اتعرضت لحادث بلطجة !!

[Ahmod]

السلام عليكم ورحمة الله وبركاته

يوم الاربع اللى فات خلصت شغلي في حدود الساعة 4 ونص تقريبا

راجع من الشغل معايا زميلتي وماشي في شارع خاتم المرسلين (موازي لشارع الهرم)

الطريق زحمة ومليان تكاتك ومكروباصات وقرف

مكروباص تويوتا بس كان مقفول مش مركب فيه حد وجاي عمال يزنق نفسه وعايز يعدي بالعافية !!

الطريق اصلا مش مستحمل اي غلاسة وده عايز يعدي منك بالعافية !!

انا لو الطريق يسمح انه يعدي من غير غلاسة بخليه يعدي

انما الطريقة الوحيدة اللى هو يعدي بيها انه يجي جمبك ويرمي عليك والمفروض اني افرمل عشان هو يخش مكانك وانا الناس دي بتستفزني الصراحة

حاول يعدني مرتين مديتلوش فرصة بعدها الطريق وسع (لما بيكون شارع ونبي على شمالك)

قمت انا واخد شمال وسبتله اليمين وطلعتله ايدي بقوله اتفضل عدي

لقيته جي جمبي وطبعا السواق شكله فيه حاجة غلط

وبيقولي انا ممكن اكسرهالك على فكرة وقام خبطلي العربية من الرفرف القدام !!!

انا طبعا ببصله كدة ومزهول مش فاهم ؟؟ هو ايه اللى حصل !! اصلا لما الطريق فتح انا وسعتلك وسبتك تعدي

لقيته قام كسر عليا تاني وبيقولي اقفلي بقى !!! وقام معرض المكروباص قدامي عشان يقفل عليا خصوصا اني ماشي في الشمال

انا لقيت شكله غلط وانا دكتور مش بتاع لا مشاكل ولا خناقات ولا عمري اتخانقت مع حد قبل كدة وكمان معايا زملتي في الشغل قلت استعوض ربنا في الخبطة

وامشي احسن من المشاكل وقمت مدي الغيار الراجع وطلعت منه ومشيت

لقيته جاي ورايا وعمال يزعق اقف اقف !! ؟؟

خليته يجي جمبي وبقوله عايز ايه ؟ بيقولي اقفلي

وقام برضوا كاسر عليا تاني عشان اقف

انا هنا حسيت ان الموضوع مش تمام !! وانها تلكيكة عشان يقلبك او يبلطج عليك او يحصل اي حاجة لا سمح الله

فخدت قرار اني مديلوش فرصة انه يوقفني واهرب منه وخلاص

فطلعت منه وجريت وهو ورايا (طبعا الطريق اصلا زحمة وكل شوية يقف ومش مستحمل ومافيش فرصة)

لحد مالطريق قدامي وقف خالص قمت طالع بالعربية بعجلتني على الرصيف وعديت وسبته هو اتزنق في الزحمة

لقته نازل من المكروباص يجري ورايا عايز يوقفني باي طريقة بس انا كان الطريق فتح قدامي و مشيت الحمد لله وطلعت على الهرم الرئيسي

طبعا الواحد مش هينفع يقول غير حسبي الله ونعم الوكيل في البلد اللى بقت البلطجة فيها عيني عينك في عز الضهر

والواحد بعد كدة ماينفعش انه يمشي بالعربية غير لما يكون معاه اي حاجة تنفعه في المواقف اللى زي كدة !!

بس بصراحة مش مستوعب لحد دلوقتي ؟

حاسس انه لما خبطلي العربية وانا سكت قام مزودها !! ؟

ولا هو فعلا بلطجي ودي تلكيكة عشان يقلبك ؟؟

انتو شايفين ايه ؟ كان المفروض اني اقف واتخانق ؟ ولا التصرف اللى انا اتصرفته ده كويس ؟

والحمد لله على كل شئ

[sakr_skoda]

يادكتور دى عالم تخاف متختشيش لازم تاخد كورس بلطجة وازاى تحمر عينك للبقر دى هو شافك كدا عرف انك لقمة طريه ويسهل ابتلاعها خلى معاك فى العربية ماسورة حديد زى اللى عندى او جزير بس حضرتك دكتور يبقى خلاص مقص كبير وافتحة علية حتلاقيه يعملك الف حساب**

[Hosam_Optrawy]

الحمد لله انها عدت على خير

طبعا انت اتصرفت صح لان الاحتكاك بالعالم دى مش هاينوبك منه غير البهدله وعمرك ماهاتعرف تاخد معاه حق ولا باطل

الحاجه الوحيده اللى أغلطك فيها , انك ماتدتلوش فرصه يعدى وعندت معاه

العالم دى البعد عنها غنيمه سواء ميكروباص ولا توك توك او تاكسى

دا حتى الملاكى ممكن يطلعلك فيها واحد مش تمام

الحمد لله عدت على خير

[moh_rag_abd]

بجد والله بقت حاجة مقرفة جدا
بالنسبة لعندي سواقين العشش بيسوق بطريقة اللي يخاف علي عربيتة يحاسب
بيكون عارف انو راكب صفيحة وكمان مش بتاعته شغال عليها
ولو حصل في مرة وخبط فيك عمرك ما هتاخد منو حق ولا باطل وهتلاقي زميلو اللي علي نفس الخط نزلو معاه (تقريبا بيعشقو البلطجة) وممكن في الاخر كمان ياخد تعويض منك
بجد بقت حاجة تقرف
حسبي الله ونعم الوكيل فيهم

[Mamoud salah H]

للاسف لو كنت نزلت واتخانقت كان هيتعمل علي حضرتك حفلة لان كل سواقين الخط هيجوا يوجبوا مع صاحبهم غير ان حضرتك مكنتش لوحدك انما لو كنت كذا واحد شباب مع بعض كنت هقولك انزل ومنسيبوش غير لما يبوس راسك

[ahmadsapre]

بص يادكتور ا نتا اتصرفت بمنتهى العقل اولا عشان معاك زيملتك ومش هينفع تبهدلك معاك حتى لو اطر انو يبوزلك العربيه انا سعات بتحصل معايا حاجت غريبه
بس لم اكون لوحدى بتصرف مع الاشكال دى بنفس مستواهم
بس لم معايا مراتى اوى اى حد بحاول اكتم غيظى وبكبر دماغى مش خوف ولا ضعف
بس عشان مبهدلش الى معايا خصوصا لو حد يخصنى
وربنا يبعد عنك ولاد الحرام الى على الطريق عشان بئو كتير اوى الاايام دى

[rompo10]

انت صح في اللي عملته والناس دي بتبقي مبرشمه وضايعه اعمل زي بشيل معايا علبه اسبراي اللي هو بتاع العرق اتزنقت خالص انزل ورش في عينه وكمل ضرب بقي هههههههههه

[mohkhattab]

انت اتصرفت صح يا دكتور لان لاسف انت مش هتقدر تنزل لمستواهم
استعوض ربنا وربنا يعوضك عليك فى الخبطة

[Ahmed.Essam]

ارخم حاجة ان واحد زي ده يحس انك في ظروف مش هتعرف تعمل معاه حاجة فيها يعني معاك زميلتك وكسرلك العربية وسكت فساق فيها لو في ظروف تانية كنت انزله وفور دمك جوا جسمك وافتح بطنه وانفجر في وشه ومتستناش تشوف هيقولك ايه اصلا
بس الحمدلله انها عدت علي خير

[ENG.MaRk]

الحمد لله علي سلامة حضرتك و لكن أحب أنصح حضرتك إنك تشيل اليكتريك أو اميريكان استيك و تتعامل مع الأشكال دي بكل بلطجة لأن للأسف في الوقت الحالي مش هينفع غير كدة

[Omar Mahmoud]

الحمدلله انها جت علي قد كدة و ربنا يعوض عليك
انا لو لوحدي وواحد عمل كدة انا هنزل اطلع م***ن امه
و للاسف في مصر لازم نمشي بسلاح دلوقتي

[kokowasfy]

الحمد لله علي سلامة العالم دى مبتفهمش واللة بس انزل زعق فى وشو هتلاقية كش بس لحد معين لم الموضوع قبل ما زميلو يجو يوجبو معاة بس بمجرد ميلقيق مش سهل هيسبك و يبعد عنك ويدور على حد غيرك

[drcobra]

فى حادثة مماثلة برضوا دكتور زميلنا فى المنتدى سواق اتوبيس خبطة قالى باحترام خالى بالك قام حككله الجنب كله

راحوا القسم الظابط قال لزميلنا مفيش فايدة افضل حل تاخد فلوس تمن التصليح ويادوب قدروا يقنعوا البلطجى انه يدفع 200 جنية البلطجى قالهم هاروح اجيب الفلوس وفعلا راح وهو داخل القسم (خالى بالكوا العربية بتاعة الدكتور جوا الفسم )
تصوروا البلطجى المريض دة عمل اية ؟؟؟؟؟؟؟؟؟؟؟؟ظظظ




جرح العربية كلها بمسمار قبل ما يدخل للظابط

تخيلوا رد فعل الظابط؟؟؟؟؟؟؟؟؟؟؟؟





















ولا حاجة يا دكتولر كل اللى هنقدر نعملة اننا نحبسة يوم وبعدين يطلع منها ومفيش حد شافة هههههههههههه

البلد دى فيها حكومة ههههههههههههقوقوقوووووووووووو

شيلاه ياحكومة شيلاة يا قانون

الراجل المحترم الدكتور كويس انه محصلوش حاجة............


كان معكم دكتور زميل والله تعب من القصص المخيفة دى وحصلى حاجة نفسية من فقدان الثقة اه والله

[maheralsisi]

على فكرة حضراتكم ده لا برشام و لا اى حاجة
هم بيبقى ليهم نظرة و شاف حضرتك محترم زيادة عن اللازم فكان عاوز يطلع منك بمصلحة
انما لو انت محترم بس مش قوى و من النوع اللى ممكن تبقى مناخيره بايظة و ما بيعرفش ينطق غير حرف ال خ متواصل ماكانش هايعمل كده مع حضرتك اصلا
النصاب عارف بينصب على مين و البلطجى كمان عارف يبلطج على مين و يلم نفسه امتى و ازاى
انت عملت الصح و اشتريت احترامك و مقامك
لكن نزولك كان هايقل منك لا لشئ الا انك محترم بس بزيادة و كنت هاتتبهدل و هاتزعل اكتر

مش عارف اقول دى نصيحة و لا لا
بس يعنى ما تبقاش محترم قوى فى الزمن ده عشان الناس ما تطمعش فيك

[ah-elgendy]

فعلا منتهى البلطجه وقله الادب بس كويس انك اتصرفت كده وهات صاعق كهرباء انا برود بدور ع واحد اجيبه ومش عارف الاقى حاجه نظيفه