه هنا

http://www.nilemotors.net/Nile/showthread.php?p=26588#post26588

أنا فاهم تقصد إيه .. انت عايز تدفع الفلوس ، والعربية تسدد قسطها ، وتركبها فترة معقولة كل شهر .
أغلب أصحاب معارض التأجير بيقولك اشتري عربية وسبهالي 10 أيام فقط وهي هتسدد قسطها ، وبعد شوية ممكن تجيب عربية تانية ، وتأجير واحدة فقط سوف يغطي تكاليف تقسيط العربيتين . هذه خدعة قديمة بها الكثير من المحاذير .
1. أن أغلب الذين يقومون بهذا العمل هم أصحاب مكاتب التأجير لا الشركات ، وبالتالي فإن قدرتهم على حماية العربية فيها شك طبعاً .
2. أن هذه الصورة الوردية تتغير بمجرد حدوث أية مشكلة ، وسوف تجد نفسك أمام خيارين أولهما أن تخفض قيمة الإيجار لأنك محتاج الفلوس ، وثانيهما انك ترفض وتتدبس في القسط على ما يلاقوا عربية ثانية وشخص تاني يقومون معه بهذا الفعل .
3. ليه هذه المكاتب ما دام المسألة مضمونة جداً كدة لا تقم بهذا الفعل لنفسها .
4. السيارة سوف تتأجر بشكل جيد طالما هي لا زالت جديدة وبمجرد مرور سنة سوف تجد الرغبة في إيجارها تقل وبالتالي سوف تجد نفسك أمام عدد من السنوات مطلوب منك تسدد قسطها في الوقت الذي لن تكون عليها إقبال .
5. أن من يستأجر السيارة من هذه المكاتب أغلبهم من الشباب الروش اللي هايدمرلك العربية في شهور .
6. أن جميع الضمانات تقدم من مستأجر العربية للمكتب وليس لك فأنت تحت ضرس المكتب تماماً .
7. أنه بمجرد حدوث أي حادثة أو سرقة أو جريمة في السيارة ستجد نفسك في متاهات كبيرة قد لا يساعدك فيها مكتب التأجير ، خاصة أنه في كثير من الأحيان تكون أوراق المستأجر مزورة من جوازات سفر أو بطاقات لو كان ينوي ارتكاب جريمة بها أو سرقتها .
8. أن إيصال الأمانة أو الشيك على بياض الذي يحصل عليه المكتب قد يصدر من شخص معه رخصة لكنه تحت السن القانوني أقل من 21 سنة وبالتالي لن تكون له قيمة .
طيب هي كدة اتقفلت ... لأ
لو فكرت نفس التفكير لابد لك من الآتي :
1. أن تحاول تأجير السيارة لشركة محترمة ، واشهر الشركات هي شركات البترول ، وهم يطلبون مواصفات محددة في السيارات ، ويمضون معك عقداً لمدة ثلاث سنوات ، ومبلغ الإيجار تستطيع أن تدفع منه قسط سيارة معقولة لحين استكمال سداد أقساط السيارة الأولى .
2. لو لم يتوفر الخيار السابق حاول التعرف على سوق الإيجار محتاج سيارات من أي نوع ، واشتريها ، وضع عليها سائق من طرفك ، ولا تؤجرها أبداً بدون السائق ، بهذا تحافظ على السيارة من السرقة والحوادث والإهلاك .
3. ظبط حالك مع بعض سماسرة الشقق المفروشة من الطبقة الممتازة ، وأجر السيارة في الصيف بسائق محترم ومؤدب وملتزم لعائلات خليجية ، وسعر إيجار السيارة المتوسطة ( لانسر كورولا واجا سوبارو أو حتى ماتريكس ) في اليوم حوالي 350 جنيه بدون حد أقصى للكيلومترات في حوالي 100 يوم هو موسم السياحة الخليجية سوف تدر عليك ما يقارب من 30000 جنيه سنوياً سدد منهم القسط والتأمين واستخدم العربية في بقية السنة . ويمكنك أن تتواصل مع بعض مكاتب السياحة والسفر في دول الخليج لتكون معتمداً لديهم ، والمسألة سهلة ، وكل عائلة ستجد منك الالتزام سوف ترشحك لأقربائها وزملائها والعملية هتمشي يعني .

ولاحظ أنه بدون أن تتمكن من ضبط هذه الأمور لا تتسرع في شراء سيارة تحت أي وهم أو تعشيم على الإطلاق .
تقبل خالص مودتي وبالتوفيق إن شاء الله تعالى

[timo_crosswind]

بارك الله فيك ياخ احمد ونعم المعلومات والنصيحه
بس الواحد ازاي يوصل للشركات البترول واي الشركات اللي ممكن الواحد ياجرلهم العربيه ويكون مطمن؟؟؟؟

[AhMeD EzZ]

بالنسبة لشركات البترول
راجع الصفحة دي

http://www.ewaseet.com/classifieds.php?main=2&publication=11&ad_category=1&ad_class=198&ad_header=1&ad_caption=9&key=%D9%84%D8%A7%D9%86%D8%B3%D8%B1&country_id=EG

بس يا ريت لما تتصل تقولي ايه نظامهم لاني ناوي اعمل نفس الموضوع في عربية لانسر برضة

[mimo_mohamed]

طبعا افدتنا الف شكر ليك بس ناقص حاجتين
اول حاجه امتى موسم السياحه ده يعنى ايامه فى اى شهر من شهور السنه شتا ولا صيف ولا ايه ظروفه
تانى حاجه بحكم خبرتك انا معايا عربيه واحده هجيبها زيرو قريب لانسر 2008
وعايز اجرها مده طويله وللاسف مفيش سواق ممكن لو تعرف تكتبلى الشركات او الفنادق او المكان اللى اقدر اثق فيه
وعايز اعرف رايك لو وديتها مثلا شكره موبينيل ولا فودافون ولا اتصالات
هل هما امان
وهيقدروا العربيه كويس ويدفعوا حلو
ياريت تفيدنى اكتر

[mimo_mohamed]

على فكره يا كاربون اللينك بتاعك مش عايز يفتح
بس انا ممكن افيدك فى اللى انا بفكر اعمله
واقولك انت كمان تعمله لو شايف انه صح
ناوى اجيب عناوين وارقام تليفونات اكبر شركات البترول اللى فى القاهره والجيزه
وابدا بيهم واشوف ايه نظامهم
تانى حاجه اشوف شركات المحمول اتصالات وموبينيل وفودافون
تالت حاجه شركات السياحه
بس المشكله انى مش لاقى سواق اثق فيه فى كل الاحوال
فلازم احطها فى مكان اثق فيه 100%
وانت لو عندك اى معلومات حطها هنا فى التوبيك ده