ماذا تفعل أذا أضطرتك الظروف لخناقة مع سواق ميكروباص

[Hosaam]

أحبائي و أعزائي أعضاء المنتدى . أنا حابب آخد رأيكم فى موضوع كده حصل معايا يوم الخميس الماضي 3 / 4 / 2014 . يمكن هوه بعيد شوية عن موضوع موديلات و أعطال السيارات . بس بحكم أنكم أكثر مني خبرة في مشاكل السواقة و الأحتكاك مع السواقين لأعوام سابقة ( أنا لسه جديد فى المجال و بطلع بالعربية مرة واحدة في الأسبوع و عامل 5000 كيلو في 3 سنين ) . أرجو منكم أفادتي عن التصرف السليم في الحالة الآتية . الموضوع بأختصار أن بعد ما خلصت أنا و زوجتي مشتراواتنا من كارفور أسكندرية الساعة 11.30 بالليل و راجعين من شارع قناة السويس و عند مدخل النفق اللي يطلع على شارع أبوقير دخل معايا ميكروباص من تفريعة جانبية و كنت أنا اللي سابقه يعني تقدر تقول أن أنا دخلت النفق قبل منه . المهم فضلنا ماشيين تقريبا جنب بعض هوه ب وش عربيته عند نهاية عربيتي . لحد ما جينا عند بوووز رصيف مثلث يفصل بين مطلع للنفق صاعد لشارع أبوقير و بين طريق النفق الرئيسي أسفل شارع أبوقير . المهم لقيت نفسي مضطر أدي أشارة يمين و أزود السرعة عشان ما أخبطش في بوووز الرصيف لحد ما سبقته و بقيت قدامه بمسافة . المهم اللي حصل بعد كده أنه طلع يجري ورايا بالميكروباص زي المجنون لحد ما حصلني و راح حاطط الميكروباص قدامي فجأة مثبتني بيه و الحمد لله أني عرفت أمسك نفسي و ما لبستش فيه . واحد نازل زي المسعور عل خناق و معاه واحد تاني شكله زميله و كان قاعد جنبه . المهم أنه نازل فاتح صوته على آخره ( أنت أزاي تعمل كده ) و بيشوح بأيديه الأتنين و بيبرق بعينيه . صعبان عليه نفسه أني سبقته و كان حيلبس فيا من ورا و الميكروباص كان حيضيع منه . في الواقع أنا أول مرة يقابلني الموقف ده و ما بقتش عارف أعمل أيييه . هل أخرج بره العربية و لا أفضل مستني جواها . هل أفتح الأزاز اللي جنبي و لا أخليه مقفول . هل أخرج أتخانق معاه بالشلوت و البونية و لا أسيبه يعمل اللي هوه عايزه . طب وماذا لو أتهور وراح مديني بالبونية مثلا و أنا جوه العربية أو فتح عليا مطوه . ماذا أفعل هل أسيبه و أسكت و لا أعمل أيييه . طب لو شتم بالأب و الأم . هل أسكت و اعمل أني ما سمعتش حاجة و لا أرد عليه طب لو حاولت أهدي الكلب ده أهديه أزاي وبأيييه . في الواقع كل الأسئلة دي دارت في ذهني بسرعة و المدام قاعده جنبي في ذهول من المفاجأة . المهم أنا مش حقدر أكمل أيييه اللي حصل بعد كده قبل ما أعرف رأيكم لو كنتم مكاني حتعملوا أيييه و تتصرفوا أزاي . و تأكدوا أن رأيكم ده حيكون مهم جدا بالنسبالي لأني حأسترشد بيييه لو أتكرر نفس الموقف معايا بعد كده . ألتقي بكم ثانية بعد أن أعرف رأيكم . حتتصرفوا أزاي ؟



ممنوع إغراق المنتدى بتكرار موضوع أو مشاركة أكثر من مرة أو في أكثرمن قسم
تم دمج مواضيعك ويرجى عدم التكرار لتجنب مخالفة قواعد المنتدى وتعرضك للإيقاف
م ع 4

[Ahmed.Essam]

هو الموضوع لو ضرب بس وخناقة واشتباك بالايد كده ده امره سهل لان اغلب سواقين الميكروباص تقريبا من اول بوكس هيقع في الارض بس مش دي المشكلة

الناس اللي من النوع ده اجبن مما تتخيل بس هما بيعملوا كده لانهم عارفين انهم مسنودين من اهل المنطقة اللي هما فيها او من زميله اللي معاه او لان معاه مطوة او سنجة او او او

وغير كده هو شايف حضرتك شكلك مش بتاع مشاكل وزوجتك معاك فأكيد مش هيبقى عندك استعداد تنزل تأذيه او تعمل معاه مشكلة
عشان كده انا متوقع هو قال لحضرتك ايه وعمل ايه وهو عمل كده بقلب جامد لانه جبان وعارف ان حضرتك مش هينفع ترد عليه لاي سبب من اللي كلنا عارفينهم

يعني بقدر الامكان المفروض اننا نتجنب الناس دي اصلا حتى لو عارف ان في امكانك ترد عليه حتى لو بالشتيمة ودي مفيش اسهل منها بس احنا كناس محترمة بنخاف على شكلنا ومعندناش موهبة الشتيمة وسط الشارع جدا بعلو الصوت

[hugan]

مفيش مقياس
حسب طبيعتك
ومش عيب
في ناس عندها استعدا د للخناق والضرب واللي يحصل يحصل
وغالبا بيكون شباب
والحماس واخدهم
وفي ناس واكيد من كلامك انت منهم
تائثر السلامه ممهما كانت التلفيات
لاءن مش من طبيعتهم النزول لمستوي سواق ميكروباص همجي
وفي ناس واصله
وبتليفون يجيبه زي الكلب ويبوس الايادي

[amgomaa]

هعمل نفسي مش واخد بالي متنزلش لمستوى سواقين الميكروباص

Sent from my GT-S5282 using Forum Runner

[eng.salama93]

هطلع الستيك و ف وش امه لما اكومه ف الارض و بعدها ادغدغله الميكروباص

[afrikano]

بص ياغالى
انت اولا مش هينفع تتكلم او تتخانق حتى لو هو اللى غلطان او انت اللى غلطان
لان معاك المدام

بس لو انت متاكد انك مش غلطان يبقى تسيبه لحد مايخلص خالص
وتروح ماشى ولا كانك شايفه < لان معاك المدام بردو

لو بقى انت مش غلطان وهو عمل الموضوع دة تروح فاتح باب عربيتك
وتجري عليه من غير ماترد وتروح ماسكة بايدك وتعمل اللى انت عاوزه
وعلى فكرة 90% من سواقين المكروباص كلام وبس يعنى مافيش عندهم رد فعل
ومش بيشوفو نفسهم الا لما يلاقو اللى قدامهم ساكت وخايف منهم

انت لو عملت اللى قولتلك عليه دة تاكد انه مش هيقدر يعمل حاجة
ولو مسك فيك واتخانق هتلاقى 1000 واحد بيسلك .. وربنا يهدى الجميع :d

[samoreception]

حضرتك باين عليك شخص محترم واخلاقك عالية
وبصراحة انا لو مكانك هحاول اتمالك اعصابى ومش هنزل مستوى تفكيرى ليه وهحاول اخده على قد عقله وخلاص وخصوصا انى معايا مراتى فمش هبهدلها معايا فى خناقات وتسمع الفاظ خارجة وكلام ملوش لازمة

[afrikano]

لو بقى انت مش غلطان وهو عمل الموضوع دة تروح فاتح باب عربيتك
وتجري عليه من غير ماترد وتروح ماسكة بايدك وتعمل اللى انت عاوزه
وعلى فكرة 90% من سواقين المكروباص كلام وبس يعنى مافيش عندهم رد فعل
ومش بيشوفو نفسهم الا لما يلاقو اللى قدامهم ساكت وخايف منهم

انت لو عملت اللى قولتلك عليه دة تاكد انه مش هيقدر يعمل حاجة
ولو مسك فيك واتخانق هتلاقى 1000 واحد بيسلك .. وربنا يهدى الجميع :d

الكلام دة لو انت لوحدك طبعا ومش معاك المدام :d

[a_mohamedsamir]

لا تتدنى بمستواك الى هذا المستوى الهابط
فرق كبير فى الثقافه والفكر
الكلام مع الفئه دى فى حد ذاته إهانه
أنا لما بيحصل موقف زى ده بسيبه يسبق طالما ان تفكيره هداه لكده يبقى شخص لا يستحق التفكير فيه لأنك حتحرق دمك على الفاضى لكن هو إعتاد على ذلك
للأسف الموضوع عندنا فى اسكندريه أصبح زائد عن الحد من بعد ثورة 25 يناير المجيده

[mido1982]

هو زى ما قال اغلبيه الاعضاء
فعلا الناس ده اجبن مما تتخيل ولكنه بعتمد على البرشام اللى بيديه الجراه ده
انا راى تحاول متخشش فى مواجهه مع حد بالمنظر ده لان هو ممش بيبقى باقى على حاجه
وتحاول تسيطر عالموقف بحكمه
بعنى مثلا تقولو يارت تتكلم براحه
ايه اللى حصل
حيقولك انت عملت وسويت وكانى مانى
سيبه يخلص
خلاص يا سيدى حقك عليا
هو حيتكسف من نفسه ويمشى
يعنى كل موقف وليه اسلوبه

[فتح الباب]

كل الردود ذات فكر راقى ......... كل الاحترام للاخوه الزملاء . تحياتى

[Amr Elshamy]

انا اكم ما بيحصل معايا وبالاخص مع سواقين التاكسي ومرة سواق تاكسي نزل وقعد يصيح بصوت عالي وانا مردتش عليه نهائى قولتله انت راجل محترم ومتشكر لانك احترمتنى قدام مراتي طبعا هيغلط تاني ف طبيعي مش هرد عليه وانزل للمستوى دا لان الاشكال دي بتبقي مبرشمه وحتي لو مش كدا مش هعرف اتخانق ومعايا مراتي
لكن بقي لو مش معايا مراتي انا تحت الكرسى بتاعي حاجه بتوفى الغرض للاشكال اللى زي دي ف لما بكون لوحدي ببقي زيهم ويمكن على اوحش كمان " هعمل ايه مضطر "
ف نصيحه طول ما معاك مراتك اوعى تتخانق

[VTEC]

بص يا باشا فى الزمن ده اتبع مبدأ السلامه متضمنش السواق ده يبقى شارب ايه ولا واخد حبايتين مخلينه مش حاسس بنفسه فدايماّ حاول تتجنب المشاكل مع الفئه دى بالذات
انا حصل معايا موقف مشابه كنا عربيتين ورا بعض و سواق مكروباص قطع الطريق على واحد صاحبى ماشى قدامى كان حيلبسه فيه يا اما فى الرصيف بس الحمدلله عرف يلم العربيه المهم صاحبى كان معاه اتنين كمان فوقف قدامه و نزل يزعق و السواق غلطان و مش عاجبه الكلام و ابتدى يزعق و يشتم و الموضوع قلب بخناقه و كان السواق معاه واحد كمان واحنا كنا خمسه طبعاّ السواق واللى معاه اتروقو لولا الناس اللى وقفت تحوش كانوا محدش فيهم طلع من تحت ايدنا بس الحمدلله ربنا ستر ساعتها مكنش معاهم سلاح
بص حاول تبقى بارد كده و متنفعلش و دايماّ حط احتمال ان اللى قدامك ده مش باقى على حاجه سواقين المكروباصات دول ملوش بيت ولا مستقبل عشان يخاف عليه
وربنا يستر طريقنا كلنا

[MEMODINA1]

اولا الموضوع دا مهم جدا جدا وبيتكرر كل ثانية مش كل يوم ..
بص نصيحة منى فى الايام دى لو اتخانقت ممكن تروح فيها مش مجرد كلمة لاة بجد ممكن تاخد مطوة او كباس او اى حاجة لان الناس دى بتبقى شاربة وبيبقى غاية فى قلة الادب وعدم الاحترام وانعدام الاخلاق ...

بس راى بصراحة مينفعش تتخانق لانك معاك زوجتك ودا خطر كبير عليها صدقنى.. وكمان هما اتنين وانت لوحدك وطبعا محدش يقولى انى واحد بس اللى هيتخانق لاة هتلاقى الاتنين عليك ولو كانوا عشرة برضة هتلاقيهم كلهم عليك .. معدش فية رجولة اصلا فى الناس اللى زى دى ... وصدقنى اول ما هتتخانق محدش هيجى جمبك من الناس اللى فى الشارع الكلام دا كان زمان ..هيسبوك لحد ما واحد فيكم لقدر الله .. ممكن يموت التانى ..

انا كمان اتمنى اسمع رد باقى الاعضاء ..
خدوا بالكم الراجل لوحدة وكمان معاة زوجتة فياريت الردود تبقى فيها منطقية شوية ..

[hilal]

مع احترامي للجميع
تقديري للموقف كما يلي:
1- لو انا اللي غلطان ، هحاول امتص غضبه ، واعتذر له ، وغالبا بينتهي الامر على خير
2- لو هو اللي غلطان فلابد من تقدير الموقف وتوازن القوى كما يلي:
- لو معاك اسرتك ، الزوجة او الاطفال ، فلا داعي للبهدلة ، اعتذر برده وامتص غضبه عشان اسرتك
- لو لوحدك او معاك صديق ، وتقدر عليه بسهولة ، انزل واعمل معاه الواجب
- لو حسيت ان توازن القوى في صالحه ، ماتردش عليه ، حتى لو شتمك واستفزك ، لانك لازم تختار اخف الضررين
تحياتي لسيادتك