معلومات عن جمارك جديدة للسيارات

[wawoo]

اهلا يا شباب
فى معلومات جديدة عن تخفيضات متوقعة فى جمارك السيارت , و الكلام انها حتكون تخفيضات زى الى حصلت من سنتين كدة و وصلت السيارات ل 40%

التخفيضات الجديدة , المعلومات بتقول انها حتكون 25% بس ,
الحقيقة ليسة المعلومات مش كاملة يعنى اللى فهمتة انها حتنزل من 40 ل 25 % للجمارك دة غير طبعا ضريبة المبيعات او خلافة

و اعتقد دى نسبة واقعية شوية لان الجمارك الحالية عالية جدا بالنسبة لجميع الفئات و غير مناسبة للمستهلك المصرى على الاتطلاق
اتمنى ان الموضوع دة يدخل حيز التنفيذ فى اقرب وقت لان فعلا اسعار السيارات اصبحت نار و غير قادر عليها غير فئة محدودة فى المجتمع , و الحجة القديمة ان الشوارع مش حتستحمل حجة واهية وليس لها اى مبرر

مش معقول انا فى مصر ادفع فى ثمن السيارة اكتر من 30% او اكتر فوق ثمنها عن المستهلك فى اى حتة فى العالم , دة غير منطقى وغير حضارى , مصر دول غير منتجة للسيارت بالكامل و بالرغم من كدة الجمارك مرتفعة جدا عن اى منطقة فى العالم رغم اننا كلنا عرفين متوسط الدخل للفرد كام فى السنة و طبعا شيفين مستوى الموصلات العامة عامل ازى .

[khalid_adel]

طب واخبار ال 2000 سي سي ايه وده حاجه مهمة برضة لو حد يعرف عنه حاجه؟؟؟؟

[معاذ الشرباصى]

مصدر حضرتك ايه للكلام ده؟

لأن كل شوية تطلع اشاعات و الناس تحجم عن الشراء؟

[wawoo]

https://www.arabfinance.com/arabic/News/DefaultDetails.aspx?Id=27273&Type=AFSource

وأبدى تقرير أولي أصدرته شركة بلتون للسمسرة مؤخرا تفاؤلا بشأن خطط الشركة التوسعية غير أنه حذر من تأثير خفض متوقع في التعريفة الجمركية للسيارات المستوردة في المدى المتوسط لاسيما على عمليات تجميع السيارات.

وقال غبور "المعلومات التي نحصل عليها تقول ان التخفيضات الجديدة ستقلص التعريفة الجمركية الى 25 في المئة بما يزيد خمسة في المئة عن مستوى قدرتنا على الاستمرار."[/b]

[Nile Heart]

انا اشك جدآ ان غبور يقول الكلام ده!! لآنه كده بيموت السوق وبيقول للناس ماحدش يشترى دلوقت!

ولو كان قال كده فعلآ, يبقى خبر الجمارك ده هيحصل خلال ايام, وربما ساعات!!!

[جندى مجند]

لو الكلام صحيح (و غالباً صحيح طالما تصريح رسمى من غبور) يبقى غبور كدة لعبها صح ... لم من طرح أسهمه فى البورصة مليار و 110 مليون جنيه و الناس اللى دخلت فى السهم هى اللى حتلبس أى خسائر فى خطوط انتاجه

[wawoo]

انا اشك جدآ ان غبور يقول الكلام ده!! لآنه كده بيموت السوق وبيقول للناس ماحدش يشترى دلوقت!

ولو كان قال كده فعلآ, يبقى خبر الجمارك ده هيحصل خلال ايام, وربما ساعات!!!

حضرتك لو تاخد بالك الكلام دة منشور فى الوب سيت دة بتاريخ واحد يوليو و دة وبس سيت مشهور خاص بالاقتصاد و الكلام دة منشور للمستثمرين يعنى مش الغرض منة نشر الموضوع دة للناس كلها , و لو الكلام دة غير صحيح كان غبور بعديها بساعات كان نشر نفى انة قال الكلام دة ,
دة مش وب سيت للاهرام او الاخبار دة وب سيت اقتصادى مهم و بيتنشر فية الاخبار الاقتصادية المؤكدة و بيتبنى عليها قرارات بالملايين , و لو تاخد بالك مش غبور بس اللى بيقول شركة بلتون كمان بتقول نفس الكلام و دى من اكبر شركات السمسرة و اللى تبتعمل تحليلات و بتاخد قرارات فى ملايين
يعنى انا مش بنقل كلام منشور من اى حتة , انا عارف ان فى اشعات كتير ترددت عن تخفيضات و خلافة و انا مش بصدق معظمها , انما المصدر المرة دى مختلف و مهم عشان كدة حبيت انقل الكلام دة و الكلام واضح زى ما انتو شيفين و اعتقد ان نزول اسهم غبور فى البورصة دة لوحدة دليل على ان فى تغيرات حتحصل لان غبور بقى لة سنتين عاوز ينزل البورصة اشمعنى نزل فى الوقت دة بالذات , دة معناة ان فى تغيارات حتحصل فعلا ولكن المرة دى مش حينفع تكون مفاجئة زى المرة اللى فاتت عشان لازم التجار و المستهلكين يكونو عرفين لان اللحصل قبل كدة دة مكانش مضبوط و ضر ناس كتير لان فى ناس كانت عرفة بالتخفيضات و ناس لاء , طبعا كل واحد حر يقتنع او لاء انا بس حبيت اوصل المعلومة دى لانى حسيت باهميتها , و اذا كان حدة عندة اى تمعلومات بخصوص الموضوع دة اكتر ياريت يفدنا

[Mina W]

كده يبقى البنزين هيغلى

لو الكلام اتحقق هيزيد فى المقابل سرع البنزين، لانهم كانوا بيشتكو من دعم البنزين، و كنت قريت ان زيادة اسعار الجمارك على العربيات علشان يعوضوا دعم البنزين، فبالتالى خفضها يعنى هيزودوا البنزين من الناحية التانية و يبقى اللى نزلوه هنا زودوا هناك
اصلهم امتى رخصوا حاجة كده لله :?:

[abo3bdolrahman]

كلام المهندس مينا ممكن يكون منطقى بس سعر البنزين عندنا غالى مش رخيص نظرا لأننا دولة منتجة للبترول و منتجاته و كمان الجمارك فيها إستهبال كبير يبقى إيه اللى ممكن يحصل !
دى مصر اللى لا يمكن توقع إيه اللى هايحصل فيها أبدا :roll:
و ربنا يكون فى عونا جميعا
:lol: 8) :lol:

[ahmad7610]

فعلا

انا سمعت الكلام ده بيتردد كتير فى اكتر من مكان .
خاصة ان احنا فى بداية سنة مالية جديدة..... وكل شيىء متوقع
-
ال 25 % دى حتحصل حتحصل سواء فى 2007 او فى 2008
و اكيد حيكون معاها تخفيض ال 2000 سىسى .. بس اخر كلام سمعته ان ال2000 حينزل ل 60% ؟؟؟ حد سمع الكلام ده برضه؟؟


-
ببساطة كده لو ده حصل ..
يبقى مثلا اللانسر 1600 بدل 95000 حتبقى ب 75000 :)
والفكترا بدل 160000 حتبقى ب 135000 :)
-

والعربية ال 2000 الى سعرها 450000 حتبقى ب 300000 :) معقول!؟!؟!؟!؟

[ABU HAMZA]

(بس سعر البنزين عندنا غالى مش رخيص نظرا لأننا دولة منتجة للبترول و منتجاته)

مصر بتستورد حصه الشريك الاجنبي بالكامل (حصه الشركات الاجنبيه من البترول المصري حسب الconcession agreement + تستورد بترول من دوله الكويت + تستورد المازوت من السعوديه + جميع الاستكشفات الجديده معظمها غاز و البتروليه منها متوضعه جدا

واضرب لك مثل صغير بشركه بترول في مصر بها مجلس اداره و حقول و ادارات هندسيه و خلافه و قائمه على حقل ينتج 1500 برميل يوميا - بالمقابل شركه بترول العراق بالرغم من التخريب و الحرب تنتج 1.5 مليون برميل يوميا

[Abdallah]

اعتقد ان الى هيحصل هو تخفيض فى نسبة جمارك السيارات ذات السعة الكبيرة ( 2000 سى سى ) ومعتقدش ان ممكن ينزلوا جمارك ال 1600 فما اقل الايام دى خاصة وان الموضوع دة لما حصل فجأة الناس هاجت والغرفة التجارية سعبة سيارات عملت قلق جامد وهم فى غنى عن وجع الدماغ دة كله وايضا معتقدش انهم هيرفعوا سعر البنزين ولكن اعتقد انهم هيرفعوا سعر السولار والديزل والغاز الطبيعى وهذه كلها مجرد اجتهادات تحليلية من جانبى ولا علاقة لها بمصادر او ما شابه والله تعالى اعلم .

[sokasoon]

Re: فعلا

يبقى مثلا اللانسر 1600 بدل 95000 حتبقى ب 75000 :)
والفكترا بدل 160000 حتبقى ب 135000 :)


والعربية ال 2000 الى سعرها 450000 حتبقى ب 300000 :) معقول!؟!؟!؟!؟

• والمتضرر من الموضوع ده اللى اشترى قبل التخفيض
  
  يعنى يبقا شارى مثلا لانسر ب95000 وبعديها بشهرين ولا ثلاثة ولا 6 شهور يلاقى تخفيضات
  
  الجمارك نزلت وباقت العربية ب75000 كده يجيلو سكته قلبية العربية اتخفس بيها الارض
  
  وهتبقا زى ال128 مغرقة الدنيا
  

[sokasoon]

• لو حصل كده ياريت نعرف بدرى شوية
  
  علشان ابيع العربية واشترى عربية جديدة

[sokasoon]

Re: فعلا

حذف لعدم وجود اضافة مجدية.